ཆང་སྐྱེས།
དོ་ནུབ་ཟླ་བ་དཀར་པོ་སྤྲིན་གྱིས་བསྒྲིབས།།
སྐར་མའི་ཚོགས་རྣམས་ཆར་ཆུའི་ཐིགས་པས་ཟག།
སུན་སྣང་ཁ་དབུགས་སྟུག་པོའི་ཀློང་རུམ་ན།།
མིག་ཆུ་དྲོན་མོ་ཞིག་ཀྱང་ཤོར་ནས་ཐལ།།
འབྲུག་སྒྲ་སང་སིང་རི་བོའི་རྩེ་ནས་མཆེད།།
གློག་དམར་ཀྱ་ཀྱུ་གནམ་སའི་མཚམས་ན་འཁྱུག།
སྒེའུ་ཁུང་ཆག་རོ་ཞིག་གི་འགྲམ་ངོགས་ན།།
སེམས་པ་ཆུང་ཆུང་ཞིག་ཀྱང་འདར་གྱིན་འདུག།
འཚུབ་མ་རླུང་གིས་མུན་པ་བརྟོལ་ཏེ་ལྡང་།།
ལོ་མ་ལྗང་ཁུ་ཕྱི་རོལ་ཁྲོམ་ན་འཕུར།།
སྨུག་ནག་ས་ལ་ལྷུང་བའི་མཚན་མོ་འདིར།།
འཇིགས་སྣང་དམར་པོ་ཞིག་ཀྱང་འགུལ་བཞིན་འདུག།
མིག་ཟུང་ཅེར་རེ་རི་བོའི་རྒྱབ་ལ་བལྟས།།
སེམས་པ་ལག་པས་སྐྱོར་བཞིན་འདང་ཞིག་བརྒྱབ།།
ཆུ་བོ་ཆེན་པོ་ཞིག་གི་ཁུགས་སོ་ན།།
ད་དུང་ཅི་ཞིག་ལུས་པའི་སྣང་བ་ཤར།།
ལོ་དང་ཟླ་བའི་གྲངས་ཀ་མ་ངེས་ཀྱང་།།
འཛུབ་མོ་ནང་ལ་བཀུག་སྟེ་རྩིས་ཤིག་བརྒྱབ།།
བགྲངས་བྱ་བཅུ་ཕྲག་མང་བོའི་ཧྲག་བར་ན།།
རྨ་ཁ་གསར་རྙིང་གཉི་གའི་ན་ཟུག་འདུག།
རས་རྐྱང་སྟན་གྱི་མལ་ཁ་འཁྱག་གིས་བཟུང་།།
སེམས་ཀྱི་དྲོད་ཐིག་ལྷག་མ་ཙག་གིས་བསྡམས།།
སྙན་ངག་ཐན་ཐུན་ཞིག་གི་ཚེག་བར་ན།།
མྱི་རྐྱང་གླེན་པ་ཞིག་ཀྱང་རྒས་ཀྱིན་འདུག།