བློ་བཟང་རིན་ཆེན།
གནམ་ལ་ཉི་ཟླ་སྐར་གསུམ་མངོན་པར་བཀྲ །
ས་ལ་སེ་འབྲས་དགའ་གསུམ་མངོན་པར་འཕགས།།
མཁས་དབང་སྐར་ཚོགས་ཁྲོད་ཀྱི་ཟླ་བ་ནི།།
ང་ཡི་བཤེས་གཉེན་ཟླ་བ་ཚེ་རིང་ཉིད།།
དཀར་དམར་ཚོན་གྱིས་ཞལ་མདངས་མ་ཕབ་ལ།།
བཅོས་མའི་ཉམས་ཀྱིས་གཞན་སེམས་མི་སླུ་ཞིང་།།
ཞི་དུལ་བག་ཕེབས་སྤྱོད་ལམ་བཟང་པོ་ཡིས།།
སློབ་བུ་སྟོང་ཕྲག་མང་པོའི་ཡིད་དབང་བཀུག །
གཡོ་དང་རྫུན་གྱི་ལྷད་པ་མ་འདྲེས་ཤིང་།།
གཏམ་དང་སྙན་གྲགས་ཆེད་དུ་མི་དམིགས་པར།།
གཞུང་ལུགས་རྣལ་མ་བཤད་ལ་མཁས་པའི་མཆོག །
མཁས་བརྒྱའི་ཁྲོད་ཀྱི་མཁས་པའི་དབང་པོ་ཉིད།།
རིགས་ལམ་རྐྱང་པའི་ཚིམ་པར་མི་བྱེད་ཅིང་།།
ལུང་རྐྱང་ཙམ་ལ་སྐྱབས་སུ་མི་འཛིན་པར།།
ལུང་རིགས་ཟུང་འབྲེལ་ཐོས་བསམ་སྒོམ་པ་བ།།
བཤེས་གཉེན་བཟང་པོ་བསྟན་པའི་མཛེས་རྒྱན་ཉིད།།
ཐུགས་སེམས་དཀར་པོ་དུང་གི་རང་མདངས་ཉིད།།
བྱམས་བརྩེ་ཟབ་པ་རྒྱ་མཚོའི་གཏིང་ལ་འགྲན།།
མཚན་ལྡན་བཤེས་གཉེན་བཟང་པོ་ཁོང་ལྟ་བུ།།
དེང་གི་དུས་ལ་དཀོན་པའི་དཀོན་མཆོག་ཉིད།།
བདག་ནི་གུང་གསེང་ཟླ་བ་གཉིས་པོའི་རིང་།།
བཀའ་དྲིན་ཅན་གྱི་བཤེས་གཉེན་བཟང་པོ་མཆོག །
ཞེ་ལ་ཐོགས་ཤིང་དྲན་པས་མི་འདོར་བ།།
ཡིག་འབྲུ་ཁ་ཤས་དབང་མེད་ལག་ནས་ཐལ།།
2023/1/29 བློ་བཟང་རིན་ཆེན་གྱིས་བྲིས།