གཡག་ཕྱུག་ཕུན་ཚོགས་ཆོས་འཕེལ། (ལྡི་ལི་མཐོ་སློབ།)
རྒྱུ་རྐྱེན་དེ་བག་ཆགས་འདི་ཡི་དབང་གིས་ཡིན་ནམ། ཡང་ན་ཨ་མའི་བྱམས་བརྩེ་ཡི་དབང་གིས་ཡིན་ནམ། ད་ལྟ་ཡིག་རྒྱུགས་སླེབས་གྲབས་ཉེ་བའི་མཐོ་སློབ་ཀྱི་སློབ་མ་ཞིག་ལ་ཆ་མཚོན་ན་གོང་གི་དྲི་བ་འདི་གཉིས་ལ་ལ་བསམ་བློ་གཏོང་རྒྱུ་དང་ལན་འདེབས་རྒྱུར་དུས་ཚོད་ཅིག་གང་ན་ཡོད། ཁོའི་མིག་མདུན་དུ་སྔ་ས་ནས་དྲི་བའི་ཕུང་པོ་རེ་རེ་རི་བོའི་གཏོས་དང་མཉམ་པ་སྤུངས་ནས་ཡོད་ན་ཡང་། ཆེས་སྤྱིར་བཏང་མིན་པའི་དྲི་བ་དེ་འཁོར་ཐེངས་རེར་ཁོའི་འདས་སོང་གི་འཚོ་བ་གང་མང་ཞིག་ལ་བསམ་གཞིག་བྱེད་དགོས་བྱུང་སོང་ལ། ལྷག་པར་དུ་དྲི་བ་འདི་གཉིས་ཀྱིས་ཁོ་རང་ཡང་ཡང་“བྱིས་པ་པྲ་ཚག་ཅན་”ཅན་ཞིག་གི་རྣམ་ཤེས་ལ་འཛུལ་ནས་མིག་ནས་རང་དབང་མེད་པར་མཆི་མ་ལྷུང་འགྲོ།
དང་པོ།
སྐབས་དེ་དུས་ང་རང་བྱིས་པ་ཆུང་ཆུང་ཞིག་ཡིན། སྡེ་བའི་བྱིས་པ་གཞན་དག་དང་འདྲ་བར་ང་རང་ཡང་འབའ་འབའ་ལུ་གུའི་རྩེད་མོ་རྩེད་རྒྱུ་དང་ཨ་མྱེས་དམ་པའི་དྲུང་ནས་འདྲེ་སྒྲུང་དང་མཚར་དྲུང་ཉན་རྒྱུ་ཤིན་ཏུ་ནས་དགའ་བོ་ཡོད། ཉིན་མ་ནུབ་རི་ལ་ཡལ་གྲབས་ཉེ་བའི་ས་སྲོད་ཙམ་གྱི་དུས་ཚོད་ཅིག་ལ་ང་དང་སྡེ་བའི་བྱིས་པ་ཕོ་མོ་ཁ་ཤས་བསྟན་འཛིན་རྣམ་གྲོལ་གྱི་ཁྱིམ་དུ་ཨ་ཁུ་ལགས་ལ་ལབ་ཙམ་ཡང་མ་བྱེད་པར་རྩེད་མོ་རྩེད་ཁར་སོང་བ་ཡིན། དེར་རྒྱུ་མཚན་མེད་པ་མ་ཡིན་ཏེ། ཕྱོགས་གཅིག་ནས་ད་ལྟ་ཨ་མ་ནད་ཀྱི་གདུང་བའི་རྐྱེན་གྱིས་མལ་སར་ལུས་ཡོད་ལ་ཁྱིམ་ལ་བསྡོམས་པས་གཅེན་པོ་དང་གཅེན་མོ། སྲིང་མོ་གཅིག་བཅས་ཡོད་ནའང་རང་ཉིད་ཨ་ཁུས་ཁྱིམ་གྱི་ལས་ཀ་གང་ཞིག་བཀོལ་ཡོང་བསམ་པའི་དངངས་སྐྲག་ཅིག་གིས་སློབ་གྲྭ་གྲོལ་ནས་དཔེ་ཁུག་ཀྱང་ཁྱིམ་དུ་མ་བསྐྱལ་བར་ཁོ་མོའི་ཁྱིམ་དུ་སོང་བ་ཡིན།
ངའི་ཁྱིམ་ལྟ་བུར་མཚོན་ན་དུས་རྒྱུན་གྱི་འཚོ་བའི་བརྒྱུད་རིམ་ཁྲོད་ཀྱི་བྱ་བ་ཕལ་ཆེ་བ་ཞིག་ཨ་མས་བྱེད་ཀྱིན་ཡོད་ལ་ཨ་ཁུ་ཡང་གཟུགས་པོ་དེ་ཙམ་བདེ་བོ་མེད་ནའང་གཞུང་གི་ཚོང་ཁང་ཞིག་ཏུ་ཅ་ལག་ཆུང་ཆུང་འདྲ་བཙོང་ནས་བྱ་བ་སྒྲུབ་ཀྱིན་ཡོད། ང་ཚོའི་རང་ཁྱིམ་དུ་སྡེ་བ་གཞན་ཚོ་དང་འདྲ་བར་ཟ་མ་གྲ་རྒྱས་པོ་དང་རྒྱུ་དང་དཔལ་འབྱོར་གྱི་འདུ་འགོད་འདི་ཙམ་ཉུང་ཉུང་ཡིན་ན་ཡང་ཨ་མའི་རྒྱུན་དུ་དགོང་མོར་ཐུག་པ་ཚ་བ་རེ་བཀོལ་ནས་ང་ཚོ་ཁྱིམ་མི་ཡོངས་རྫོགས་དགོད་སྒྲ་དང་སྐད་ཅོར་མང་བའི་འཇིག་རྟེན་གཞན་ཞིག་ལ་འཁྲིད་ཀྱིན་ཡོད། ཡིན་ནའང་ང་རང་སྤུན་མཆེད་གཞན་དང་མ་འདྲ་བར་ཁོ་བོ་རྒྱུན་དུ་མི་དགའ་ས་ནི་ཁོ་མོའི་ཐུག་པ་ཚ་བོ་དེ་དང་རྫོགས་རྒྱུ་མེད་པའི་བསླབ་བྱ་དེ་རེད།དུས་རྒྱུན་དགེ་རྒན་གྱིས་ནང་ལས་དང་སྦྱོང་ཚན་འདྲ་སྤྲད་དུས་ཁོ་མོས་ཡི་གེ་ཀ་ཅིག་མ་ཤེས་ཀྱང་དེར་ཐེ་གཏོགས་བྱ་རྒྱུ་དགའ་ལ་ལྷག་པར་དུ་སང་ཉིན་སློབ་གྲྭར་འགྲོ་དུས་“སློབ་གྲོགས་འདི་མཉམ་དུ་རྒྱུགས། གན་མཉམ་དུ་མ་འགྲོ་”ཞེས་རང་སྣང་ཅན་གྱི་འཇིག་རྟེན་ཆུང་ཆུང་དེར་གཙང་ཕྱགས་བྱ་རྒྱུ་ཁོ་མོས་སྔ་ས་ནས་གྲ་སྒྲིག་བྱེད་ཀྱིན་ཡོད།
ང་རང་བྱིས་པ་ཡིན་དུས་ངའི་ཨ་མས་ལོ་གསར་དུ་ཉོས་པའི་གོས་ལོག་གསར་པ་དེ་དང་ཟ་མ་དམིགས་བསལ་ཅན་དེ་གཉིས་མ་གཏོགས་གཞན་གང་ཞིག་ལ་ཡང་འགྲམ་ཆུ་ལྡང་མ་མྱོང་། ཁ་སང་ཁ་སྔོན་ནས་བཟུང་ཁོ་མོ་མལ་ས་ནས་ལངས་མ་ཐུབ་པར་རྟག་པར་གླ་ལུ་དྲག་པོ་རེ་རྒྱག་གིན་འདུག་པས་ངས་དུས་ཚོད་དེ་ཁོ་མོ་དང་རྒྱང་དུ་གྱེས་རྒྱུ་གོ་སྐབས་བཟང་པོ་ཞིག་ལ་བརྩིས་ནས་ས་རུབ་ཙམ་ལ་མ་གཏོགས་ནང་དུ་ལོག་ཡོང་གིན་མེད། ང་ཚོ་ཚང་མ་དང་པོ་བསྟན་འཛིན་རྣམ་གྲོལ་གྱི་ཁྱིམ་དུ་འཛུལ་ནས་རྩེད་མོ་གང་ཞིག་རྩེད་རྒྱུ་གྲོས་བྱས་པ་དང་དེ་ནས་བྱིས་པ་གཞན་ཞིག་གིས་མཚན་མོ་མུན་པ་རུབ་ཙམ་ལ་ཁྱིམ་མཚེས་ཀྱི་ཨ་ཁུའི་རྡོར་རྒྱམ་གྱི་ཞིང་ཁའི་ནང་དུ་ཨ་ཤོམ་བརྐུས་ཁར་འགྲོ་རྒྱུ་ཡིན་ཞེས་ངར་ལངས་སོང་། ཁྱིམ་མཚེས་གཞན་དག་གི་ནང་དང་བསྡུར་ཚེ་ཁོ་མོའི་ཁྱིམ་(བསྟན་འཛིན་རྣམ་གྲོལ་)ནི་ང་ཚོའི་ནང་དང་བར་ཐག་ཉེ་ཤོས་ཀྱི་གྲས་ཡིན་ལ་ནང་གི་སྒེའུ་ཁུང་ནས་བལྟས་ཚེ་ང་ཚོའི་ཁྱིམ་གྱི་ཕྱི་ཡི་བར་འཁྱམས་དང་ཤིང་གི་བཟོས་པའི་བྱ་ཚང་ཆུང་ཆུང་དེ་འདྲེན་བྱེད་ཟུང་དུ་གསལ་ལྷང་ངེར་མཐོང་ཐུབ་ཀྱིན་ཡོད།
གཉིས་པ།
ང་ཚོ་བྱིས་པ་ཚོའི་སེམས་དང་ལུས་པོ་ཡོད་ཚད་རྩེད་མོའི་ནང་དབྱིངས་ཚུད་པའི་སྐབས་དེར་ཁྱིམ་མཚེས་ཀྱི་ཨ་ཅག་ག་གེ་མོ་ཞིག་གིས་ཁོ་བོ་ཚུར་འབོད་ཙམ་བྱས་ནས་ཨ་མ་བདེ་བོ་ཡིན་མིན་དང་ན་ཚ་དྲག་རྒྱས་ཇི་ཙམ་སོང་ཐུབ་མེད་སྐོར་སྐད་ཆ་དྲིས་ཙམ་བྱས་སོང་། ངས་ཨ་མ་བདེ་བོ་ཡིན་པའི་བརྡ་ལ་མགོ་བོ་སྒུར་ཙམ་བྱེད་ནས་བྱིས་པ་གཞན་ཚོའི་འགྲམ་དུ་བྱ་འཕུར་བ་ལྟར་རྒྱུགས་ནས་ཕྱིན་པ་ཡིན། དོན་དངོས་ཐོག་ངའི་ཨ་མ་དངོས་གནས་བདེ་བོ་ཡིན་ནམ། མདང་དགོང་མུན་པ་རུབ་ནས་ནམ་སྨད་ཀྱི་ཆུ་ཚོད་བཅིུས་ཙམ་ཟིན་གྲབས་ཡོད་པའི་སྐབས་དེར་གློ་བུར་དུ་ཨ་མ་མལ་ས་ནས་གློ་ལུ་དྲག་པོ་ཞིག་གི་རྐྱེན་པས་ཡར་ལངས་སོང་ལ་ཁ་ནས་ཁྲག་བར་མེད་དུ་སྐྱུགས་ཀྱིན་འདུག དང་པོ་ཁོ་བོ་སྣང་ཚུལ་དེ་མཐོང་ནས་དངངས་སྐྲག་ཆེན་པོ་རེ་སྐྱེས་ནའང་གནས་ཚུལ་དེ་ཉིན་རེ་བཞིན་རྒྱུན་ལྡན་དུ་འགྱུར་བས་སེམས་པ་ཡང་བག་ཕེབས་སུ་གྱུར་སོང་།
ཡིན་ན་ཡང་ཨ་མའི་གདོང་གཤིས་ཉིན་རེ་ནས་ཉིན་རེ་སྐྱོ་རུ་འགྲོ་གིན་འདུག་ལ་དུས་ཚོད་གང་ཙམ་ཞིག་གི་རིང་ང་ཚོའི་ཁྱིམ་གྱི་ཁ་དབུགས་ཧྲིལ་པོ་དེ་ཡང་ཅུང་ཙམ་ཞིག་རྒྱུན་ལྡན་མེད་པ་ལྟ་བུ་ཞིག་ལ་གྱུར་སོང་། ཡིན་ན་ཡང་ངས་དེ་དག་ལ་སྣང་འཇོག་དེ་ཙམ་མ་བྱས་པར་དུས་རྒྱུན་སྨན་པ་དང་སྨན་ཁང་ག་གེ་མོ་ཞིག་ཏུ་ཨ་ཁུས་སྨན་ལེན་པར་མངགས་དུས་ངས་ཨ་མར་འཁང་ར་དང་ལེ་བདའ་བྱེད་པ་བགྲང་གི་མི་ལང་།
ད་ཅི་གོང་དུ་བྱིས་པ་པྲ་ཚག་ཅན་ཁོས་མཚན་མོ་མུན་པ་རུབ་ཙམ་ལ་ཁྱིམ་མཚེས་ཀྱི་ཞིང་ཁའི་ནང་དུ་ཨ་ཤོམ་བརྐུས་ཁར་འགྲོ་རྒྱུ་གྲོས་བྱས་ན་ཡང་ཁོའི་གཅུང་མོས་ལྐོག་ཏུ་ཨ་མ་ལ་ཞུ་གཏུགས་རྒྱབ་པའི་རྐྱེན་གྱིས་ཨ་མ་འདྲོགས་ལངས་ནས་ཁོར་གཅར་རྡུང་ཚད་མེད་ཅིག་བྱེད་ཀྱིན་ང་ཚོ་ཚང་མ་སོ་སོའི་ཁྱིམ་དུ་ལོག་རྒྱུ་བཀོད་མངགས་བཏང་སོང་། ང་རང་ཕྱོགས་གཅིག་ནས་ཁྱིམ་མཚེས་ཀྱི་བྱིས་པ་གཞན་ཚོ་ནང་བཞིན་བྲེལ་འཚུབ་ངང་ནང་དུ་ལོག་རྒྱུ་སེམས་ཁྲལ་ཕྲ་མོ་ཙམ་ཡང་མེད་ལ་ད་ལྟ་ཨ་མ་མལ་སར་ལྷུང་ཡོད་པའི་རྐྱེན་གྱིས་ཁོ་མོའི་སེམས་པའི་ནང་རང་གི་བུ་ཁྱི་ལྡོམ་འདྲ་བ་དེར་གཅིག་བྱ་བསམ་ཡང་ལུས་པོའི་མ་ཐུབ་པའི་སྣང་ཚུལ་དེར་ཁོ་བོ་སེམས་གཏིང་ནས་བགད་མོ་རེ་བྲོ་སོང་།
གང་ལྟར་ད་ལྟ་རྩེད་རོགས་ཚང་མ་ནང་དུ་ལོག་འདུག་ལ་ང་རང་ཡང་ཅུང་ཙམ་སྐྱོ་ངལ་དང་ཉོབ་སྣང་འདྲེས་མས་དཔེ་ཁུག་ཐེབས་ཆག་དེ་ཕྲག་པར་བླངས་ནས་ནང་དུ་སོང་བ་ཡིན། ད་ལྟ་དགོང་མོའི་ཆུ་ཚོད་
དྲུག་པ་དང་བདུན་པའི་གཡས་གཡོན་ཙམ་ཞིག་ཡིན་ན་ཡང་ཁྱིམ་མཚེས་ཀྱི་ཕྱི་སྒོའི་འགྲམ་ནས་འཐེན་པའི་བགྲོད་ལམ་ཐུང་ཐུང་དེ་མུན་པ་དང་བསིལ་རླུང་འཇམ་པོ་ཞིག་གི་གསེབ་ཏུ་ཚུད་འདུག་པས་ང་རང་ཅུང་ཙམ་ཞེད་སྣང་སྐྱེས་མགོ་བརྩམས་ནས་རང་ཉིད་ནང་གི་སྒོའི་འགྲམ་དུ་སླེབས་དུས་ཕྱི་སྒོ་ཤུགས་ཀྱི་བརྡུང་བ་ཡིན། ནམ་རྒྱུན་མུན་པ་རུབ་ཙམ་ལ་ནང་དུ་ལོག་ཡོང་དུས་ཨ་ཁུས་ཤུགས་ཀྱི་མཛུབ་མོ་རིང་མོ་དེ་ངའི་ཐོད་པར་བརྩུགས་ཙམ་བྱས་ནས་གནད་ལུགས་དང་རྒྱུ་མཚན་འདྲེས་མའི་གཤེ་གཤེ་དྲག་པོ་རེ་གཏོང་ནའང་། དེ་རིང་རྒྱུན་ལྡན་གྱི་སྣང་ཚུལ་དང་མ་འདྲ་བར་ང་རང་མགྱོགས་ཙམ་ནང་དུ་འཛུལ་ཤོག་ཅེས་སྐད་ངག་འཇམ་པོས་སྐུལ་ཙམ་བྱེད་ནས་ཕྲག་པར་ལག་པས་རྡེབ་ཙམ་བྱས་སོང་།
ང་རང་ནང་དུ་འཛུལ་ཡོོང་དུས་དུས་རྒྱུན་གྱི་ང་ཚོའི་ཁང་ཁྱིམ་ཆུང་ཆུང་དེ་གཉེན་ཉེ་དང་ཕྱི་མི་མང་པོས་ཁེངས་ནས་འདུག་པ་དང་གཅེན་པོས་ཟུར་གྱི་ཅོག་ཙེ་ཞིག་གི་འགྲམ་དུ་ཁུ་སིམ་མེར་མིག་ཆུ་ཕྱིས་ནས་ངར་བལྟས་འདུག ད་ལྟའི་ངའི་མིག་མདུན་གྱི་རྒྱུན་ལྡན་མིན་པའི་སྣང་ཚུལ་དེར་མགོ་བོ་འཐོམས་ནས་མགྱོགས་མྱུར་ཨ་མའི་མལ་ཁྲི་ཡོད་སའི་ཁང་པ་སྦུགས་མ་དེར་བལྟས་ཙམ་བྱེད་དུས་ཁོ་མོའི་ལུས་པོ་ཡོངས་རྫོགས་ཁ་བཏགས་ཀྱི་ཡོལ་བའི་ནང་དུ་བཏུམ་འདུག ང་རང་ཇི་ཙམ་ཞིག་ཁོ་མོའི་འགྲམ་དུ་སོང་ནས་“ཨ་མ་ ཨ་མ་”ཞེས་སྐད་ཤུགས་ཆེན་པོས་ངུ་འབོད་ཡང་ཡང་བྱེད་ཀྱང་ཁོ་མོས་དུས་རྒྱུན་ཚུར་ལ་ཡ་ལན་འབྱིན་པའི་གསོན་ཤུགས་དང་ཟིལ་སྟོབས་ཡོད་ཚད་རྨང་ནས་ཞིག་འདུག་ལ་ངས་ཁོ་མོས་ལག་པ་དམ་དུ་བཟུང་ནས་“ཨ་མ་མ་འགྲོ་དང་། སང་ཉིན་ནས་བཟུང་སྟེ་ངའི་བྱིས་པ་ཡ་རབས་ཅན་ཞིག་བྱ་ཆོག་”ཅེས་ངུ་སྐད་འདྲེས་མའི་ཀློང་ནས་འབོད་པའི་གནའ་ཚིག་དེ་དུས་ཚོད་ཀྱི་འཁོར་ལོ་བཅོ་ལྔ་ཙམ་ཞིག་འདས་ཀྱང་ད་ལྟ་ཡིན་ནའང་དྲན་པ་གསལ་པོ་གསོ་གིན་འདུག
ང་རང་མུན་པ་མང་སའི་གྲུ་ག་ཞིག་ཏུ་ཡུན་རིང་བོར་གཅིག་པུ་ངུས་ནས་བསྡད་དུས་ཨ་ཁུས་མང་པོ་ངུས་ནས་གཤིན་པོའི་རྣམ་ཤེས་ལ་ཡག་པོ་མེད་ཚུལ་དང་གཅེན་པོས་ང་རང་འཁྲིད་ནས་རྨོ་མོ་ཨ་ཆུང་ལགས་ཀྱི་ཁྱིམ་དུ་ཞག་སྡོད་བྱ་རྒྱ་བསླབ་བྱ་གནང་སོང་། སྐབས་དེར་ཁང་པའི་ཉེ་འགྲམ་གྱི་ཁྱིམ་མཚེས་དང་གཉེན་ཉེ་མང་པོས་ང་ཚོ་སྤུན་མཆེད་གང་བོར་སེམས་གསོ་ཚུལ་གྱི་སྐད་ཆ་གང་ཙམ་རེ་བཤད་པ་དང་སྐོར་
ཞིག་གིས་རྒྱབ་མདུན་གང་ས་ནས་“འདི་ངོ་མ་བསོད་ནམས་ཟད་པའི་རྟགས་རེད་”ཅེས་ཟུར་ཟའི་སྒྲ་རྣམས་གསལ་པོ་ཐོས་ཡོོང་གིན་འདུག
དེ་དུས་གལ་ཏེ་ངས་སློབ་གྲྭ་གྲོལ་མ་ཐག་ཤག་སེ་ནང་དུ་ལོག་ཡོང་སྟེ་ཁྱིམ་ལས་ཆུང་ཆུང་འདྲ་བྱས་ནས་ཨ་མ་དང་ཁ་བརྡ་ཐུང་ཐུང་རེ་བྱེད་ཡོད་ན་ད་ལྟ་ངའི་སེམས་པ་འགྱོད་གནོང་གི་ཁེངས་པ་ཞིག་ཡིན་སྲིད་དམ།
ནམ་རྒྱུན་ཨ་མ་མལ་སར་ལྷུང་དུས་ངས་ཨ་ཁུའི་བཀོད་མངགས་བཞིན་སྨན་ཁང་དུ་སྨན་ལེན་པར་སོང་ཡོད་ན་ད་ལྟ་ངའིི་སེམས་ཡིད་ཆད་ཀྱི་ཁེངས་པ་ཞིག་ཡིན་སྲིད་དམ། ད་ལྟ་ང་རང་ཨ་མའི་ཞལ་ལ་ཉན་པའི་བྱིས་པ་ཡ་རབས་ཅན་ཞིག་བྱེད་འདོད་ཡོད་ཀྱང་ཁོ་མོ་འཇིག་རྟེན་གཞན་ཞིག་ལ་ཕེབས་པའི་འགྲུད་བཞུད་དེ་ནས་ང་རང་ལ་ཕྱི་མིག་བལྟ་ཕོད་དམ། སྐབས་དེར་་ང་རང་གནམ་རྒན་པའི་མདུན་དུ་པུས་མོ་གཉིས་ས་ལ་བཙུགས་ནས་སྡོང་པོ་འགྱེལ་འགྱེལ་འདྲ་ཕྱག་འཚལ་ནས་ཁོ་མོ་ང་ཚོའི་འཇིག་རྟེན་དུ་ཡང་བསྐྱར་སྐྱེས་མ་ཞིག་གི་ཚུལ་དུ་ཡོང་རྒྱུ་རེ་འབོད་དང་ཡིད་ཆེས་བྱས་པ་དེ་ད་ལྟ་བསམ་བློ་རེ་གཏོང་དུས་ངོ་མ་བྱིས་བློས་སྦགས་པའི་རྒྱུ་ལས་མ་འདས་ན་ཡང་། ལོ་ན་དྲུག་བདུན་ཙམ་ལས་སོན་མེད་པའི་བྱིས་པ་ཞིག་ལ་མཚོན་ན་ཁོའི་ཨ་མ་འདས་ཁར་དཀོན་མཆོག་གསུམ་ལས་སྐྱབས་འཇུག་ཞུ་རྒྱུ་ལས་སྐབས་དེར་ཐབས་གཞན་མེད་པར་འགྱུར།
གསུམ་པ།
འཇིག་རྟེན་ནང་སྡུག་བསྔལ་གྱི་རིགས་ཇི་ཙམ་ཞིག་ཡོད་ན་ཡང་འཆི་བ་མི་རྟག་པའི་སྡུག་བསྔལ་ལས་ཆེ་བ་ཞིག་མེད་པ་ཁོ་བོས་སྐབས་དེ་དུས་ནས་ཤེས་སོང་ལ་ང་རང་འཇིག་རྟེན་འདི་ནང་སླེབས་དུས་ནས་ངའི་ཨ་ཕ་ཞེས་འབོད་སའི་སྐྱེ་བོ་དེ་གྱང་ལྡེབས་ཀྱི་ཤིང་གི་པར་སྒྲོམ་ཞིག་གི་ནང་དུ་འགུལ་མེད་ཚོར་མེད་ངང་སྡོམ་ཐག་དང་ཐལ་རྡུལ་གྱི་ཡོངས་སུ་ཁེངས་ནས་འདུག་ལ་ཁ་སང་ཨ་མ་ཞེས་འབོད་སའི་མ་ཡུམ་དེ་ཡང་ད་ལྟ་གློ་བུར་དུ་འཇིག་རྟེན་གཞན་ཞིག་གི་གཟིགས་མོ་ལ་ཕེབས་དུས་ངའི་འབྱུང་འགྱུར་གྱི་གྲུབ་འབྲས་དང་བྱ་བ་གང་ཞིག་ལའང་འདང་རྒྱག་བྱེད་མི་ཕོད། གང་ལྟར་ཨ་མ་འདས་ནས་ཉིན་གཉིས་ཙམ་གྱི་རྗེས་སུ་ཁོ་མའི་འདས་མཆོད་སྒྲུབ་སོང་ལ་ཨ་ཁུས་ང་ཚོ་སྤུན་མཆེད་བཞི་བོར་སེམས་པ་སྐྱོ་མི་དགོས་པའི་བསླབ་བྱ་ཡང་སེ་གནང་ནས་ཕྱི་རོལ་ལ་ལས་དོན་ཞིག་གི་ཆེད་དུ་བུད་སོང་།
ད་ལྟ་ང་ཚོ་སྤུན་མཆེད་བཞི་བོ་ཡ་གྲལ་སོང་ཟིན་པའི་བྱིའུ་བཞིན་མགོན་མེད་སྐྱབས་མེད་དུ་འགྱུར་སོང་ལ་ཁྱིམ་གྱི་སྒོ་ཟོག་དང་བྱ་ཚང་ཐམས་ཅད་ལྟ་རྟོགས་བྱེད་ཀྱིན་མེད་པའི་རྒྱུ་མཚན་ལ་བརྟེན་ནས་ཁོ་ཚ་ཡང་ངའི་ཨ་མ་དང་ལྷན་དུ་གློ་བུར་དུ་ཡལ་སོང་།
བཞི་པ།
ང་རང་དེ་དུས་བྱིས་པ་ཆུང་ཆུང་ཞིག་ལས་མེད་ན་ཡང་ངའི་ཨ་མའི་ཁར་ནམ་ཡང་ཉན་མྱོང་མེད་ལ་ལྷག་པར་དུ་ཁོ་མོ་མལ་སར་ལྷུང་དུས་ངའི་རོགས་བྱས་པ་གང་ཞིག་ཀྱང་དྲན་གིན་མི་འདུག ང་རང་ཁོ་མོའི་བྱམས་བརྩེ་དང་བྲལ་ནས་ལོ་ངོ་བཅོ་ལྔ་ཙམ་ཞིག་དུས་ཚོད་ཀྱི་བཞུར་རྒྱུན་ཁྲོད་ནས་འདས་ན་ཡང་ཨ་ཁུས་བཀའ་དྲིན་ལ་བརྟེན་ནས་ད་ལྟ་མཐོ་སློབ་ཀྱི་སྐས་འཛེགས་སྟེང་དུ་རྐང་རྙོབ་ཙམ་བྱེད་ཐུབ་སོང་། དྲང་པོར་བཤད་ན་ཁོ་མོ་གཞན་ཡུལ་དུ་གཤེགས་པ་འདི་ངའི་བྱིས་པའི་བསམ་བློར་བག་ཆགས་ཟབ་མོ་ཞིག་བཞག་སོང་ལ་ང་རང་བྱིས་པ་གཞན་ཚོ་དང་སྐབས་འགར་ལག་འཛིང་དང་ཁ་འཛིང་རེ་ཤོར་དུས་ཁོ་ཚོས་རུབ་ནས་ངར་“དྭ་ཕྲུག་”ཅེས་མཚང་མིང་འདོན་པ་བགྲང་གི་མི་ལང་ལ་ཁྱིམ་མཚེས་ཀྱི་བྱིས་པ་གཞན་ཚོ་ནང་མི་ལྷན་འཛོམས་བྱེད་ནས་ལོ་གསར་པར་རྟེན་འབྲེལ་གྱི་མཛད་སྒོ་སྒྲིག་དུས་ངས་ཉིན་མ་རེ་རེར་ཁེར་རྐྱང་དང་སྡུག་ཡུས་ཀྱི་ངང་ནས་འཕུད་ཐབས་བྱེད་དགོས་བྱུང་སོང་། མ་གཞི་ཕྱི་མི་ཚོས་ཁོ་བོར་བསོད་ནམས་ཟད་པའི་བུ་ཕྲུག་ཅེས་ཟུར་ཟ་བྱེད་པ་དེར་སྐབས་འགར་བསམ་བློ་རེ་གཏོང་དུས་ཁོ་ཚོར་ངོ་མ་སྐྱོན་མི་འདུག་སྙམ།
ངས་ཁོ་མོའི་བྱམས་བརྩེ་དང་བརྩེ་དུངས་ཀྱི་ཐ་སྙད་རེ་རེ་ལ་གཏན་ནས་སྣང་འཇོག་བྱས་མྱོང་མེད་ལ་ཁོ་མོ་ད་ལྟ་འཇིག་རྟེན་ནང་བཞུགས་ཡོད་ཚེ་ངས་སླར་ཡང་ཚིག་རྩུབ་དང་ངན་གཏམ་ཁོ་ན་བཤད་དེ་ཁོ་མོར་སྡུག་བསྔལ་འཕར་མ་ཞིག་སྤྲད་རྒྱུ་ཡིན་པ་ལས་གཞན་གང་ཡང་མེད།
ལྔ་པ།
གང་ལྟར་ཨ་མའི་གྲོངས་པའི་ཉིན་དེ་ནས་བཟུང་ང་རང་བྱིས་པ་ཡ་རབས་ཅན་ཞིག་དང་ལྷག་པར་དུ་སློབ་མ་འབད་འབུངས་ཅན་ཞིག་བྱ་རྒྱུ་ལས་ལམ་གཞན་མ་རྙེད་པས་སྐབས་འགར་ངས་སློབ་གྲྭ་ནས་གྲུབ་འབྲས་དང་བྱ་དགའ་ཆུང་ཆུང་འདྲ་བླངས་ཡོད་དུས་ཁོ་མ་ད་ལྟ་བཞུགས་ཡོད་ན་བསམ་པའི་འདུན་པ་འགོག་མེད་ཅིག་སྐྱེས་ཡོང་གིན་འདུག ད་ལྟ་ང་རང་བྱིས་དུས་ཀྱི་རྨི་ལམ་རྨིས་སའི་སྡེ་བ་དེ་དང་སྡེ་བ་དེ་ནང་གི་ཨ་ཁུ་ལོ་ལོན་བཀའ་དྲིན་ཅན་ཁོང་དང་ཁ་བྲལ་ནས་ལོ་ངོ་ལྔ་གསུམ་བཅོ་ལྔ་ཙམ་ཞིག་སེ་གོལ་གཏོགས་པ་ལྟ་བུ་ཇ་ཡུན་ཙམ་གྱི་འདས་ན་ཡང་ཨ་མའི་བྱམས་བརྩེ་དང་བག་ཆགས་ཟབ་མོ་དེ་དག་དྲན་ཐེངས་རེརེ་འདས་སོང་གི་འཚོ་བ་གང་མང་ཞིག་ལ་བསམ་གཞིག་བྱེད་དགོས་བྱུང་སོང་ལ་སྐབས་འགར་བྱིས་པ་པྲ་ཚག་ཅན་ཞིག་གི་རྣམ་ཤེས་ལ་འཛུལ་ནས་མིག་ནས་རང་དབང་མེད་པར་མཆི་མ་ལྷུང་འགྲོ །
ཨོ་པུ་གུ་ཨ་མ་དྲན་གྱི་ཡོད་པའདྲ། འོ་མ་ཐུང་སློབ་སྦྱོང་ཡག་པ་བྱོས་དང་བྱི་རིལ་མངར་མོ་མངན་པ་སྤྲད་ཆོག་པུ་གུ་མ་ངུ་ཨ།
ལགས་སོ།། །།