རས་པ།
གྲོགས་པོ་ཚོས་ནམ་རྒྱུན་བཤད་རྒྱུར
ཡང་གནམ་རྒན་མ་ངུས་སོང་ཟེར
གྲོགས་པོ་ཚོས་ནམ་རྒྱུན་བཤད་རྒྱུར
ལམ་འགྲམ་ཀུན་ཏུ་འདམ་སྙིགས་ཀྱིས་བཀང་འདུག་ཟེར
བདེན་དེ འཇིག་རྟེན་གྱི་སྙིགས་རོ་ཡལ་འགྲོ་དུས
སྐྱོ་གདུང་གི་སྣང་བ་ཅིས་ཀྱང་དགོས་པ་འདྲ
དེ་བས དོ་ནུབ་ཡང་གནམ་རྒན་མ་ངུ་བཞིན་འདུག
མཚམས་མ་ཆད་པར་གཏོང་བའི་མིག་ཆུའི་འབབ་རྒྱུན་ནི
གཉིད་འགུགས་ཀྱི་རོལ་དབྱངས་ཤིག་དང་འདྲ་བར
ལག་ཏུ་བཟུང་བའི་དཔེ་དེབ་ས་ལ་ཡང་ཡང་ལྷུང་ཞིང
ཆར་ཁྲོད་འགྲུལ་བཞུད་པའི་མགྱོགས་འགྲོས་ཀྱང
མྱ་ངན་ཞུ་བར་བྲེལ་སྟབས་ཀྱིས་བགྲོད་པའི་མྱིག་སྔུན་པ་དང་མཚུངས
དོ་ནུབ་བདེ་བ་དང་སྡུག་བསྔལ་གྱི་ཐ་སྙད་ལ་ཁྱད་པར་འདུག་གམ
༢༠༡༤།༧།༢༨དགོང་མོ།
*མྱིག་སྔུན་པ། ངའི་ཕ་ཡུལ་ནས་འདས་པོའི་ནང་མིར་ཐུགས་གསོ་ལ་འགྲོ་དུས་མྱིག་སྔུན་ལ་འགྲོ་ཟེར་ཞིང་།འདིར་མྱིག་སྔུན་ལ་འགྲོ་མཁན་ལ་བདག་སྒྲ་པ་འདི་སྦྱར་བ་ལགས།
ད་ཁྱེད་ཀྱི་སྙན་ངག་གི་བཅུད་དེ་ཤོར་འདུག
མྱིག་ལ་སྟོན་རྒྱུ་བོ། བདག་སྒྲ་པ་དེ་བསམ་ས་བསམ་ལ་སྦྱར་བཞག་ན་གོ་བ་ཞིག་ཡོད་ལ་ཨ།
མྱིག་སྔུན་ལ་བུད།
མྱིག་སྔུན་པ། ཧ་ཧ་ཧ།
མྱིག་གི་རིག་སར་བུད།
མྱིག་གི་རིག་ས་བ། ཧ་ཧ་ཧ། བདག་སྒྲ་བ་ཞིག་སྦྱར་ཡོད་དོ། གོ་བ་ཡོད་མེད་ཀྱི་རྩོད་པ་ཁུར་ཤོག།