གཡུ་དྲུག་དཀར། རྡ་ས།
འདི་དང་གན་ཞེས་གླེང་གླེང་བའི་རྔ་བ། དོན་ངོ་མར་ཁྱོད་ཀྱི་ས་ནག་པོའི་ཐོག་ན། རི་མཐོན་པོའི་རྩེ་རུ། ཆུ་གཙང་བོའི་གཞུང་དུ། ཤ་རུས་པའི་གསེང་ན་ཅི་ཞིག་གི་གཏེར་རི་མཐོན་པོ་ཞིག་གི་འགྲེང་གཟུགས་མཐོ་རུ་འཕར་ཡོད་ཨང་། དུས་ད་ལྟ་སྙིང་སྟོབས་ཀྱིས་འབར་གྱིན་རང་ལུས་སྲེག་པར་ཐོགས་པ་མི་མངའ་ཞིང་། མེ་དཔུང་ལིང་ལིང་པའི་ཁྲོད་དུ་རང་སྲོག་འདོར་བར་ཐེ་མི་ཚོམ་པའི་མི་བུ་ཆུང་ཆུང་ཚོའི་དཔའ་གདེང་གིས་ནི། གནའ་སྔ་མོའི་ངའི་སེམས་ནང་གི་རྔ་བའང་མེ་རུ་བཏབས་སོང་།
ཚག་སྒྲ་རྐང་གཅིག་གི་སྣེ་མོ་རུ། དམར་པོ་མེ་དཔུང་གི་སྙིང་སྟོབས་ཀྱིས་ཡོམ་ཡོམ་འགུལ་གྱིན་པའི་རྔ་བ། ད་ནི་འབར་ཆོག་ཆོག་གི་མེ་ཤིང་སྐམ་པོ་དེ་ཡིན་ནམ། སྔོ་ལིང་ལོང་གི་མེ་ལྕེའི་ངོགས་སུ་ཕོ་ཆོག་ཆོག་གི་ས་སྣུམ་རློན་པ་དེ་ཡིན།
ཁྱེད་ཀྱི་གཞུང་ལམ་ཡངས་ཡངས་དང་ཆེ་ཆེ་དེ། དམར་དམག་གི་མེ་མདའི་རྩེ་གྲིའི་བར་བར་ན་གུ་དོག་ཅིང་འཇིག་ཡེར་ཡེར་དུ་བྱས་ཡོད་མོད། ཁྱེད་ཀྱི་དཔའ་སྙིང་རྡོག་རྡོག་དེ་དག་ད་དུང་ཐང་ཡངས་ས་ཞིག་དང་ཞེ་ལྷོད་ས་ཞིག་ཏུ་བགྲོད་ཀྱིན་པ་ལྟར་གཅིག་རྗེས་གཉིས་མཐུད་ཀྱིས་ལྡིང་ནས་མཆོང་ནས་འགྲོ་ཞིང་། རང་གི་རང་དབང་གི་ཀི་སྒྲས་གནམ་ས་ཡོངས་རྫོགས་ཀྱི་ངོ་གདོང་ཚ་བེར་བེར་དུ་བྱེད་ལ། རང་ལུས་གསོན་པོ་དུས་གཏན་དུ་གཟིམ་པ་མེད་པའི་ཚེ་འབར་དུ་སྒྲོན་གཞིན་གདའ།
དུས་དེ་རིང་ཁྱེད་ཀྱི་བྲང་གཞུང་ན་དམར་ལྷབ་ལྷབ་ཀྱིས་མཆེད་ཀྱིན་པའི་མེ་ལྕེ་ཆེན་པོ་དེ་དག ལོ་ཆུང་ཆུང་གི་གྲྭ་བ་ཆུང་ཆུང་རྣམ་པའི་སྙིང་སྟོབས་ཀྱི་དར་ཆ་རེད། ངའི་དད་པ་དག་སྣང་གི་སེམས་དཔའ་ཆེན་པོ་དག་གི་སྙིང་སྟོབས་ཀྱི་ཕྱག་རྒྱའོ།།
ཁོང་ཚོའི་འཕྲིན་ལས་ཀྱི་སྒྱུ་འཕྲུལ་འདི་ཡིས། ང་ཡི་སེམས་པའི་བར་བར་གྱི་བྱང་ཆུབ་སེམས་དཔའ་སེམས་དཔའ་ཟེར་བའི་མག་མོག་གི་ཐ་སྙད་དེ་དག་ཡོངས་སུ་བརླགས་ཤིང་། མངོན་སུམ་གྱི་དང་འཇིག་རྟེན་གྱི་བྱང་ཆུབ་སེམས་དཔའ་སེམས་དཔའ་གཅིག་རྗེས་གཉིས་མཐུད་དུ། ཁྱོད་ཀྱི་དགོན་གྲོང་གང་དུའང་མཇལ་དུ་ཡོད་པར་བགྱིས་སོང་ན།
དམར་པོ་མེ་དཔུང་ཁྲོད་ཀྱི་རྔ་བ། དོན་ངོ་མར་ཁྱོད་ཀྱི་པང་ན་ཅི་ཞིག་མང་ངམ། ཁྱོད་ཀྱི་སེམས་ན་ཅི་ཞིག་ཡོད་དམ། ང་ཡི་རྔ་བ། བོད་ཀྱི་རྔ་བ།།
ཕོ་རྒྱ་སྟོང་གི་རྒོད་ས་མོ་རྒྱ་སྟོང་གི་མཛེས་ས་རྔ་བ་ཁུལ་གྱི་མི་མང་ཡིས་འུ་ཅག་ཁ་བ་གངས་ཅན་པ་ཡི་ཆེད་དུ་ཡོད་ཚད་བློས་བཏང་ཚར་སོང་ད་ཡིན་ན་འུ་་ཅག་ཁ་བ་གངས་ཅན་པ་དག་གིས་གང་བྱེད་ནུས་ཅི་བྱེད་ནུས་སམ། བདག་རང་གིས་ནི་གང་བྱེད་ཀྱི་བྱེད་མེད་པར་ཅི་ཆ་མེད་པར་རེ་ཞིག་དུ་དྲན་མེད་དུ་རྒྱལ་སོང་