དོལ་ཚོགས་སྒོ་བརྒྱབ་ཡོད་དམ།

——-རྭ་འཕྲིན
 
ཡང་དོལ་ཚོགས་སྐོར་ལ་བསམ་ཚུལ་ཐུང་ཐུང་ཞིག་ཞུ་འདོད་བྱུང་། ཉེར་ཆར་ང་ཚོའི་སྤྱི་ཚོགས་ཁྲོད་ལ་རྒྱལ་སྤྱིའི་ཤུགས་ལྡན་ཚོགས་པ་ཟེར་བ་ཞིག་སྒོ་བརྒྱབ་ཡོད་པ་དང་༧ གོང་ས་མཆོག་ལ་ངོ་རྒོལ་མཚམས་འཇོག་བྱས་ཡོད་པའི་གསར་འགྱུར་སྙན་མོ་ཞིག་ཐོན་ཡོད། སྤྱིར་ཡིན་ན་དོལ་ཚོགས་དང་འབྲེལ་ཡོད་ཀྱི་ལས་ཁུངས་དང་ཚོགས་པ་གཅིག་གི་སྒོ་བརྒྱབ་པ་ཡིན་ན་ང་ཚོར་མཚོན་ན་མཐུན་རྐྱེན་ཞིག་རེད། ཡིན་ན་ཡང་ཚོགས་པ་འདི་སྒོ་བརྒྱབ་པ་ནས་བཟུང་དོལ་ཚོགས་མེད་པ་ཆགས་ཡོད་དམ། མདོར་ན་ད་ནས་བཟུང་དོལ་རྒྱལ་ཚོགས་པས་ཁྱི་སྐད་རྒྱག་རྒྱུ་དེ་མཚམས་བཞག་པ་རེད་དམ་ཟེེར་ན་རྩ་བ་ཉིད་ནས་ཡོད་མ་རེད་བསམ་གྱི་འདུག

ངའི་བསམ་ཚུལ་ལ་ཚོགས་པ་འདི་སྒོ་རྒྱག་དགོས་པའི་རྒྱུ་རྐྱེན་གཙོ་བོ་གཅིག་ནི་ཁོང་ཚོའི་ནང་ཁུལ་ལ་མ་མཐུན་པ་ཆགས་ཀྱིན་ཡོད་པ་དེ་གསལ་བོར་མཚོན་ཐུབ་ཀྱི་འདུག གལ་ཏེ་ཁོང་ཚོ་མ་གྲོས་གཅིག་མཐུན་གྱི་སྒོ་ནས་ཐག་གཅོད་བྱས་པ་ཡིན་ན་ཉི་མ་དེར་དོལ་ཚོགས་ཡོངས་སུ་རྫོགས་པ་དུས་མཉམ་དུ་ཅིའི་ཕྱིར་སྒོ་མ་བརྒྱབ་པ་རེད། བྱང་ཨ་རི་དང་རྒྱ་གར་ལྡི་ལི་སོགས་ན་ཡོད་པའི་ལྷ་མི་སྲུང་སྐྱོབ་ཚོགས་པ་དང་ནེའུ་ཡོག་གི་དམངས་ཁྲོད་ཁ་བརྡ་ལ་སོགས་པའི་ལྟེ་གནས་དག་ལ་གྲག་འགུལ་ཅི་ཡང་མེད་པའི་ཐོག་ནས་ད་དུང་གནས་བསྡད་ཡོད་རེད། འདིས་མ་མཐའ་ཡང་དོལ་ཚོགས་ནང་ཁུལ་དུ་མཐུན་པོ་མེད་པ་གསལ་བོ་མཚོན་ཐུབ་བོ། །

གསར་འགྱུར་དེར་བཀོད་པའི་གནས་ཚུལ་ལྟར་ན་དོལ་ཚོགས་ཀྱི་རྒྱབ་ན་རྒྱ་ནག་གཞུང་ཡོད་མེད་ལ་རོ་ཡེ་ཊིར་གསར་ལས་ཁང་གིས་ལོ་འགའི་རིང་ཞིབ་འཇུག་དང་རྒྱུས་ལོན་བྱས་མཐར། ཉིས་སྟོང་བཅོ་ལྔ་ལོའི་སྤྱི་ཟླ བཅུ་གཉིས་པའི་ནང་སྙན་ཞུ་ཞིག་ཕུལ་ཏེ། རྒྱལ་སྤྱིའི་ཤུགས་ལྡན་ཚོགས་པ་ཟེར་བ་འདི་ལ་རྒྱ་ནག་གཞུང་གིས་དཔལ་འབྱོར་གྱི་རོགས་སྐྱོར་བྱས་ཏེ་༧གོང་ས་མཆོག་གི་རྒྱལ་སྤྱིའི་སྟེང་གི་ཤུགས་རྐྱེན་ཇེ་ཆུང་དུ་གཏོང་ཆེད་ངོ་རྒོལ་དང་། མཚན་སྨོད་སོགས་ཀྱི་ལས་འགུལ་སྤེལ་རྒྱུར་སྐུལ་འདེད་བྱས་ཡོད་པའི་སྐོར་གཞུང་གི་ཡིག་ཆ་སོགས་ལས་བདེན་རྟགས་ར་སྤྲོད་བྱས་འདུག་ཅེས་བཀོད་ཡོད་པ་རེད། གནས་ཚུལ་འདི་ལ་བསམ་བློ་བཏང་བ་ཡིན་ན་རྒྱལ་སྤྱིའི་ཤུགས་ལྡན་ཚོགས་པ་ཟེར་བ་འདི་རྒྱ་ནག་དང་ངན་འབྲེལ་ཡིན་པ་ཐེར་འདོན་བྱས་ཏེ་སྒོ་བརྒྱབ་པ་རེད་ཟེར་བ་འདྲ་བོ་ཞིག་ཆགས་ཡོད་ལ། དེ་ལྟར་ཡིན་ན་དྲི་བ་ཞིག་རང་བཞིན་གྱིས་སླེབས་ཡོང་གི་ཡོད་རེད།

རྒྱལ་སྤྱིའི་ཤུགས་ལྡན་ཚོགས་པ་ཟེར་བ་འདིས་དོལ་ཚོགས་ཡོངས་ཀྱི་ཚབ་མཚོན་ཐུབ་བམ། ཐུབ་ན་དོལ་ཚོགས་ཡོངས་ལ་རྒྱ་ནག་གི་དཔལ་འབྱོར་རྒྱབ་སྐྱོར་ཐོབ་ཀྱིན་ཡོད་པ་ཅིའི་ཕྱིར་ཐེར་འདོན་མ་བྱས་པ་རེད། གལ་ཏེ་བྱས་ཡོད་ན་དོལ་ཚོགས་ཡོངས་སུ་རྫོགས་པ་དུས་མཉམ་དུ་སྒོ་མི་རྒྱག་དོན་ཅི་རེད། འདི་དག་ལ་སོགས་པའི་དོགས་གཞི་མོད་པོ་ཞིག་གི་ཁྲོད་ནས་གནས་ཚུལ་འདི་ང་ཚོར་མཚོན་ན་གྲོགས་ཤིག་ཡིན་པའམ་ཡང་ན་གེགས་ཤིག་ཡིན་པ་སོགས་ནི་ད་དུང་ཡང་ཧ་ཅང་གལ་ཆེ་བའི་བསམ་བློ་གཏོང་གནས་ཤིག་ཆགས་འདུག་བསམ།

དཔེར་ན། ཚང་མས་ཤེས་གསལ་ལྟར་དོལ་ཚོགས་ལ་རྒྱ་ནག་གི་དཔལ་འབྱོར་གྱི་རོགས་སྐྱོར་བྱེད་ཀྱིན་ཡོད་པ་གསལ་བོ་རེད། ད་གནད་འགག་གཙོ་བོ་དེ་གང་རེད་ཅེ་ན། རྒྱ་ནག་གཞུང་གིས་དོལ་རྒྱལ་ཚོགས་པ་ལ་དཔལ་འབྱོར་གྱི་རོགས་སྐྱོར་བྱས་ན་ཁྲིམས་འགལ་ཞིག་ཡིན་ནམ། གལ་ཏེ་ཁྲིམས་འགལ་ཆགས་མེད་ན་མ་འོངས་པ་ལ་མུ་མཐུད་ནས་འདི་ལྟར་འགྲོ་རྒྱུ་རེད་མ་གཏོགས་གཞན་འགྱུར་བ་ཅི་ཡང་ཐེབས་ཀྱི་མ་རེད་བསམ། མ་ཚད་ཚུར་འཁོར་ནས་ང་ཚོར་ཉམ་ཐག་ལ་རོགས་སྐྱོར་བྱེད་བཅུག་མ་སོང་ཟེར་བ་སོགས་ཀྱི་ནག་ཉེས་ཀྱང་འཛུགས་མི་སྲིད་པ་མ་རེད། ད་ལྟའི་ཆར་ང་ཚོའི་སྤྱི་ཚོགས་ཁྲོད་ནས་དོལ་ཚོགས་ལ་ཉེས་འཛུགས་དུ་མ་ཞིག་བྱེད་ཀྱིན་ཡོད་པ་ལས་རྒྱ་ནག་དང་ངན་འབྲེལ་བྱས་ཏེ་དཔལ་འབྱོར་གྱི་ངན་དངུལ་ལེན་གྱིན་ཡོད་ཅེས་ཐེར་འདོན་གཅིག་གནང་ཡོད་རེད།

གཞན་༧ གོང་ས་མཆོག་ལ་མཚན་སྨོད་དང་བོད་ནང་ཁུལ་ལ་དཀྲུགས་ཤིང་། སྤྱིར་སངས་རྒྱས་ཀྱི་བསྟན་པ་ལ་གནོད་ག་ཚོད་བསྐྱལ་ཡོད་པ་དེ་དག་བཤད་མི་དགོས་པ་ཞིག་རེད། བྱས་ཙང་ད་ལྟའི་ཆ་ལ་ང་ཚོའི་ངོས་ནས་རྒྱལ་སྤྱིའི་ཤུགས་ལྡན་ཚོགས་པ་སྒོ་བརྒྱབ་སོང་ཟེར་ནས་དགའ་སྤྲོའི་ངང་མི་སྡོད་པར། ལྷོད་ཡེངས་མེད་པའི་ཐོག་ནས་མུ་མཐུད་དུ་དོལ་རྒྱ་མཉམ་འབྲེལ་ཡིན་པ་དངོས་སུ་ཕྱི་གསལ་ནང་གསལ་གྱིས་མདུན་དུ་ཐོན་ཡོང་བ་ཡིན་ན། ང་ཚོས་ཅི་ཞིག་བྱ་དགོས་སམ་ཞེས་པའི་དྲི་བ་འདི་ལ་གྲ་སྒྲིག་དང་བསམ་བློ་གཏོང་རྒྱུ་ཧ་ཅང་གལ་ཆེན་པོར་མཐོང་ངོ་། །

སྤྱི་ལོ་༢༠༡༦ ལོའི་ཟླ་༣ ཚེས་༡༦ ཉིན་ཨ་རིའི་རྒྱལ་ས་ནས།