དྲི་ཆུ་གྲུབ་ཚུལ་དང་དྲི་ཆུའི་ཕན་ཡོན་སྐོར་ལ་རོབ་ཙམ་གླེང་བ་བྱིས་པའི་ལྡིབ་སྐད།

མི་ཞུན། ཝར་ཎ་མཐོ་སློབ།

ས་ཆེན་རྒྱལ་བོའི་རྒྱལ་བོ་དང་ནི་འདི་ཕྱིའི་གོང་མའི་གོང་མ་ཉིད།།
འགྲོ་བ་ཀུན་གྱི་མགོན་པོ་དང་ནི་སྡུག་བསྔལ་ཞི་བའི་ཞི་བ་ཉིད།།
ཐར་དང་བདེ་བའི་ལམ་ཆེན་དང་ནི་སྟོན་པའི་ཕྱོགས་སྟོན་འཁོར་ལོ་ཉིད།།
ཚད་མེད་སྙིང་རྗེའི་གོང་བུ་དང་ནི་ཆེན་པོའི་ཆེན་པོ་ཁྱོད་ལ་འདུད།།

ས་ལཱའི་སྨན་ལྗོངས་ཆེན་མོ་དང་ནི་ཀེ་ལ་ཤ་ཡི་རྒྱལ་བོའི་གནས།།
ས་བཅུད་དགེ་བའི་གཏེར་མཛོད་དང་ནི་སྣོད་ཁམས་ཆེན་མོའི་རྩེ་མོ་ཉིད།།
ས་སྟེང་མཁས་པའི་ཡང་རྩེ་དང་ནི་བདེ་འདྲེན་འཁོར་ལོའི་བྱེད་པོའི་ཁྱུ།།
ས་ལ་གྲགས་པའི་ཆུ་འཛིན་དཀར་པོ་གཡུ་ཐོག་ལ་སོགས་ཀུན་ལ་འདུད།།

དཀའ་བ་སྟོང་གི་སྡུག་པ་དང་ནི་འཁུར་ཆེན་བཟོད་པའི་བརྟུན་པོ་གང་།།
ཤེས་བྱ་འཁྱིལ་བའི་རྒྱ་མཚོ་དང་ནི་སྐོམ་འཐུང་ཧམ་པའི་རི་བོ་ཅན།།
རིག་བཅུའི་མཁྱེན་དཔྱོད་རྫོགས་པ་དང་ནི་སྐད་སྣ་ཚོམ་བུའི་བདག་པོ་ཁྱེད།།
ཚེ་འཛིན་གསོ་བའི་སྲོག་རྩ་དང་ནི་མི་ཆུང་ང་འདྲའི་མགོན་པོ་ཉིད།།

ཀླད་མའི་སྐད་ཆ།

དྲི་ཆུ་ཟེར་བ་ནི་གསོ་རིག་གཞུང་ལུགས་ཀྱི་ཐ་སྙད་ཅིག་རེད། ཕལ་སྐད་དུ་དེ་ལ་གཅིན་པ་ཟེར་གྱི་ཡོད། གཅིན་པ་ནི་མི་ཡིན་པ་ཐམས་ཅད་ཙམ་དུ་མ་ཟད་འབུ་སྲིན་གྲོག་མ་ཡན་ཆད་ལ་ཡང་ཡོད་ངེས་པའི་ལུས་ཟུངས་ཀྱི་སྙིགས་མ་(བོད་ཀྱི་གསོ་རིག་གཞུང་ལུགས་སུ་ལུས་ཟུངས་ཀྱི་སྙིགས་མར་འདོད་ཀྱི་ཡོད)ཞིག་ཡིན། བོད་ལུགས་གསོ་རིག་ཚིག་མཛོད་ཆེན་མོ་ལས་དྲི་ཆུ་ནི་ཁ་ཟས་སླ་བའི་སྙིགས་མ་གཅིན་གྱི་མིང་ཞེས་བཀོད་འདུག་པ་དང་ཝཱེ་ཁེ་ཚིག་མཛོད་ནང་དུ་གཅིན་པ་ནི་རྩ་བའི་ཆ་ནས་ཆུ་ཡིན། དེའི་ནང་དུ་ད་དུང་ལུས་ཟུངས་ཀྱི་བཅུད་རྫས་སྤྲི་དཀར་དང་རྨེན་བུའི་སྐུལ་རྒྱུ་ལ་སོགས་ཚུད་པའི་སྐྱེ་མེད་ཚྭ་དང་སྐྱེ་ལྡན་འདུས་རྫས་སྣ་འཛོམས་ཅན་ཞིག་ཀྱང་ཚུད་ཡོད་ཅེས་གསུངས་འདུག གང་ལྟར་ན་ཡང་། གཅིན་པ་ནི་མི་ཚང་མའི་སྣང་ངོ་ལ་ལུས་ཟུངས་ཀྱི་སྙིགས་མ་ཡིན་ཕྱིར་དེ་ནི་རང་བཞིན་གྱིས་བཙོག་པ་དང་རྫོབ་རོ་དྲི་མ་ཅན་ཞིག་ལ་ལྟ་ཡི་ཡོད་པ་དང་ཕན་མེད་དགོས་མེད་ཀྱི་སྙིགས་རོ་ལྷག་མ་ཞིག་ཀྱང་ཡིན་པར་འདོད་ཀྱི་ཡོད། དོན་དངོས་གནས་དྲི་ཆུ་ལ་ང་ཚོའི་བསམ་ཡུལ་ལས་འདས་པའི་ན་ཚ་གསོ་བཅོས་ཀྱི་ནུས་པ་ཁྱད་པར་བ་ཞིག་ཡོད་པ་ནི་མང་པོ་ཞིག་གིས་ཤེས་མེད། ལར་ནས། འཇིག་རྟེན་གྱི་བྱ་དངོས་ཕྲ་མོ་རེ་རེ་ལ་ཡང་རང་རང་གི་ཚད་དང་ཚོད་ལ་དཔག་པའི་ནུས་པ་དང་ངོ་བོ་མ་འདྲ་བ་རེ་ཡོད་ངེས་པ་ནི་གཞི་གྲུབ་པས། སྨན་གྱི་བླ་མ་གཉིས་པ་འཚོ་བྱེད་གཞོན་ནུས་ཀྱང་། ས་སྟེང་འདི་ན་སྨན་མིན་གང་ཡང་མེད། ཅེས་གསུངས་པ་བཞིན་དྲི་ཆུ་ནི་གདོད་མའི་དུས་རབས་ནས་བཟུང་འཛམ་བུ་གླིང་གི་རྒྱལ་ཁབ་མང་པོ་ཞིག་གི་མི་རྣམས་ཀྱིས་ལོ་རབས་ནས་ལོ་རབས་དང་མི་རབས་ནས་མི་རབས་བར་ན་ཚ་གསོ་བཅོས་དང་ནད་མེད་བདེ་ཐང་གི་ཕྱིར་དུ་སྤྱད་ནས་ཡོང་བའི་རང་ལུས་ཀྱི་སྨན་མཆོག་ཁྱད་པར་བ་ཞིག་རེད། དེ་ནི་འཛམ་གླིང་སྤྱིའི་འགྲོ་བ་མི་རྣམས་ཀྱིས་རང་ལུས་སྲུང་སྐྱོབ་དང་རང་ཕུང་བདེ་ཐང་། ན་ཚ་སྔོན་འགོག་དང་ནད་གཞི་རྩ་གཏོར་སོགས་ཀྱི་དོན་དུ་བཀོལ་སྤྱོད་ཤུགས་ཆེན་བྱས་པའི་སྨན་ཆུ་ནུས་པ་ཅན་ཞིག་ཀྱང་རེད་འདུག། དཔེ་བཞག་ན། རོ་མ་རྒྱལ་ཁབ་ཀྱི་སྐབས་སུ་མི་རྣམས་ཀྱིས་དྲི་ཆུ་སྤྱད་དེ་སོ་དཀར་པོ་གཏོང་ལུགས་ཀྱི་སྲོལ་རྒྱུན་ཞིག་ཡོད་པ་དང་། རྒྱ་ནག་གི་མི་དམངས་ས་ཡ་གཅིག་ཙམ་ཀྱིས་གཟུགས་པོ་བདེ་ཐང་དང་ནད་མེད་རྒས་མེད་ཀྱི་ཕྱིར་དུ་རང་གི་དྲི་ཆུ་ཁོག་ལ་འཐུང་བ་དང་ཕྱི་ལ་བསྐུ་བ་སོགས་ཀྱི་བྱེད་ཐབས་སྤྱོད་ཀྱི་ཡོད། ལྷག་པར་དུ་བྱིས་པའི་ངོ་གདོང་བཀྲུ་བ་ལ་བྱིས་པའི་དྲི་ཆུ་བེད་སྤྱོད་གཏོང་ཤུགས་ཧ་ཅང་ཆེན་པོ་མཆིས། ཁོང་ཚོས་དྲི་ཆུ་ནི་ཤིན་ཏུ་ནུས་པ་ཐོན་ཤོས་ཅན་གྱི་སྨན་ཆུ་ཞིག་ལ་ངོས་འཛིན་བྱེད་ཀྱི་ཡོད། ཧྥ་རིན་སའི་ནང་དུ་རྩི་ཤིང་གི་གཞུང་རྟ་དྲི་ཆུའི་ནང་ལ་སྦངས་ཏེ་གྲེ་བའི་ན་ཚ་གསོ་ཕྱིར་སྐེ་ལ་སྒྲིལ་བའི་སྤྱི་སྲོལ་ཞིག་འདུག དུས་རབས་བཅུ་བདུན་པའི་ནང་དུ་ཧྥ་རིན་སའི་བུད་མེད་རྣམས་ཀྱིས་རང་གི་ལུས་ཀྱི་པགས་མདོག་སྙིང་རྗེ་བོ་ཆགས་པའི་ཕྱིར་དུ་དྲི་ཆུའི་ནང་ལ་འཁྲུས་བརྒྱག་གི་ཡོད་རབས་བཤད། ཐེ་ཝན་རྒྱལ་ཁབ་ཀྱི་ནང་དུ་མི་དམངས་སྟོང་ཕྲག་ཉིས་བརྒྱ་༢༠༠༠༠༠་ཡིས་དྲི་ཆུ་སྤྱོད་ཀྱི་ཡོད། ད་དུང་རྒྱ་གར་ནང་དུ་ཡང་དྲི་ཆུའི་གསོ་ཐབས་སྤྱོད་མཁན་གྱི་མི་གྲངས་ཧ་ཅང་མང་ཤོས་ཤིག་ཆགས་ཡོད། དྲི་ཆུ་ནི་གནའ་བོའི་རྒྱལ་ཁབ་གྷི་རི་ཁུ་དང་རོམ། འཇར་མེན། ཧྥ་རིན་སི། ཉི་ཧོང་། ཀོ་རི་ཡ། ཐེ་ཝན། རྒྱ་ནག རྒྱ་གར། བོད། གཞན་ཡང་འཛམ་བུ་གླིང་གི་རྒྱལ་ཁབ་མང་པོ་ཞིག་གི་ནང་དུ་གནའ་ནས་ད་བར་དུ་རྒྱུན་མ་ཆད་པར་བཞུར་ནས་ཡོང་བའི་དམངས་ཁྲོད་རིག་གནས་སམ་ཡང་ན་སྲོལ་རྒྱུན་རིག་གནས་ཀྱི་ཡ་གྱལ་བ་ཞིག་སྟེ་ན་ཚ་གསོ་བཅོས་ཀྱི་རིག་པ་དཔེ་མེད་ཅིག་ཡིན་པ་རེད།
ཆོས་ལུགས་ཀྱི་ཐད་ནས་བཤད་ནའང་ཡེ་ཤེས་ཆོས་ལུགས་ཀྱི་བསྟན་བཅོས་གཙོ་བོ་བྷ་བྷེལ་ནང་དུ་”Drink waters from thy own cistern.རང་གི་ཆུ་མཛོད་ཀྱི་གཙང་ཆབ་འཐུང་ཞེས་གསུངས་ཡོད་པ་དང་། ཧིན་དྷིའི་ཆོས་ལུགས་ཀྱི་ནང་དུ་ཡང་ཚེ་ཡི་རིག་བྱེད་ཀྱི་མ་མ་རུ་འབོད་པའི་ནག་པོའི་བསྟན་བཅོས་ Shivambu Shastra ཞེས་པ་ལས་རང་ཉིད་ཀྱི་དྲི་ཆུ་ནི་ལྷ་ཆེན་པོའི་བདུད་རྩི་waters of shivaཡིན་པར་གསུངས་ཡོད། དེ་བས་དྲི་ཆུ་ནི་འཛམ་བུ་གླིང་འདིའི་འགྲོ་བ་མི་སྤྱི་མཐུན་གྱིས་གདོད་མའི་དུས་སྐབས་ནས་བཟུང་ལག་ལེན་ལ་དངོས་སུ་བསྟར་ཏེ་རང་ཉིད་ཀྱི་མྱོང་བ་རྗེན་པ་དང་གདམས་ངག་ཟབ་མོ་བརྒྱུད་སྤེལ་གྱིས་རྒྱུན་མ་ཆད་པར་དར་བའི་ནད་མེད་རྒས་མེད་ཀྱི་གསོ་ཐབས་ནུས་ཅན་ཞིག་ཏུ་གྱུར་མཆིས་པའི་རྒྱུ་མཚན་གྱིས་ད་ལྟའི་དུས་ལ་ཡང་མི་དམངས་ས་ཡ་དུང་ཕྱུར་མང་པོས་རང་ཉིད་ཀྱི་དྲི་ཆུ་རང་ཉིད་ཀྱི་ན་ཚ་གསོ་བཅོས་དང་ནད་མེད་བདེ་ཐང་གི་ཕྱིར་དུ་ཡིད་ཆེས་དང་དད་པའི་སྒོ་ནས་སྤྱོད་ཀྱི་ཡོད་པའི་རིགས་གཅིག་དང་བརྟག་པ་དང་དཔྱད་པ་དཔྱིས་ཕྱིན་པའི་སྒོ་ནས་དྲི་ཆུའི་ཕན་ནུས་རྟོགས་ཏེ་སྤྱོད་ཀྱི་ཡོད་པའི་རིགས་གཅིག་ཡོད།
གསོ་རིག་གཞུང་ལུགས་མང་པོའི་ཐད་ནས་བཤད་ནའང་རྒྱ་གར་གྱི་ཚེ་ཡི་རིག་བྱེད་དང་། ཧི་མོ་པེ་ཐེ། བོད་ཀྱི་གསོ་བ་རིག་པ། རྒྱ་ནག་གི་ཀྲུང་དབྱི་སོགས་ཀྱི་ནང་དུ་ཡང་དྲི་ཆུའི་གསོ་ཐབས་ཀྱི་སྐོར་ལ་མང་པོ་གསུངས་ཡོད། དྲི་ཆུ་སྤྱད་དེ་ན་ཚ་གསོ་བཅོས་དང་ལུས་པོ་བདེ་ཐང་དུ་གཏོང་བའི་རིག་པ་འདི་ནི་ལོ་ངོ་སྟོང་ཕྲག་མང་པོའི་ཡར་སྔོན་ནས་བྱུང་བའི་སྲོལ་རྒྱུན་རིག་གནས་ཀྱི་ཐབས་བྱུས་ཤིག་སྟེ་འདི་ལ་རྨ་མེད་པའི་དགེ་མཚན་བླ་ལྷག་ཏུ་མཆིས་པ་དང་དྲི་མེད་པའི་ནུས་པ་ངོ་མཚར་ལྡན་པ་ཞིག་གདའ་བ་ནི་གནའ་བོའི་འཚོ་བྱེད་པ་དང་ཆོས་བཤད་པ། མཁས་པ་དང་བླ་མ་སོགས་ཀྱི་རྟོགས་རིག་གི་ཡིད་ཤེས་ལས་འཁྲུངས་པའི་བསྟན་བཅོས་གཤའ་མ་དག་གིས་ར་སྤྲོད་པ་མ་ཟད་དེང་གི་ཚན་རྩལ་རིག་གནས་ཀྱིས་གསར་གཏོད་མཛད་པའི་ཕྲ་མཐོང་ཤེལ་མིག་ལས་ཀྱང་ཁུངས་བདེན་དག་སེལ་བྱེད་ཀྱི་ཡོད་པ་ཡིན། ང་རང་སྒེར་ལ་མཚོན་ནས་བཤད་ནའང་ཆུང་དུས་ནས་ཆམས་པ་བྱུང་བ་དང་མིད་པ་སྐྲངས་པ། རྨ་བཟོས་པ་ལ་སོགས་པའི་དུས་སུ་ཕ་མས་རྒྱུན་དུ་རང་གི་དྲི་ཆུ་འཐུང་གི་འཇུག་པ་དང་རྨ་ལ་བསྐུ་བ་སོགས་བྱེད་ཀྱི་ཡོད་པས། དུས་དེ་ནས་བཟུང་སྟེ། དྲི་ཆུ་ནི་ནུས་ཅན་དང་སྟོབས་ཅན་གྱི་སྨན་ཆུ་ངོ་མཚར་བ་ཞིག་ཡིན་པའི་བག་ཆགས་ཟབ་མོ་ཞིག་མངའ་བ་དེའི་དབང་དུ་བྱས་བའམ་ཡང་ན་ཚོར་སྣང་དེ་ལྟ་བུ་ཞིག་གི་བརྒྱུད་སྐུལ་ལ་བརྟེན་ནས་དེ་རིང་གི་བརྗོད་གཞི་འདིའི་སྒང་ལ་རྩོམ་ཡིག་ཅིག་འབྲི་འདོད་ཆེན་པོ་སྐྱེས་པ་ཡིན། ཞོར་དུ་ཡིག་ཆའི་དེབ་དང་དྲ་རྒྱ་མང་པོ་ཞིག་གི་རྒྱབ་འདེགས་ཀྱི་ཀ་བ་ལ་ཁེན་ནས་དང་པོ་དྲི་ཆུའི་གྲུབ་ཚུལ་གྱི་སྐོར་དང་གཉིས་པ་དྲི་ཆུའི་ཕན་ཡོན་གྱི་སྐོར་ལ་རང་ལུགས་དང་ཕྱི་ལུགས་གཉིས་ཐད་ནས་རིག་པ་སྐོར་འདོན་གྱིས་རང་གི་ཤེས་བྱའི་འཇོན་ཚད་ལ་དཔག་ནས་ཅུང་བྲི་བར་བྱའོ།།

དང་པོ། དྲི་ཆུ་གྲུབ་ཚུལ་སྐོར་ལ་བཤད་པ།

གསོ་བ་རིག་པའི་རྣམ་བཞག་ལ་སྦྱངས་པ་མ་ཐོན་པའི་མི་ཞིག་ཡིན་ན་ཕལ་ཆེར་རང་ལུས་ཀྱི་དྲི་ཆུ་གྲུབ་ཚུལ་གྱི་སྐོར་ལ་སྐད་ཆ་བཤད་རྒྱུའི་ལྕེ་ཤེད་དེ་ཙམ་མངའ་བར་མི་འདོད། རྒྱུ་མཚན་གསོ་བ་རིག་པའི་གཞུང་ལུགས་དང་འབྲེལ་བ་གཏན་ནས་མེད་པའི་མི་ཞིག་གིས་དེའི་སྐོར་ལ་དོ་སྣང་བྱེད་སྲིད་པ་ཁག་པོ་རེད། དེ་བས། མང་པོ་ཞིག་གིས་གཅིན་པ་ནི་རྒྱུ་གང་ཞིག་གིས་གྲུབ་པ་དང་། ཇི་ལྟར་གྲུབ་པ། ཅིའི་ཕྱིར་གྲུབ་པ་སོགས་ཀྱི་སྐོར་ལ་ཤེས་འདོད་ཆེར་རྐྱེན་གུས་ཀྱིས་འདིར་རང་གི་ཀླད་པས་འཁྱོག་ཚོད་ཅིག་དང་ཤེས་བྱས་ལྕོགས་ཚོད་ཅིག་ཀུན་གྱི་སྤྱན་ངར་བཏེགས་པར་མགུ་བ་ལ།
དང་པོ་རང་ལུགས་བོད་ཀྱི་གསོ་བ་རིག་པའི་གཞུང་ལུགས་དཔལ་ལྡན་རྒྱུད་བཞིའི་བཤད་རྒྱུད་ལེའུ་ལྔ་པ་ལུས་ཀྱི་མཚན་ཉིད་བསྟན་པའི་ནང་དུ། འགྱུར་ཚུལ་ཞུ་རྗེས་དྭངས་སྙིགས་བྱེ་བ་ལས།། སྙིགས་མ་རྒྱུ་མར་སྐ་སླ་གཉིས་སུ་བྱེ།། སྐ་བ་བཤང་འགྱུར་སླ་བ་གཅིན་དུ་འགྱུར།། ཞེས་གསུངས་ཡོད་པ་དང་། འདི་ལ་དྲང་སྲོང་ཞལ་ལུང་ལས། ཟས་སྐོམ་གང་ཟོས་པ་མཐའ་དག་བད་ཀན་མྱག་བྱེད་ཀྱིས་མྱགས། མཁྲིས་པ་འཇུ་བྱེད་ཀྱིས་བཞུས། ཞུ་བའི་རྗེས་སུ་མེ་མཉམ་རླུང་གིས་དྭངས་སྙིགས་གཉིས་སུ་ཕྱེས་པ་ལས་སྙིགས་མ་རྣམས་ཀྱང་རྒྱུ་མའི་སྨད་དུ་རིམ་བཞིན་སྐ་སླ་གཉིས་སུ་བྱེ་ནས། སྐ་བ་རྣམས་ལོང་དུ་སོང་སྟེ་བཤང་བར་འགྱུར་བ་དང་། རིམ་བཞིན་འཕོངས་སྒོ་ནས་ཕྱིར་འབྱིན་པར་བྱེད་པ་དང་། སླ་བ་རྣམས་རྒྱུ་གྲོགས་སམ་རྒྱུ་མའི་ལྡེབས་ཀྱི་རྩ་ལམ་མང་པོ་བརྒྱུད་དེ་མཐར་མཁལ་མར་སོང་ནས་གཅིན་དུ་འགྱུར་བ་དང་། རིམ་བཞིན་ལྒང་པར་གསོག་ཅིང་གཅིན་ལམ་བརྒྱུད་ལུས་ཀྱི་ཕྱིར་འབྱིན་པར་བྱེད་པའོ།། ཞེས་གསལ་བར་གསུངས་ཡོད།
གཞན་ཡང་། ཕྱི་མ་རྒྱུད་ཀྱི་ལེའུ་གཉིས་པའི་ནང་དུ་ གྱུར་ཚུལ་ཟས་སྐོམ་ཕོ་བར་དྭངས་སྙིགས་ཕྱེ།། སྙིགས་མ་རྒྱུ་མའི་ནང་ཚུད་སྐ་སླ་ཕྱེ།། སླ་བ་རྒྱུ་གྲོག་རྩ་ནས་ལྒང་པར་འདྲིལ།། ཞེས་གསུངས་པ་འདི་ལ་ཡང་དྲང་སྲོང་ཞལ་ལུང་ལས་ཟས་སྐོམ་གང་དང་གང་ཟོས་ཤིང་འཐུང་བ་རྣམས་ཕོ་བར་སླེབས་པའི་ཚེ་ཕོ་བར་བད་ཀན་མྱག་བྱེད་ཀྱིས་མྱགས་པ་དང་། མཁྲིས་པ་འཇུ་བྱེད་ཀྱིས་བཞུས། རླུང་མེ་མཉམ་གྱིས་དྭངས་སྙིགས་ཕྱེ་བ་ལས་སྙིགས་མ་རྣམས་རྒྱུ་མའི་ནང་དུ་ཚུད་ནས་སླར་ཡང་སྐ་བའི་ཆ་དང་སླ་བའི་ཆ་གཉིས་སུ་ཕྱེ་བའི་སླ་བ་ནི་རྒྱུ་གྲོག་ཅེས་རྒྱུ་མའི་སྡེབས་སུ་དྲྭ་བ་ལྟར་འབྲེལ་བའི་རྩ་སྦུབས་ཕྲ་མོ་རྣམས་ནས་རིམ་པར་རྒྱུ་ཞིང་འཁོར་བ་འཁོར་ཏེ་མཐར་ལྒང་པར་འདྲིལ་བ་སྟེ་འབབ་ནས་གཅིན་དུ་གྱུར་པ་ཡིན་ནོ།། ཞེས་གསུངས་འདུག
མདོར་དྲིལ་ནས་བཤད་ན་བཟའ་བཏུང་གི་ཟས་སྐོམ་གང་ཡིན་རུང་ཐོག་མར་ཁ་དང་ལྕེ། མིད་པ་དང་གྲེ་བ་བརྒྱུད་དེ་ལྟོ་བར་འགྲོ་བ་དང་ལྟོ་བ་ནས་མེ་དྲོད་རྣམ་པ་གསུམ་གྱིས་མྱག་ཞུ་དྭངས་སྙིགས་ཕྱེས་པས་སྙིགས་མ་རྣམས་རྒྱུ་མར་འགྲོ་བ་དང་རྒྱུ་མ་ནས་སླར་ཡང་སྐ་སླ་གཉིས་སུ་ཕྱེས་ཏེ་སྐ་བ་རྣམས་རྒྱུ་མ་ནས་ལོང་བ་བརྒྱུད་བཤང་བར་འགྱུར་བ་དང་། སླ་བ་རྣམས་རྒྱུ་མ་དང་ལོང་ཀའི་ལྡེབས་ངོས་སུ་མངའ་བའི་རྩ་ཕྲན་དག་བརྒྱུད་དེ་མཁལ་མའི་རོགས་པ་ལ་བརྟེན་ནས་ལྒང་པར་འདྲེས་ཀྱི་ཡོད་པར་གསུངས་ཡོད།
ཕྱི་ལུགས་ཀྱིས་མིའི་རིགས་ཀྱི་མཁལ་མ་ནི་རིམ་པ་གསུམ་ལ་བགོས་ཡོད། དེ་ནི་མཁལ་མའི་ཕྱི་ཤུན་ཀོ་ཏེ་ཀི་སི་ cortex དང་མེ་ཏྲོ་ལ་ medulla གཞན་ཡང་ pelvis བཅས་ཡིན་པར་གསུངས། མཁལ་མའི་འཕར་རྩ་བརྒྱུད་དེ་ཁྲག་རྣམས་རྐང་ལ་རྒྱུ་བ་དང་དེ་ནས་ཀོ་ཏེ་ཀི་ཟི་ལ་རྒྱུ་བར་བྱེད། མཁལ་མའི་འཕར་རྩའི་ཡན་ལག་རྣམས་ནི་འཕར་རྩ་ཕྲ་མོར་རྒྱས་ཤིང་འཕེལ་བ་དང་། འཕར་རྩ་ཕྲ་མོ་རེ་རེ་ནི་ཁྲག་དྭངས་སྙིགས་འབྱེད་བྱེད་ཀྱི་ནེ་ཧྥུ་རོན་ཟེར་བ་དེ་རུ་རྒྱུ་མཚམས་འཇོག བདེ་ཐང་གི་མཁལ་མ་ཞིག་གི་ནང་དུ་ནེ་ཧྥུ་རོན་ཁྲི་གཉིས་ལྷག་ཡོད་པར་བཤད་ཀྱི་འདུག དེ་ཡིས་ཉི་མ་རེ་ལ་ཁྲག་ལེ་ཁྲར་190བཙག་གི་ཡོད། སྤྱིའི་ཆ་ནས་གཅིན་པ་ནི་བརྒྱ་ཆའི་གོ་ལྔ་95% ཆུ་ཡིན་པར་བཤད་པ་དང་། * 2.5% urea(དམུ་རྫིང་)་ཡིན། གཞན་པ2.5%ནི་སྤྲི་དཀར་དང་རྨེན་བུའི་སྐུལ་རྒྱུ། འཇུ་བྱེད་གཤེར་ཁུ། ཚྭ། གཏེར་རྫས་ལ་སོགས་འདྲེས་མ་ཞིག་ཡིན་པར་གསུངས་འདུག
མདོར་དྲིལ་ནས་བཤད་ན་ཕྱོགས་གཉིས་ཀའི་བཤད་ལུགས་དང་བཤད་ཚུལ་ལ་ཞིབ་ཚགས་མིན་དང་གྲ་རྒྱས་མིན་ཅིག་གི་ཁྱད་པར་ལས་གཞན་དྲི་ཆུ་ནི་བཟའ་བཏུང་གི་རིགས་གང་ཡང་མྱགས་ཞུ་དྭངས་སྙིགས་ཕྱེས་རྗེས་སྐ་སླ་གཉིས་སུ་ཕྱེས་པའི་སླ་བ་རྣམས་མཁལ་མ་བརྒྱུད་ནས་ལྒང་པར་གསོག་གི་ཡོད་པའི་དགོངས་ཚུལ་ནི་ངས་བལྟས་ན་གཅིག་པ་གཅིག་མཚུངས་རེད་དོ།།

གཉིས་པ། དྲི་ཆུའི་ཕན་ཡོན་སྐོར་ལ་བཤད་པ།

བོད་ཀྱི་གསོ་བ་རིག་པའི་གཞུང་ལུགས་སུ་དྲི་ཆུའི་ཕན་ཡོན་སྐོར་ལ་རྒྱས་ཤིང་རྒྱས་པ་དང་ཕྲ་ཞིང་ཕྲ་བ་ཞིག་གསུངས་པ་མི་མངོན་ན་ཡང་བཤད་རྒྱུད་ལེའུ་ཉི་ཤུ་སྨན་གྱི་ཕན་ནུས་བཤད་པའི་སྐབས་ལ། མི་ཆུས་གཉན་སྲིན་སེལ་རིམས་སྲུང་།། ཞེས་དྲི་ཆུ་ཡིས་རྨ་གང་ལ་ཡང་གཉན་ཁ་རྒྱས་པར་མི་འཇུག་པ་དང་སྲིན་གསོད་པ། གཞན་ཡང་རིམས་ཆམས་སོགས་འགོག་པར་བྱེད་པ་ཡིན། མདོར་ན་གཉན་དང་སྲིན། རིམས་ཆམས་སོགས་ལ་ཤིན་ཏུ་ཕན་པར་གསུངས་ཡོད། ལག་ལེན་གཅེས་བཏུས་ལས། ཉིན་རེར་ཁམ་རེར་བསྟེན་ན་ཚེ་འཕེལ་ཞིང་།། ས་བདག་ཀླུ་གཉན་ནད་གདོན་སྲིན་ནད་སེལ།། ཞེས་གསུངས་ཡོད། ཉིན་རེར་ཞོགས་པའི་དྲི་ཆུ་བར་མ་ཁམ་གང་རེ་བཏུང་བཏུབ་པ་ཡིན་ན་ཚེ་རིང་དུ་མཆི་བ་ཙམ་དུ་མ་ཟད་ལུས་ཀྱི་ཤ་མདངས་དཀར་ལ་བཀྲག་མདངས་རྒྱས་ཏེ་གཞོན་ཉམས་དོད་པོ་ཡོང་བ་བཅས་ཀྱི་དགེ་ཕན་ཆེ། གཞན་ཡང་ས་བདག་ཀླུ་གདོན་ལ་སོགས་པའི་གནོད་པ་སེལ་པར་བྱེད་ཅིང་གཉན་དང་སྲིན་ལ་སོགས་པ་ཡང་འགོག་པར་བྱེད་པ་སོགས་གསུངས་ཡོད། ཤེལ་ཕྲེང་ལས་ཀྱང་། ཨེཀྲོ་རྟ་(དྲི་ཆུ་ཡི་མིང་།)་ཡིས་གཉན་རིམས་དུག་ཚད་གདོན།། ནད་རྙིང་རུས་ཞེན་དབུགས་མི་བདེ་བ་སེལ།། མི་ཡི་དྲི་ཆུ་དྲོན་མོས་ཁ་ནད་སེལ།། དྲི་ཆུ་གྲང་མོས་མིག་ནད་སེལ་བར་བྱེད།། དྲི་ཆུ་བར་པས་དུག་དང་གཉན་སྲིན་སེལ།། རིམས་སོགས་འགོ་བའི་ནད་སྲུང་རྨ་གསར་འདུལ།། ཞེས་གསུངས་ཡོད་པས། འདི་ལས་ཀྱང་ང་ཚོས་དྲི་ཆུའི་ཕན་ཡོན་མང་པོ་ཞིག་རྟོགས་བཏུབ་པ་འདུག་སྟེ་མདོར་ན་གཉན་དང་རིམས་ཆམས། དུག་ཚད་སོགས་ལ་ཕན་ཞིང་ནད་རྙིང་རུས་ལ་ཞེན་པ་དང་དབུགས་མི་བདེ་བ་སོགས་ལ་ཡང་ཕན་པ་ཡོད། ལྷག་པར་དུ་རང་གི་དྲི་ཆུ་ཁ་གང་ཉར་ནས་བཀྲུས་པ་ཡིན་ན་སོ་རྩ་བརྟན་ཞིང་ཁ་དྲི་ཞིམ་པ་དང་མིད་པའི་གཉན་ཚད། སོ་འབམ། སོ་རྙིལ་སྐྲངས་སྦོས་སོགས་ཁ་ནད་ཀུན་ལ་ཕན་པ་ཡོད། མིག་དང་རྣ་བ་ལ་གཏིག་པས་དབང་པོའི་ནུས་པ་བསྐྱེད་པར་བྱེད་པ་བཅས་ཀྱི་ཕན་ནུས་ཆེ། རིམས་སོགས་འགོས་ནད་སྲུང་བ་དང་རྨ་གསར་པ་སོགས་ཀྱི་སྒང་ལ་བྱུག་ན་ཕན་པ་ཡོད། མན་ངག་རྒྱུད་ཀྱི་ལེའུ་དྲུག་ཅུ་རེ་གཉིས་ཕྲན་བུའི་ནད་གསོ་བའི་སྐབས་སུ་ཡང་། སྣེའུ་ལྷགས་ན་རང་གི་དྲི་ཆུ་བྱུག། ཅེས་གསུངས་ཡོད་པས་སྣེ་ས་བཞི་ཡི་རྨེན་བུ་སྐྲངས་པ་ཡིན་ན་རང་གི་དྲི་ཆུ་བྱུག་པས་ཕན་པར་བཤད་ཀྱི་ཡོད་པ་བཅས་སོ།།
ཕྱི་ལུགས་ཀྱིས་དྲི་ཆུ་ནི་ཁོག་ལ་བཏུང་བ་དང་ལུས་ལ་བྱུག་པ། མིག་ལ་གཏིག་པ་དང་རྣ་ལ་བླུགས་པ། མགོ་ལ་བསྐུ་བ་དང་སྣ་ལ་རྔུབས་པ་སོགས་གང་ཡང་བྱེད་རུང་ལ་ཅི་ཡང་བྱས་ཆོག་པའི་སྨན་ཆུ་ཁྱད་པར་བ་ཞིག་ཡིན་པར་གསུངས་ཡོད། ཁོག་ལ་བཏུང་ན་འཆི་མེད་རྒས་མེད་དུ་འགྱུར་བ་དང་། ལུས་ལ་བྱུག་ན་པགས་མདོག་སྙིང་རྗེ་བོ་ཆགས་པ། མིག་ལ་གཏིག་ན་མིག་ནད་སེལ་བ་དང་རྣ་ལ་བླུགས་ན་རྣ་ནད་སེལ་བ། མགོ་ལ་བསྐུས་ན་སྐྲ་བྱི་འགོག་པ་སོགས་ཀྱི་དགེ་ཕན་ལྡན་པར་གསུངས་ཡོད།
མདོར་ན། དྲི་ཆུས་ན་ཟུག་གཅོག་པ་དང་གྲུམ་བུའི་ན་ཚ་སེལ་བ། གཞན་ཡང་། མཆིན་ནད་དུག་ཐབས་དང་གཅིན་སྙི། འབྲུམ་ཐོར། ཟ་འཕྲུག་ཅན་གྱི་པགས་ནད། ཟ་རྐོང་། ཤུ་བ། མཁལ་མའི་མཁྲིས་པ། གཅོང་ནད། གློ་གཅོང་གི་ནད། འབྲས་ནད། གྲུམ་བུ། དབུགས་གསག་གི་ནད། མིག་དང་རྣ་བའི་འགོས་ནད། འཚིག་སྐྱོན་རྨ། སྨུག་ཐིག འཛེར་ནད། པགས་པའི་འགོས་ནད། ཕོ་ནད། རིམས་ཆམ། གློ་ཡུའི་གཉན་ཚད། དུག་སྦྲུལ་གྱིས་སོ་བརྒྱབ་པ་དང་སྦྲང་མའི་མདུང་ཟུག་པ། སོགས་ན་ཚ་མང་པོ་ཞིག་ལ་ཕན་པའི་དགེ་བ་དུ་མ་ཡོད་པར་གསུངས་ཡོད།
འཇར་མན་གྱི་ཤེས་བྱ་ཀུན་འདུས་ཆེན་མོ་མང་ཆེ་བ་ཞིག་གི་ནང་དུ་རྙེད་ཐུབ་པའི་དཔེ་མཚོན་ཡག་ཤོས་ཤིག་ནི་(Johann Heinrich Zedler’s Grossen Vollständigen Universallexikon, 1747) ཟེར་བ་དེའི་ནང་དུ་རྩོམ་པ་པོས་དྲི་ཆུ་སྨན་བཞིན་སྤྱོད་ཐབས་ཀྱི་རིག་པ་འགའ་གསུངས་ཡོད།
 ཉུང་མ་དང་མུ་ཟི་ཕྱེ་མ་བཟོས་ཏེ་དྲི་ཆུ་རྙིང་པ་དང་ལྷན་དུ་བརྫིས་ཤིང་བསྲེས་ཏེ་སྦྱོར་བ་བསྡེབས་པས་སྐྲ་བྱི་བ་ལ་ཕན།
 བྱིས་པའི་དྲི་ཆུ་བསྐོལ་བའི་ནང་དུ་སྦྲང་རྩི་བླུགས་ཏེ་མིག་ལ་བསྐུས་པ་ཡིན་ན་མིག་ལ་རྨས་སྐྱོན་ཕོག་པའི་རིགས་ཐམས་ཅད་སེལ་ནུས། སྨན་འདིས་རྒྱུན་ལྡན་ནས་གང་ཐུབ་ཀྱིས་མིག་བཀྲུ་དགོས།
 གྲེ་བ་གཤལ་བ་དང་དྲི་ཆུའི་སྒང་ལ་ཁ་ཆེའི་ཀུར་གུམ་ཅུང་ཙམ་བསྣན་པ་ཡིན་ན་གྲེ་བའི་གཉན་ཚད་ཀྱི་རིགས་ཐམས་ཅད་ལ་ཕན་པ་ཡིན།
 ལག་པ་དང་པུས་མོ་ལ་རྩ་འདར་བརྒྱག་པ་དང་གཡོ་བ་སོགས་བྱེད་ན་རང་ཉིད་ཀྱི་དྲི་ཆུ་དྲོན་མོ་པགས་པའི་སྟེང་ལ་ཐད་ཀར་དུ་བྱུག་བསྐུ་མཉེ་གསུམ་བྱས་ན་ཕན་ཐོགས་ཆེན་པོ་ཡོད།
 སྐྱ་རྦབ་དང་དམུ་ཆུའི་ན་ཚ་མགོ་འཛུག་སྐབས་སུ་རང་ཉིད་ཀྱི་ཞོགས་པའི་དྲི་ཆུ་དུས་ཚོད་གང་འཚམས་ཤིག་ལ་ལྟོ་སྟོང་དུ་འཐུང་བ་ཡིན་ན་ཕན་ཐོགས་ཆེ་བ་ཡོད། འདིས་གཞན་ཡང་མཁྲིས་ནད་ལ་ཡང་ཕན་ཐོགས་ཆེ།

དྲི་ཆུ་སྤྱད་མྱོང་བའི་འཛམ་བུ་གླིང་གི་མི་སྣ་ཆེན་པོ་འགའ་ཡི་སྐོར།

རྒྱ་གར་གྱི་སྔོན་མའི་སྲིད་བློན་མོ་རཱ་ཇེ་དྷེ་ས་ Morarji Desai མཆོག་ནི་དྲི་ཆུ་རྒྱུན་རིང་སྤྱོད་མཁན་གྱི་མི་སྣ་ཞིག་ཡིན་པ་དང་། ༡༩༧༨ལོར་ཁོང་གིས་དྷན་ར་ངྷིར་ Dan Rather མཆོག་ལ་སྐར་མ་དྲུག་ཅུའི་རིང་དྲི་ཆུའི་གསོ་ཐབས་ཀྱི་སྐོར་ལ་སྐད་ཆ་བཤད་མྱོང་ཡོད། ཁོང་གིས་དྲི་ཆུའི་གསོ་ཐབས་ནི་སྨན་བཅོས་བྱེད་བཏུབ་ཀྱི་མེད་པའི་རྒྱ་གར་གྱི་མི་དམངས་དུང་ཕྱུར་མང་པོའི་ཆེད་དུ་ཡང་དག་པའི་སྨན་རྫས་ཤིག་ཡིན་པར་གསུངས་ཡོད།
དབྱིན་ཇིའི་གློག་བརྙན་འཁྲབ་སྟོན་མ་་ས་ར་མེལ་ Sarah Miles ཡིས་འགོས་ནད་སྔོན་འགོག་དང་འཕྲོད་བསྟེན་བདེ་ཐང་གི་ཕྱིར་དུ་མི་ལོ་སུམ་ཅུའི་རིང་རང་གི་དྲི་ཆུ་འཐུང་བ་རེད་འདུག
མ་དྷོ་ན་ Madonna ཡིས་མོ་རང་གི་ལུས་རྩལ་གྱི་རྐང་པའི་དཀའ་ངལ་སེལ་བའི་ཕྱིར་དུ་རང་གི་དྲི་ཆུ་རྐང་པའི་སྒང་ལ་བྱུག་པར་འགྲེལ་བརྗོད་བྱས་ཡོད།
དྲག་པོའི་སྒྱུ་རྩལ་བསྲེས་མ་འཛིང་མཁན་གྱི་ལོ་ཏྲོ་མ་ཆེས་དྷ་ Lyoto Machida ཡིས་བཅར་འདྲི་ཞིག་གི་སྐབས་སུ་ཁོང་གིས་ཁོ་རང་གི་དྲི་ཆུ་འཐུང་གི་ཡོད་པའི་སྐོར་གྱི་གསང་བ་དེ་གསལ་སྟོན་བྱས་ཡོད། ལོ་གསུམ་གྱི་ཡར་སྔོན་དུ་ཁོང་གི་ཆམས་པ་ལ་དྲག་སྐྱེད་མ་བྱུང་བའི་རྗེས་སུ་ཁོང་གི་ཨ་པས་ཁོང་ལ་དྲི་ཆུ་འཐུང་དུ་བཅུག་འདུག

མཇུག་གཏམ་ཐུང་ཐུང་།

མཚམས་འདི་ནས་གུས་ཀྱིས་དྲི་ཆུའི་གྲུབ་ཚུལ་དང་དྲི་ཆུའི་ཕན་ཡོན་གཉིས་ཐད་ནས་གང་འཇོན་འཇོན་དང་ཅི་ཤེས་ཤེས་ཀྱིས་བྲིས་བྲིས་པ་ཚང་མ་ཡང་དག་པ་དང་མ་ནོར་བ་ཡིན་པའི་ངེས་པ་གང་ལ་ཡོད་དེ་ཅི་ནས་ཀྱང་མེད་པ་བདག་གི་བློ་ལ་ནམ་མཁའི་ཉི་མ་བཞིན་གསལ་པས་ཀློག་མཁན་དག་གིས་ཀྱང་རང་རང་གི་རིག་པའི་རྣོ་ཕྱུང་སྟེ་བཀླག་ཅིང་དཔྱད་པ་བྱེད་རྒྱུ་ནི་ཆེས་འགག་ཆེན་དུ་བསམས་ནས་ཡོད། ལྷག་པར་དུ་དྲི་ཆུའི་གྲུབ་ཚུལ་གྱི་སྐོར་ལ་རང་ལུགས་ཀྱི་ཕྱོགས་ནས་གང་འཇོན་ཅི་འཇོན་བྱས་ཡོད་ཀྱང་། ཕྱི་ལུགས་ཀྱི་འདོད་ཚུལ་དེ་དབྱིན་ཡིག་གི་མ་རྩའི་ཤེས་ཚད་ཞན་པ་དང་སྐྱོ་བའི་དབང་གིས་དེ་ཙམ་ཞིག་ཇི་བཞིན་པ་དང་ཇི་ལྟ་བ་བཞིན་བསྒྱུར་བཏུབ་པ་མ་བྱུང་བས་ཡག་པོ་དང་དག་པོ་ཞིག་འཁྱོངས་མེད་ཚོད་དུ་སྣང་། སྣོན་མ་ཅུང་ཙམ་དགོས་ངེས་ཤིག་རེད་ཀྱང་། གནས་སྐབས་རིང་རང་གི་ཤེས་ཚད་ཀྱི་འཁོས་ཀ་ལ་དཔག་ནས་ཅུང་ལྷོད་པར་མི་བྱ་ཐབས་མེད་བྱུང་། དྲི་ཆུ་རྩ་ཆེན་པོའི་སྨན་ཆུ་ཞིག་ཡིན་པའི་སྐོར་ལ་ནི་གོང་ནས་ཀྱང་མང་དག་ཅིག་བཤད་ཡོད་པ་དེ་བཞིན་དུ་བསྐྱར་བཟློས་བྱེད་མ་གལ་བར་བསམས་ནས་ཡོད། ཀློག་པོ་དག་ལ་ཆེན་པོ་ཆེན་པོ་ཞིག་གིས་རྔོ་ཐོགས་མིན་ཡེ་ནས་མི་ཤེས་མོད། མདོ་དོན་སྙིང་དུ་དྲིལ་ནས་བཤད་པ་ཡིན་ན། ཐེངས་འདིའི་རྩོམ་ཡིག་གི་བརྗོད་གཞིའི་སྒང་ལ་དུས་ཚོད་གང་འཚམས་ཀྱིས་བསམ་གཞིགས་དང་དཔེ་ཀློག་གི་ཀློང་དུ་འགྲིམས་ཏེ་ཤེས་ཤིང་ཐོབ་པའི་སྐད་ཆ་ཞིག་ནི་རང་ལུགས་དང་ཕྱི་ལུགས་གཉིས་ཐད་ནས་བལྟས་ཤིང་དཔྱད་དེ་བསམ་པ་ཡིན་ན་ཡང་དྲི་ཆུ་ནི་ཤིན་ཏུ་ཕན་ནུས་ཅན་དང་དགེ་མཚན་ཅན་གྱི་སྨན་ཆུ་ཡེ་ནས་དག་པ་ཞིག་ཡིན་པ་ནི་གདོན་མི་ཟ་བ་ཞིག་རེད་ལ་རྒྱུན་ལྡན་གྱི་འཚོ་བའི་ཁྲོད་དུ་ཉིན་རེར་ཐེངས་རེར་སྣང་མེད་དང་ཕངས་མེད་ཀྱི་སྒོ་ནས་ཕྱི་ལ་འཕོ་ཞིང་གཡུགས་པ་འདི་ཡང་ད་ལྟ་བསམས་ན་དངོས་གནས་ཡེ་མི་བྲ་བ་ཞིག་རེད་ཨང་བསམས་ནས་བསྡད་ཡོད་དོ།།

གཏིང་ཟབས་རྒྱ་མཚོའི་ཆུ་ལ་འཛུལ་བའི་རྐྱལ་རྩལ་ཕུལ་བྱུང་ང་ལ་མེད།།
ཁྲོ་འཇིག་གཏུམ་པའི་གཡུལ་སར་ཆས་ལ་ཞུམ་མེད་སེམས་ཀྱང་བྲལ་བ་སྟེ།།
ཕུན་ཚོགས་དཔལ་གྱི་དོན་སྙིང་ལྡན་པའི་གསོ་རིག་གཞུང་ལུགས་མང་པོ་ལ།།
འཇུག་དང་བལྟ་བའི་བརྟུན་པའི་ཡི་ག་ང་ཡི་ཀླད་པར་ཤིན་ཏུ་འཆུས།།

ཁྱ་གེ་ཁྱོག་གེའི་རྩོམ་ཐུང་ཞིག་ཀྱང་འབྲི་བར་འདི་འདྲའི་དཀའ་བ་སྟེ།།
གཏིང་མཐའ་བྲལ་བའི་གཞུང་ལུགས་སློབ་ལ་ཉིན་ཞག་ཁྲི་སྟོང་ཡིན་ད་ཡིན།།
བསླབས་པའི་རྗེས་ལ་ཚང་མ་སེམས་སུ་ངེས་པ་ཡོད་ན་བཟང་གི་མོད།།
བརྗེད་པའི་རྐུན་པོ་དྲན་ཤེས་ལས་ཀྱང་མཐུ་བར་བསམས་ན་ཨ་ཙ་མ།།

འབྱམས་ཀླས་ཡངས་པའི་ལྷ་ལམ་ཁྱོན་ཆེན་ཉི་ཟླ་སྐར་མའི་རྟེན་གཞི་དང་།།
སྲ་བརྟན་སྒེག་པའི་ནོར་འཛིན་ཕྱུག་མོ་སེམས་ལྡན་ཀུན་གྱི་གཞིས་ཁྱིམ་ཡིན།།
གཏིང་མཐའ་བྲལ་བའི་ཟླ་བའི་མ་མ་སྲིན་འབུ་ཀུན་གྱི་གྲོང་ཁྱེར་དང་།།
དཔལ་ལྡན་རྒྱུད་བཞིའི་གླེགས་བམ་འདི་ཡང་འཚོ་བྱེད་སྤྱི་བོའི་རྒྱགས་ཕྱེ་ཨང་།།