ཆང་སྐྱེས།
བྲག་རི་ཟུར་གསུམ་ཅན་གྱི་རྩེ་ཁ་ནས།།
མིག་ཟུང་རིང་དུ་གཏད་དེ་རྒྱང་ལ་བལྟས།།
སྤྲིན་པ་ས་ལ་ལྷུང་བའི་མཁའ་མཐའ་ན།།
ཕ་ཡུལ་གངས་ལྗོངས་ཡོད་པའི་སྣང་བ་ཞིག།
མཚོ་མོ་དྭངས་ཤེལ་ཅན་གྱི་མཐའ་ཁ་ནས།།
སེམས་པ་ནང་ལ་བཀུག་སྟེ་འདང་ཞིག་བརྒྱབ།།
ཁྲུང་ཁྲུང་དཀར་མོ་བཞུད་པའི་ཕ་རོལ་ན།།
རང་ཡུལ་ཨ་མདོ་ཡོད་པའི་འཁྲུལ་སྣང་ཞིག།
ཆུ་མོ་ཤག་ཤག་འབབ་པའི་འགྲམ་ངོགས་ནས།།
མགོ་བོ་ཕྲག་ཁར་གླན་ཏེ་ངལ་ཞིག་གསོས།།
མེ་ཏོག་དཀར་དམར་འཛུམ་པའི་མཛེས་སྡུག་གིས།།
སྙིང་གི་དྲན་གདུང་ལྕི་མོ་རྨང་ནས་སྒུལ།།
ཡུལ་དང་ཁ་ཐག་རིང་བའི་ས་མཐའ་ནས།།
སེམས་ཀྱི་བུ་ཆུང་ལང་ཤོར་ཡུན་གྱིས་རྒས།།
ལ་གཞས་སང་སེང་ལེན་པའི་འབྲོག་མོ་དེ།།
མཚན་མོའི་རྨི་ལམ་ཞིང་ལ་ཡང་ཡང་འཁོར།།
ལོ་ཟླའི་འཁོར་སྐྱོད་རིང་མོའི་ལྟེབ་ཁུགས་ནས།།
ཡ་ཐོད་གདོང་གི་སྐྱི་པགས་རྒས་ཏེ་གཉེར།།
རྡོ་ཆག་བཙན་སྒྲིག་ལྟ་བུའི་སྙན་ངག་འདི།།
དྲན་གདུང་གསོན་པོ་ཞིག་གི་ཚུལ་ཏུ་བྲིས།།
ཐ་མག་ཚེ་སྲོག་རྔུབ་པའི་ཧྲག་བར་ནས།།
མིག་ཆུ་དྲོན་མོ་ཞིག་ཀྱང་ས་རུ་ཟགས།།
རླུང་བུ་ཤུགས་ཤུགས་ལྡང་བའི་སུན་སྣང་གིས།།
སྐྱོ་གདུང་ལྷག་མའི་སྟེང་ལ་ལྷག་མ་བསྣན།།
གཞིས་སུ།
པཎ་ཆེན་བཅུ་པ་ང་ཕོད་ངག་འཇིགས་སྦ་ཕུན་གསུམ་པོ་དགུང་དུ་ཡལ། །
བྱེས་སུ།
ཡོངས་འཛིན་རྣམ་པ་གཉིས་དང་ཀརྨ་པ་ཞེས་བཅུ་དྲུག་པ་ཡང་ཡལ། །
བོད་ནང་།
གངས་ཅན་པ་ཞེས་ཆོལ་གསུམ་མི་རིགས་ས་ཡ་དྲུག་པོ་བོད་ན་བཞུགས། །
ཕྱི་རུ།
༸རྒྱལ་མཆོག་བསྟན་རྒྱ་༸ས་སྐྱ་ཁྲི་ཆེན་༸ཀརྨ་པ་ནི་ཕྱི་རུ་བཞུགས།
་
གཞིས་ལུས་མི་མངས་བོད་ནང་བརྩོན། །
བཙན་བྱོལ་བྱེས་འབྱོར་ཕྱི་རུ་བརྩོན། །
མཉམ་བསམ་མཉམ་སྒྲུབ་སྤྱི་དོན་འབུངས། །
གཉིས་སྨན་སྤྱི་དོན་གཉིས་མོས་སྒྲུབས། །
་
མི་སྒྲུབ་ལས་ཞིག་སྲིད་ན་མེད། །
སྒྲུབས་དང་འབྲས་མེད་མི་སྲིད་པས། །
སྤྱི་དོན་བསམ་དོན་དོ་མི་སྒྲུབ་མེད། །
མཉམ་ཞུགས་མཉམ་སྒྲུབས་མཉམ་སྤྱོད་གྱིས། །
་
ཀརྡོས།
གྱེར་ཡོད།