སྒང་པ་དགེ་ལེགས།
ང་ཚོའི་སྤྱི་ཚོགས་ཆུང་ཆུང་འདིར་མང་གཙོའི་ཁེ་དབང་ཇེ་ཆེར་སོང་བ་ནས་མི་རེ་རེའི་སྤུ་མདོག་གི་ཁྱད་པར་ཇེ་ཆེར་སོང་ཞིང་། སྤུ་མདོག་རེ་རེའི་ཕག་ན་ཀླད་རྒྱ་ཆེ་ཆུང་དང་རྣ་བའི་སྲབ་མཐུག བསམ་པའི་དཀར་ནག་དང་མིག་གི་ཆུམ་ཚད་སོགས་ཕྱོགས་མང་པོ་ཞིག་ནས་མི་འདྲ་བའི་བར་ཁྱད་ཀྱི་རྒྱང་ཐག་མངོན་གསལ་ཇེ་ཆེར་ཕྱིན། མཐོ་ས་ནས་ཁྲིམས་བཟོ་ལྷན་ཁང་གི་ཁྲིམས་བཟོ་བའི་ཁྲོད་ཀྱི་རྒྱལ་ཁབ་དང་སྒྲིག་འཛུགས་ཀྱི་ འཆིང་ཐག་དང་ཀ་བ་ལྟ་བུའི་ཁྲིམས་ལ་རྨོངས་བ་དང་ཁྲིམས་ལ་མི་བརྩི་བའི་གཏུམ་སྤྱོད། དམའ་ས་ནས་ཐབ་ཚང་དང་གསང་སྤྱོད་གཙང་བཟོའི་ཆེད་ལས་པ་ཚོའི་ཁྲོད་ཀྱི་སྤྱི་བའི་སྟོབས་ཤུགས་ཀྱི་གཞི་རྩ་ལ་ཅི་མི་སྙམ་པར། ཞེན་ཁོག་ཡན་གར་བའི་ཆེད་དུ་ཤེས་བཞིན་དུག་འཐུང་གིས་གཏམ་ཡན་གྱི་རྗེས་སུ་འུར་ཞོགས་དང་ཟིང་སློང་གི་རྩིང་སྤྱོད་ལ་ཤ་ཐང་རུས་ཐང་དུ་འབད་པའི་སྨྱོ་སྤྱོད་སོགས། རང་ཉིད་རྨོངས་པའམ་ཡང་ན་ཁེ་ཕན་བྱེ་བྲག་པའི་ཆེད་དུ་གོང་བུའི་ནུས་པ་ལ་གས་ཁ་གཏོད་ཅི་ཐུབ་བྱེད་པའི་བྱ་སྤྱོད་ཀྱིས། གནས་ལུགས་འདི་འདྲ་ཞིག་ཀྱང་གསལ་འདེབས་བྱེད་བཞིན་མེད་དམ་སྙམ་སྟེ། མང་གཙོའི་ལམ་ལུགས་འདི་དོར་མ་ཞིག་ཡིན་པའི་དབང་དུ་བཏང་ན་ང་ཚོ་ལ་རིང་དྲགས་ཏེ་གོམ་པ་སྤོ་མི་ཐུབ་ཅིང་། གོམ་པ་སྤོས་ན་ཐང་ལ་འགྱེལ་ནས་ཁ་ཆག་སྣ་རལ་དུ་འགྱུར་འགྲོ་བ་དང་། ཞྭ་མོ་ཞིག་ཡིན་པའི་དབང་དུ་བཏང་ན་ང་ཚོ་ལ་ཆེ་དྲགས་ཏེ་ཡ་ཐོད་བཀབ་ནས་མིག་མདུན་མཐོང་མི་ཐུབ་ཅིང་། མདུན་དུ་བསྐྱོད་ན་གཡང་ལ་ལྷུང་ནས་ཤ་ཉོག་རུས་ཉོག་ཏུ་གཏོང་སྲིད་པ་ནི་གཏན་ཚིགས་མང་པོ་མི་དགོས་པར་ད་ལྟའི་མཐོང་སྣང་འདི་ཁོ་ནས་ཀྱང་བདེན་དཔང་བྱེད་ཐུབ།
གནའ་སྔ་མོའི་བྲན་གཡོག་གི་ལམ་ལུགས་ལས་གློ་བུར་ཐོག་རྒྱག་ཏུ་ཐོབ་ཐང་འདྲ་མཉམ་གྱི་ལམ་ལུགས་སུ་ཐོད་བརྒལ་བྱས་པའི་ཞོར་སྐྱོན་གྱིས། བྲན་གཡོག་གི་སྣང་བ་ལ་ཚད་ལས་བརྒལ་བའི་འཁྲུལ་སྣང་གི་བཅིང་གྲོལ་བྱུང་སྟེ། སྤྱི་བའི་གོམ་པ་རེ་རེ་ཡང་རང་ཉིད་ཀྱི་འདོད་པ་དང་ཡོངས་སུ་མཐུན་དགོས་ཤིང་། རང་གི་དགའ་ཕྱོགས་ཀྱིས་བཅའ་ཁྲིམས་ཡོངས་སུ་ཟིལ་གྱིས་གནོན་དགོས་པའི་སྒེར་གཙོ་དང་སྒེར་གཅོད་ཀྱི་ལྟ་བའི་དབང་དུ་སོང་བ་རེད། དེ་ཡང་ཕྱོགས་གཅིག་ནས་ཁག་མི་འདུག་སྟེ། སྔ་མོའི་དུས་སུ་ཁོ་ཅག་གཉའ་གནོན་གྱི་འོག་ཏུ་སྡོད་ཡུན་རིང་དྲགས་པ་དང་། མི་རབས་ནས་མི་རབས་བརྒྱུད་དེ་རྣ་བར་བཅུག་བཅུག་པའི་ཡིད་སྐྱོའི་གཏམ་རྒྱུད་དེ་དག་གིས་སྙིང་ལ་ཡལ་དཀའ་བའི་ན་ཟུག་བཟོད་དཀའ་ཞིག་བཞག ནམ་ཞིག་གི་ཚེ་བྲན་གཡོག་དང་དཔོན་པོའི་དབང་ཐང་འདྲ་མཉམ་དུ་གྱུར་བ་ན། ཁོ་ཅག་གིས་འདི་ནི་སྔོ་ནག་ཏུ་གྱུར་བའི་སྙིང་གི་རྨ་ཁ་གསོ་བའི་གོ་སྐབས་ཤིག་ཏུ་བསམ་ནས། བཅའ་ཁྲིམས་དང་གནས་ལུགས་སོགས་གཏིང་བརྗེད་དུ་གྱུར་ཅིང་། ཐོབ་ཐང་མ་གཏོགས་འགན་ཁུར་གྱི་འདུ་ཤེས་རྩ་བ་ནས་བོར་སོང་བ་རེད།
ཁོ་ཚོར་གནས་ལུགས་ལ་ཉན་ཤེས་པའི་རྣམ་དཔྱོད་མེད་པ་མིན་རུང་གནས་ལུགས་ལ་ཉན་འདོད་པའི་ཀུན་སློང་མེད་པས། ངོ་སྤྲོད་མཁན་ཚོས་ལྕེ་རྐན་གྱི་རྩོལ་བ་བསྐལ་བའི་བར་དུ་བྱས་རུང་དྲི་བ་མིན་པའི་དྲི་བ་དེ་དག་ནམ་ཡང་མཚམས་མི་འཇོག དེ་ནི་དྲི་བ་ཟབ་དྲགས་པས་ལན་མ་ཐེབས་པ་མ་ཡིན་གྱི། འདྲི་བ་པོའི་ཀུན་སློང་ཁ་སྤུབ་ཡིན་པས་ངལ་བ་འབྲས་མེད་དུ་འགྱུར་འགྲོ། ཞིབ་ཏུ་བསམ་ན་འདྲི་བ་པོ་མ་ཡིན་པའི་འདྲི་བ་པོ་འདི་ཚོར་ལན་སློག་རྒྱུའི་བརྩོན་པ་བསྐྱེད་པ་ནི་བླུན་པོའི་བྱ་སྤྱོད་ཅིག་ཏུ་མཐོང་ན་ཡང་། འདྲ་མཉམ་གྱི་ལམ་ལུགས་འདིའི་ཁྲོད་ན་ཀུན་སློང་ཅི་ཡིན་དང་དྲི་བ་ཡིན་མིན་ལ་མ་ལྟོས་པར་ཡོད་ཚད་ལ་ལན་འདེབས་པ་ནི་བརྩི་བཀུར་བྱེད་སྟངས་ཤིག་ཏུའང་ངོས་འཛིན་དགོས་པ་རེད། དེས་ན་འདྲི་བ་པོ་དང་ལན་སློག་པ་པོའི་བར་གྱི་འབྲེལ་བ་འདི་ནི་འདོད་པ་ཡོད་མེད་ཅི་ལྟར་རུང་ཐོད་བརྒལ་མང་གཙོའི་ལམ་ལུགས་ཀྱི་སྤྱི་ཚོགས་འདིའི་ཁྲོད་དུ་ད་དུང་ཡང་དེ་ལྟར་གནས་དགོས་པ་ནི་སུས་ཀྱང་བཅོས་མི་ཐུབ་པའི་བརྒྱུད་རིམ་ཞིག་རེད།
འོ་ན་ང་ཚོ་ལ་བྱ་ཐབས་གཞན་གང་ཡང་མེད་དམ་ཟེར་ན་དེ་ཡང་མ་ཡིན་ཏེ། ང་ཚོས་ལྷག་པའི་ལྷ་ལ་རང་དབང་དང་མང་གཙོ་འདྲ་མཉམ་སོགས་ཀྱི་ཁེ་དབང་ལ་ལོངས་སུ་སྤྱོད་བཞིན་པ་ཚོར། ཐོབ་ཐབ་དེ་དག་དང་འབྲེལ་བའི་འགན་འཁུར་གྱི་སྙིང་སྟོབས་དང་འདུ་ཤེས་ཀྱི་དངོས་གྲུབ་སྩོལ་བའི་གསོལ་འདེབས་ཤུགས་དྲག་འདེབས་ཆོག་པ་ཡིན་ནོ།