རྭ་འཕྲིན། ༼ ཨ་རི ༽
གཅིག དོལ་རྒྱ་མཉམ་འབྲེལ་དེ་གསང་བ་ཞིག་ཡིན་ནམ།
ཉིན་འདི་དག་ལ་དྲ་ལམ་སོ་སོར་སྔོན་མ་དོལ་རྒྱལ་རྗེས་འབྲངས་ཡིན་མཁན་བླ་མ་ཚེ་བཀྲ་རིན་པོ་ཆེ་ཟེར་བ་ཞིག་གིས་དོལ་ཚོགས་དང་རྒྱ་ནག་མཉམ་འབྲེལ་ཡིན་ཚུལ་སྐོར་ལ་གསལ་སྟོན་དང་ཐེར་འདོན་བྱས་ཡོད་པའི་བརྙན་ཐུང་དེ་ཁྱབ་རྒྱ་ཤིན་ཏུ་ཆེན་པོ་འགྲོ་བཞིན་འདུག། དེ་ལ་དོལ་ཚོགས་མི་སྣ་ཁག་ཅིག་གིས་ཀྱང་ལན་འདེབས་ལྟ་བུ་རེའང་སྤེལ་སོང་། ཁོང་ཚོའི་རྒན་མོའི་ཅོ་འཛིང་ལ་དམིགས་བསལ་རྒྱུ་མཚན་ཞིག་ཡོད་པ་མཐོང་མ་སོང་མོད། ང་རང་ཉིད་ལ་མཚོན་ན་སྔོན་མ་ནས་དོལ་རྒྱལ་ཚོགས་པ་ཟེར་བ་འདི་གནད་དོན་མི་ཆུང་བ་ཞིག་ཡིན་པར་ངོས་འཛིན་བྱེད་ཀྱི་ཡོད།
སྤྱིར་བཤད་ན་ཐེངས་འདིར་བླ་མ་ཚེ་བཀྲ་ལ་མཚོན་ན་དངོས་ནས་ཁོ་རང་ཉིད་ཀྱིས་བཤད་པ་ལྟར་མཐར་ཐུག་ན་སོ་སོའི་ཚེ་སྲོག་ལ་ཉེན་ཁ་འཕྲད་སྲིད་པ་ཞིག་རེད་མོད། འཛེམས་ཟོན་མེད་པའི་ཐོག་ནས་ངེས་ཤེས་གསལ་བོ་ཞིག་རྙེད་ཏེ་དོན་དག་འདི་གསལ་སྟོན་དང་ཐེར་འདོན་བྱས་པ་ལ་རྗེས་སུ་ཡི་རང་དང་བསྔགས་བརྗོད་ཡོད།
འོན་ཀྱང་མི་སྒེར་གྱི་གནད་དོན་ཐད་བསམ་བློ་བཏང་ན་ཁོ་རང་ད་ལྟའི་བར་ངོ་གཉིས་མ་ཞིག་གི་ངོ་བོར་གནས་ཡོད་པ་འདིས་བློས་འཁེལ་ཆོག་པའི་མི་ཞིག་མིན་པ་གསལ་སྟོན་བྱས་ཡོད། གང་ལྟར་དོལ་རྒྱལ་དང་རྒྱ་ནག་གཉིས་མཉམ་འབྲེལ་ཡིན་པ་དེ་དང་པོ་ནས་ཚང་མས་ཚོད་དཔགས་བྱས་ན་གསལ་བོ་གསལ་རྐྱང་ཤེས་ཐུབ་ཀྱི་ཡོད་རེད་ལ་ཤེས་ཀྱང་ཡོད་རེད་སྙམ།
བླ་མ་ཚེ་བཀྲས་ཐེངས་འདིའི་གསང་བ་ཕྱི་བཏོན་ལ་བརྟེན་ནས་དོལ་ཚོགས་དང་རྒྱ་ནག་བར་ཀྱི་འབྲེལ་བ་ཅུང་ཇེ་གསལ་དུ་བཏང་བ་ཙམ་རེད། འོ་ན་ད་ལྟ་ང་ཚོའི་ངོས་ནས་བསམ་བློ་གང་ལ་གཏོང་དགོས་ཀྱི་འདུག། ལྟོས་དང་། དོལ་རྒྱ་གཉིས་མཉམ་འབྲེལ་ཟེར་བ་དེ་བདེན་པ་རེད་འདུག་ག་ཟེར་ནས་བསྡད་བསྡད་ན་འགྲིག་གི་ཡོད་དམ།
ཐེངས་འདིའི་གསལ་བཤད་ནང་དུ་ཐད་ཀར་རྒྱ་ནག་དང་འབྲེལ་ལམ་ཡོད་མཁན་དོལ་རྒྱལ་ཚོགས་པའི་མི་སྣ་གལ་ཆེན་ཁག་དང་རྒྱ་ནག་ཕྱོགས་ནས་འབྲེལ་བ་འཛིན་སའི་མི་སྣ་ཁག་ཐེར་འདོན་བྱས་པ་དེ་ཧ་ཅང་ཡག་པོ་རེད་མོད། དེ་དག་ཤེས་པ་ཙམ་གྱིས་དོལ་རྒྱལ་གནད་དོན་འདི་ཐག་ཆོད་པ་ཞིག་ཡོང་དཀའ། མི་ངན་འདི་དག་ཚང་མ་ངོ་ཚ་མེད་པའི་ཁྱི་སྨྱོན་འདྲ་བ་རྐྱང་རྐྱང་ཡིན་ཙང་། དོན་དག་འདི་ཧ་གོ་བ་ཙམ་གྱིས་ཁོང་ཚོའི་ལས་ཀ་སྡུག་ཅག་འདི་དག་མཚམས་འཇོག་གི་མ་རེད།
ཡིན་ན་ཡང་དོན་དག་འདིས་ང་ཚོར་ཉེན་བརྡ་ཞིག་གཏོང་གིན་ཡོད་པ་ནི། གནད་དོན་འདི་ལས་སླ་བོ་ཞིག་མ་ཡིན་པ་དང་འདི་ལ་ཡ་མེད་བྱས་ནས་བཞག་ན་ཕན་ཐོགས་མེད་པ། གནད་དོན་འདི་འཆར་གཞི་ལྡན་པའི་ལྐོག་གཡོ་ངན་པ་ཞིག་ཡིན་པ་དང་རྒྱབ་ལྗོངས་མཐུག་ལ་ཡུན་རིང་བ། ད་ལྟའི་དོལ་རྒྱལ་གདོན་འདྲེ་འདི་དགེ་ལུགས་པ་གཅིག་བུའི་གནད་དོན་ཞིག་མ་ཡིན་པ། ཁོང་ཚོའི་ཁ་གཏད་གཅོག་ས་དང་ངོ་རྒོལ་བྱེད་ས་དེ་བོད་མི་ཡོད་དོ་ཅོག་ཡིན་པ་ལས་༸ གོང་ས་མཆོག་གཅིག་བུ་མ་ཡིན་པ་སོགས་ཉེན་བརྡ་ཁ་ཤས་ཤིག་སྤྲད་ཀྱིན་ཡོད། འདི་དག་ལ་ད་ལྟ་ནས་ཐུགས་བསམ་རྒྱ་ཆེན་གནང་དགོས་པའི་དུས་ལ་སླེབས་ཚར་འདུག་བསམ།
དོལ་རྒྱལ་གནས་ཚུལ་འདི་ཆུང་ཆུང་ནས་ཇེ་ཆེར་འགྲོ་བ་དང་ལྐོག་གྱུར་ནས་མངོན་དུ་འགྱུར་བཞིན་པའི་སྐབས་འདིར་ང་ཚོའི་ཐད་ནས་ཅི་ལྟར་གདོང་ལེན་བྱེད་རྒྱུ་དང་སྔོན་འགོག་བྱེད་དགོས་བ་དེ་ད་ལྟ་ཤུན་ཏུ་ཛ་དྲག་ཆེ་བའི་གནད་དོན་ཞིག་དང་གནས་བབ་ཅིག་ཡིན་སྟབས། ཁོ་བོས་ཀྱང་རང་ཉིད་བོད་པ་ཞིག་ཡིན་པའི་ཆ་ནས་གནད་དོན་འདིའི་སྐོར་ལ་རང་གི་བསམ་ཚུལ་ཅུང་ཙམ་ཞིག་བརྗོད་འདོད་བྱུང་།
རྒྱ་ནག་གསང་བའི་ལས་ཁུངས་ཀྱི་ངོས་ནས་ཉི་མ་གཅིག་ལ་དོལ་རྒྱ་མཉམ་འབྲེལ་གྱི་གསང་བ་འདི་ཕྱི་ལ་ཤོར་འགྲོ་བ་ཤེས་བཞིན་དུ་ལས་ཀ་བྱེད་ཀྱིན་ཡོད་རེད་ལ། དེ་ལ་གྲ་སྒྲིག་ཀྱང་མང་པོ་ཞིག་ཏན་ཏན་བྱེད་བཞིན་ཡོད་རེད་བསམ། དཔེར་ན། དོལ་རྒྱ་གཉིས་མཉམ་འབྲེལ་ཡིན་པ་ཕྱི་གསལ་ནང་གསལ་ཡིན་པའི་ཐོག་ནས་མུ་མཐུད་དུ་ང་ཚོར་རྙོག་དྲ་སློང་གི་རེད། དེ་ལ་ང་ཚོས་ཅི་ལྟར་གདོང་ལེན་བྱ་རྒྱུ་ཡིན།
སྤྱིར་རྒྱ་ནག་གི་ཁྱད་ཆོས་དེ་དོན་དག་ཆེ་མ་ཆུང་གསུམ་གང་ལ་ཐུག་ཀྱང་མ་ཡིན་ཡིན་མདོག་བྱེད་རྒྱུ་དང་མེད་པ་ཡོད་པར་བཤད་ནས་ད་ལྟ་བར་དུ་བསྡད་ཡོད་པས་ཧང་སང་དགོས་པའི་གནས་ཚུལ་ཅི་ཡང་མ་རེད་མོད། ང་ཚོས་ག་དུས་ཡིན་ན་རང་ཉིད་ལ་བདེན་པ་ཡོད། བདེན་པ་ཉིད་རྒྱལ་གྱུར་ཅིག་ཟེར་ནས་བསྡད་པས་ཀྱང་ཅི་ལ་ཕན། བདེན་པ་ཉིད་ཡོད་པ་ཙམ་གྱིས་རྒྱལ་ཁ་ཐོབ་པའི་ངེས་པ་ཅི་ཡང་ཡོད་མ་རེད། བདེན་པ་ཉིད་ཟེར་བ་དེ་རེ་བ་ཞིག་དང་རྒྱབ་བརྟེན་ཙམ་རེད། རྒྱལ་ཁ་ཐོབ་མི་ཐོབ་ཟེར་བ་དེ་ང་ཚོའི་ལག་པར་ཡོད་རེད་ལ། བདེན་པ་ཉིད་འཐབ་རྩོད་པའི་ལག་པ་ལ་ཡོད་རེད། བདེན་པ་ཡོད་པ་ཙམ་གྱིས་རྒྱལ་ཁ་ཐོབ་འགྲོ་ན་འཛམ་གླིང་གོ་ལ་ཟླུམ་པོའི་སྟེང་ལ་འགྲོ་བ་མིའི་རང་དབང་མེད་ས་ཞིག་ཡོད་དོན་མེད་ལ་རང་དབང་རྩོད་ལེན་པ་ཚོས་ཚེ་སྲོག་དང་མི་ཚེ་བློས་བཏང་ནས་རྩོད་དོན་ཡང་ཡོད་མ་རེད། མི་ཞིག་ཡིན་པའི་ཆ་ནས་འགྲོ་བ་མིའི་ཐོབ་ཐང་དགོས་པ་དེ་ལས་བདེན་པ་ཞིག་མེད་དོ། །
གཉིས། དོལ་ཚོགས་ཀྱི་ངོ་རྒོལ་དང་འཁྱོག་བཤད་ལ་ཁ་ཡ་བྱེད་དགོས་སམ།
ང་ཚོ་བོད་པའི་སྤྱི་ཚོགས་ཁྲོད་མང་ཆེ་བའི་བཤད་སྟངས་ཤིག་ལ་སྐྱག་པ་རྡོ་ཡིས་གཞུས་ན་དྲི་མ་ཇེ་ཁ་ཡིན་ཞེས་པ་དེར་དཔེ་བླངས་ནས་མི་མང་པོས་དོལ་རྒྱལ་སྐོར་ལ་ཡ་མེད་བྱས་བཞག་ན་བཟང་རབས་དང་། དོལ་ཚོགས་ལ་དགོས་ཡ་དེ་ང་ཚོའི་ངོས་ནས་ཁོང་ཚོར་གདོང་ལེན་བྱེད་རྒྱུ་དང་ངོ་རྒོལ་བྱེད་རྒྱུ་དེ་རེད་ཅེས། ཅི་ཡང་མ་སྨྲོས་ཅི་ཡང་མ་བྱས་ན་བཟང་རབས་ལུང་པ་གང་བཤད་ཡ་ཡོད། ཡིན་ན་ཡང་ཁོ་བོས་བསམ་ཚུལ་ནི་དེ་ལས་བཟློག་སྟེ། སྐྱག་པ་ལ་རྡོ་ཡིས་གཞུས་ཀྱང་མ་གཞུས་ཀྱང་གང་ལྟར་དྲི་མ་ཁ་བ་ནི་ཏན་ཏན་རེད། དེ་བས་ཐབས་ལམ་ཡག་པོ་ཞིག་གི་ཐོག་ནས་སྐྱག་པ་དེ་མེད་པར་བཟོས་ནས་ཤུལ་གཙང་མ་བྱས་པ་ཡིན་ན་ད་གཟོད་དྲི་མ་ཁ་གི་མ་རེེད་བསམ། བྱས་ཙང་། གལ་ཏེ་ང་ཚོའི་ངོས་ནས་དོལ་ཚོགས་ལ་ཡ་ལན་དང་གདོང་ལེན་ཞིག་ཏག་ཏག་མ་སྤྲད་ན་ཁོང་ཚོར་དགོས་ཡ་དང་ཁོང་ཚོར་ཕན་ཡ་དེ་ག་རང་ཆགས་བསྡད་ཡོད་རེད་བསམ།
སྤྱིར་ཡ་མེད་བྱས་ན་ཕན་མི་ཕན་ཟེར་བ་དེ་ཁོང་ཚོའི་ངོ་རྒོལ་བྱེད་དགོས་པའི་དམིགས་ཡུལ་ལ་རག་ལས་ཡོད། ཁོང་ཚོས་དམིགས་ཡུལ་དེ་རྒྱ་ནག་གཞུང་གི་དམིགས་ཡུལ་དང་གཅིག་པ་ཆགས་བསྡད་ཡོད་ཙང་འདི་ལ་མཐའ་ཡོད་མ་རེད། གལ་ཏེ་ཁོང་ཚོས་དམིགས་ཡུལ་དེ་བོད་པ་ཚོར་མ་བདེ་ཙམ་བཟོ་རྒྱུའི་ཆེད་ཡིན་ན་གཅིག་བྱས་ན་ང་ཚོས་ཀྱང་གནོད་གི་མེད་མདོག་མདོག་བྱས་ནས་ཁ་ཡ་མ་བྱས་ན་ཁོང་ཚོ་ཅུང་ཙམ་མ་བདེ་ཆགས་སྲིད་པ་རེད། ཡིན་ན་ཡང་དངོས་ཡོད་གནས་ཚུལ་ལ་བསམ་བློ་བཏང་ན་དོལ་ཚོགས་ཀྱི་ངོ་རྒོལ་འདི་དག་གིས་ང་ཚོར་གནོད་གི་ཡོད་པ་དེ་ཁོང་ཚོས་གསལ་བོ་དག་པོ་ཧ་གོ་བའི་ཐོག་ནས་ངོ་རྒོལ་དང་ལས་འགུལ་སྤེལ་གིན་ཡོད་པ་དང་། ང་ཚོར་ཡང་ཚད་ངེས་ཅན་ཞིག་གི་ཐོག་ནས་བལྟས་ནས་ཧ་ཅང་གནོད་ཀྱི་ཡོད་པས་གནོད་ཀྱི་མེད་མདོག་མདོག་བྱས་ནས་ཡ་མེད་བཏང་བཞག་ན་ཕན་ཐོག་དེ་ཙམ་མི་འདུག་སྙམ།
ཁོང་ཚོས་ག་དུས་ཡིན་ན་ངོ་རྒོལ་བྱེད་པ་དང་སྐྱག་རྫུན་སྒྲོག་སྤེལ་འདོད་པ་ཚིམ་པ་ཞིག་བྱས་ནས་བུད་འགྲོ་གི་ཡོད་ལ། ང་ཚོ་ཡང་དེ་ལ་བརྟེན་ནས་ག་དུས་ཡིན་ན་དགའ་སྐྱོ་གཉིས་ལྡན་གྱིས་ཚོར་བ་ལྗིད་པོ་ཞིག་ཁུར་ནས་སོ་སོའི་ནང་ལ་ལོག་དགོས་ཐུག་འགྲོ་གི་ཡོད་རེད། དོལ་ཚོགས་ཀྱི་ངོ་རྒོལ་གྱི་རྩ་བའི་དམིགས་ཡུལ་དེ་བོད་པ་ཡོད་དོ་ཅོག་ཡིན་ལ་༸གོང་ས་མཆོག་ལ་མ་ཉེས་ཁག་གཡོགས་བྱེད་རྒྱུ་དང་། མཚན་སྨོད་བྱེད་རྒྱུ་དེ་ཁོང་ཚོས་ཐབས་ལམ་ཆགས་བསྡད་ཡོད་རེད། བྱས་ཙང་ང་ཚོའི་ཐད་ནས་ག་དུས་ཡིན་ན་འདི་ལ་གདོང་ལེན་དང་ཡ་ལན་ཅིག་ཏག་ཏག་སྤྲད་དགོས་པ་རེད་བསམ།
ཡང་ཁག་ཅིག་གི་བཤད་སྟངས་ལ། བོད་པ་ཚོར་ནང་འཁྲུག་སློང་གི་རེད་ཟེར་བ་དང་། ༸གོང་ས་མཆོག་གི་མཚན་སྙན་ལ་རྩ་བ་ཉིད་ནས་གནོད་གི་མ་རེད་ཟེར་ཀྱིན་ཡོད། འདི་བོད་ནང་ཁུལ་ལ་ནང་འཁྲུག་སློང་བ་ཞིག་རྩ་བ་ཉིད་ནས་མ་ཡིན་ཏེ། ང་ཚོའི་རང་དབང་འཐབ་རྩོད་བྱེད་ས་དེ་སྔོན་མ་ནས་རྒྱ་ནག་ཆགས་བསྡད་ཡོད་པར་ངོས་ལེན་ཡོད་ན་ཕལ་ཆེར་དོལ་ཚོགས་དང་ང་ཚོའི་བར་ཀྱི་འཐབ་རྩོད་འདི་ཡང་བོད་ནང་ཁུལ་གྱི་རྩོད་རྙོག་ཅིག་རྩ་བ་ཉིད་ནས་མ་ཡིན་པ་རྟོགས་ཐུབ།
ད་དུང་ང་ཚོ་བོད་པའི་སྤྱི་ཚོགས་ཁྲོད་ནས་དོལ་ཚོགས་སྐོར་ལ་བཤད་སྟངས་འདི་འདྲ་ཞིག་ཡོད་དེ། དོལ་ཚོགས་ཟེར་བ་འདི་མི་ངན་ཁ་ཤས་ཤིག་མ་གཏོགས་ཡོད་མ་རེད། འདི་དག་ལ་ཡ་མ་བྱས་པར་གཡུག་བཞག་ན་ཁོང་ཚོ་ག་ལེར་མེད་པ་ཆགས་གི་རེད་ཟེར་མཁན་ཡོད་མོད། རང་ཉིད་ལ་མཚོན་ན་བཤད་སྟངས་དེར་མོས་མཐུན་བྱེད་ཐུབ་ཀྱི་མེད། རྒྱུ་མཚན་ནི། དོལ་ཚོགས་ལ་དགོས་པ་ནི་དེ་ག་རང་རེད། འདི་ལྟར་བཞག་པ་དེས་ཁོང་ཚོར་སྟོབས་ཤུགས་གསོག་འཇོག་དང་རྒྱ་ནག་ལ་འབྲེལ་བ་བྱེད་རྒྱུའི་གོ་སྐབས་སུ་གྱུར་ཡོད་རེད་ལ་འགྱུར་བཞིན་པ་རེད། གལ་ཏེ་ད་དུང་འདི་ལྟར་བཞག་ན་མ་འོངས་པར་རྒྱ་ནག་དང་མཉམ་འབྲེལ་གྱི་ཐོག་ནས་བོད་སྤྱི་ཡོངས་ལ་གནོད་པ་ཆེན་པོ་ཞིག་གཏོང་རྒྱུ་ཡིན་པ་གཏན་ཁེལ་རེད་བསམ། ཚོད་དཔགས་བྱས་ན་ཕལ་ཆེར་དོལ་ཚོགས་ཀྱི་བསྟན་པ་ཧ་ཅང་དར་དུས་ནི། ༸གོང་ས་མཆོག་ཞལ་མ་བཞུགས་པའི་སྐབས་དེ་ནས་འགོ་རྩོམ་གི་རེད་བསམ།
གང་ལྟར་དེ་དུས་༸གོང་ས་མཆོག་སྐུ་ཕྲེང་བཅོ་ལྔ་བ་སླེབས་ལ་ཉེ་ཡོད་དུས་རྒྱ་ནག་གི་ཕྱོགས་ནས་༸སྐུ་འཕྲེང་བཅོ་ལྔ་པ་ཞིག་ལམ་སང་ངོས་འཛིན་རྒྱུ་ཡིན་པ་དང་། སྐབས་དེར་བོད་ཀྱི་ཉི་ཟླ་གཉིས་ཀ་ཁོང་ཚོར་ཡོད་པ་རེད། དེ་དུས་དག་རྫུན་ལ་ཁ་ཡ་བྱེད་གི་མ་རེད་ལ་དོལ་ཚོགས་ངོས་ནས་ཁ་ཐུག་རྒྱ་ནག་ཕྱོགས་ཀྱི་ཏཱ་ལའི་བླ་མའི་རྗེས་འབྲངས་འགྲོ་གི་རེད་ལ། དེ་འདྲའི་ཏཱ་ལའི་བླ་མ་དེ་དོལ་རྒྱལ་སྟེན་མཁན་ཞིག་ཡིན་པ་སྨྲོས་ཅི་དགོས། གོ་སྐབས་དེ་དོལ་ཚོགས་ཀྱི་ལག་པར་ཤོར་བ་ནས་བཟུང་རྒྱ་ནག་གཞུང་དང་དོལ་ཚོགས་གཉིས་དངོས་སུ་ཕྱི་གསལ་ནང་གསལ་གྱི་ཐོག་ནས་ངོ་བོ་དབྱེར་མེད་ཆགས་ཚར་རེད་ལ། བོད་མང་ཚོགས་ལ་ཇི་ལྟར་དཀའ་ངལ་ཅི་ལྟ་བུ་ཞིག་སྤྲད་རྒྱུ་ཡིན་པ་དེ་ཡང་གསལ་བོ་རེད་བསམ།
དེ་བས་ད་ལྟ་ང་ཚོ་ལ་༸གོང་ས་མཆོག་སྐུ་དངོས་སུ་ཞལ་བཞུགས་དུས་རེད། ཐེངས་འདིའི་༸སྐུའི་གྱ་སྟོན་སྐབས་གནང་བའི་བཀའ་སློབ་ལ་བསམ་བློ་བཏང་ནས་གནད་དོན་འདི་རྒྱུན་རིང་བོར་མ་བཞག་པར་ད་ལྟ་ནས་བོད་མི་ཡོད་དོ་ཅོག་གི་བསམ་བློ་གཅིག་མཐུན་གྱི་ངང་ནས་དོན་དག་འདི་ཆེན་པོ་ཆུང་དུ་བཏང་། ཆུང་ངུ་མེད་པ་གཏོང་རྒྱུ་ནི་ང་ཚོའི་ལམ་ཁ་ཡག་ཤོས་སུ་མཐོང་ངོ་། །
གསུམ། དོལ་ཚོགས་ལ་ཇི་ལྟར་གདོང་ལེན་བྱེད་དགོས་སམ།
བདག་གིས་བཤད་འདོད་པའི་སྐད་ཆ་ཐ་མ་ནི། དོལ་རྒྱལ་རྗེས་འབྲངས་བ་ལ་མུ་བཞི་བཀར་དགོས་པར་སྙམས་ཏེ། རྒྱུ་མཚན་ནི་དོལ་རྒྱལ་བསྟེན་གསོལ་བྱེད་མཁན་ཚང་མ་དོལ་ཚོགས་དང་འབྲེལ་བ་མེད་ལ། དོལ་ཚོགས་ཡིན་ན་དོལ་རྒྱལ་བསྟེན་མཁན་ཞིག་ཀྱང་ཡིན་པའི་ངེས་པ་མེད་པས་སོ། །མུ་བཞི་ནི་འདི་ལྟར།
དོལ་ཚོགས་ཡིན་ལ་དོལ་བསྟེན་ཡང་ཡིན་པའི་མུ།
དོལ་ཚོགས་ཡིན་ལ་དོལ་བསྟེན་མ་ཡིན་པའི་མུ།
དོལ་བསྟེན་ཡིན་ལ་དོལ་ཚོགས་མ་ཡིན་པའི་མུ།
དོལ་བསྟེན་མིན་ལ་དོལ་ཚོགས་ཀྱང་མ་ཡིན་པའི་མུ་སྟེ་བཞིའོ། །
དང་པོ་ནི་དཔེར་ན་མངོན་སུམ་འཛེམས་མེད་དུ་དོལ་རྒྱལ་བསྟེན་གསོལ་བྱེད་མཁན་དང་སྲུང་སྐྱོབས་བྱེད་མཁན་ཡིན་ཟེར་ནས་ཚོགས་པ་སོགས་རྩ་འཛུགས་བྱས་ཏེ་༸གོང་ས་མཆོག་ལ་ངོ་རྒོལ་བྱེད་མཁན་འདི་དག་ལྟ་བུ་བཞག་ན་འོས་པར་སེམས།
གཉིས་པ་ནི། སོ་སོའི་ལྟོ་དོན་དང་ལས་ཀ་སོགས་ཀྱིས་ཆེད་དུ་དོལ་ཚོགས་ལ་ཞབས་ཞུ་དང་རྒྱབ་སྐྱོར་བྱེད་མཁན་ལྟ་བུ། དེ་དག་མང་ཤོས་ཕྱི་གླིང་བ་ཡིན་ཤས་ཆེ་སྙམ།
གསུམ་པ་དེ་སྤྱིར་ན་སོ་སོའི་ཕ་མེས་ནས་བརྒྱུད་དོལ་བསྟེན་ཡིན་པ་གང་ཞིག་ལ་ད་སྐབས་ཀྱང་དོལ་རྒྱལ་བློས་མ་ཐོངས་པར་མུ་མཐུད་དུ་སྟེན་མཁན། འོན་ཀྱང་༸གོང་ས་མཆོག་དང་བོད་མི་རིགས་ལ་རྒྱབ་འགལ་བྱེད་འདོད་མེད་པའི་བོད་པ་ཕལ་བ་དག་ལྟ་བུའོ། །
བཞི་བ་ནི། དཔེར་ན་དོལ་ཚོགས་དང་དོལ་བསྟེན་པའི་མགོ་སྐོར་འོག་ལ་ཚུད་ཏེ་གཡམ་རྒྱུགས་བྱེད་མཁན་ཕྱི་གླིང་བ་དང་བོད་པ་གཞོན་སྐྱེས་དག་ལྟ་བུ་འཇོག་དགོས་བསམ།
འོ་ན་ང་ཚོས་ངོས་ནས་སྤྱིར་དོལ་རྒྱལ་ལ་སྟེན་མཁན་ཞིག་ཡིན་པ་ནས་བཟུང་ཚང་མ་དགྲ་བོར་འཛིན་རྒྱུ་དེ་ནོར་འཁྲུལ་རེད་བསམ། དོན་དངོས་སུ་དང་པོ་དང་གཉིས་པ་ནི་ང་ཚོའི་འཐབ་རྩོད་བྱེད་ཡུལ་གྱི་དམིགས་འབེན་ཆགས་ཡོད་པ་དང་། གསུམ་པ་དང་བཞི་བ་ལ་གསལ་བཤད་དང་གྲོས་བསྡུར་བྱེད་རྒྱུ་ནི་་ཤིན་ཏུ་གལ་ཆེན་པོར་མཐོང་ངོ་། །
གསལ་བོར་ཞུས་ན་དོལ་རྒྱལ་ལ་བསྟེན་པ་ཙམ་གྱིས་ང་ཚོའི་དགྲ་རུ་འཛིན་མི་རུང་ལ་དགྲར་ཆགས་གི་ཡང་མ་རེད། དོལ་བསྟེན་པ་ཡོད་དོ་ཅོག་དོལ་ཚོགས་མིན་ལ། གལ་ཏེ་ཡིན་པར་འཛིན་ན་དོལ་ཚོགས་ལ་དགོས་ཡ་དེ་ག་རང་ཡིན། གང་ཞེ་ན་ཁོང་ཚོར་མཚོན་ན་དོལ་བསྟེན་པ་ཡོངས་སུ་རྫོགས་པ་དོལ་ཚོགས་ནང་ལེན་ཨེ་ཐུབ་འབད་བརྩོན་བྱེད་ཀྱིན་ཡོད་རེད། འོན་ཀྱང་དོལ་བསྟེན་པ་མང་པོ་ཞིག་དོལ་ཚོགས་ནང་ལ་ཞུགས་འདོད་ཡོད་མ་རེད། ཤ་དང་རུས་པ་གཅིག་ནས་མཆེད་པའི་རང་གི་བོད་རིགས་སྤུན་ཟླ་ཡིན་པའི་འདུ་ཤེས་འཛིན་གི་ཡོད་རེད། དོལ་ཚོགས་ལ་འབྲེལ་བ་ཅི་ཡང་མེད་པའི་དོལ་བསྟེན་པ་ཧ་ཅང་མང་པོ་ཡོད་རེད་བསམ་གི་འདུག
བྱས་ཙང་། དོན་དངོས་སུ་དོལ་ཚོགས་ལ་ད་ལྟ་མི་ཉུང་ཤས་ཤིག་མ་གཏོགས་མེད་དུས། རྒྱ་ནག་དང་ཐད་ཀར་འབྲེལ་བ་ཆགས་བསྡད་ཡོད་མཁན་དེ་ཚོ་ཡང་དོལ་ཚོགས་གཅིག་བུ་ཡིན་པ་ལས་དོལ་བསྟེན་པ་ཚང་མ་གཏན་ནས་མ་རེད་བསམ། དེ་འདྲ་ཡིན་དུས་ང་ཚོས་ངོས་ནས་དོལ་ཚོགས་དང་འབྲེལ་བ་མེད་པའི་དོལ་བསྟེན་པ་དག་ལ་གྲོས་མོལ་བྱས་ནས་རིགས་མཐུན་སྤུན་ཟླ་དང་དམིགས་འདུན་གཅིག་པ། དགྲ་བོ་གཅིག་པ་ཡིན་པའི་ཐོག་ནས་མཉམ་རུབ་བྱས་ཏེ་དོལ་ཚོགས་དང་རྒྱ་ནག་ལ་བདེན་པའི་འཐབ་རྩོད་བྱེད་དགོས་ཀྱི་ཡོད་རེད། དེ་ལྟར་བྱུང་ན་ད་གཟོད་ནུས་པ་ཐོན་གི་རེད།
དོལ་ཚོགས་ལ་ཁ་གཏད་གཅོག་མཁན་ཡག་ཤོས་དེ་བོད་པ་དོལ་བསྟེན་པ་ཚོ་ཆགས་བསྡད་ཡོད་རེད། ང་ཚོ་ལས་དོལ་བསྟེན་པའི་ངོས་ནས་དོལ་ཚོགས་ཟེར་བ་འདི་ལྟ་སྲུང་བསྟེན་ཚུལ་ཙམ་མ་ཡིན་པར་ཆབ་སྲིད་ཡིན་པ་དང་རྒྱ་ནག་གི་ལག་ཆར་གྱུར་ཡོད་པ་སོགས་གསལ་བཤད་ཞིག་རྒྱག་ཐུབ་ན་ནུས་པ་ཧ་ཅང་ཆེན་པོ་འབྱུང་ངེས་རེད། དོལ་ཚོགས་ཟེར་བ་འདི་རང་གི་ཁེ་བཟང་དང་གོ་ས་གཅིག་བུར་དམིགས་ནས་ལྷ་སྲུང་དང་བླ་མ། ཐ་ན་རང་གི་མི་རིགས་དང་ཕ་མ་སྤུན་མཆེད་སོགས་ལ་རྒྱབ་འགལ་བྱས་ཏེ་བཙོང་དགོས་ན་བཙོང་ཐུབ་པའི་མི་ངན་རྐྱང་རྐྱང་ཡིན་ཙང་མ་འོངས་པར་དོལ་བསྟེན་པ་ཚོར་ཡང་དཀའ་ངལ་དང་ཆགས་འཇིགས་ཆེན་པོ་ཞིག་ཏན་ཏན་སྤྲད་གི་རེད་སྙམ། དེ་ལས་ད་ལྟ་ནས་བཟུང་ཚང་མ་མཉམ་རུབ་བྱས་ཏེ་དོལ་ཚོགས་དང་རྒྱ་ནག་གི་གཡོ་བྱུས་འདི་ལ་འཐབ་རྩོད་བྱེད་ཐུབ་ན་དགེ་མཚན་ཆེའོ། །
ད་སྐབས་སྤྱི་ཚོགས་ཁྲོད་ན་དོལ་བསྟེན་པ་དང་མཉམ་དུ་ཆོས་དང་ཟང་ཟིང་གི་འབྲེལ་བ་མི་བྱེད་ཞེས་དམ་བཅའ་འཇོག་མཁན་མང་པོ་བྱུང་ཚར་ཡོད་རེད། འདི་དམངས་ཁྲོད་ནས་བྱུང་བའི་སྐད་ཆ་ཞིག་དང་ལས་འགུལ་ཞིག་རེད། འོན་ཀྱང་དོན་དངོས་ཐོག་དང་མིག་གཉིས་བར་གྱི་གདོང་པ་ཞེས་བའི་དཔེ་ལྟར་དྲང་མོར་བཤད་ན། ཆོས་ཀྱི་ཐད་ནས་འབྲེལ་བ་མི་བྱེད་ཟེར་ན་འགྲིག་མདོག་ཁ་བོ་རེད་མོད། ཟང་ཟིང་གི་ལོངས་སྤྱོད་མཉམ་དུ་མི་བྱེད་ཟེར་ཡོང་དུས་ཧ་ཅང་གི་ཐལ་དྲགས་པ་ཞིག་རེད་བསམ། དོལ་ཚོགས་ཡིན་ན་ཆོས་དང་ཟང་ཟིང་གི་ལོངས་མི་སྤྱོད་ཟེར་ན་འགྲིག་ཐག་ཆོད་རེད། ཁོང་ཚོ་བོད་པ་སྤྱི་ལ་རྒྱབ་འགལ་བྱས་ནས་རྒྱ་ནག་གི་རྒྱུགས་ཁྱི་བྱེད་མཁན་ཤ་སྟག་རེད།
འོན་ཀྱང་དོལ་བསྟེན་པ་ཐམས་ཅད་དོལ་ཚོགས་མ་རེད་བ། ཅིའི་ཕྱིར་དུ་ཟང་ཟིང་གི་འབྲེལ་བ་མི་བྱེད། ༸གོང་ས་མཆོག་གིས་དོལ་བསྟེན་པ་ལ་ཆོས་དང་ཟང་ཟིང་གི་འབྲེལ་བ་བྱེད་མི་ཆོག་ཅེས་བཀའ་གསུངས་དེ་འདྲ་གནང་མྱོང་ཡོད་མ་རེད་ལ། མེད་བཞིན་དུ་དོལ་ཚོགས་ནས་དེ་ལྟར་གསུངས་གནང་སོང་ཟེར་ནས་འཁྱོག་བཤད་རྒྱག་གིན་ཡོད་རེད། གལ་ཏེ་ང་ཚོའི་ཐད་ནས་དེ་འདྲ་བྱས་ཡོང་དུས་དོན་གྱིས་དོལ་ཚོགས་ལ་རྒྱབ་སྐྱོར་ཞིག་ཏུ་འགྱུར་མི་འདུག་གམ་རིགས་པས་དཔྱོད་དང་། ཁ་ཆེ་ཕ་ལུའི་སྙིང་གཏམ་བཤད་ཡོད་དོ། །ཉན་དང་མ་ཉན་སོ་སོས་ལག་པ་རེད་ཅེས་གསུངས་པའི་སྐབས་སུ་མ་ཉན་མཁན་ལ་འབྲེལ་བ་གཅོད་དགོས་སོ་ཞེས་གསུངས་མི་འདུག་ག།
གཞན་ཡང་། ལྷ་སྲུང་བསྟེན་ཚུལ་ཁ་ཁ་ཡིན་པ་རྒྱུ་མཚན་དུ་བཞག་ནས་ཆོས་དང་ཟང་ཟིང་གི་འབྲེལ་བ་མི་བྱེད་ཟེར་ཀྱིན་ཡོད་ན། ང་ཚོ་དང་ཤ་ཁྲག་རུས་གསུམ་གང་གི་ཐོག་ནས་འབྲེལ་བ་གང་ཡང་མེད་པའི་ཡེ་ཤུ་བ་དང་ཁ་ཆེ་བ། ཧིན་དུ་སོགས་ཆོས་ལུགས་དང་། གྲུབ་མཐའ། ལྟ་བ་དད་ཡུལ་སོགས་མི་གཅིག་པའི་ཆོས་ལུགས་དང་མི་རིགས་དག་ལ་ཆོས་དང་ཟང་ཟིང་གང་གི་ཐད་ནས་ལོངས་སྤྱོད་ཀྱིན་མི་འདུག་གམ། ད་དུང་རིས་མེད་ཡིན་སྲོལ་དང་བརྩི་བཀུར་མཐོང་ཆེན་ཡིན་དགོས་རབས་ཟེར་གི་ཡོད་མ་རེད་དམ།
དེ་དག་ལ་ཟང་ཟིང་གི་ལོངས་སྤྱད་ནས་རིས་མེད་དང་བརྩི་བཀུར་བྱེད་ཐུབ་ན་རང་གི་ཤ་དང་རུས་པ་གཅིག་ལས་མཆེད་པའི་བོད་མི་ཞིག་ལ་ཅིའི་ཕྱིར་ཟང་ཟིང་གི་འབྲེལ་བ་བྱེད་མི་ཐུབ། ད་ལྟ་ང་ཚོའི་ཐ་ན་དགྲ་རྒྱ་ནག་ལ་གུ་ཡངས་དང་བསམ་ཤེས་བྱས་ཏེ་གྲོས་མོལ་བྱེད་གི་ཡིན་ཟེར་ཀྱིན་ཡོད་རེད། རྒྱ་ནག་ལྟ་བུ་ཞིག་ལ་གུ་ཡངས་གཏོང་ཐུབ་ན་ང་ཚོ་བོད་མི་ནང་ཁུལ་ལ་ཅིའི་ཕྱིར་གུ་ཡངས་གཏོང་མི་ཐུབ། སྤྱི་ཚོགས་ཁྲོད་ནས་དོལ་བསྟེན་པ་ལ་ཆོས་དང་ཟང་ཟིང་གི་ལོངས་མི་སྤྱོད་ཟེར་ན་འདིའི་བོད་སྤྱི་ཡོངས་ལ་གྱོང་ཁེལ་བ་དང་དོལ་ཚོགས་ལ་ཁེ་ཕན་ཆེན་པོར་གྱུར་ཡོད་རེད་སྙམ་མོ། །
གོང་གི་མུ་གསུམ་པ་དང་བཞི་བ་ལ་གྲོས་མོལ་བྱེད་རྒྱུའི་སྐོར་ལ་ཅུང་ཙམ་ཞིག་གླེང་ན། དོན་དངོས་ཐོག་ནས་དོལ་ཚོགས་དང་འབྲེལ་བ་གང་ཡང་མེད་པའི་དོལ་བསྟེན་པ་ཕལ་བ་དག་ལ་མཚོན་ན་ང་ཚོ་དང་མཉམ་འབྲེལ་གི་ཐོག་ནས་དོལ་ཚོགས་དང་རྒྱ་ནག་གི་གཡོ་བྱུས་འདི་ལ་གདོང་ལེན་བྱེད་ཐུབ་ན། ཁོང་ཚོ་ཡང་མ་འོངས་པར་མི་རིགས་དང་ལོ་རྒྱུས་ཀྱི་ཉེས་ཅན་པ་མི་ཆགས་པའི་དགེ་ཕན་ཡོད་རེད། དེ་མ་གཏོགས་ད་སྐབས་དོལ་རྒྱལ་ཚོགས་པས་དོལ་རྒྱལ་ཁ་ལ་ཁྱེར་ནས་རྒྱ་གཞུང་གི་རྐུབ་ལ་བརྒྱུགས་ཏེ་རང་ཤ་ཁྱི་ལ་བྱིན། ཕ་བླ་དགྲ་བོར་སྟེར་གྱི་ཡོད་པ་རེད། དོལ་རྒྱལ་ཚོགས་པའི་ངོས་ནས་རྒྱ་ནག་དང་ཁྱི་སྤྱང་ངན་འབྲེལ་བྱེད་ཆེད་དོལ་རྒྱལ་ཁོ་རང་བེད་སྤྱོད་གཏོང་ཐུབ་ན་དོལ་རྒྱལ་བསྟེན་མཁན་གྱི་མི་བུ་དག་བེད་སྤྱོད་བཏང་ནས་བཙོང་དགོས་ན་ཨ་ཅང་ཅང་མ་རེད་དམ།
ཐུགས་བསམ་ཐོངས་དང་། དེ་དུས་མི་འདོད་བཞིན་དུ་རང་གི་མི་རིགས་དང་། ཕ་མེས། ལོ་རྒྱུས་དང་བཅས་པ་ཐལ་བར་བསྲེགས་པའི་ཁྲེལ་མེད་དུ་གྱུར་ཚར་བ་རེད། དོལ་ཚོགས་དང་རྒྱ་ནག་གི་དམིགས་ཡུལ་དེ་རེད་བ། གྱོང་སུ་ལ་སྤྲད་ཡོད་རེད་བོད་སྤྱི་ལ་སྤྲད་ཡོད་རེད།
བྱས་ཙང་དོལ་ཚོགས་ལ་འབྲེལ་བ་མེད་པའི་དོལ་བསྟེན་པ་ཚོ་དང་དོལ་བསྟེན་མ་ཡིན་པའི་བོད་པ་ཡོངས་རྫོགས་ནས་རང་ཉིད་བོད་པ་ཞིག་ཡིན་པའི་བསམ་བློ་གཅིག་དང་། ང་ཚོ་ཚང་མ་ཤ་རུས་གདུང་རྒྱུད་གཅིག་ལས་མཆེད་པའི་ཕུ་ནུ་མང་སྲིང་ཡིན་པའི་འདུ་ཤེས་དང་གཉིས། ༸སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་དགུང་ལོ་བཅུ་དྲུག་ནས་བརྒྱད་བཅུ་བར་དུ་སྐུ་ངལ་གནང་ཡོད་པ་མ་ཚད། ད་དུང་ང་ཚོའི་ཆེད་དུ་མུ་མཐུད་ནས་སྐུ་ངལ་མྱོང་བཞིན་པ་འདི་ལ་བསམ་བློ་ཞིག་གཏོང་རྒྱུ་དང་གསུམ། ད་སྐབས་བོད་ལ་དཀའ་ཁག་འདི་འདྲའི་ཆེན་པོ་ཞིག་འཕྲད་ཡོད་དུས་རང་ཉིད་བོད་པ་ཞིག་ཡིན་པའི་ཆ་ནས་རང་ལ་གང་ཡོད་པའི་ནུས་པ་ཡོངས་རྫོགས་འདོན་མ་ཐུབ་ན་ཡང་། རང་མི་རིགས་ནང་ཁུལ་ལ་གུ་ཡངས་པོའི་ཐོག་ནས་གཅིག་མཐུན་གྱི་བསམ་བློ་དང་དམིགས་ཡུལ་ངེས་ཅན་ཞིག་བཟུང་སྟེ་རྡོག་རྩ་གཅིག་ཏུ་དྲིལ་ནས་༸གོང་ས་མཆོག་གི་ཡང་དག་པའི་དབུ་ཁྲིད་འོག་འགྲོ་ཐུབ་ན་དགེ་མཚན་ཧ་ཅང་ཆེའོ། །བོད་རྒྱལ་ལོ།
གནད་ལ་འཁེལ་བའི་དགོངས་ཚུལ་རིན་ཐང་ཅན་ཞིག་གསུངས་འདུག བཀའ་དྲིན་ཆེ། རྩོམ་རིང་པོ་འདུག འོན་ཀྱང་ཆ་ཚང་ཞིབ་ཀློག་ཅིག་བྱས་ཚར།
ང་རང་ནི་བོད་པ་ཡིན་ སངས་རྒྱས་དང་ལས་རྒྱུ་འབྲས་ལ་མ་ཏོག་སྲུང་མ་ཟེར་བ་ཚང་མར་ཡིད་ཆེད་མེད་ལ་ དེ་རྣམས་ཡོད་པ་ལའང་ཡིད་ཆེད་མེད་ དེར་རྟེན་སྡོལ་རྒྱལ་གྱི་སྙོགས་དྲ་དེ་ ཞོང་པ་སྟོང་པའི་ཞོང་འཛིངས་མ་གཏོགས་ཆོ་ཡོད་པ་ཞིག་མཐོང་གི་མི་འདུག་ སྲུང་མ་ཡིན་ཟེར་མཁན་ཚང་མས་གང་ཡང་སྲུང་མ་ཐུབ་པར་ད་དུང་༧གོངས་ས་མཆོག་དང་བོད་པ་རྣམས་ལ་མགོ་སྐོར་གཏོང་གྱིན་འདུག་ ད་ཟང་ཟིང་དེ་རྣམས་ཚང་མ་མེད་པ་བཟོས་ནས་སངས་རྒྱས་ཆོས་ལུགས་པ་གཙང་མ་ཞིག་བྱེད་ཐུབ་ན་སྙོགས་དྲ་དེ་མེད་པ་བཟོ་ཐུབ་ཀྱི་རེད་ དེ་ངའི་བསམ་ཚུལ་ཡིན་
དགེ་ལུག་ནང་ཁུལ་གྱི་རྩོད་རྙོག་བོད་པ་སྤྱིའི་སྒང་ལ་མ་གཡུག་རོགས།
ལྷ་འབོད་ཀླུ་འབོད་ཟེར་ནས་སྤྱན་ལོག་བལྟ་བཞིན་གལ་ལ་ཐུག་དུས་བོད་རྒྱུད་ནང་བསྟན་འདི་ལས་ལྷ་འབོད་ཀླུ་འབོད་ཆེ་བའི་ཆོས་ལུགས་ཞིག་ཡོད་བཟོ་མི་འདུག ད་བར་དུ་ལྷ་འབོད་ཀླུ་འབོད་ཀྱིས་མའ་གྲིག་པའི་བཟོ་ཞིག་རེད་འདུག དྷ་སར་བརྟན་བཞུགས་རེ་འབུལ་དུས་གནས་ཆུང་ལས་སོགས་ལྷ་ཀླུ་ཐམས་ཅད་བཞེངས་ནས་མགོ་གཡུག་གཡུག་འདྲ་བྱས་ནས་ཟིང་ཆ་སློང་ནས་ཡོང་གི་འདུག ད་མི་ཤེས་ཆོས་ལུགས་གཞན་པ་ཞིག་གིས་དེ་ལྟར་བྱས་ཚེ་ལྷ་མཆོད་ཀླུ་མཆོད་ཀྱི་ཆོས་ལུགས་ཟེར་ནས་དམོད་གང་ཐུབ་བྱེད་ངེས་རེད།
ནང་པ་སངས་རྒྱས་པའི་གསང་སྔགས་རིག་པའི་ལྷ་དང་སྲུང་མ་བརྟེན་པའི་ལམ་ལུགས་དེ་ལ་དེའི་ལྟ་གྲུབ་ཅིག་ཡོད་རེད། ལྟ་གྲུབ་དེའི་སྟེང་ནས་བལྟས་ན་དོལ་རྒྱལ་ནི་འབྱུང་ཁུངས་དང་། ངོ་བོ། བྱེད་ལས་གང་ཐད་ནས་བསམ་ཀྱང་ལྷ་སྲུང་ཞིག་གི་གྲས་ནས་སྤང་དགོས་པ་དེ་རེད། གནས་ཆུང་སོགས་ནི་བླངས་དགོས་པ་དེ་རེད། དེ་ལྟ་གྲུབ་ཅིག་གཞིར་བཞག་ནས་བཤད་གི་ཡོད་པ་རེད། ཁྱོད་ཚོའི་བསམ་ཚུལ་ན་ཅི་ཞིག་ཡོད་མེད་ཟེར་བ་དེས་ས་རྒྱ་གང་ཡང་ཆོད་གི་མ་རེད། ཆོས་དད་རང་མོས་ཀྱི་སྲིད་ཇུས་སྟེང་ནས་བཤད་ན་རྒྱལ་བ་རིན་པོ་ཆེས་ལྷ་སྲུང་གང་འདྲ་ཞིག་བརྟེན་དང་མི་བརྟེན་གྱི་དབང་ཚད་ཡོད་པ་རེད། ཁོང་གི་སློབ་མ་ཚོ་རྒྱལ་བ་རིན་པོ་ཆེའི་རྗེས་སུ་འབྲངས་བའི་དབང་ཚད་ཀྱང་ཡོད་པ་རེད། ལམ་གང་འདྲ་ཞིག་འདེམས་དང་མི་འདེམས་ཀྱི་དབང་ཆ་དེ་ནམ་ཡིན་ཡང་ཡོད་བསྡད་པ་ཞིག་རེད། སོ་སོས་བདམས་པའི་ལམ་དེས་སོ་སོའི་འདོད་པ་མ་ཁེངས་བ་བྱུང་ན་དེ་རང་རང་གི་བདམ་ཁ་ནོར་བའི་སྐྱོན་རེད་མ་གཏོགས་རྒྱལ་བ་རིན་པོ་ཆེའི་སྒང་ལ་སྡུག་ནན་སྤུངས་ས་ཡོད་པ་མ་རེད།
བཀྲ་ཡེ་ཚང་ལགས་མི་ངན་དེ་ཚོས་དོལ་རྒྱལ་ཁ་ལ་འཁྱེར་ནས་རྒྱ་ནག་གུང་ཁྲན་ཏང་དང་ལག་འབྲེལ་བྱེད་ཀྱི་ཡོད་པས་ད་དུང་དགེ་ལུག་ནང་ཁུལ་རྩོད་རྙོག་རེད་གསུངས་ན་བསམ་བློ་མ་བཏང་བའི་བཀའ་མོལ་ཞིག་མ་རེད་དམ་
ལྷ་དང་སྲུང་མ་བརྟེན་པའིལྟ་གྲུབ་དེ་ཉེ་བའི་བོད་ཀྱི་ལོ་རྒྱུད་ཐོག་ནས་བཤད་ནའང་ཕན་མེད་དང་སྨོངས་འདད་རེད་ ལྟ་གྲུབ་དེ་སངས་རྒྱས་ཆོས་ལུགས་མ་རེད་ གལ་སྲིད་སྲུང་མ་ལ་ཡིད་ཆེད་དང་སྐྱབས་བཅོལ་གྱི་ཡོད་ན་ ལས་རྒྱུ་འབྲས་ལ་ཡིད་ཆེད་མེད་པ་རེད་ དེ་ལྟར་ཡིན་ན་སངས་རྒྱས་ཆོས་ལུགས་པ་མ་རེད་ གསང་སྔགས་ གསང་སྔགས་ཟེར་ནས་སངས་རྒྱས་ཀྱི་གསུང་ལ་མེད་པ་རང་གི་བློ་ལ་ཡོད་པ་ཚང་མ་བྱས་ན་དེས་ང་ཚོ་བོད་པ་དང་ ལྷག་པར་དུ་སངས་རྒྱས་བསྟན་པར་གནོད་ཀྱིན་འདུག་ གོས་ཆེན་རྒྱ་སེའི་སྟོན་གག་ཕུད་པ་ནང་བཞིན་སྲུང་མ་བརྟེན་རྒྱུ་དེའང་ད་ལྟ་རང་ཕུད་ན་བསམ་པའི་རེ་བ་ཡོད་
འདི་ལྷ་ཞིག་རྟེན་མི་རྟེན་གྱི་རྙོག་འདྲ་མ་རེད། དོལ་རྒྱལ་བ་ནི་དེང་སང་རྒྱ་མིའི་དངུལ་ལོར་ཟས་ནས་མི་རིགས་བཙོང་མཁན་གྱི་རྒྱ་ཁྱི་ཞིག་ཆགས་ཚར་བ་རེད། དེས་ན་གནད་དོན་འདི་བོད་སྤྱི་པ་དང་འབྲེལ་བ་མེད་ཟེར་མཁན་ཞིག་ཡོད་ན་ཁོ་རང་སྤྱི་པ་ལ་འགན་མི་ཁུར་མཁན་ཞིག་ཡིན་པའི་རྟགས་མཚན་རེད།
གནས་དོན་དེ་མགོ་ཚུགས་སྐབས་ལྷ་དེ་ཡག་ཉེས་ཀྱི་སྐོར་བཤད་ནས་བྱུང་བ་རེད་པ་ མ་རེད་པས་
རྒྱ་མིས་གོ་སྐབས་ནམ་བྱུང་ལ་ང་ཚོར་གནོད་པ་བྱེད་ཀྱི་རེད་ བོད་སྤྱི་པའི་གནས་དོན་ཡིན་པ་ཤེས་ན་ཡག་པོ་རེད་
དོལ་རྒྱལ་གྱི་སྙོགས་དྲ་དང་དཀའ་ངལ་དེ་བོད་པའི་སྙོགས་དྲ་རེད་མ་གཏོགས་རྒྱ་མིའི་དཀའ་ངལ་མ་རེད་
ཁོང་ཚོའང་བོད་པ་རེད་ལ་ང་ཚོའང་བོད་པ་རེད་ དངོས་གནས་བོད་སྤྱི་པར་བསམ་བློ་གཏོང་མཁན་ཡིན་ན་
ཕྱོགས་རེས་མེད་པའི་ཐོག་ནས་གཤད་དགོས་ཀྱི་རེད་མ་གཏོགས་ ང་རང་ཚོའི་དཀའ་ངལ་དེ་གསེལ་ཐུབ་ཀྱི་མ་རེད་
ཚང་མ་བཀའ་དྲིན་ཆེ་ཞུ། སྤྱིར་ན་འདི་གར་མཆན་བྲིས་ནས་རྩོད་པ་རྒྱག་འདོད་མེད། འོན་ཀྱང་ངའི་རྩ་བའི་ཆ་ནས་གང་བཤད་འདོད་པ་དེ་དོལ་རྒྱལ་ལྷ་ཡིན་མིན་དང་ཁོས་འབྱུང་ཁུངས་ལོ་རྒྱུས། དམ་བསྒྲགས་བྱེད་དགོས་བའི་རྒྱུ་མཚན་སོགས་མིན་ལ། དོལ་རྒྱལ་རྗེས་འབྲངས་བ་ལ་མུ་བཞི་ཞེས་བ་འདི་ཡིན། ལོ་རྒྱུས་དང་འབྱུང་ཁུངས་དེ་ཙམ་གནད་འགག་མ་རེད། ད་ལྟའི་དོལ་ཚོགས་ཀྱི་དམིགས་ཡུལ་དང་མ་འོངས་བ་དེ་ང་ཚོ་བོད་པ་ཡོངས་ནས་དོ་སྣང་བྱེད་དགོས་བ་ཞིག་ཆགས་བསྡད་ཡོད་ལ་ཧ་ཅང་གི་གནད་འགག་ཆེན་པོ་ཞིག་ཀྱང་རེད་སྙམ་མོ།
དོལ་རྒྱལ་ཚོགས་པས་རྒྱ་གཞུང་ལ་འབྲེལ་བ་བཟུང་བ་ངན་དང་། རྡ་ས་ཚོགས་པས་རྒྱ་གཞུང་ལ་འབྲེལ་བ་བཟུང་བ་བཟང་དུ་བརྗོད་ཐུབ་བམ། གཉིས་ཀ་སུ་ཡིན་ཡང་རྒྱ་གཞུང་ལ་མགོ་བཏགས་པ་ནི་འདྲ་འདྲ་རེད་པཱ། བོད་མི་ངོ་མ་ཞིག་ཡིན་ན། ཕྱོགས་གཉིས་ཀའི་བྱ་སྤྱོད་ལ་ཞིབ་བཤེར་བྱེད་དགོས་ཐུག་ཡོད།
ཨ་ཁུ་ནོར་བུ། བསམ་བློ་གཏོང་ནས་སྐད་ཆ་བཤད་རོག གལ་སྲིད་ཁྱེད་རང་གིས་གསུང་པ་ལྟར་ལྷ་ཞེས་པ་དེ་གལ་ཆེན་པོ་མིན་ན་དོལ་རྒྱལ་བས་དྲེག་པ་ཞིག་གི་ཆེད་དུ་ག་རེ་བྱས་ན་ནས་གོང་ས་མཆོག་ལ་རྒོལ་བ་རེད། ག་རེ་བྱས་ནས་བོད་མི་རིགས་བཙོང་བ་རེད། ག་རེ་བྱས་ནས་རང་རིགས་ཀྱི་བླ་མ་དང་དཔོན་པོ་ཚོ་གསད་རྡུང་བྱས་པ་རེད། དོལ་རྒྱལ་གྱི་རྙོག་འདྲ་དེ་བོད་པའི་རྙོག་འདྲ་ཡིན་ཡང་འདིས་ལེན་ཁག་དེ་སུ་ལ་ཡོད་པ་རེད། སུས་བྱ་སྤྱོད་དེ་ཚད་ལས་བརྒལ་བ་རེད། དེ་ཚོ་ཤེས་པའི་ཐོག་ནས་སྐད་ཆ་བཤད་ན་ཡག་པོ་ཡོད་རེད།
ཀར་བློ། དོལ་རྒྱལ་ཚོགས་པས་པད་ཤག་གི་ཆེད་དུ་རྒྱ་གཞུང་ལ་འབྲེལ་བ་བྱས་ནས་བོད་མི་རིགས་བཙོང་བ་དང་། རྡ་ས་ཚོགས་པས་རྒྱ་གཞུང་ལ་འབྲེལ་བ་བྱས་ནས་བོད་མི་རིགས་ལ་རང་སྐྱོང་གི་ཐོབ་ཐང་རྩོད་པ་གཉིས་གོ་ས་གཅིག་ལ་བཞག་སྟངས་འདིའི་སྟེང་ནས་མཐོང་ཐུབ་པ་ནི་ཁྱོད་རང་བཟང་ངན་དབྱེ་འབྱེད་མི་ཤེས་པའི་གླེན་པ་ཡིན་པ་དེ་རེད།
དེང་སྐབས་རྡ་སའི་སྒྲིག་འཛུགས་ཀྱིས་རྒྱ་ནག་གཞུང་དང་འབྲེལ་བ་བྱེད་ས་མ་རག་པ་མ་ཟད། རྒྱ་ཡི་ཁ་ངོ་མ་ལེན་ནས་ལྷག་སྡོད་པའི་སྐབས་འདིར། དོལ་ཚོགས་འདིས་རྒྱ་གཞུང་དང་འབྲེལ་བ་བྱེད་ཡོང་བའི་རྣམ་པ་ཞིག་འདུག། བཙན་བྱོལ་ཚང་ལ་ལྟོས་ན་དེ་འཇོན་པོ་བྱུང་། བཙན་བྱོལ་ཚང་གིས་རྒྱ་ནག་ལ་བློ་གཏོད་བཅོས་པ་ནང་བཞིན་དོལ་ཚོགས་ཀྱིས་ཀྱང་རྒྱ་གཞུང་དང་མཉམ་འབྲེལ་བྱེད་པར་དཀར་ནག་གིས་ཁྱད་པར་འགའ་ཡོད་ཚད་མི་འདུག། དེ་སྔོན་ཆུ་སྒང་གིས་ཐེ་ཝན་བོད་སོག་ལས་ཁང་དང་མཉམ་དུ་གྲོས་ཆད་དེར་རྒྱལ་བ་རིན་པོ་ཆེ་དང་ཟམ་གདོང་ཚང་གིས་བཙན་བཀའ་བཏང་བ་དེ་ཚོ་ཡང་ཡིད་ལ་འཁོར་ཡོང་གི་འདུག། ཧཧཧཧཧཧཧཧཧཧ། བོད་པ་ཚོ། སོ་སོའི་རྣམ་དཔྱོད་བེད་སྤྱོད་ཡག་པོ་གཏོང་དགོས། མི་གཞན་གྱིས་བྲན་དང་གཡོལ་སྒྱུར་འོག་ཏུ་མ་ཚུད་པ་རང་ཚུབ་ཟིན་དགོས། མི་སྣ་གཅིག་གི་ཆེད་དུ་མི་རིགས་ཞིག་དང་ཆོས་ལུགས་ཞིག་གི་ཁེ་དབང་ལ་དོ་ཕོག་གཏང་མི་རུང་། དེས་ལོ་རྒྱུས་ཀྱི་དམག་ཆེན་འགྱུར་རྒྱུ་རེད། དེས་མི་རིགས་ཀྱི་ནང་འཁྲུག་འགྱུར་རྒྱུ་རེད། དེས་མི་དམངས་ཀྱི་སྟོབས་ཤུགས་ཉམས་རྒྱུ་རེད། ངས་བོད་པ་ཚང་ལ་ལུང་སྟོན་ཆུང་ཆུང་ཞིག་ཡོད། ལག་སྲིད་དོལ་ཚོགས་དང་རྒྱ་གཞུང་གཉིས་དབར་ཕྱིར་གསལ་ནང་གསལ་གྱི་མཉམ་འབྲེལ་ཞིག་ཆགས་པ་ཡིན་ན། ཏཱ་ཟམ་གཉིས་ཀྱིས་དོལ་རྒྱལ་ལ་འཛིན་པའི་འདོད་དོན་མི་རྒྱུ་ཁོ་ཐག་རེད།།
ཀརྨ་བློ་གསལ་ལགས་ཁྱེད་རང་མཁྱེན་བཞིན་དུ་མ་མཁྱེན་མདོག་མདོག་གནང་ན་གང་ཡང་ཞུ་རྒྱུ་མེད་་་དེ་མིན་དོལ་ཚོགས་ཀྱི་རྒྱ་གུང་ཁྲན་གྱི་དངུལ་དངོས་ལ་རྔམ་ནས་ང་ཚོའི་སྤྱི་ཚོགས་གཏོར་བཤིག་གཏོང་བའི་ཆེད་དུ་འབྲེལ་བ་བྱེད་ཀྱི་ཡོད་པ་རེད་་་་་་་་་་་་་རྡ་སའི་གཞུང་གི་རྒྱ་བོད་གཉིས་དབར་གྱི་དཀའ་ངལ་དེ་གྲོལ་མོལ་ཐོག་ནས་གསེལ་ཐབས་ཡོང་ཆེད་འབྲེལ་བ་གྱེད་ཀྱི་ཡོད་པ་རེད་་་་་དེ་འདྲ་སོང་ཙང་དེ་གཉིས་བར་ལ་གནམ་སའི་ཁྱད་པར་ཡོད་རེད་་་་་་་
ཧཧཧཧཧཧཧཧ་་་་་གངས་ཕྲུག་མ་རེད་་་་ད་ཡང་སྨྱོ་ཕྲུག་ཞིག་སླེབས་དུག་
གངས་ཕྲུག་ལགས། དོལ་རྒྱལ་ཁ་ལ་འཁྱེར་མཁན་མི་ཉུང་ཤས་ཤིག་ནས་རྒྱ་གཞུང་མི་སྣ་རྣམས་འབྲེལ་བ་བྱ་བཞིན་པ་འདི་དག་ཧང་སང་དགོས་དོན་མིན་འདུག རྒྱ་གཞུང་ནས་བོད་རྒྱ་དཀའ་རྙོག་སེལ་ཆེད་དོལ་ཚོགས་ལ་འབྲེལ་བ་བྱེད་པ་ཞིག་རྩ་བ་ཉིད་ནས་མིན་པ་ཁ་གསལ་རེད། སྐབས་འདིར་རྒྱ་གཞུང་ལ་ཁེ་ཕན་ཡོད་སྟབས་དོལ་ཚོགས་བེད་སྤྱོད་བྱ་བཞིན་པ་རེད། གངས་ཕྲུག་ཁྱེད་ཀྱི་ལུང་བསྟན་ལ་ངེད་ནང་ལན་འཐུང་ཞུ་རྒྱུ། བོད་ཕྱི་ནང་གཉིས་ཀྱི་བོད་རིགས་རྣམས་༧གོང་ས་མཆོག་ལ་བརྩི་བཀུར་དང་དད་པ་ཧ་ཅང་ཆེན་པོ་ཡོད་སྟབས་ཁོང་གི་ལམ་སྟོན་ལ་ཤར་བསྐྱོད་བྱ་རྒྱུ་ཡིན་པ་ཐེ་ཚོམ་མེད། དེ་ལྟར་ན་དོལ་ཚོགས་ཀྱི་གནད་དོན་རིང་མིན་ཇ་ཡལ་བ་ལྟ་བུ་ཡལ་འགྲོ་རྒྱུ་ལས་ཡུན་གནས་མི་ཐུབ་པས་རྒྱ་གཞུང་ལ་དགོས་མཁོ་མེད་པ་ཆགས་རྒྱུ་ཡིན། དེ་མཚམས་རྒྱ་གཞུང་ནས་དོལ་ཚོགས་རྗེས་འབྲང་པ་རྣམས་བྱི་ཕྲུག་ཐང་ལ་ལྷག་པ་ལྟ་བུ་མགོན་མེད་སྐྱབས་མེད་གནས་སྟངས་ཆག་རྒྱུ་ཡིན།
གནོད་འདོན་སེལ་བ་ལ་ཐབས་ལམ་གཅིག་རང་ཡོད་པ་དེ། དེ་ནི་ཞི་གྲོས་བྱེད་རྒྱུ་དེ་རེད། རྒྱ་ནག་ལ་ཞི་གྲོས་བྱེད་ཐུབ་བཞིན་དུ་བོད་པ་ཁ་ཤས་ལ་བྱེད་མི་ཐུབ་རྒྱུ་ཅང་ཨེ་ཡོད། གཙོ་བོ་གཟིགས་རྒྱ་ལ་རག་ལུས་ཡོད་པ་རེད།
ལུང་རྟོགས་ལགས་ ངས་བསམ་བློ་གཏང་ནས་བཤད་པ་ཡིན་ ཁྱེད་རང་གི་ལངས་ཕྱོགས་ལ་ང་མུ་མཐུན་ཡོད་
འོན་ཀྱང་དཔེ་ན་ རང་གི་ལུས་ལ་ནད་ཞིག་ཡོད་ན་ དེ་ལ་ཕན་པའི་སྨན་ཡག་ཤོས་ཞིག་བཟའ་དགོས་པ་ལས་
སྨན་ཤུགས་ཆེ་ཤོས་ཞིག་བཟས་ན་དེས་ཕན་པ་ལས་གནོད་ཆེ་ཡི་རེད་ དེ་ནང་བཞིན་སྙོགས་དྲ་དེ་དང་དཀའ་ངལ་དེ་
ང་ཚོ་བོད་པ་རང་གི་རེད་མ་གཏོགས་ རྒྱ་དཀར་ནག་གཉིས་ཀྱི་མ་རེད་ལ་ གྲྭ་ཆས་གྱོན་པའི་མགོ་གསེར་སྨྱོན་པ་
དེ་ཚོའི་དཀའ་ངལ་མ་རེད་ སྙོགས་དྲ་དེ་གསེལ་དགོས་ན་ དེའི་ལེན་ཁག་སུ་ལ་ཡོད་མེད་བཤད་ན་ཕྱོགས་གཉིས་ཀར་ལ་བཤད་
རྒྱུ་ཡོད་པ་མ་ཟད་ལོ་བཞི་རྒྱ་ལྷག་རྩམ་གྱི་ལོ་རྒྱུད་བཤད་དགོས་བྱེད་ཀྱི་རེད་ བསམ་བློ་ཡག་པོ་གཏང་ན་དེས་ང་ཚོའི་དཀའ་ངལ་དེ་
གསེལ་ཐུབ་ཀྱི་མ་རེད་ད་ ཞོངས་པ་སྟོངས་པའི་ཞོངས་རྫིན་དེ་རྙིང་པ་རེད་།
ཨ་ཁུ་ནོར་བུ་ལགས། དོལ་རྒྱལ་གྱི་དཀའ་རྙོག་འདི་ང་ཚོ་བོད་པ་རང་གི་རེད་ཟེར་ན་ཏག་ཏག་གཅིག་ཨེ་ཡིན། དོལ་ཚོགས་ཀྱི་རྒྱབ་ལ་རྒྱ་གུང་ཕྲན་ཡོད་པའི་རྐྱེན་གྱིས་རྙོག་འདྲ་འདི་ལང་གི་ཡོད་པ་རེད་ལ་དཀའ་ངལ་འདི་སེལ་མི་ཐུབ་པའི་རྒྱུ་མཚན་ཡང་འདི་ལ་ཐུག་ཡོད་པ་རེད། དེ་མེད་ན་ཁོ་ཚོ་གོང་ས་མཆོག་གར་ཕེབས་ས་ལ་སྐད་འབོད་རྒྱག་ཏུ་འགྲོ་བའི་འགྲོ་སོང་སུས་བཏང་གི་རེད། རྙོག་འདྲ་འདི་སེལ་སོང་ན་ཁོ་ཚོ་ལ་རྒྱ་ནག་གཞུང་གིས་མུ་མཐུད་ནས་པད་ཤག་སྤྲད་ཀྱི་རེད་དམ། དཀའ་ངལ་ངོ་མ་དང་རྙོག་འདྲ་སེལ་མི་ཐུབ་པའི་རྩ་བ་འདི་ལ་ཐུག་ཡོད་པ་ལས་དོལ་རྒྱལ་གསོལ་མི་གསོལ་ལ་ཐུག་ཡོད་མ་རེད། ལོ་བཞི་རྒྱ་ཙམ་གྱི་ལོ་རྒྱུས་རྒྱལ་བ་རིན་པོ་ཆེས་ཞེ་ས་མ་ཞུས་ན་ཞལ་ན་ན་གི་བར་དུ་གསུངས་སོང་བས་ད་ནི་གཉིད་ཁུག་སྡད་མཁན་ཞིག་ཡིན་ན་མ་གཏོགས་གསལ་པོ་ཆགས་དགོས་ཚོད་ཡིན།
གངས་ཕྲུག་ཟེར་བ་དེའི་བཤད་སྟངས་ལ་ལྟས་ན་དོལ་ཕྲུག་གཅིག་པ་བཤད་མ་དགོས། ཁོ་ཚོའི་སྐད་ཆ་ལ་བདག་པོ་མ་བརྒྱག་ན་དེ་གས་འགྲིག་གི་རེད།
དོལ་རྒྱལ་འདྲེ་རེད། དོལ་ཚོགས་འདྲེ་དམག་རེད།
ལུང་རྟོག་ལགས། ང་དོལ་ཕྲུག་དང་དོལ་རྒོལ་གང་ཡང་མིན། ཡིན་ངོ་མ་བོད་ཕྲུག་དག་མ་ཞིག་ཡིན། ངས་དོལ་ཚོགས་དང་དོལ་རྒོལ་གཉིས་ཆའི་བྱེད་བབ་ལ་ངོ་རྒོལ་བྱེད་རྒྱུ་ཡིན། རྒྱུ་མཚན་ནི། དེས་བོད་མི་རིགས་དང་བོད་ཀྱི་བླ་མའི་ཆོས་ལུགས་འདི་དག་མེད་བླག་ཏུ་བཟོ་བཞིན་པར་གཅིག་མཚུངས་སུ་ངེས་འཛིན་པས་ཡིན། དོལ་རྒོལ་དང་དོལ་རྒྱལ་གཉིས་ཀས་བླ་སློབ་རང་རང་གི་འདོད་ཕྱོགས་ཙམ་ལས་བསྟན་འགྲོའི་བདེ་སྡུག་ལ་བསམ་ཞིབ་མེད་པར་གཅིག་མཚུངས་རེད། དེ་གཉིས་ཀས་བརྒྱ་བཤད་སྟོང་སྐོར་ཇི་ཙམ་སྨྲས་ཀྱང་བདེན་རྫུན་ཚད་གྲུབ་མེད་པ་ཡང་གཅིག་མཚུངས་རེད། འཛམ་གླིང་ས་ལྒང་འདིའི་སྟེང་དུ་བོད་མི་རིགས་ཀྱི་བླ་ཚོང་གི་ཡོད་པ་ཡང་གཅིག་མཚུངས་རེད། དོལ་རྒོལ་དང་དོལ་ཚོགས་པ་དག་གིས་བོད་མིའི་ནང་དམེ་བཟོ་བཞིན་པ་ཡང་གཅིག་མཚུངས་རེད། མདོར་ན། ཕྱོགས་གཉིས་ཀས་རྣམ་རྟོག་དང་རྟོག་བཏགས་ཙམ་གྱིས་རྒོལ་བ་ནི་གཅིག་མཚུངས་རེད། འོན་ཀྱང་། དེང་སྐབས་དོལ་ཚོགས་དང་རྒྱ་དམར་མཉམ་འབྲེལ་གྱི་ནུས་སྟོབས་དེར་དོལ་རྒོལ་བ་ཚོས་ཀྱང་རག་འདེབས་སྒྲུབ་བཞིན་པ་ནི་ཤིན་ཏུ་ནི་ཡ་མཚན་རེདོ།།
ལུང་རྟོགས་ལགས་ འདི་བོད་པ་རང་གི་སྙོགས་དྲ་དང་དཀའ་ངལ་རེད་ སྙོགས་དྲ་འདི་ང་ཚོས་འཐབ་ཤེས་ཡག་པོ་ཞིག་གི་ཐོག་ནས་གསེལ་མ་ཐུབ་པ་དེ་རྒྱ་མིས་བེད་སྤྱོད་བྱས་པ་རེད་ རྒྱ་མིས་གོ་སྐབས་ནམ་བྱུང་ལ་གང་ཐུབ་སྤྱི་ཐུབ་ཀྱི་ང་ཚོ་ཁ་འཕྲལ་གཏོང་ཐབས་བྱེད་ཀྱི་རེད་ དཔེ་ན་མི་ཚང་ཞིག་ལ་ཕྲུ་གུ་ཁ་ཤས་ཡོད་པའི་ནང་ནས་གཅིག་གིས་ཁ་ལ་མ་ཉན་པ་དང་སྤྱོད་པ་ལོག་ན་ཕྲུ་གུ་ནང་ནས་ཕུད་པ་ཡིན་ན་ ཕྲུ་གུ་དེས་ཕྱི་ལ་སྐད་རྒྱབ་ཀྱི་རེད་ལ་ཁོང་རང་འགྲོ་ས་ཞིག་དང་བསྡོད་ས་ཞིག་འཚལ་དགོས་ཀྱི་རེད་ དེ་དུས་མི་ཚང་དེར་འགྲར་འཛིན་མཁན་གྱི་མི་ཚང་གཞན་ཞིག་གིས་ཕྲུ་གུ་དེ་བེད་སྤྱོད་བྱས་ནས་གནོད་པ་སྐྱལ་སྲིད་ཀྱི་རེད་ དེ་དང་གཅིག་པ་རེད་ ཁོང་ཚོ་ང་ཚོ་བོད་པའི་སྤྱི་ཚོགས་ནས་ཕུད་པ་དེ་རྒྱ་མིས་བེད་སྤྱོད་བྱས་པ་རེད་་ སྡོལ་རྒྱལ་ཚོགས་མི་བོད་པ་ཚོས་༧གོངས་ས་མཆོག་ལ་མཚན་སྨད་ཞུ་པ་དེས་བོད་སྤྱི་ལ་གནོད་ཀྱི་ཡོད་ལ་ཁོང་རང་ཚོ་ལའང་གནོད་ཀྱི་ཡོད་པ་དེ་ཁོང་ཚོས་ཤེས་དགོས་ མགོ་སེར་རྣམས་ནི་སྨྱོན་པ་ཡིན་པས་གང་ལྟར་སྐད་རྒྱབ་ཀྱི་ཡིན་པས་ང་ཚོར་ཁྱད་པར་མིན་འདུག་།
རྭ་འཕྲིན་ལགས་ཀྱི་དོལ་རྒྱལ་སྐོར་གྱི་རྩོམ་ཡིག་་ཐེངས་གཅིག་ཞིབ་ཀློག་བྱེད་དུས་དངོས་གནས་བྲོ་བ་ཆེན་པོ་བྱུང་པས་ཐུགས་རྗེ་ཆེ་ཞུ།
དོལ་རྒྱལ་གྱི་གནད་དོན་འདི་ཆུང་ཆུང་ཞིག་གཏན་ནས་མིན་པར་སྔ་ས་ནས་མེད་པར་བཟོ་རྒྱུ་གལ་ཆེན་ནང་ནས་འགངས་ཆེན་ཡིན་སྟབས། བོད་མི་མི་རེ་ངོ་རེ་ནས་དོལ་རྒྱལ་རྗེས་འབྲངས་པ་ཚོའི་བྱེད་སྟངས་དང་གནས་ལུགས། དམིགས་ཡུལ་གང་ཡིན་སྐོར་གྱི་དངོས་ཡོད་གནས་ཚུལ་རྒྱལ་སྤྱིའི་གསར་འགྱུར་བརྒྱུད་ལམ་ཁག་དང་སྤྱི་ཚོགས་དྲ་ཚིགས་སོགས་བརྒྱུད་ནས་སྔར་ལྷག་མུ་མཐུད་སྤེལ་དགོས།
ཉེ་ལམ་བླ་མ་ཚེ་བཀྲ་ཟེར་བ་ཞིག་གིས་དོལ་རྒྱ་གཉིས་ལག་སྤྲེལ་ཡིན་པ་དང་རྒྱ་གཞུང་གིས་དོལ་ཚོགས་ལ་དངུལ་སྤྲོད་པ། རྒྱ་ནག་གསང་ལས་ཁུངས་ཀྱིས་ངན་ཇུས་འོག་དོལ་རྒྱལ་གྱིས་༸གོང་ས་མཆོག་གི་སྐུ་ཕྱྭ་ལ་ཉེན་ཁ་བཟོ་འཆར་ཡོད་ཚུལ་བཤད་པར་ཡིད་རངས་ཡོད། འོན་ཀྱང་། ཁོས་༡༩༩༧ ནས་༢༠༠༨ ལོའི་བར་དོལ་ཚོགས་ཀྱི་ཚོགས་གཙོའི་མིང་འཁུར་ནས་རྒྱ་ནག་ནང་ཡང་ཡང་ལྟ་སྐོར་སོང་སྟེ། བོད་ཀྱི་ཡུལ་ཁམས་ཁག་ཅིག་ཏུ་དོལ་རྒྱལ་དར་སྤེལ་དང་། ཕྱི་རྒྱལ་རང་དབང་ལུང་པའི་ནང་དོལ་ཚོགས་ཀྱི་ཡན་ལག་ཚོགས་པ་བཙུགས་པ་སོགས་ཀྱི་ལས་ཀ་བྱས་ཡོད་སྟབས། གང་ལྟར་དགའ་མ་དགའ་ཟེར་ན་མི་ཤེས་ཀྱང་ཁོ་ངོ་གཉིས་མ་ཡིན་པས་བློས་འགེལ་ཡིད་ཆེས་མེད།དེར་བརྟེན།བདེ་སྲུང་ལས་ཁུངས་དང་འབྲེལ་ཡོད་ལས་བྱེད་ཚོས་ཁོ་ལ་གང་གཟབ་གནང་དགོས། ཁོ་རང་གིས་༢༠༠༨་ལོར་ནས་བཟུང་དོལ་རྒྱལ་ཚོགས་པ་དང་འབྲེལ་བ་མེད་ཚུལ་དང་དོལ་རྒྱལ་སྤངས་ཡོད་ཚུལ་བརྗོད་ཀྱང་། ཁོས་ལོ་ལྔ་དྲུག་རྗེས་ནས་དོལ་རྒྱལ་ཚོགས་པའི་གསང་བ་བཤད་དགོས་དོན་ག་རེ་ཡིན་ནམ། སྡུག་ས་བཤད་ན་གོང་གི་ལོ་དེ་དག་ནང་དོལ་ཚོགས་པས་༸གོང་ས་མཆོག་གི་སྐུ་ཕྱྭ་ལ་གནོད་པ་ཡོད་བྱུང་ཚེ། ཁོས་རྒྱ་ནག་ལ་འཇོན་ཐང་བསྟན་ཡོད་མདོག་མདོག་བྱས་ནས་དམར་ཤོག་བྱ་དགའ་བླངས་ཡོད་ཀྱི་རེད། ད་ལོར་ས་བསྒྲགས་གནམ་བསྒྲགས་བྱས་དོགས་གཞི་ཡིན།
དེ་ཙམ་ཡིན།
༸རྒྱལ་བའི་སྐུ་ཚེ་ཡུན་རིང་བརྟན་པ་དང་།
༸རྒྱལ་བའི་མཛད་འཕྲིན་ཉིན་ལྟར་རྒྱས་པར་ཤོག།
ཨ་ཁུ་ནོར་བུ་ལགས། ཁྱེད་རང་གི་སྐད་ཆ་དེ་གནས་ཚུལ་ཡག་པོ་མགོ་མ་འཚོས་པའི་སྐད་ཆ་རེད་འདུག དོལ་རྒྱལ་བ་བོད་པའི་སྤྱི་ཚོགས་ནས་ཕུད་པ་རེད་ཟེར་བ་དེ་བདེན་པ་རྩ་བ་ནས་མ་རེད། སྤྱིར་གོང་ས་མཆོག་གིས་ཆོས་རྒྱུད་བར་ལ་མཐུན་སྒྲིལ་དང་དམ་ཚིག་འོ་ཆུ་གཅིག་འདྲེས་ཡོང་ཆེད་དོལ་རྒྱལ་རྟེན་གསོལ་ལ་དམ་བསྒྲགས་གནང་བ་རེད། ཡིན་ན་ཡང་སྒེར་སོ་སོས་རྟེན་མ་རྟེན་རང་དབང་སྤྲད་ཡོད་པ་ལས་རྩ་བ་ནས་རྟེན་མི་ཆོག་ཞེས་གསུང་མེད། རྟེན་མཁན་ཡིན་ན་ཁོང་གི་མདུན་ནས་དབང་དང་ཆོས་ཞུ་རུ་མ་ཡོང་གསུངས་པ་ནི་ཆོས་ཀྱི་དམ་ཚིག་ལ་དགོངས་ནས་གསུངས་པ་ཡིན་པ་ཁྱོས་ཀྱང་ཤེས་རྒྱུ་རེད། དེ་མིན་བོད་གཞུང་གི་ངོས་ནས་དོལ་རྒྱལ་བ་ལ་བཙན་བྱོལ་བོད་མིའི་ཐོབ་ཐང་ཆ་ཚང་འདྲ་མཉམ་གནང་ཡོད་པ་ལས་དབྱེ་འབྱེད་གནང་མེད་པ་གསལ་པོ་རེད། ཁོ་ཚོ་ཨ་རི་དང་ཡུ་རོབ་སོགས་ལ་སྐྱབས་གཅོལ་བའི་མིང་ཐོག་ནས་སོང་བ་རེད་ལ་འདི་ལ་བཙན་བྱོལ་གཞུང་གིས་རྒྱབ་སྐྱོར་འོག་ནས་པ་སི་སེར་པོ་རག་ཡོད་པ་ཚང་མས་ཤེས་གསལ་རེད། ཁོ་ཚོ་བོད་མི་མང་གིས་མ་དགའ་བ་ཤུགས་ཆེན་པོ་བྱེད་ཀྱི་ཡོད་པ་འདི་ནི་ཁོ་རང་ཚོའི་བྱ་སྤྱོད་ལ་ཐུག་ཡོད་པ་རེད། ཁོ་ཚོས་ལྷ་མི་སྲུང་སྐྱོབས་ཚོགས་པ་ཟེར་བ་བཙུགས་ནས་མཚན་ཉིད་སློབ་དཔོན་སྐུ་བཀྲོངས་པ་མ་ཟད་ལྷོ་ཕྱོགས་གཞིས་འགོ་སོགས་རང་རིགས་མང་པོར་བཅར་རྡུང་དང་འཇིགས་སྐུལ། དེ་བཞིན་རྒྱ་ནག་གཞུང་ལ་འབྲེལ་བ་བཙུགས་ནས་གོང་ས་མཆོག་དང་བོད་མིའི་སྒྲིགས་འཛུག་ལ་ངོ་རྒོལ་སྐྱོན་བརྗོད་དང་བོད་ཀྱི་ཆེད་དུ་ལས་ཀ་བྱེད་མཁན་ཚོར་གཞི་མེད་སྐུར་འདེབས་ཁོ་ན་བྱེད་ཀྱི་ཡོད་དུས། སངས་རྒྱས་བྱང་སམས་འདྲ་ཡིན་ན་མ་གཏོགས་མི་ཕལ་པ་བཟོད་སྒོམས་བྱེད་ཐུབ་ཐབས་མེད་པའི་གནས་སྟངས་འདི་ཆགས་པ་རེད།
སེམས་ཁྲལ་དགོས་མིན་འདུག ཨ་རིའི་གཞུང་གིས་དོལ་རྒྱལ་ཚོགས་པའི་མགོ་པ་དེ་ཚོར་དོ་སྣང་བསླེབས་ཟིན་འདུག
དེ་བཞིན་ལི་ཐར་ཨ་དར་ཟེར་བ་འདི་དོལ་ཚོགས་ཀྱི་མགོ་པ་གཞན་པ་ཚོ་དང་མ་འགྲིགས་པར་ནང་འཁྲུག་ཆེན་པོ་ཞིག་གྲ་སྒྲིག་བྱེད་བཞིན་འདུག ཟླ་བ་གཅིག་ཙམ་སྒུག་ཨ། མི་གསོད་ཁྲག་སྦྱོར་ཡོང་རྒྱུ་ཉག་གཅིག་རེད།
གངས་ཕྲུག དོལ་ཚོགས་དང་དོལ་རྒོལ་གཉིས་གཅིག་མཚུང་ཡིན་ན་གསེར་དང་བོང་གཉིས་ཀྱང་གཅིག་མཚུངས་ཡིན་ངེས། བོད་མི་རིགས་དང་བོད་ཀྱི་ནང་ཆོས་མེད་བརླག་བཟོ་མཁན་ནི་དོལ་རྒྱལ་བ་ཚོ་རེད། ཁོ་ཚོས་བླ་མ་དང་ཡི་དམ་ལས་དྲེག་པ་དོལ་རྒྱལ་ལ་གལ་ཆེར་རྩིས་ཡི་ཡོད་པས་ནང་ཆོས་ཀྱི་དམངས་རྡོ་ལྟ་བུའི་སྐྱབས་འགྲོའི་བསླབ་བྱ་དང་འགལ་ཡོད་པས་ནང་ཆོས་མེད་པ་བཟོ་བཞིན་ཡོད་པ་རེད། ཁོ་ཚོས་དགྲ་བོ་རྒྱ་དམར་ལ་མགོ་འབུལ་ལུས་འབུལ་བྱས་ནས་བོད་མི་རིགས་ཀྱི་བདེ་སྡུག་པད་ཤག་དང་བརྗེ་བཞིན་ཡོད་པས་བོད་མི་རིགས་མེད་པ་བཟོ་ཡི་ཡོད་པ་རེད། རྒྱལ་བ་རིན་པོ་ཆེས་བོད་ཀྱི་ཆོས་རྒྱུད་བར་ལ་མཐུན་སྒྲིལ་དང་དམ་ཚིག་འོ་ཆུ་གཅིག་འདྲེས་ཡོང་ཆེད་དོལ་རྒྱལ་དམ་བསྒྲགས་གནང་བ་དང་། དོལ་རྒྱལ་བས་དྲེག་པ་དོལ་རྒྱལ་ལ་མགོ་འབུལ་ལུས་འབུལ་གྱིས་ཆོས་དང་།ི་རིགས་ཚང་མ་བློས་བཏང་བ་གཉིས་བསྟན་འགྲོའི་བདེ་སྡུག་ལ་བསམ་བཞིག་མེད་པ་གཅིག་མཚུངས་རེད་ཟེར་ན་ལབ་པ་པོ་རང་ཉིད་རྩ་ཚང་མེད་པའི་རྟགས་རེད། དོལ་རའགོལ་བ་ཚོས་དོལ་རྒྱལ་གྱི་རྒྱུ་དང་ངོ་བོ་བྱེད་ལས་སོགས་གསལ་པོ་གསལ་རྐྱང་འབྲེལ་བཤད་རྒྱག་གི་ཡོད་པ་མ་ཟད། བསྟན་འཛིན་གྱི་སྐྱེས་ཆེན་དམ་པ་ཚད་ཐུབ་མང་པོས་དམ་བསྒྲགས་གནང་བའི་ལོ་རྒྱུས་ཁུང་ཐུབ་ཀྱི་བདེན་སྤང་སྟོན་ནས་འབྲེལ་བཤད་རྒྱག་རྒྱུ་ཡོད་པ་དང་། དོལ་རྒྱལ་བས་ལྐུགས་པ་ཨུ་ཚུགས་ཀྱིས་དོལ་རྒྱལ་ཁ་ལ་ཁྱེར་ནས་རྫུན་གཏམ་བསྒྲོགས་པ་གཉིས་ལ་ཚད་མ་ཡིན་མིན་གྱི་ཁྱད་པར་མི་འདུག་ཟེར་ན་ཁྱེད་རང་གིས་ཚད་མའི་རིག་པ་ཅང་ཤེས་ཀྱི་མེད་པའི་རྟགས་མཚན་གསལ་པོ་རེད། དོལ་རྒྱལ་བས་དངུལ་དངོས་ཀྱི་ཆེད་དུ་མི་རིགས་བཙོང་བ་དང་དོལ་རྒོལ་བས་ཁོ་ཚོ་ལོག་ལམ་ལས་ལྡོག་ཆེད་ངོ་རྒོལ་བྱས་པ་གཉིས་བོད་མི་རིགས་ཀྱི་བླ་བཙོང་བ་གཅིག་པ་ཡིན་ན་རོ་བརྒྱ་ལྡན་པའི་ཞལ་ཟས་དང་དྲི་ངན་ཁ་བའི་སྐྱག་པ་གཉིས་ཀྱང་གཅིག་པར་ཅི་ལ་མི་འགྱུར། རྣམ་རྟོག་གི་སྒྲོ་བཏག་རེད་ཟེར་བ་ནི་ཁྱོད་རང་གི་འདོད་ཕྱོགས་ཙམ་ལས་རྒྱུ་མཚན་གང་ཡང་མེད་པ་རེད། ཁྱོད་ཚོས་ལྷ་འདྲེ་མེད་པ་སྒྲུབ་ཐུབ་ཀྱི་མ་རེད་ལ་དེ་མ་ཐུབ་ན་དེ་ཚོས་ཕན་གནོད་མེད་པ་ཡང་སྒྲུབ་ཐུབ་ཀྱི་མ་རེད། དོལ་རྒོལ་བ་ཚོས་དོལ་རྒྱལ་བའི་ངན་འཚར་ཕྱིར་སྟོན་ནས་ཁོ་ཚོའི་རྒྱ་དམར་དང་མཉམ་འབྲེལ་གྱི་ནུས་ཤུགས་ལ་ངོ་རྒོལ་དང་རྩ་མེད་བཟོ་ཐབས་བྱེད་ཀྱི་ཡོད་པ་ལས་རམ་འདེགས་ཟེར་བ་ཞིག་སྒྲུབ་ཀྱི་མེད།
དོལ་རྒྱལ་བརྟེན་མཁན་དང་དེ་མ་བརྟོན་་མཁན་དབར་ཁ་དང་ཁའི་སྤུ་དབྱེ་མཚམས་དང་ཆོས་དང་ཟང་ཟིང་གི་འབྲེལ་བ་མེད་པ་བཟོ་དགོས་གསུངས་མཁན་དེ་སུ་རེད། ཧཧཧཧཧ། དེ་དག་ཚང་མ་དྲ་རྒྱ་དང་གསར་ལམ་ཁག་ཏུ་གསོན་པོ་གནས་ཡོད་རེད། ལུང་རྟོག་སོགས་སྐབས་འཚོལ་ནང་རུལ་བ་ཁྱེད་ཚོའི་སྐད་ཆ་ལ་ཟིན་ས་དང་གཞི་འཛིན་ས་ཞིག་མེད་པ་ང་ཚོས་སྔ་ས་ནས་ཤེས་ཀྱི་ཡོད། སྤོང་རྟགས་ཁུངས་ལུངས་ཡོད་ན་མི་གསོད་ལག་དམར་གྱི་དོན་རྐྱེན་དེ་ཚོ་ཡུལ་ཁྲིམས་ལ་སྐྱེལ་དགོས་རེད། སྟོང་ལབ་རྐྱང་རྐྱང་གིས་འུར་གཏམ་དེས་ཕན་ནི་མ་རེད། མཚན་ཉིད་རྒན་བློ་རྒྱ་བསད་མཁན་དོལ་ཚོགས་ཡིན་པར་ཁྱེད་ཚོས་རྒྱ་གར་གྱི་ཁྲིམས་སར་དག་འཕུད་བྱས་མ་ཐུབ་པ་རེད་དང་། དོལ་ཚོགས་རྒྱ་གར་གྱི་རྒྱལ་སར་ཁྲིམས་མཐུན་གྱི་གནས་ཡོད་རེད། གལ་སྲིད་ཁྱེད་ཚོར་བདེན་སྤོང་དང་ཁ་གདིང་ཡོད་ན་མི་དམངས་གཅོས་མ་རྣམས་བེད་སྤྱོད་ནས་ནང་དམེ་རྐྱང་རྐྱང་བཟོ་མ་སྡོད་པ་དཀར་ནག་དང་བདེན་རྫུས་དབྱེ་རྒྱུར་རྒྱལ་ཁབ་སོ་སོའི་ཁྲིམས་སར་ཆུབ་མི་ཉན་ཡ།
གངས་ཕྲུག ཁ་དང་ཁ་སྤུ་དབྱེ་འབྱེད་དང་ཆོས་དང་ཟང་ཟིང་གི་འབྲེལ་བ་བཅད་དགོས་པ་དེ་སུས་བཟོས་པ་རེད་དོལ་ཚོགས་ཀྱི་བཟོས་པ་རེད། ཁོ་ཚོས་རྒྱ་གཞུང་དང་འབྲེལ་བ་བྱས་ནས་བོད་ཀྱི་ཕ་ཆུས་གནམ་ལྕགས་རག་གྲི་དེ་ལྟོག་ནས་དངུལ་དང་རྗེས་པས་མ་ཟད། བོད་མི་ཡོངས་ཀྱི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་གོང་ས་སྐྱབས་མགོན་ཆེན་པོ་མཆོག་གི་སྐུ་ཕྱ་ལ་ཡང་ཉེན་ཁ་བཟོས་པའི་རྐྱེན་གྱི་དེ་འདྲ་མི་བཟོ་ཀ་མེད་བྱུང་བ་རེད། དཔེར་ན་ཁྱོད་རང་གི་སྤན་མཆེད་ཀྱིས་ཁྱོད་རང་གསད་རྩིས་བྱས་ན་ཁྱོད་རང་ཁོ་དང་འབྲེལ་བ་མ་བཅད་པར་སྡོད་ནུས་པ་འདུག་གམ། སྐད་ཆ་སོམས་ནས་ཤོད། རྩམ་པ་ལྡད་ནས་མིགས། ནང་རུལ་བ་ངོ་མ་རྟག་པར་དགྲ་བོ་རྒྱ་དམར་ལ་ཚིག་གཅིག་བཤད་ནི་ནུས་པར་མདུང་སོ་ནང་ཕུ་ནུས་སྟེང་ལ་སྐོར་མཁན་ཁྱོད་ཚོ་རེད། མཚན་ཉིད་དགེན་བཀྲོངས་མཁན་དོལ་རྒྱལ་གསོལ་མཁན་སེར་སྨད་སྤོམ་ར་ཁང་ཚན་གྱི་གྲྭ་པ་དྲུག་ཡིན་པ་རྒྱ་གར་ཉེན་རྟོག་པས་དཔང་རྟགས་ཁུང་སྐྱེལ་བྱས་ཡོད་པ་རེད་ལ། ཁོ་ཚོའི་པར་དང་མིང་ཕ་ཡུལ་བཅས་པ་གསལ་གསལ་ཐིང་ཐིང་དྲ་ཐོག་ལ་ཡོད་པ་རེད། ད་ལྟོ་ཁོ་ཚོ་ཨ་ཞང་རྒྱ་ནག་ཚང་གི་སྤང་ལ་ལོག་ནས་སྐྱིད་པོ་གཏོང་ནས་སྡད་ཡོད་པ་རེད། བོད་མི་མང་ཚོས་མ་གྲོས་བསམ་པ་གཅིག་མཐུན་དང་མ་སྐུལ་དང་བླངས་ཀྱི་སྒོ་ནས་རྒྱ་མིའི་རྒྱུག་ཁྱི་དོལ་ཚོགས་ལ་ཁ་གཏད་བཅག་གི་ཡོད་པ་ལས་བེད་སྤྱོད་གཏོང་མཁན་སུ་ཡང་ཡོད་མ་རེད་ལ་དམངས་གཙོའི་སྤྱི་ཚོགས་ནང་ལ་མིས་མི་བེད་སྤྱོད་གཏོང་ཐུབ་ཀྱི་ཡང་མ་རེད། ནང་དམེ་བཟོ་མཁན་སུ་ཡིན་ཧ་གོ་བར་གྱིས་མི་གསད་རྡུང་རྨས་གསུམ་དང་སྡིག་ར་འཇིགས་སྐུལ་བྱེད་མཁན་དེ་ཚོ་ནང་དམེ་ནཟོ་མཁན་ཡིན་པ་ལས་བདེན་པའི་སྐད་ཆ་བཤད་ནས་ཞི་བའི་ངོ་རྒོལ་བྱེད་མཁན་དེ་ཚོ་ནང་དམེ་བཟོ་མཁན་མ་རེད།
དོལ་རྒྱལ་བ་ཚོ་དང་མཉམ་དུ་ཆོས་དང་ཟང་ཟིན་གྱི་འབྲེལ་བ་མི་བྱེད་རྒྱུའི་སྐད་ཆ་དེ་ཚོ་སྤྱིར་འགྲོ་བ་མི་ལ་རན་པ་ཞིག་མ་རེད། ཡང་དགོས་སུ་ཐེག་པ་ཆེན་པོའི་ཆོས་བྱེད་མཁན་རྣམས་ཀྱིས་མ་རུང་པ་དང་མ་འོས་པ་ཞིག་རེད། དེ་ལྟར་བྱ་སྤྱོད་སྤེལ་མཁན་ཚོར་བྱམས་པ་དང་སྙིང་རྗེ་སོགས་ཐེག་ཆེན་གྱི་དྲི་ཙམ་ཡང་སེམས་རྒྱུད་ལ་མེད་རྟགས་རེད།
ད་གཞའ་ཞིག་ཡིན་ད། རྡ་ཚོགས་དང་དོལ་ཚོགས་གཉིས་ཀ དགེ་སློབ་འཁྲུག་པ་རང་རེད། བོད་ལ་འབྲེལ་བ་མེད་པས། འདས་པོ་ཁྲི་བྱང་སྙིང་རྗེ། གསོན་པོ་གོང་སར་ཅི་བབས། བེད་སྤྱོད་ལོག་པར་གཏོང་བའི། མི་ཚོ་ར་མ་ལུག་རེད།
གངས་ཕྲུག་ལགས་ཀྱིས་བཤད་སྟངས་དེ་ཚོར་བསམ་བློ་གཏོང་དགོས་ས་མང་པོ་འདུག།
ཀརྨ་བློ་གསལ། རྡ་ཚོགས་དང་དོལ་ཚོགས་ཟེར་ཡོང་དུས་ཁྱོད་ཀྱིས་ངོ་བོ་གཅིག་ངོས་འཛིན་གྱི་ཡོད་རེད་ལྦཱ། བཀྲ་མི་ཤིས་པའི་མི་འདི་ཚོའི་ཁ་ན་འདི་ལས་ལྷག་པའི་སྐད་ཆ་ཞིག་གང་ནས་ཡོང་། རྡ་ཚོགས་ཀྱིས་མ་འཇོན་པ་ཞིག་ཁྱོད་ཀྱིས་ཅི་ཞིག་བྱེད་བཞག་ཡོད། མྱི་ཆ་ཡོད་ལ་གཏམ་ཆ་མེད་མ་བཤད། བོད་པ་སྐྱབས་བཅོལ་བ་ཚོས་འཇོན་ན་རེད་མ་འཇོན་རེད་ལོ་རྒན་དྲུག་ཅུའི་རིང་ང་ཚོ་ལ་བཀྲ་མི་ཤིས་པ་ཁྱོད་ལྟར་གྱིས་རྡ་ཚོགས་ལས་སྟོན་རྒྱུ་ཅི་ཞིག་ཡོད། རྡ་ཚོགས་དང་དོལ་ཚོགས་བླ་སློབ་ཀྱི་བར་གྱི་འཁྲུག་པ་ཅི་ལྟར་རེད་གསལ་བཤད་བྱོས། ཆེན་པོ་ཞིག་ཤེས་ཡོད་མདོག་མདོག་མ་བྱེད་ང་ཚོ་མྱི་ཆ་ཡོད་ཡིན་པཱ། རྡ་ཚོགས་ཀྱིས་མ་འཇོན་པ་ཁྱོད་ཀྱིས་ཐུབ་ཀྱི་ཡོད་ན་ཁྱོད་སུ་ཞིག་གིས་བཟུང་ནས་བཀག་འདུག ཁྱོད་འདྲ་བའི་མྱི་སྐྱག་པ་འདྲ་བ་དག་ཁ་ནང་འཁོར་བ་ལས་ཕྱི་ལ་འཁོར་རྒྱུ་མེད། རྒྱ་རྒན་ཚོས་དངོས་ཡོད་ལ་འཁྱོག་བཤད་ནམ་མཁར་མི་ཤོང་བ་བྱེད་ཡོང་དུས་ཁྱི་འདྲ་བ་ཁྱོད་དག་གང་དུ་ཡོད། དོལ་ཚོགས་ཀྱི་གནད་དོན་འདི་བླ་སློབ་ཀྱི་འཁྲུག་པ་ཞིག་ཡིན་པའི་དབང་དུ་བྱས་ན་ཆོས་བརྒྱུད་ཆེན་པོ་བཞི་གཡོན་དྲུང་བོན་བཅས་པའི་བླ་ཆེན་ཁག་གིས་བླ་སློབ་ཀྱི་འཁྲུག་པ་ཙམ་ལ་རྒྱབ་ནས་སྐྱོར་མདུན་ནས་བསུས་ཏེ་དགག་བཞག་བྱེད་ཀྱི་ཡོད་རེད་ཟེར་འདོད་པ་རེད་པས། ཁ་མ་དྲོ་བའི་མྱི་འདི་ཚོ།
དོལ་རྒྱལ་ཐོག་མར་བྱུང་བ་ཡང་བླ་སློབ་འཁྲུག་ནས་བྱུང་བ་རེད། བར་དུ་གནས་པ་ཡང་བླ་སློབ་འཁོན་ནས་གནས་པ་རེད། མཐའ་མ་རྩོད་པ་ཡང་བླ་སློབ་དམ་ཚིག་ཉམས་ནས་རྩོད་པ་རེད། xxx
གངས་ཅན་པ། ད་འོ་ན་ཕ་ཆུས་དངུལ་དང་བརྗེ་བ་དེ་འགྲོ་བ་མི་ལ་རན་པ་ཞིག་ཨེ་རེད། གཟན་ཤམ་གོན་ནས་མི་གསད་རྡུང་དང་འཇིགས་སྐུལ་བྱེད་པ་དེ་ཐེག་ཆེན་པའི་ཆོས་བྱེད་མཁན་རྣམས་ཀྱི་བྱ་སྤྱོད་ཨེ་རེད། བྱམས་དང་སྙིང་རྗེ་སོགས་ཆོས་ཀྱི་དྲི་མ་ཡོད་ན་སངས་རྒྱས་བསྟན་པ་རྨང་ནས་བཤིག་མཁན་གུང་ཕྲན་ཏང་ལ་སྐྱབས་ཞུ་གི་ཨེ་རེད།
ངོ་མ་རེད་ད། དོལ་ཚོགས་ཀྱིས་སྤྱོད་ངན་ཅི་བྱས་ཀྱང་དཀར་པོ་དང་རྡ་སས་དེ་ལ་ཁ་གཏད་ཀྱི་ལས་འགུལ་ཅི་བྱས་ཀྱང་ནག་པོར་མཐོང་མཁན་དེ་ཚོ་རྩ་ཚང་ཡོད་ན་རྒྱ་དངུལ་གྱིས་བསླུས་པའི་ར་མ་ལུག་ཡིན་པ་བཤད་ཅི་དགོས།
ཕ་ཆོས་སྒྲོ་ལགས་དང་བརྗེ་བར་ཉེན་པ་མེད་ན་བུ་ཆོས་དཱ་ཡང་དང་བརྗེ་བར་ཉེན་པ་ཅི་ལ་འབྱུང་། གཟན་ཤམ་འོག་ཏུ་དམག་དཔོན་ཆོག་ས་ལ། གཟན་ཤམ་གྱོན་ནས་དམག་འཐབ་མི་མཆོག་རྒྱུ་ཅི་ལྟར་འགྱུར། མི་རིགས་ཞིག་གི་ལོ་རྒྱུས་རིང་མོ་དེ་མི་སྒེར་ཞིག་གིས་རྒྱ་དམར་འོག་ཏུ་སྒྱུར་ནས་གུང་ཁྲན་ཏང་ལ་སྐྱོབ་བཅོལ་ཞུ་མཆོག་ན། མི་སྒེར་འགའི་དཀའ་སྡུག་ཞུ་ས་གུང་ཁྲན་ཚང་ལ་མི་མཆོག་རྒྱུ་ཅི་ཡོད་དམ།
ཁ་སང་དེ་རིང་ང་ཚོ་བོད་ལ་ཡོད་པ་ཁ་དགྲ་ལ་མི་འཁོར་རོགས་ལ་འཁོར་མཁན་མང་། གུང་ཁྲན་ལ་ཞེ་འཁོན་སྟོན་ས་རྡ་ས་མ་རེད། འུ་ཚོའི་ཕ་ཨ་ཁུ་གསོད་མཁན་རྒྱ་གུང་ཁྲན་ཡིན་པ་ངེས་ཤེས་གསལ་བོ་རྙེད་ཡོད་ན་གཞིས་ལུས་རྒྱ་ཆེའི་མི་མང་བཞིན་ལུས་སྲོག་འབེན་ལ་བཞག་ནས་གུང་ཁྲན་ལ་རྒོལ་དང་རྒོལ་སྟངས་རྒོལ་ལུགས་འུ་ཚོའི་མི་ཐོག་སྔོན་མ་ཚོས་བསྟན་ཡོད་རེད་ལྦཱ། དེ་འདྲའི་ཕོ་ཚོད་མེད་ན་གུང་ཁྲན་གཞུང་ཚབ་ཁྱོད་གང་ན་ཡོད་ན་དེ་རུ་རེ་རེ་ཡོད་རེད། དེར་སོང་ནས་དེ་ལ་རྡོ་ཅིག་གཡུགས་དང་། དེ་ཡང་མི་ཐུབ་ན་མཚན་སོང་ན་དེ་ཚང་གི་སྒོར་སྐྱག་པ་ཐོངས། དེ་ཡང་མི་ཐུབ་ན་འདིར་ཡོང་ནས་ཁ་སྟོང་བས་གུང་ཁྲན་དམོད་དམོད་རེ་ཐོངས། དེ་ཙམ་གྱིས་ཁྱོད་རང་སྡང་ས་གནག་ས་མ་ནོར་བ་རེད། འདིར་ཡོད་པའི་དྲ་འབུ་ཁ་ཤས་ཤིག་གིས་གུང་ཁྲན་ཚང་ལ་སྡང་རབས་གནག་རབས་བཤད་པ་མ་གཏོགས་ཟ་ཁང་གསང་སྤྱོད་འདྲ་བ་རེའི་ནང་རྒྱ་རྒན་ཚང་གི་ཚེ་གཡོག་བྱེད་ནས་བསྡད་ཡོད་ལྦཱ། རྒྱབ་མདུན་མི་མཚུངས་པའི་སྐད་ཆ་དེ་འདྲབཤད་རྒྱུ་་བཞག་ན་ཡག བླ་མ་ཉི་མ་འདྲ་བོས་ཚེ་གང་བོར་བོད་པའི་ཚེ་གཡོག་བྱས་པས་མ་འགྲིག་པ་རེད་དམ།
༡༩༥༩/ལོར་བོད་ས་ཤོར་༡༩༦༠/ལོ་ནས་གསེར་ཊ་རོབ་གཉིས་ཙམ་གྱི་རྙོག་གཞི་མགོ་གཙུག་༡༩༦༡སྨར་ཁམས་ཐོས་བསམ་དང་མར་ནང་ཨ་བོ་དང་སྒ་ཕྲུག་སོགས་ཀྱིས་བོད་བཙན་བྱོལ་དེ་དམངས་གཙོ་དགོས་མིན་གྱི་རྙོག་གཞི་སོགས་དང་། དུས་དེ་ནས་མི་ལོ་དྲུག་བཅུ་ལྷག་གི་རིང་ནང་དམས་དང་ནང་ཁྲུག་ཁོ་ན་ལས་ཐ་ན་བོད་རང་བཙན་ཕར་ཞོག ཉིན་ཞིག་བོད་ཟེར་བ་དེ་ཐ་སྙད་ཙམ་ཡང་འབོད་མི་ཆོག་པའི་བཀའ་ཞིག་དྷ་སའི་རི་ངོགས་ནས་སླེབས་ངེས་རེད། སྐབས་དེར་བོད་འདིར་ལོ་རྒྱུས་ཙམ་ཡང་ཤེས་ཁན་དཀོན་པོ་རེད། དཔེ་ན་རྒྱ་གར་བྱང་ཤར་ཁུལ་དུ་གནས་པའི་ན་གྷརལིང་ཌི་ནང་བཞིན་ཆགས་ཀྱི་རེད། དཔེ་ན་ལུངས་རྟོགས་ལྟ་བུ་མི་བུ་དག་གི་བསམ་ཚུལ་ནི་ལོ་ངོ་བདུན་བརྒྱ་ཡར་སྔོན་ནུབ་ཕྱོགས་རྒྱལ་ཁབ་ཀྱི་ཆོས་ལུགས་ཁག་གི་རྙོག་གཞི་ཡི་དཔོན་ངན་རྣམས་ཀྱི་རྒྱུགས་ཁྱི་བཞིན་རེད། བོད་ཕྱི་ནང་གཉིས་དང་གང་སར་དོལ་ཚོགས་ཀྱིས་དུས་ཚོད་༢༤སྒོ་ཕྱེས་ནས་ཡོད་པས་དྲང་བདེན་གྱི་གནས་ལུགས་བཤད་མཁན་དང་གནད་དོན་ཐག་བཅོད་ཐུབ་མཁན་ཡོད་ན་ཕེབས་ཤོག་དང་འཛམ་གླིང་གི་བདེ་འཇག་གང་འདྲ་ཞིག་ལ་གྲ་སྒིགས་བྱས་ན་ཆོག་ཞེས་སྐད་སང་མཐོན་པོ་སྒྲོགས་བཞིན་པར་ཁྱོད་རྣམས་གོ་ཐོས་ཙམ་ཡང་མ་བྱུང། དེས་ན་རྒྱ་མི་རྒྱུགས་ཁྱི་དང་དངུལ་ལོ་ཡི་ཆེད་དུ་ཡིན་སྐད་ཆ་དེ་འདྲ་བཤད་མི་སྲིད། དེས་ན་ངེས་པར་དུ་ང་ཚོ་ནང་ཁུལ་གྱི་རྙོག་གཞི་ཁག་གི་རྩ་བ་ཧ་དགོས་ཡ་ཆེས་གལ་ཆེན་རེད།
ཤུགས་ལྡན་བསྟེན་མཁན་དང་ཤུགས་ལྡན་ལ་ངོ་རྒོལ་བྱེད་མཁན་གཉིས་ཀྱི་དབར་ལ་ཐད་ཀར་བགྲོ་གླེང་བྱེད་ཐུབ་ན་ལེགས། དང་ཐོག་བགྲོ་གླེང་གྲ་སྒྲིག་པོ་ཞིག་མ་བྱུང་རུང་། གཉིས་ཀ་གདན་ཅོག་གཅིག་གི་ཐོག་ལ་བསྡད་ནས་སྐད་ཆ་བཤད། རིམ་བཞིན་ཇེ་ལེགས་སུ་བཏང་སྟེ། ས་གནས་གང་སར་ཤུགས་ལྡན་སྟེན་མཁན་དང་ངོ་རྒོལ་བ་གཉིས་འཛོམས་ནས་སྐད་ཆ་བཤད་ཐུབ་ན་ཕན།
དེ་མིན། གཅིག་གིས་གཅིག་ལ་ངོ་རྒོལ་ཤ་སྟག་བྱས་ནས་འབྲས་བུ་མི་ཐོན། རྒྱལ་བ་རིན་པོ་ཆེར་མིང་དོན་ལྡན་པའི་བརྟན་བཞུགས་ཅིག་འབུལ་བསམ་ན། ཤུགས་ལྡན་གྱི་ངོ་རྒོལ་དེ་མེད་པ་བཟོས་ནས། ནང་ཁུལ་འགྲིགས་འཇགས་བྱུང་ན་དེ་ལེགས་ཤོས་རེད།
ཕོ་ཁྱོ་ཀ་ཡིན་ན། མར་འཐོན་ནས་ཁ་ཡོད་ལག་ཡོད་ལས་ཀ་བསྒྲུབ་པར་ཤོག། གློག་འཕྲིན་དང་སྐད་འཕྲིན་ཁ་བྱང་འདིར་ཟ་ཞོག། ང་ཚོ་མཉམ་དུ་བགྲོ་གླེང་གི་སྟེགས་བུ་ཞིག་བཟོས་ཆོག
རབ་བྱུང་ན་ཡུ་ཊོབ་ནང་ལ་ཕྱོགས་གཉིས་ཀ་གདན་དྲེན་ཞུས་ནས་སྐད་ཆ་ཤོད་ཐུབ་ན་ལེགས།
རྒྱབ་སྐྱོར་ཡོད་པ་རྣམས་ཐོན་ཤོག
ཟ་ཞོག་ཅེས་པ། ཞོག་རོགས་ལ་བཅོས་རོགས།
བཀྲིས་ལགས་ ང་དང་ངའི་གྲོགས་པོ་རྣམས་ཀྱི་ཀྱང་བསམ་བློ་དེ་འདྲ་གཏང་མྱོང་ ཁོང་ཚོར་དཀའ་ངལ་ཡོད་པ་ཤེས་ཀྱི་ཡོད་ལ་དཀའ་ངལ་དེ་བོད་པ་སྤྱི་པའི་དཀའ་ངལ་ཞིག་ལ་རྩིས་ཀྱི་ཡོད་ འོན་ཀྱང་ད་གནས་ཚུལ་དངོས་དེ་འདྲ་རེད་མི་འདུག་ ཁ་ས་ངས་youtube ནང་སྡོལ་ཚོགས་ཀྱིས་རྒྱ་མིའི་རྒྱལ་དར་འཁྱེར་ནས་༧གོངས་ས་མཆོག་ལ་ངོ་རྒོལ་ཞུ་ཡི་ཡོད་པ་ཞིག་མཐོང་བྱུང་བས་ཧང་སངས་བྱུང་ རྒྱ་མིས་དར་ཆ་འདི་འཁྱེར་ནས་ང་རང་ཚོའི་ལུང་པར་དགོན་པ་སྟོང་ཕྲག་དྲུག་རྩམ་རྩ་གཏོར་གཏང་བ་དང་བོད་མི་ཁྲི་མང་པོ་བསད་པ་དང་བཙོན་དུ་བཅུག་པ་ ང་ཚོའི་བོད་ཡོངས་རྫོགས་ད་བར་བཙན་བཟུང་བྱེད་མཁན་དེའི་དར་ཆ་འཁྱེར་ཡོང་ནས་བོད་པ་ནང་འཁུལ་ལ་ངོ་རྒོལ་བྱས་པ་དེ་ལྷ་དང་ སྲུང་མ་ དགའ་ལྡན་ཕོ་བྲང་ ཆོས་ལུགས་རང་དབང་སོགས་ཀྱི་གནས་དོན་རྩ་བ་ཉིད་ནས་མ་རེད་ དེ་ནི་བོད་ཀྱི་རྒྱལ་རབས་དང་བོད་མི་ས་ཡ་དྲུག་གི་རྩ་དོན་དང་མགལ་བ་ཞིག་ཡིན་པས་ཁོང་ཚོའི་བྱེད་གཏང་དེས་ང་ཚོའི་སེམས་ནས་ཁོ་ཚོ་གཏན་དུ་འབྲལ་སོང་་ དེ་རིང་ནས་གཟུང་སྡོལ་ཚོགས་དེ་ང་ཚོའི་ཤི་གསོན་གྱི་དགྲ་ཡིན།
ཨ་ཁུ་ནོར་བུའི་གསུངས་པ་དེ་ག་རང་རེད། དོལ་ཚོགས་ཀྱི་གདོང་རིས་ངོ་མ་དེ་དམར་རྗེན་དུ་སྟན་ཡོང་གི་ཡོད་པ་རེད། ད་ཁྱོད་ཚོ་ལ་བཤད་རྒྱུ་ཅི་ཡོད། བོད་པའི་དཔེ་གཏམ་དཔེ་ཕྱི་དགྲ་ལྕགས་ཀྱི་མཛེར་མས་མིག་བཅར་བ་ལས་ནང་དགྲ་ཁང་རྒན་ཐིག་པས་ཡིད་དཀྲུག་ན་སྡུག་ཞེས་པ་དེའི་དཔེ་མཚོན་གསོན་པོ་ནི་དོལ་ཚོགས་རེད། གང་ལྟར་ད་ལྟའི་ཆར་དོལ་ཚོགས་ནི་བོད་མི་རིགས་ཀྱི་དགྲ་བོ་གཉིས་པ་དེ་ཆགས་ཚར་བ་རེད། ད་ནི་མགོ་གསེར་སྐུའི་བཅག་ན་བྱིན་རླབས་མེད། ཡིད་ཕ་མས་བཅད་ན་དགའ་རྒྱུ་མེད། སྨ་ཉེ་བས་ཕབ་ན་འཚར་རྒྱུ་ཅི་ཡང་མེད། དོལ་ཚོགས་ཀྱི་བྱ་སྤྱོད་ལ་འགྱུར་བ་མ་གཏོང་ན་ཞི་བའི་ངོ་རྒོལ་བྱེད་རྒྱུ་ལས་ཅི་ཡང་ལྷག་ཡོད་མ་རེད།
ཐམས་ཅད་ལ་བདེན་ཁ་འདུག ང་ཚོས་ཁ་གཅིག་བསྒྲགས་ཀྱིས་ཆིག་བསྒྲིལ་དང་ཆིག་བསྒྲིལ་ཟེར་ནས་ཁ་འདོན་མ་ཎི་ལྟར་བགྲངས་བཞིན་ཡོད། འོན་ཀྱང་དོན་ལ་ཐུག་དུས་ཆོས་ལུགས་ཀྱི་སྟེང་ནས་ནང་པ་དང་བོན་པོ་ཟེར་ནས་ཁ་བརྡའི་ནང་དུ་དམག་འཁྲུགས་ག་ཚད་ཅིག་བསླངས་ཡོད། ཆོལ་ཁའི་སྟེང་ནས་དམག་འཁྲུགས་ག་ཚད་ཅིག་ཤོར་ཡོད་གསལ་གསལ་ཐིང་ཐིང་རེད་པ། ཆིག་བསྒྲིལ་དགོས་ན་འདྲ་མཉམ་གྱི་ལྟ་བ་དགོས། ཆིག་བསྒྲིལ་དགོས་ན་ཕན་ཚུན་ལ་མཛའ་བརྩེའི་ལྟ་བ་ཞིག་དགོས། མཉམ་གནས་དགོས་ན་དག་སྣང་གི་ལྟ་བ་དགོས། ཆགས་སྡང་ཞིག་ཡོད་ཕྱིན་ཆིག་བསྒྲིལ་ཟེར་བ་ནེ་ཙོའི་མ་ཎི་རང་རེད། འདི་ནས་ཕྱོགས་གཉིས་ཀས་བསམ་ཚུལ་ལྷུག་པོར་ཤོད་ཀྱིན་འདུག་ཉན་ནས་བསྡད་ཡོད། ཁ་བརྡའི་དྲ་བདག་ནས་ཀྱང་གུ་ཡངས་ཀྱིས་སྨྲ་བརྗོད་རང་དབང་གནང་བར་ཡི་རངས་དང་བསྔགས་བརྗོད་ཡོད། འདི་ལས་ལྷག་པའི་སྨྲ་བརྗོད་རང་དབང་ཟེར་བ་མེད། ཕྱོགས་གཉིས་ཀས་སྨྲ་བརྗོད་རང་དབང་ལ་བེད་སྤྱོད་ལེགས་པོར་སྤྱད་དེ་བགྲོ་གླེང་གནང་རོགས།
ཁྱུང་སེ། ཁ་བརྡའི་ནང་ལ་ཆོལ་ཁའི་རྩོད་རྙོག་ཡོད་པ་མི་ཤེས་ཀྱང་བོན་པོ་དང་ནང་པའི་བར་རྩོད་རྙོག་ཆུང་ཙག་རེ་ཡོང་གི་ཡོད་པ་རེད། འོན་ཀྱང་རྩོད་རྙོག་འདི་དག་ནི་བོན་ཞེན་ཅན་གྱི་བོན་པོ་ལ་ལས་ནང་ཆོས་ཀྱི་རྩ་བ་བོན་པོ་ཡིན་མདོག་དང་ནང་པའི་སྐྱེས་ཆེན་འགའ་རེར་སྐུར་འདེབས་ཀྱི་རྩོམ་ཡིག་འདིེ་བཀོད་པའི་དབང་གིས་ཡོང་གི་ཡོད་པ་ལས། ནང་པ་ཞིག་གིས་བོན་ཆོས་ཡང་དག་མ་ཡིན་པ་བཤད་པ་དང་བོན་པའི་སྐྱེས་ཆེན་ཚོར་སྐུར་འདེབས་བྱས་པ་ཞིག་མཐོང་མ་འོང་། བཙན་བྱོལ་སྒྲིག་འཛུགས་ནི་ད་ལྟའི་ཆར་དམངས་གཙོའི་གཞུང་ཞིག་ཡིན་ཞིང་བཙན་བྱོལ་མི་མང་ཚོ་ཡང་དམངས་གཙོའི་གོ་རྟོག་མཐོ་རུ་འགྲོ་ཡི་ཡོད་པས་འདྲ་མཉམ་གྱི་ལྟ་བ་ནི་ཡོད་པ་རེད། མཛའ་བརྩེ་ཞེས་པ་དེ་ཡང་བྱང་ཆུབ་སེམས་དཔའ་འདྲ་ཡིན་ན་མ་གཏོགས་མི་ཕལ་པ་ཞིག་ལ་མཚོན་ན་ཕྱོགས་གཉིས་ཀ་ནས་ཕན་ཚུན་བསམ་ཤེས་དང་གུས་བཀུར་བྱེད་ནས་ཡོང་དགོས་པ་ལས་ལག་པ་གཅིག་གིས་ཟློག་པ་མི་ཡོང་བ་དངོས་ཡོད་རེད། ཆགས་སྡང་ཡོད་པས་ཆིག་སྒྲིལ་ཡོང་མི་སྲིད་ན་ཆགས་སྡང་མེད་པའི་མི་ནི་ཧ་ལམ་མེད་པས་འཇིག་རྟེན་ཁམས་འདིར་ཆིག་སྒྲིལ་ཟེར་བ་ཞིག་ཡོང་མི་སྲིད་པ་རེད།
མཐོང་མ་འོང་ཞེས་པ་དེ་མ་མྱོང་ལ་བཅོས།
སྐུ་ཞབས་ལུང་རྟོགས་ལ་ཁྱེད་རང་གིས་རྟག་ཏུ་གོང་ས་མཆོག་དང་བཙན་བྱོལ་སྒྲིགས་འཛུགས་ལ་མཐའ་གཅིག་ཏུ་རྒྱབ་སྐྱོར་དང་གདོང་ལེན་བྱེད་བཞིན་པར་རྗེས་སུ་ཡི་རངས་དང་ཐུགས་རྗེ་ཆེ་ཞུ་གི་ཡོད། འོན་ཀྱང་གནད་དོན་ཁ་ཤས་ནས་་ཁྱེད་ཀྱིས་གཟིགས་བཞིན་ཁྱེད་ཀྱིས་དེར་དགག་པ་སོགས་བྱེད་དང་བྱས་བཞིན་པར་ད་དུང་མངོན་སུམ་ལ་བསྙོན་འདེང་སྟངས་དེར་ཡ་མཚར་སོང། དཔེར་ན། བོན་པོ་བ་ཚོས་བན་དེའི་སྐྱེས་ཆེན་ལ་སྐུར་བ་བཏབ་ཚུལ་ལས་བན་དེས་བོན་པོར་དེ་ལྟར་བྱས་ཚུལ་མ་མཐོང་རབས་གསུངས་པ་ལྟ་བུ་རེད། བོན་ཞེས་ཁ་བརྡའི་ནང་དུ་བཀོད་ཚེ་སྔོན་དུས་སུ་དཔལ་དགྱེས་དང་ཨོ་རྒྱན་ཉི་མ། ཨེ་མ་ཧོ། སྤོབས་མཐའ་དང་ཁྱེད་རང་ལུང་རྟོགས་མིང་ཅན་ཚོས་བོན་པོར་ཅི་ཞིག་བྲིས་མེད་དམ། རང་སེམས་རང་ལ་ལྐོག་འགྱུར་ནི་ཡིན་གྱི་མ་རེད། སྔར་རྗེས་ལ་ཕྱི་མིག་ཅིག་གཟིགས་རོགས། དྲང་པོར་ཤོད་དགོས་པ་ལས་རྫུན་གྱིས་ས་ཆོད་ཐུབ་ལི་མ་རེད།
ལུང་རྟོགས་ལགས་ནི་སྡིག་པ་དམིག་གཙུམ་གྱི་གཞུང་འཛིན་པ་ཞིག་རེད། ལེགས་ཉེས་ཀྱི་རྣམ་དབྱེར་འགན་འཁུར་བཟོ་ནི་མ་རེད། བླ་ཆེན་མི་ཆེན་ཚོ་ལ་དག་སྣང་རྐྱང་རྐྱང་ལས་སྐྱོད་བརྗོད་འགྲོ་ས་ཡོད་ནི་མ་རེད། ཆེན་པོ་ཚོར་སྐྱོན་བརྗོད་བྱེད་མཁན་རིགས་ལ་ལུང་རྟོགས་ཀྱིས་ལོང་རྟགས་སྟོན་ཡོང་གིན་རེད། དེས་ན་ཁོང་ནི་སྲིད་དབང་སྒེར་སྤྱོད་ཀྱི་གཤིས་ལ་གོམས་པའི་མི་བུ་ཞིག་ཡིན་བཟོ་འདུག།
སྐུ་ཞབས་ཁྱུང་སེ་ལགས། ངས་གང་བཤད་ཡོད་པ་དེ་ལ་ཡག་པོ་གཟིགས་རོག ངས་བཤད་རྒྱུ་ནི་ང་ཚོ་ནང་པ་ཚོས་བོན་པོ་ལ་ངན་པ་ཚིག་གཅིག་བཤད་རྒྱུ་མ་བྱུང་ཟེར་གྱི་མེད། འོན་ཀྱང་དང་བོན་པོའི་དགེ་བཤེས་སམ་མཁས་པ་ཚོས་ཁ་བརྡའི་ནང་ལ་ནང་ཆོས་ཀྱི་འབྱུང་ཁུང་བོན་ཆོས་ཡིན་རབས་དང་སློབ་དཔོན་པད་འབྱུང་སོགས་ནང་པས་དད་གུས་ཆེན་པོ་ཞུ་ཡུལ་གྱི་སྐྱེས་ཆེན་ཁག་གཅིག་ལ་སྐུར་འདེབས་སོགས་ཀྱི་རྩོམ་ཡིག་སྤེལ་རྐྱེན་ང་ཚོས་ཡང་དེ་ལ་གསལ་བཤད་དང་ལེན་འདེབས་བྱེད་དགོས་ཆགས་ཀྱི་འདུག་ལ། དེ་འདྲའི་སྐབས་སུ་རྣོ་ངར་ཅན་གྱི་ཚིག་རེ་ཟུང་ཕྱོགས་གཉིས་ཀས་ཤོར་འགྲོ་བ་ཡང་ཆགས་སྡང་ཅན་གྱི་མིའི་ཆོས་ཉིད་རེད། དེས་ན་དོན་དག་རྡོག་རྡོག་ཁ་བརྡའི་ནང་ལ་རྩོད་གཞི་སློང་མཁན་བོན་པོ་ཚོ་རེད་ཟེར་བ་ཡིན། དེ་འདྲ་ཡིན་མིན་ཁྱེད་རང་ཡང་ཁ་བརྡའི་ནང་ལ་ཕེབས་ནས་རྒྱུན་རིང་ཙམ་འགྲོ་ཚོད་ཡིན་པས་གཟུ་བོའི་བློས་བསམ་བློ་བཏང་ན་མཁྱེན་གྱི་རེད། ང་ཁ་བརྡ་ནང་ལ་ཡོང་ནས་ལོ་མང་པོ་ཡིན་ཡང་བན་དེའི་མཁས་པའམ་རྩོམ་པ་པོ་ཞིག་གིས་བོན་ཆོས་ལ་སྡང་ཟུག་དང་བོན་པོའི་བླ་མ་ལ་སྐུར་འདེབས་ཀྱི་རྩོམ་ཡིག་སྤེལ་བ་ཞིག་ཕལ་ཆེར་མཐོང་མྱོང་། གཅིག་བྱས་ན་ངས་མ་མཐོང་བ་ཡིན་སྲིད་ཀྱི་རེད།
འོན་ཀྱང་དང་བོན་པོའི་་་ཞེས་པ་དེ་དང་པོ་ལ་བཅོས།
ཚང་མའི་བསམ་ཚུལ་ཡག་པོ་གསུངས་འདུག། མུ་བཞིའི་སྐོར་ལ་བསམ་ཚུལ་འདྲ་ཡོད་ན་མུ་མཐུད་གསུངས་རོགས་ཞུ།
ཧཧཧ གངས་ཅན་པ། ཕྲག་དོག་ཅན་གྱི་མི་བུ་དག་གིས་དུས་རྟག་པར་བླ་ཆེན་མི་ཆེན་ཚོར་སྒྲོ་སྐུར་བྱེད་བཞིན་པ་ནི་ཁོང་ཚོའི་ཕུན་ཚོགས་ལ་མ་བཟོད་པ་ལས་དྲང་བདེན་ཅན་གྱི་བྱེད་སྟངས་ཤིག་གཏན་ནས་མ་རེད། ང་ལ་མཚོན་ན་བླ་ཆེན་མི་ཆེན་ཡིན་མིན་ལ་ལྟ་ཡི་མེད་ཁོང་ཚོའི་བྱ་བ་སྒྲུབ་སྟངས་ལ་ལྟ་ཡི་ཡོད། དེ་བཞིན་ང་བླ་ཆེན་མི་ཆེན་མིན་ལ་བླ་ཆེན་མི་ཆེན་ཚོར་འབྲེལ་བ་གང་ཡང་མེད། འོན་ཀྱང་ངས་གོང་ས་མཆོག་ལ་མཐའ་གཅིག་ཏུ་དད་གུས་ཞུ་ཡི་ཡོད་ལ་བོད་གཞུང་ལ་མཐའ་གཅིག་ཏུ་རྒྱབ་སྐྱོར་བྱེད་ཀྱི་ཡོད། དེ་ནི་གོང་ས་ཡིད་བཞིན་ནོར་བུའི་སྐུ་དྲིན་འོག་འཚོ་མཁན་ཞིག་དང་བོད་གཞུང་གི་འབང་སུ་གཏོག་པའི་བོད་མི་དཀྱུས་མ་ཞིག་ཡིན་པའི་འགན་ཁུར་བ་ཡིན་ལ། ཕྱོགས་གཞན་ཞིག་ནས་བཤད་ན་གོང་ས་མཆོག་དང་བོད་གཞུང་ལ་སྐྱོན་བརྗོད་བྱེད་མཁན་ཚོར་གནས་ལུགས་མ་མཐོང་བས་ཡིན། དངོས་གནས་སྐྱོན་ཡོད་པ་ཞིག་ཡིན་ན་ངས་སུ་ལ་ཡང་འཛེམ་ཟོན་བྱེད་ཀྱི་མེད། དཔེར་ན་ཨ་མ་རྗེ་བཙུན་པད་མས་བོད་ཕྲུག་མང་པོ་གསོ་སྐྱོང་གནང་བ་བཀའ་དྲིན་ཆེན་པོ་ཡིན་ཡང་ཁོ་མོས་བོད་ཡིག་ལ་འཛིན་པའི་ལྟ་སྟངས་ལ་ངས་མཐའ་གཅིག་ཏུ་སྐྱོན་བརྗོད་བྱེད་ཀྱི་ཡོད།
རྩོམ་ཡིག་འདིའི་ཁག་རྗེས་མ་བརླག་འདུག ད་འགྲིག་གི གང་ལྟར་ཡང་གསལ་པོར་ཞུ་ཡ་དེ་རྡ་ཚོགས་དང་དོལ་ཚོགས་ཀྱི་རྩོད་གཞི་འདི་རིམ་བཞིན་རྒྱ་ནག་གཞུང་ནས་དངུལ་ལོ་རེག་པའི་མང་ཉུང་རྩོད་ཀྱིན་པ་འདྲ་བོ་འདུག རྙོག་གླེང་འདིའི་ནང་དུ་བོད་མི་མང་དྲུད་མ་ཡོང་། བོད་མི་མང་འདི་དང་འབྲེལ་བ་མི་འདུག རྩོད་རྙོག་འདི་བྱུང་རྐྱེན་དང་གནད་དོན་གང་ལ་ཐུག་མིན་སོགས་ཁ་སང་ཞུས་ཟིན་པའི་ཁུལ་ཡིན།
ཀརྨ་བློ་གསལ་ལགས། དོལ་དོན་འདི་བོད་མི་ཡོངས་དང་འབྲེལ་བ་མེད་ཟེར་ན་ཏག་ཏག་ཅིག་བསྡད་ཡོད་མ་རེད། གང་ཞེ་ན། དོལ་བསྟེན་བོད་པ་ཚོ་དང་གཅིག། དགེ་ལུགས་པ་དང་གཉིས། རྙིང་མ་བ་དང་གསུམ། ས་སྐྱ་བ་དང་བཞི། ཁྱད་པར་དུ་ད་སྐབས་རྒྱ་ནག་གི་ལག་ཆར་གྱུར་ནས་༧ གོང་ས་མཆོག་ལ་ངོ་རྒོལ་བྱེད་བཞིན་པ་དང་ལྔ་ལ་སོགས་ད་དུང་དོན་དག་མང་པོ་ཞིག་དང་འབྲེལ་བ་ཡོད་རེད། བོད་པ་གཅིག་གི་དོན་དག་བོད་མི་ཡོངས་དང་འབྲེལ་བ་ཆགས་གི་རེད། བོད་པ་གཅིག་གི་ཞབས་འདྲེན་ཞུས་ན་བོད་སྤྱི་ལ་གནོད་གི་རེད། བོད་པ་གཅིག་རྒྱལ་ན་བོད་མི་ཡོངས་ལ་ཕན་གི་རེད། མི་གཅིག་གི་དོན་དག་བོད་མི་ཡོངས་དང་འབྲེལ་བ་ཆགས་ཐུབ་ན་གོང་དུ་བརྗོད་པ་དག་ཅིའི་ཕྱིར་བོད་མི་ཡོངས་དང་འབྲེལ་བ་མེད་རེད། བསམ་བློ་བཏང་ནས་སྐད་ཆ་ཤོད།
རྩོམ་འཕྲོ་དེ་བརླག་འདུག། དེ་བདེན། དགོས་དབང་ཞིག་གིས་ཕྱིར་འཐེན་རྒྱག་དགོས་ཐུག་སོང་ཟེར། རབས་ཡིན་ན་ཁ་བརྡ་རྩོམ་སྒྲིག་པ་ཚོའི་དགོས་དབང་དེ་ང་ལ་གསལ་བཤད་བྱེད་ཐུབ་ན་བཟང་།