ཆང་སྐྱེས།
སྣ་ཚོགས་གཡུ་ལོ་རྒྱས་པའི་ལྗོན་ཤིང་གི་རྩེ་ནས།།
ཁུ་བྱུག་གཞོན་ནུས་གསུང་སྐད་བར་མེད་དུ་སྒྲོག་དུས།།
ཚེར་མོ་གཡང་དཀར་ལུག་གི་འབའ་སྒྲ་དང་འགྲོག་པའི།།
ན་ཆུང་ལུག་རྫི་བུ་མོའི་མཛའ་གཞས་དེ་དྲན་བྱུང་།།
ཆུ་མོ་ཤག་ཤག་འབབ་པའི་དྭངས་གཙང་གི་ངོགས་ན།།
མེ་ཏོག་དཀར་དམར་སྣ་ཚོགས་ཁྲ་ལམ་མེར་བཞད་དུས།།
རྩྭ་འགོའི་ཟིལ་བ་རྡོག་པའི་སྣེ་མོ་ན་ཐོར་བའི།།
ན་ཆུང་ཆུ་ལེན་བུ་མོའི་ཟུར་མིག་དེ་དྲན་བྱུང་།།
མཐོན་མཐིང་ཨ་སྔོན་དགུང་གི་བང་རིམ་གྱི་ཀློང་ན།།
ཆུ་འཛིན་སྤྲིན་པ་དཀར་པོ་རྒྱང་རིང་ལ་འཕུར་དུས།།
ཐོད་དཀར་འབྲི་མོ་བཞོ་བའི་དབྱངས་རྟ་ལ་ཆགས་པའི།།
ན་ཆུང་མཐོ་སྒང་བུ་མོའི་འཇོ་སྒེག་དེ་དྲན་བྱུང་།།
གོས་ལྗང་ཐང་ལ་བཏིང་བའི་སྤང་ལྗོངས་ཀྱི་ཁུགས་ནས།།
ཕྱེ་ལེབ་སྒེག་མོའི་གཤོག་འགྱུར་འཇའ་ཚོན་ལ་འཐིམ་དུས།།
ལང་ཚོའི་མཛེས་སྡུག་རྨ་བྱའི་སྒྲོ་ཆེན་དང་འདྲ་བའི།།
འདོད་པའི་མྱོས་བུམ་འབུར་བའི་བུ་མོ་དེ་དྲན་བྱུང་།།
ཤར་ཕྱོགས་རི་རྒྱལ་ལྷུན་པོའི་དབུ་འཕང་གི་རྩེ་ནས།།
དཀར་གསལ་བཅོ་ལྔའི་དུང་ཟླ་ཡིད་འོང་གིས་འཛུམ་དུས།།
སྦྲ་ནག་གྲུ་བཞིའི་ཕུག་ན་ཁེར་རྐྱང་གིས་འཚོ་བའི།།
འཛུམ་ལ་དམར་ཁ་ཚ་བའི་བུ་མོ་དེ་དྲན་བྱུང་།།
སུན་སྣང་ཁ་དབུགས་སྟུག་པའི་དོ་དགོང་གི་མཚན་མོ།།
དྲན་གདུང་སེམས་པ ལྕི་མོ་ལག་ཟུང་གིས་བསྐྱོར་ཏེ།།
ཨུ་ཚུཊ་སྟོང་གིས་རང་སེམས་གསོ་ཐབས་ཤིག་བྱས་ཀྱང་།།
སྐྱོ་གདུང་མིག་ཆུ་འདི་ལ་འགོག་ཐབས་ཤིག་མི་འདུག།