དྷཱིཿཚ་དགོན་ཆེན་གྱི་དགེ་བཤེས་ཚུལ་ཁྲིམས་རྒྱ་མཚོ་སྐུ་གྲོངས་པ།

Comments (5) on “དྷཱིཿཚ་དགོན་ཆེན་གྱི་དགེ་བཤེས་ཚུལ་ཁྲིམས་རྒྱ་མཚོ་སྐུ་གྲོངས་པ།”

1. དགེ་བཤེས་ཚུལ་ཁྲིམས་རྒྱ་མཚོ་སྐུ་གྲོངས་ཙང་། ཟླ་བ་ཚེ་རིང་ཕམ་པ་རེད་ཨེ། ་་་་

2. སྟག་རྒོད་ཟེར་མཁན་ཅོལ་ཆུང་འདི་ཚོས་ནང་ཁུལ་དགྲར་འཛིན་ལས་ཚོར་བ་གང་ཡང་མེད་པ་རེད་འདུག

3. དགེ་བཤེས་ཁོང་ལ་མྱ་ངན་གུས་འདུད་ཞུ་ཀི་ཡོད།

4. བོད་ཀྱི་བསམ་བློ་ཡོད་པ་དང་ཤེས་ཡོན་པ་དག་དེ་ལྟར་སྐུ་གཤེགས་ན་གྱོང་གུན་ཆེ།
   དགེ་བཤེས་ཁོང་ནི་ཁ་བཤད་དོན་ལ་གནས་པའི་སྐྱེས་མཆོག་ཅིག་ཡིན་པར་གདོན་མི་ཟ།
   དེར་བརྟེན་ཁོང་ལ་མྱ་ངན་གུས་འདུད་ལོས་ཞུ།

5. དམ་པ་ཁོང་ནི་བོད་ཀྱི་རྒྱལ་གཅེས་དཔའ་བོ་དང་བོད་དོན་ལས་འགུལ་བ་བླ་མེད་ཅིག་ཏུ་ལགས་པས།ཁོང་ནི་དྲང་བདེན་དང་མཁས་མཛངས་གཉིས་ལྡན་གྱི་བོད་དོན་བདེན་མཐའ་གསལ་ཐབས་ལ་ཕྱག་ལས་གནང་མཁན་གྱི་བོད་མི་བླ་ན་མེད་པའི་གྲས་ཀྱི་གཅིག་ཡིན།བོད་བསྟན་སྲིད་ལས་དོན་གྱི་ཆེད་དུ་དལ་རྟེན་ཕུལ་བའི་དགེ་བའི་བཤེས་གཉེན་ཆེན་མོ་ཨ་ཁུ་རྨོག་རུ་ཚུལ་ཁྲིམས་ཚང་གིས་བགྱིས་པ་མཐའ་དག་དུས་བརྟན་དུ་བོད་ཀྱི་བསྟན་སྲིད་ལ་སྨན་པའི་རྒྱུར་གྱུར་ཅིག་ཅེས་པ་འདི་ནི།ཁོང་དང་སྐྱིད་སྡུག་གཅིག་པ་ཚོས་བརྗོད་ན་འདོད་པ་དང་ཁོང་སྐུ་འདས་རྗེས་ཁོང་ལ་ཕུལ་བའི་མྱ་ངན་ཞུ་ཚིག་ཀྱང་ཡིན།དེ་དང་མཉམ་དུ་དམ་པ་གང་ཉིད་བསླབ་པ་ཚུལ་ཁྲིམས་ཀྱི་རྒྱལ་མཚན་འཛིན་པའི་འཕགས་པའི་དགེ་འདུན་གྱི་རྟེན་ཅན་དུ་ཡང་དང་ཡང་དུ་སྐུའི་སྐྱེས་པ་བཞེས་ནས་འཕགས་མཆོག་ཐུགས་རྗེས་ཆེན་པོས་རྗེས་སུ་བཟུང་སྟེ་།རྒྱལ་སྲས་བྱང་ཆུབ་སེམས་དཔའི་མཛད་འཕྲིན་བསྐྱང་ནས་མཐར་ཐུག་རྣམ་མཁྱེན་རྒྱལ་བོའི་གོ་འཕངས་ཐོབ་པའི་བསྔོ་སྨོན་ཞུ་བ་ལགས།གཞན་ཡང་ནང་མི་འབྲེལ་ཐོག་རྣམས་ལ་གདུང་སེམས་མཉམ་བསྐྱེད་དང་ལྷན་དམ་པ་ཁོང་གིས་སྤྱི་དོན་ཆེད་གཟུགས་སྐུ་བཀོད་པ་བསྡུས་པ་ལགས་ན།ཉེ་བར་འབྲེལ་བའི་ཁྱེད་རྣམ་པའང་སྡུག་བསྔལ་གྱིས་ནོན་དུ་མ་འཇུག་པར་མི་ཚེ་དོན་ལྡན་དུ་དེ་སྔ་ཅི་ལྟར་སྐྱེལ་ཡོད་པ་བཞིན་སྔར་ལས་བླ་ལྷག་ཏུ་འཚོ་བར་རྟིང་སྐུལ་དང་སེམས་གསོ་ཞུ་བ་ལགས།སྐྱིད་སྡུག་གཅིག་པ་ཚོའི་ངོས་ནས་༧གོང་ས་མཆོག་གི་གཙོས་སར་གནས་སེམས་དཔའ་ཆེན་པོ་རྣམས་དང་ཆོས་བརྒྱུད་རིས་མེད་ཀྱི་བོད་ཀྱི་དགོན་སྡེ་ཁག་དང་དགེ་འདུན་གྱི་སྡེ་རྣམས་ལ་བསྔོ་སྨོན་སྐྱབས་འཇུག་ཞུ་རྒྱུ་ཡིན།དེ་བཞིན་གསལ་བསྒྲགས་འདི་སུས་མཐོང་གི་སྐྱེས་ཆེན་དམ་པ་དང་འཕགས་པའི་དགེ་འདུན་ཀྱི་སྡེ་བཅས་ཚང་མས་ཐུགས་ནས་མཆོག་གསུམ་ལ་བསྔོ་སྨོན་སྐྱབས་འཇུག་རེ་གསུང་རོགས་ཞུ་བའི་འབོད་སྐུལ་ཡང་ཞུ་བ་ལགས། དམ་པ་ཁོང་ནི་བོད་ཀྱི་རྒྱལ་གཅེས་དཔའ་བོ་དང་བོད་དོན་ལས་འགུལ་བ་ངོ་མ་ཞིག་ཡིན།ཁོང་ནི་དྲང་བདེན་དང་མཁས་མཛངས་གཉིས་ལྡན་གྱི་བོད་དོན་བདེན་མཐའ་གསལ་ཐབས་ལ་ཕྱག་ལས་གནང་མཁན་གྱི་བོད་མི་བླ་ན་མེད་པའི་གྲས་ཀྱི་གཅིག་ཡིན།དེ་སྔ་རྒྱ་གར་ལ་ཕེབས་ཏེ་༧གོང་ས་མཆོག་ལ་སྐྱབས་བརྟེན་དང་བཙན་བྱོལ་བོད་གཞུང་ལ་དང་བླངས་དཔྱ་ཁྲལ་ལག་དེབ་ཀྱི་དོད་ཀྱི་ཚུལ་དུ་ཧིན་སྐོར་འབུམ་༡.༢ཕུལ་ཞིང་འབྱོར་ཡིག་མ་བླངས་པ་མ་ཟད་།སྐབས་དེར་ད་དུང་ཁོང་གིས་རང་བཙན་དཔྱ་ཁྲལ་ལག་དེབ་ཞིག་བཟོ་འདོད་ཤུགས་དྲག་བསྟན་ཡོད་མོད་།རང་ཉིད་ཕྱིར་རྒྱ་ནག་ལ་སོང་རྗེས་ལས་ཀ་བྱེད་བདེ་བའི་ཆེད་ལག་དེབ་མ་བཟོས་ན་སྐྱོན་མི་འདུག་ཅེས་དང་།དེའི་རྗེས་བོད་ནང་དུ་པགས་རིགས་མེར་བསྲེགས་ལ་སོགས་པའི་དང་བླངས་ལས་འགུལ་སྤེལ་མཁན་གྱི་གྲས་ཡིན་པ་མ་ཟད།དུས་རྒྱུན་བོད་ནང་གི་གནས་སྟངས་ཀྱི་འགྱུར་བའི་སྐོར་དང་རྒྱ་ནག་གི་བྱ་བྱེད་ཐམས་ཅད་རྒྱུན་ཆད་མེད་པར་འབྲེལ་ལམ་སྣ་མང་དང་མི་སྣ་བརྟན་པོ་མང་པོ་བརྒྱུད་ནས་བཙན་བྱོལ་བོད་གཞུང་ལ་སྙན་ཞུ་ཆགས་མེད་དུ་འབུལ་མཁན་གྱི་གྲས་ཀྱི་གཅིག་ཡིན།ཁོང་དང་དུས་རྒྱུན་འབྲེལ་བ་ཡོད་པའི་མི་ཁག་ཅིག་གིས་ཁོང་ནི་དོན་དངོས་ཀྱི་བོད་ཀྱི་ལས་དོན་བསྒྲུབ་པར་བྱང་ཆ་ལྡན་པའི་ལས་བྱེད་པ་ཞིག་དང་འབྲེལ་མཐུད་པ་ངོ་མ་ཞིག་ཡིན་པ་ཤེས་ཡོད།ཁོང་གིས་ནམ་རྒྱུན་དུས་ལྟར་བོད་ནང་དང་ཁྱད་པར་དུ་བོད་ཨ་མདོ་ཕྱོགས་ཀྱི་གནས་ཚུལ་མཐའ་དག་སྟེ།བོད་མིའི་བསམ་བློའི་འཁོར་ཕྱོགས་དང་རྒྱ་གཞུང་གི་བྱ་བྱེད་མཐའ་དག་ལོ་ངོ་བཅུ་ཕྲག་གཉིས་ལྷག་གི་རིང་ལ་བྱེད་ཐབས་འདྲ་མིན་བཀོད་དེ།༧གོང་ས་མཆོག་དང་བཙན་བྱོལ་བོད་གཞུང་ལ་དུས་ལྟར་སྙན་ཞུ་ཕུལ་མྱོང་ཡོད་པ་མ་ཟད།ད་དུང་བཙན་བྱོལ་བོད་གཞུང་གིས་༢༠༠༩ལོའི་བོད་རྒྱལ་ཡོངས་ཚོགས་ཆེན་ཚོགས་སྟེ།བོད་ཀྱི་བདེན་མཐའ་གསལ་ཐབས་ཆེད་བསམ་ཚུལ་བསྡུ་ལེན་གྱི་དམིགས་གསལ་ཚོགས་འདུ་བསྡུས་སྐབས།ཚོགས་ཆེན་མ་བསྐང་བའི་ཡར་སྔོན་ལ་མདོ་སྨད་ཀྱི་ས་ཁུལ་མང་པོའི་ཆོས་བརྒྱུད་འདྲ་མིན་གྱི་དགོན་སྡེ་ཁག་དང་ཡུལ་སྡེ་ལྔ་བརྒྱ་ལྷག་ལ་ཁོང་ཉིད་དངོས་སུ་ཆེད་ཕེབས་གནང་སྟེ།བསམ་ཚུལ་གང་ཡོད་དྲང་མོར་བླངས་ནས།ཚོགས་ཆེན་ལ་སྙན་ཞུའི་ཚུལ་དུ་བོད་གཞིས་ལུས་མདོ་སྨད་ཕྱོགས་ཀྱི་མང་ཚོགས་ཀྱི་དགོངས་ཚུལ་༧གོང་ས་མཆོག་དང་བཙན་བྱོལ་བོད་གཞུང་དང་ཚོགས་ཆེན་ལ་ཟླ་བ་གཅིག་གི་གོང་ལ་ཕུལ་ཡོད་པ་དང་། དེའི་རྗེས་༢༠༠༩ལོར་རྒྱ་གར་དུ་ཕེབས་སྐབས་ཀྱང་༧གོང་ས་མཆོག་གི་བཀའ་སློབ་ལྟར།ཁོང་གིས་སྐྱིད་སྡུག་ཚོགས་པའི་ལས་དོན་ལག་བསྟར་གྱིས་བོད་མིའི་རྒྱན་ཆ་པགས་རིགས་ཙམ་མ་ཡིན་པར།གསེར་དངུལ་གཡུ་བྱུར་ལ་སོགས་པའང་ཚད་ཙམ་མམ་མཚོན་བྱེད་ཙམ་ཡིན་ན་འགྲིག་པའི་སྐོར་གྱི་ལས་འགུལ་སྤེལ་དེར་འཛུལ་ཞུགས་ཀྱིས།སྐྱིད་སྡུག་ཚོགས་པར་བོད་མདོ་སྨད་ཕྱོགས་ཀྱི་ཡུལ་མི་ཚོས་ཕུལ་བའི་གསེར་དངུལ་གྱི་རྒྱན་ཆ་ཁག་དང་གཡུ་བྱུར་མང་པོ་བྱུང་བའི་ཁྲོད།གཡུ་བྱུར་ཚང་མ་བོད་མདོ་སྨད་ཕྱོགས་ཀྱི་བོད་ཀྱི་སྨན་ཁང་ཆེ་གྲས་ཁག་ལ་སྨན་གྱི་རྒྱུ་ཆར་རིན་མེད་ཀྱིས་ཕུལ་ཡོད་པ་དང་།དུས་དེ་ནས་བཟུང་བོད་ཡུལ་དུ་དུས་ཡུན་གང་འཚམས་རིང་བོད་གཞིས་ཀྱི་ཡུལ་མི་ཚོས་རང་ཉིད་ལ་ཡོད་པའི་གཡུ་བྱུར་མང་པོ་རིན་མེད་དུ་སྨན་ཁང་ལ་འབུལ་རྒྱུའི་རྦ་རླབས་འཕྱུར་དུ་བཅུག་པ་མ་ཟད།སྲོལ་བཟང་དེར་བསྟན་ནས་བོད་མི་རྣམས་ཀྱིས་གཡུ་བྱུར་འདོགས་རྒྱུ་མཚམས་འཇོག་གི་ལས་འགུལ་ལའང་ཕན་རླབས་ཆེན་པོ་བྱུང་།སྐབས་དེར་གསེར་དངུལ་ཚང་མ་བཞུས་སྟེ་གསེར་དངུལ་རྐྱང་རྒྱ་མ་བཅོ་བརྒྱད་ལྷག་ཙམ་རྒྱ་གར་དུ་འཁུར་སྟེ་༧གོང་ས་མཆོག་དང་བཙན་བྱོལ་བོད་གཞུང་ལ་ཕུལ་ཡོད།གཞན་ཡང་དེ་དང་ཆབས་ཅིག་ཁོང་གིས་བཙན་བྱོལ་བོད་གཞུང་དམངས་ཀྱི་ཕྱག་ལས་གནང་སྟངས་དང་སྲིད་ཇུས་ཐད་ལའང་དྲང་ལམ་དང་མཐུན་ཕྱོགས་སམ་སྒྲུབ་ཕྱོགས་ཁོ་ན་ནས་།དགོངས་ཚུལ་གང་ཡོད་དངོས་སུ་༧གོང་ས་མཆོག་ལ་ཕུལ་མྱོང་ཡོད་པ་མ་ཟད།༧གོང་ས་མཆོག་སྐུ་དངོས་ལ་སྐུ་ཚེ་རིང་བོར་བཞུགས་སྟེ་བོད་དུ་ཕེབས་ནས།བོད་བསྟན་སྲིད་ཀྱི་རྒྱལ་ཐབས་རླབས་པོ་ཆེ་འཛིན་པའི་སྐྱབས་འཇུག་ཞུ་བ་མ་ཟད།ད་དུང་དུས་དང་སྐབས་གང་ལེགས་སྤྱད་དེ་ཕྱག་བྲིས་མ་ཡིན་པར།མི་བརྒྱུད་ནས་ཀྱང་སྐྱབས་འཇུག་གང་མང་ཕུལ་མྱོང་ཡོད་པ་དང་།ལོ་ངོ་བཅུ་ཕྲག་གཉིས་ལྷག་གི་རིང་ལ་སྔ་ཕྱི་བོད་ཕྱི་ནང་གང་དུ་བོད་དོན་ཆེད།ལས་ཀ་གང་བྱས་པ་ཐམས་ཅད་ལ་འགྲོ་སོང་ཚང་མ་ཁོང་རང་སྒེར་ངོས་རྐྱང་ལས་སྐྱིད་སྡུག་ཚོགས་པས་ཕུལ་བའི་འགྲོ་གྲོན་སྐར་མ་གང་ཡང་བཞེས་མྱོང་མེད།གཞན་བསྟན་པའི་འཁུར་འདེགས་ཐད།དམ་པ་ཁོང་ནི་དེ་སྔ་མདོ་སྨད་རྡི་ཚ་བཀྲ་ཤིས་ཆོས་ལྡིངས་སུ་ཆོས་ཞུགས་ཀྱིས།དགོན་པ་དེའི་དགེས་བའི་བཤེས་གཉེན་ཆེན་མོ་རྨོག་རུ་ཨ་ཁུ་བསྟན་དར་མཆོག་དང་དགེ་བའི་བཤེས་གཉེན་ཆེན་མོ་དཔའ་ལུང་ཨ་ཁུ་ཡེ་ཤེས་མཆོག དགེ་བའི་བཤེས་གཉེན་ཆེན་མོ་རེབ་གོང་ཨ་ཁུ་ཞོ་
   འཕངས་ཚང་༼ཁོང་གི་མཚན་མི་ཤེས༽ལ་སོགས་གཙོར་བཟུང་གིས།གུས་རྟག་བརྟན་སྦྱོར་གྱིས་གཞུང་ཆེན་བཀའ་པོད་ལྔ་ལ་སྦྱངས་པ་མཐར་ཕྱིན་ཏེ།རྡི་ཚ་དགོན་པའི་དགེ་བཤེས་ཐོན་དང་པོའི་གྲས་སུ་འབྲས་རྟགས་ལ།བཀའ་བཅུ་རམ་འབྱམས་པའི་དགེ་བཤེས་དང་པོ་ཐོབ་ཡོད་པ་དང་།སྐབས་དེར་རྡི་ཚ་དགོན་པར་བསླབ་གཉེར་གནང་ཕྱོགས་ཐད་ནས།ཁོང་གི་མཛད་པས་གྲྭ་དམངས་ཀྱི་ཡིད་འཕྲོག་སྟེ།ཁོང་ལ་རྨོག་རུའི་ཨ་ཁུ་ཚུལ་ཁྲིམས་ཟབ་མོ་ཚང་ཞེས་པའི་གྲགས་པའང་འབར་མྱོང་ཡོད།དེ་བཞིན་རིག་གནས་ཆུང་བ་ལྔ་ལའང་སྦྱངས་བ་མཐར་ཕྱིན་ཏེ།རྡི་ཚ་དགོན་པའི་དགེ་བཤེས་དང་མཁས་པ་བགྲང་སྐབས་རྨོག་རུ་ཨ་ཁུ་ཚུལ་ཁྲིམས་ཚང་ཞེས་རྡི་ཚ་དགོན་པ་ཙམ་མ་ཡིན་པར།མདོ་སྨད་ཕྱོགས་ཀྱི་དགོན་སྡེ་ཁག་གིས་དད་པ་དང་ཕྱག་འབུལ་ཡུལ་གྱི་སྐུ་རྟེན་དུ་གྲུབ་ཡོད་པ་ནི།དམ་པ་གང་གིས་སྐུའི་སྐྱེས་པ་འདིར་སངས་རྒྱས་བསྟན་པ་བཤད་སྒྲུབ་གཉིས་ཀྱི་སྒོ་ནས་བསྐྱངས་པའི་ལེགས་བྱས་སུ་གྲུབ་ཡོད་ཅིང་།ཁྱད་པར་དུ་རྡི་ཚ་དགོན་པའི་དོ་དམ་ཨུ་ཡོན་ལྷན་ཁང་གི་ཀྲུའི་རིན་རྒྱུན་ལས་ཨུ་ཡོན་ཀྱི་ལས་གནས་ལོ་ངོ་བཅོ་ལྔ་ལྷག་གི་རིང་བཞེས་ཏེ།དགོན་པ་འདིའི་འདོན་རྟ་དབྱིངས་ནས་ཆོས་ཐོག་དང་ཚོགས་ཆོས་ར་ནས་བསླབ་པ་སློབ་གཉེར་ལ་སོགས་ཀྱི་ཐད།དུས་རབས་ཉི་ཤུའི་ལོ་རབས་བརྒྱད་ཅུ་བའི་མཇུག་ཙམ་ནས་དགོན་པའི་འགན་འཛིན་ཨ་དགའ་གྲགས་པའི་ཕྱག་གཡས་པའི་ཚུལ་དུ་དགོན་པ་འཛིན་སྐྱོང་ལ་འབད་དེ།རྡི་ཚ་དགོན་པའི་ནང་བློན་གཅིག་པུ་ཞེས་གྲགས་པ་འབར་ཡོད།ཁྱད་པར་དུ་རྡི་ཚ་དགོན་པར་དགེ་འདུན་གྱི་སྡེ་ཁ་ཁར་གྱུར་བའི་རྙོག་འཛིངས་ཆེ་བའི་བྱུང་རབས་ནང་།དམ་པ་ཁོང་གིས་དགེ་བའི་བཤེས་གཉེན་བསྟན་ཚུལ་ལས་མ་ལོག་པར་རང་ཚུགས་བརྟན་པོ་བཟུང་སྟེ།དགོན་པའི་དགེ་འདུན་གྱི་སྡེ་དེ་ཐོར་བཤིག་ཏུ་མི་འགྲོ་བའི་ཐད།སྐབས་དེར་དགེ་འདུན་གྱི་སྡེ་ཕྱོགས་གཉིས་སུ་གྱེས་སོང་ཡང་།ཁོང་གིས་གང་གི་ཕྱོགས་ཀྱང་མ་བཟུང་པར་བརྟེན།དགེ་འདུན་གྱི་སྡེ་ཕྱོགས་གཉིས་ཀས་ཁས་ལེན་པའི་མི་སྣ་གཅིག་པུ་དེར་གྲུབ་སྟེ།སྤྱིར་ན་དགོན་པའི་འདུས་སྡེ་ཕྱོགས་གཉིས་སུ་གྱེས་ནའང་།ཐོར་བཤིག་ཏུ་མ་སོང་བ་ནི།ཁོང་ཚུད་པའི་དགེ་བའི་བཤེས་གཉེན་མང་པོ་ཞིག་གིས་ཐུགས་བསྐྱེད་བརྩོན་འགྲུས་ལ་བརྟེན་ནས།དགོན་པ་དེ་ཕྱོགས་གཉིས་སུ་གྱེས་ཏེ་དགོན་པ་གཉིས་ཆགས་ཐུབ་པ་བྱུང་བ་དང་།ད་ལྟའི་ཆར་ཁོང་རྣམ་པའི་ཀུན་སློང་བཟང་པོ་དང་ཐུགས་བསྐྱེད་སྨོན་ལམ་ལ་བརྟེན་ནས་དགོན་པ་གཉིས་ཐུགས་མཐུན་འབྱུང་རྒྱུའི་རེ་སྨོན་གྱི་རྨང་གཞི་དེར།དམ་ཚིགས་ཀྱི་མེ་ཏོག་འབུས་བཞིན་པའི་སྐད་སྙན་དག་ཀྱང་ཐོས་རྒྱུ་འདུག་ན།མི་རིང་བར་དགོན་པ་གཉིས་འཆམ་མཐུན་ཕྱོགས་གཅིག་ཏུ་འདུན་ངེས་པས།འདི་ཡང་ཁོང་གི་མཛད་རྗེས་རྨད་བྱུང་གི་འབྲས་བུ་ཉག་གཅིག་ཏུ་གྲུབ་ཡོད།དེ་བཞིན་དགོན་པའི་དགོན་བདག་༧ཞལ་དམར་རིན་པོ་ཆེའི་མཆོག་སྤྲུལ་གྱི་ཐད་ལ་མཚོན་ན་ཡང་སྤྲུལ་སྐུ་འཕྲོག་རྩོད་ཀྱི་དོན་རྐྱེན་སྐབས།ཁོང་གིས་ཕྱོགས་གཉིས་ཀར་སྤྲུལ་སྐུའི་སྐུ་ལ་འཚེ་བ་མི་འབྱུང་རྒྱུར་ཁས་ལེན་དམ་འབུལ་གནང་དུ་བཅུག་སྟེ།རྩོད་རྙོག་ཅི་འདྲ་ཆེན་པོ་བྱུང་ན་ཡང་སྤྲུལ་སྐུར་འགལ་རྐྱེན་གྱིས་མ་ཚུགས་པ་དེ་ཁོང་གི་མཛད་རྗེས་ཉག་གཅིག་ལ་བརྟེན་པ་དང་།དེའི་རྗེས་དགོན་པའི་གྲྭ་དམངས་མགྲིན་གཅིག་དབྱིངས་གཅིག་གིས་ཁོང་ཉིད་མཁྱེན་པའི་བདག་པོ་ཡིན་པས་༧ཞལ་དམར་མཆོག་སྤྲུལ་གྱི་ཡོངས་འཛིན་ཏུ་འོས་པའི་སྙན་ཞུ་ཡང་དང་བསྐྱར་དུ་ཕུལ་བར།མཐར་དགོན་པའི་བཀའ་བཟློག་མ་ཐུབ་པར་གནས་སྐབས་ཅིག་གི་རིང་ལ་༧ཞལ་དམར་པན་ཊི་ཏའི་ཡོངས་འཛིན་གནང་སྟེ།མཆོག་སྤྲུལ་རིན་པོར་ཆེར་དམ་ཆོས་ཟབ་རྒྱས་ཆོས་ཆར་བསྩལ་ཏེ།དམ་པའི་ཆོས་ཀྱིས་བརྒྱུད་བརླན་པར་གནང་ནས།དགོན་པ་དང་གྲྭ་དམངས།དད་ལྡན་སྦྱིན་བདག་བཅས་ཀྱི་རེ་འདོད་བསྐངས་རྗེས།རིམ་པས་༧མཆོག་སྤྲུལ་གྱི་ཡོངས་འཛིན་ནས་དགོངས་ཞུ་ཕུལ་པ་དང་།ཁྱད་པར་དུ་ཁོང་གི་ཞལ་སློབ་ལ་༧ཞལ་དམར་མཆོག་སྤྲུལ་གཙོས་རྡི་ཆ་དགོན་པའི་དགེ་འདུན་པ་དང་།གཞན་ཡང་ཨ་མདོ་ཕྱོགས་ཀྱི་སློབ་གྲྭ་ཆེ་འབྲིང་ཆུང་གསུམ་གྱི་དགེ་སློབ་མང་པོ་དབྱར་གནང་དགུན་གནང་ལ།ཁོང་གི་མདུན་དུ་ཆགས་མེད་དུ་ནང་ཆོས་སྦྱོང་བར་ཕེབས་བཞིན་པ་ཁོང་རྣམ་པ་མ་ཟད།ཁོང་གི་འཆད་མཁས་པའི་མཛད་པས་ཨ་མདོ་ཕྱོགས་ཀྱི་སློབ་འབྲིང་མང་པོས་དུས་ཚོད་རྒྱས་བཅད་ཀྱིས་ཁོང་གདན་ཞུ་གནང་སྟེ།སློབ་འབྲིང་སློབ་མར་མཚན་ཉིད་ཁྲིད་དུ་བཅུག་ཅིང་།ལས་གཞི་འདི་ནི་སྐྱིད་སྡུག་ཚོགས་པས་༧གོང་ས་མཆོག་གིས་ནང་ཆོས་དེ་དགེ་འདུན་པ་གཅིག་པུ་ཙམ་མ་ཡིན་པར།བོད་མི་སེར་སྐྱ་ཡོངས་ཀྱིས་སྦྱང་དགོས་པའི་ལས་འགན་དེ།འཛམ་གླིང་ཞི་བདེ་དང་གཞན་དོན་ཡིད་བྱེད་ཀྱི་ལྟ་བའི་རྩ་བར་དགོངས་པའི་བཀའ་སློབ་ཟབ་མོ་གཞིར་བཟུང་གིས།མདོ་སྨད་དུ་ལས་འགུལ་འདི་དབུ་འཛུགས་གནང་ནས་དངོས་སུ་ལག་བསྟར་དུ་འདེབས་མཁན་གྲས་ཀྱི་ལས་བྱེད་ཞིག་ཀྱང་ཡིན།ཁོང་ནི་ནམ་རྒྱུན་ཐབས་མཁས་ཐུགས་རྗེ་དང་ལྡན་པ་ཞིག་ཡིན་པས།ཁོང་གི་སྐྱིད་སྡུག་ཚོགས་པར་དཀའ་ངལ་ཚིག་གཅིག་ཞུ་མྱོང་མེད།དེ་བས་སྐྱིད་སྡུག་ཚོགས་པར་མཚོན་ན་ཁོང་ནི་བློས་ཐུབ་ཀྱི་ནང་མི་ཞིག་དང་ཡིད་རྟོན་གནང་སྟེ་བློ་འདོན་གྲོས་རོགས་གནང་ཐུབ་མཁན་གྱི་འགན་འཛིན་ཅིག་མེད་པར་གྱུར་བས་བློ་ཕམ་ཚད་མེད་བྱུང་ཡོད་མོད།འོན་ཀྱང་ང་ཚོས་སྐྱོ་གདུང་སྟོབས་ཤུགས་སུ་བསྒྱུར་བ་སྟེ།རྐྱེན་ངན་གྲོགས་སུ་སྒོམ་ནས།ང་ཚོའི་སྐྱིད་སྡུག་ཚོགས་པར་ཁོང་དང་འདྲ་བའི་སྐྱེས་བུ་མང་པོ་ཡོད་པ་ཐམས་ཅད་ལ།ཐེངས་འདིར་ཁོང་ལ་བྱུང་བའི་འགལ་རྐྱེན་ལས་བསླབ་བྱ་ཕྱོགས་སྡོམ་གནང་སྟེ།མ་འོངས་བར་བྱ་བ་བསྒྲུབ་ཕྱོགས་ཐད་ངེས་པར་དུ་སྔར་ལས་ཞིབ་ཚགས་དང་སྤང་བླངས་ཀྱི་རྣམ་བཞག་ཚགས་དམ་རུ་གཏོང་དགོས་པར་སྐུལ་འདེད་བཏང་ཡོད་ན།འདི་ཡང་དམ་པ་ཁོང་གིས་མཛད་རྗེས་སུ་བགྲང་ཆོག ཁྱད་པར་དུ་དམ་པ་ཁོང་
   རང་དོན་མ་ཡིན་པར་བོད་ཀྱི་རིག་གཞུང་འཛིན་སྐྱོང་གི་ལས་གཞི་འདི་ཁོ་ན་གཉེར་བཞིན་པའི་ལས་ཀའི་སྐབས་སུ།རྒྱ་གཞུང་གི་གསང་བའི་ལས་བྱེད་ཀྱི་ཁྲིད་སོང་བ་འདི་ནི།དེ་བས་ཀྱང་སྐྱིད་སྡུག་ཚོགས་པ་འདིའི་སྒུལ་ཤུགས་དང་དམ་པ་གོང་མའི་རྣམ་ཐར་རྗེས་འཇུག་སློབ་མའི་ཉམས་ལེན་ཞེས་པ་ལྟར་གྱི་དམིགས་རྐྱེན་དུ་གྱུར་བ་འདི་ཡང་ཁོང་གི་མཛད་རྗེས་ཉག་གཅིག་ཏུ་གྲུབ་ཡོད།གཞན་ཡང་༡༩༩༠ལོ་ནས་བཟུང་སྐྱིད་སྡུག་ཚོགས་པའི་བཀོད་སྒྲིག་ལྟར་ལོ་རེ་བཞིན་དམ་པ་འདིས།༧གོང་ས་མཆོག་གི་སྐུའི་ཞབས་བརྟེན་བསྒྲུབས་པ་གྲངས་ཀྱིས་མི་ལངས་ལ།ཞབས་བརྟེན་ཡང་རྣམ་པ་སྣ་མང་གིས་བསྒྲུབས་ཡོད་པ་མ་ཟད།ལོ་རེ་བཞིན་༧གོང་ས་མཆོག་གི་སྐུའི་འཁྲུངས་སྐར་ཉིན་རྣམ་པ་འདྲ་མིན་གྱི་སྒོ་ནས་སྲོག་བླུ་དང་ཚེ་ཐར་མང་པོ་བཏང་ཡོད་པའི་སྟེང་བླ་ཤིང་འདེབས་འཛུགས་ཀྱི་ལས་འགུལ་སྤེལ་བའི་གྲས་སུ་ཡང་ཞུགས་ཡོད།ནམ་རྒྱུན་དགོན་པའི་ལས་ཀྱི་སྣེ་མོ་བ་ཡིན་པའི་སྟེང་རྒྱ་གཞུང་གིས་དགོན་པའི་རྒྱལ་གཅེས་ཆོས་གཅེས་ཞེས་པའི་ལས་འགུལ་གང་སྤེལ་རྣམས་ལ་ཐབས་མཁས་ཐུགས་རྗེ་ཆེན་པོས་གདོང་ལེན་གནང་ནས།དགོན་པ་རྒྱུན་བརྟན་ངང་གནས་པར་འབད་པ་གནང་མྱོང་ཡོད་པ་དང་།ཁྱད་པར་དུ་༢༠༠༨ལོའི་བོད་ཀྱི་ལོ་གསར་ཚེ་གཅིག་ཉིན་རྒྱ་གཞུང་གིས་རྡི་ཚ་དགོན་པར་རྒྱལ་གཅེས་ཆོས་གཅེས་ཞེས་པའི་ལས་འགུལ་སྤེལ་སྐབས་ཀྱང་།དུས་ལྟར་ཛ་དྲག་གི་གནས་སྟངས་བཙན་བྱོལ་བོད་གཞུང་ལ་སྙན་སེང་ཞུ་བ་མ་ཟད།ད་དུང་དགོན་པར་བདག་གཅེས་ཀྱིས་གྲྭ་དམངས་ཀྱི་ངོ་རྒོལ་བྱེད་འདོད་ཀྱི་ངར་ཤུགས་དེ་ཉིད་ཞི་བའི་ངོ་བོར་བསྒྱུར་སྟེ།ཞི་བའི་ངོ་བོའི་སྟེང་ནས་རྒྱ་གཞུང་ལ་རྒྱལ་གཅེས་ཆོས་གཅེས་ཀྱི་ལས་འགུལ་ཞེས་པ་མཚམས་འཇོག་བྱེད་དུ་བཅུག་པ་མ་ཟད།ཉིན་དེ་ནི་ལོ་གསར་ཚེ་གཅིག་དང་བོད་ས་བྱི་ལོའི་ཞི་རྒོལ་ཆེན་མོའི་ལས་འགུལ་འགོ་བཙུགས་ཀྱི་ཉིན་མོར་གྱུར་བ་རེད། འདིར་དེ་ལྟར་ཟེར་དོན་ནི་སྤྱིར་ན་བོད་ཡུལ་ཆོལ་ཁ་གསུམ་གྱི་མོད་མི་ཚང་མས།རྡོག་རྩ་དཔུང་བ་གཅིག་སྒྲིལ་གྱིས་བོད་ས་བྱི་ལོའི་ཞི་རྒོལ་ཆེན་མོ་གནང་ཡོད་པ་ནི་རྗེས་སུ་ཡིད་རང་དང་རང་རིགས་ཀྱི་དམིགས་རྐྱེན་དུ་གྱུར་ཡོད་པ་ཀུན་ཀྱིས་མཁྱེན་གསལ་ལྟར་ལགས་ཀྱང་།འདིར་དམིགས་གསལ་ཞིག་ལ་བོད་ས་
   བྱི་ལོའི་ལོ་གསར་ཚེ་གཅིག་ཉིན།སྔ་དྲོ་རྡི་ཚ་དགོན་པ་ནས་རྒྱ་གཞུང་གི་ལས་བྱེད་པ་དང་གདོང་ཐུགས་ཀྱིས་དགོན་པས་དགེ་འདུན་འདུས་དམངས་ཀྱིས་ཁྲོམ་གཞུང་དུ་བསྐྱོད་དེ།རྒྱ་གཞུང་ལ་ངོ་རྒོལ་གྱིས་རྒྱ་གཞུང་གིས་རྡི་ཚ་དགོན་པར་ཡོང་བའི་རྒྱ་དཔོན་ཚང་མ་མཐར་སྤྲད་བཏང་རྗེས།རྡི་ཚ་ཞང་སྲིད་གཞུང་ལ་སོང་ནས་ངོ་རྒོལ་གྱི་ལས་འགུལ་ཤུགས་ཆེན་སྤེལ་ནས་རྒྱ་མིའི་ལས་བྱེད་རྣམས་མཐར་སྤྲོད་བཏང་སྟེ་སྲིད་གཞུང་སྟོང་བར་བཟོས་རྗེས།དགེ་འདུན་པ་རྣམ་དགོན་པའི་རྒྱབ་རི་བཀྲ་ཤིས་བུམ་པའི་རིར་འཛོམས་སྟེ།ཚད་མེད་ཡོན་ཏན་མ་དང་རྒྱལ་བའི་ཞལ་བརྟེན་གསོལ་འདེབས་ལ་སོགས་དང་འབྲེལ་ཏེ་བོད་རང་དབང་གི་བདེན་པའི་སྐད་འབོད་ཐོག་མར་བྱས་ཤིང་།སྐབས་དེ་ཤེད་དུ་སྐད་འབོད་ཀྱི་ནང་དོན་དང་།སྐད་འབོད་ཞུ་སྟངས་སོགས་ཀྱི་དོན་ཚན་ཚང་མ་སྐྱིད་སྡུག་ཚོགས་པའི་དེ་སྔ་ཤེས་རྟོགས་བྱུང་ཡོད་པའི་རྒྱལ་གཅེས་ཆོས་གཅེས་ཀྱི་ལས་དོན་དེར་ངོ་རྒོལ་ཞུ་ཕྱོགས་གྲོས་བསྡུར་སྐབས་གཏན་འབེབས་གནང་ཡོད་པ་ལྟར།དོན་རྐྱེན་དེའི་མགོ་སྔ་དཀྱིལ་གསུམ་ཐད།ཁོང་༢༠༠༨ལོའི་སྤྱི་ཟླ་གསུམ་པའི་ཚེས་༡ཉིན་ནས་ཆེད་ཕེབས་ཀྱིས་བཀོད་སྒྲིག་ལེགས་པར་གནང་རྗེས།ཚེས་༡༦ཉིན་ཁོང་ཉིད་གྲོང་ཁྱེར་ཟི་ལིང་དུ་ཕེབས་དེ་ཁ་པར་སྟེང་ནས་དགོན་པའི་དགེ་འདུན་པ་རྣམས་ལ་བཀོད་སྒྲིག་གིས་ངོ་རྒོལ་ལེགས་འགྲུབ་བྱུང་ཞིང་།ཐེངས་དེའི་དོན་རྐྱེན་ཁྲོད་དགོན་པའི་གྲྭ་བ་གཅིག་ལའང་གནོད་སྐྱོན་སྤུ་ཙམ་ཡང་མ་བྱུང་བ་དེ་ཡང་།ངེད་སྐྱིད་སྡུག་ཚོགས་པའི་ངོས་ནས་ཁོང་གི་མཁྱེན་རྒྱ་དང་ཐབས་མཁས་ཀྱི་མཛད་པར་ངོས་འཛིན་བྱེད་བཞིན་ཡོད་པ་དང་།བོད་ས་བྱི་ལོའི་ཞི་རྒོལ་ཆེན་མོ་ཡང་འདི་ལྟ་བུའི་རྒྱ་གཞུང་གིས་བོད་ཀྱི་བསྟན་སྲིད་རྩ་མེད་དུ་གཏོང་བའི་སྦྱོར་བར་མཐའ་གཅིག་ཏུ་ངོ་རྒོལ་གྱིས་ཕྱིར་བཟློག་གཏོང་རྒྱུ་བྱུང་བ་དེ་ནི།ཁོང་ལྟ་བུ་བོད་ཀྱི་བསྟན་པ་ཆབ་སྲིད་ལ་འཁུར་འདེགས་ཀྱི་ཀུན་སློང་བཟང་པོ་དང་ཐུགས་བསྐྱེད་སྨོན་ལམ་གྱིས་བརྩིས་ཟིན་ཡོད་པའི་སྐྱེས་བུ་དམ་པའི་ཐུགས་བསྐྱེད་སྨོན་ལམ་གྱིས་ཐོག་མར་སྣེ་དྲངས་སྟེ།ལས་འགུལ་སྤེལ་བར་བརྟེན་ས་བྱི་ལོའི་བོད་ཀྱི་ཞི་རྒོལ་ཆེན་མོའི་མེར་ལྕེ་བོད་ཡུལ་ཆོལ་ཁ་གསུམ་ལ་སྤར་བ་བྱུང་ནས།ད་ལྟའི་ཆར་བོད་ཕྱི་ནང་གི་བོད་མི་ཡོངས་ལ་བོད་དོན་ཐད་ཀྱི་དྲང་བདེན་གྱི་ས་བོན་གསལ་འདེབས་གནང་ཐུབ་ཡོད་པ་འདི་ཡང་།དམ་པ་ཁོང་གི་མཛད་རྗེས་ཀྱི་ཆ་ཕྲ་མོའི་གྲས་སུ་གཏོགས་ཇེ་ཀྱང་བརྗོད་འདོད་བྱུང་།ནམ་རྒྱུན་དམ་པ་འདི་ཐུགས་ཧ་ཅང་ཞིབ་ཚགས་པ་དང་སྒམ་བརླིང་ཡིན་པའི་དབང་གིས་བྱ་བ་གང་ལའང་འཐུས་ཤོར་རྩ་བ་ནས་བྱུང་མྱོང་མེད་པ་མ་ཟད།ཁོང་ནི་དེ་བས་ཀྱང་བྱས་པ་ངོམས་སོ་མི་བྱེད་མཁན་གྱི་སྐྱེས་བུ་དམ་བ་སྟེ།ལས་གང་བྱས་ཐམས་ཅད་ལན་ལ་མི་རེ་བའི་ཚུལ་གྱིས་བཟང་འབྲས་ཐམས་ཅད་ལས་གྲོགས་ཀྱི་ཐུགས་རྗེ་བཀའ་དྲིན་ཏུ་རྩིས་ནས།གཞན་དོན་རྐྱང་བ་ལས་མི་སྒྲུབ་མཁན་གྱི་དམ་པ་ཞིག་ཀྱང་ཡིན་པས།ལོ་ངོ་ཉི་ཤུ་སོང་ཡང་།བོད་ཀྱི་བདེ་སྡུག་གི་ཆེད་དུ་ལས་ཀ་བྱས་རབས་སུ་གང་ལའང་མི་ལབ་པའི་སྟེང་།མཐའ་ན་ཁ་བརྡ་ཙམ་ཀྱི་སྐབས་ལའང་ཐབས་མཁས་པའི་སྒོ་ནས་བོད་དོན་གླེང་གཞིར་འཇོག་ཐུབ་མཁན་གྱི་སྐྱེས་བུ་དམ་པ་ཞིག་ཡིན།བསམ་ཡུལ་ལས་འདས་པ་ཞིག་ལ་ཐེངས་འདིའི་དོན་རྐྱེན་འདི་བྱུང་སོང་།ཡིན་ན་ཡང་ཁོང་བོད་ཀྱི་རིག་གཞུང་འཛིན་སྐྱོང་གི་ལས་ཀའི་ཁྲོད་ནས།ཐུགས་བསྐྱེད་སྨོན་ལམ་བོད་ཀྱི་བསྟན་པ་ཆབ་སྲིད་ལ་ཕྱག་ལས་གནང་བཞིན་དགོངས་པ་གཞན་དོན་དུ་གཏོད་པའི་རྐྱེན་ངན་གྱི་ལམ་དུ་གཏད་སོང་།ང་ཚོར་སེམས་འཚབ་དང་མ་འོངས་བའི་བཀོད་སྒྲིག་དང་ལས་དོན་ལ་ནར་འགྱངས་ཆེན་པོ་ཐེབས་སོང་བ་ནི།ཕངས་པ་ཞིག་དང་བསམ་ཡུལ་ལས་འདས་པ་ཞིག་ཡིན།དགོངས་དག་ང་སེམས་ཚོར་ཀྱིས་བསྡད་ཐུབ་ཀྱིན་མི་འདུག མེད་ཐབས་མེད་པའི་ངེད་སྐྱིད་སྡུག་ཚོགས་པའི་མི་སྣ་ཞིག་འདི་
   ལྟར་བཞུད་སོང་བས།མ་འོངས་པར་ཁོང་ལྟ་བུའི་བློས་ཐུབ་དང་ཡིད་རྟོན་རུང་བའི་ལས་བྱེད་ཞིག་གང་ནས་རེག་འོང་ངམ།བསམ་བློ་ཅན།ལས་འགུལ་སྤེལ་ཐུབ་མཁན།གསང་བའི་ངོ་བོར་གནས་ཐུབ་མཁན་ཞིག
   ང་ཚོས་དེ་རིང་ཁོང་ལ་མྱ་ངན་གྱི་ཚོགས་འདུ་རྣམ་པ་འདྲ་མིན་གྱི་སྟེང་ནས་ཞུ་ཡོད་ལ་བསྔོ་བ་སྨོན་ལམ་ཡང་བཏབ་པ་ཡིན།ཐེངས་འདིའི་རྐྱེན་ངན་བྱུང་དོན་ཐད།ང་ཚོས་ཁོངའཚོ་བཞུགས་སྐབས་མི་སྣ་ཆེད་བཅར་གྱིས་དོན་རྐྱེན་འདིའི་མགོ་རྔ་དཀྱིལ་གསུམ་ལ་ཁ་བརྡ་བྱུང་ཡོད།དེ་རིང་གི་གྲོས་བསྡུར་སྐབས་ཀྱང་གླེང་རྒྱུ་བྱུང་།དངོས་སུ་ཁ་བརྡ་བྱས་ནས་བརྩད་གཅོད་བྱུང་ཡོད།རྒྱུ་རྐྱེན་ཚང་མ་ཧ་གོ་ཡོད།ཁོང་གིས་ང་ཚོ་སྐྱིད་སྡུག་ཚོགས་པའི་སྐོར་སྤུ་ཉག་ཙམ་ཡང་མི་སུ་ལའང་ལབ་མི་འདུག ཁོང་ལ་མནར་གཅོད་གཏོང་དོན་ནི་ཁོང་ནམ་རྒྱུན་བོད་ཀྱི་བསྟན་པ་འཛིན་སྐྱོང་ཐད་ཕྱག་རྗེས་ཆེ་བ་དང་།ཐབས་ལ་མཁས་པ་ལ་སོགས་རྒྱ་གཞུང་གི་སྙིང་གི་ཚེར་མར་གྱུར་ཡོད་པའི་དབང་གིས་རེད།གཞན་རྒྱ་མིའི་མནར་གཅོད་
   བྱས་པའི་སྐབས་ཀྱང་མི་གཅིག་མཐར་འདོན་བྱས་མེད་པ་མ་ཟད།ད་དུང་ཁོང་ལ་ཚོགས་པ་དང་བོད་དོན་ལས་འགུལ་ཐད་མི་སུ་དང་ཡང་འབྲེལ་བ་ཡོད་མེད་གཅིག་ཀྱང་གསུངས་མི་འདུག གཞན་རྒྱ་མིས་ཁོང་ནམ་རྒྱུན་བོད་ཀྱི་བསྟན་པ་འཛིན་སྐྱོང་ཐད་ཕྱག་རྗེས་ཆེ་བ་དང་།ཐབས་ལ་མཁས་པ་ལ་སོགས་ཀྱི་དབང་གིས་གནོད་པ་སྐྱེལ་ཐབས་མ་རྙེད་པར་ལུས་ཡོད་པའི་དབང་དང་།སྐབས་དེ་དང་བསྟུན་ནས་ཁ་པར་གཏོང་མཁན་སྐོར་
   གྱི་སྐད་ཆ་ཞིག་ཡོད་པ་དེ།ཁ་པར་གཏོང་མཁན་ཁོ་རང་གིས་དམ་པ་གང་ལ་དུས་རྟག་ཏུ་སྐད་ཆ་དྲིས་པའི་དབང་གིས་ཡིན་པ་ལས།ཁ་པར་གཏོང་མཁན་དེར་ཡང་དམ་པ་གང་གིས་ང་ཚོས་གནས་སྟངས་གང་ཡང་ལབ་མི་འདུག་པས་ཚང་མའི་སེམས་བདེ་མོ་བྱོས།གཞན་ཁ་པར་གཏོང་མཁན་དེ་ཡང་ང་ཚོའི་སྐྱིད་སྡུག་ཚོགས་པ་དང་ཐོག་མཐའ་བར་གསུམ་དུ་འབྲེལ་བ་རྩ་བ་ནས་མེད་པ་ཞིག་ཡིན།རྗེས་སུ་མི་འདིའི་གྲས་ལ་གཟབ་གཟབ་བྱོས།རྒྱ་མིའི་སོ་བ་རེད་ཟེར་བཞིན་མེད།ཡིན་ན་ཡང་གསང་ཚིག་མེད་ན་ཁ་བརྡ་མ་བྱེད།དེ་རིང་གི་ཚོགས་འདུར་ཞུགས་མ་ཐུབ་པའི་གྲོགས་པོ་རེ་ཟུང་ལ་ཞུ་དགོས་པ་ཞིག་ལ།༢༠༡༡ལོའི་ལོ་མཇུག་ཙམ་ལ་ང་ཚོས་རྒྱ་མིའི་སྡེ་སྲུང་མི་སྣའི་དམ་པ་གང་ལ་བཅར་འདྲི་བྱས་པའི་ཚིག་ཐོ་དེར་ཡང་བསྐྱར་ཚར་གཅིག་བལྟས་ཟིན་པ་ཡིན།ཚང་མའི་སེམས་བདེ་མོ་བྱོས།དམ་པ་གང་གིས་ངོ་འཕྲད་ནས་ཁ་བརྡ་བྱས་པ་དང་ནང་དོན་སྤུ་ཙམ་ཡང་འགལ་འཛོལ་མི་འདུག སྐྱེས་བུ་ཆེན་པོ།ས་ལ་གནས་པའི་སེམས་དཔའ་ཆེན་པོ་དགེ་བའི་བཤེས་
   གཉེན་ཞིག བོད་བསྟན་པ་ཆབ་སྲིད་ལ་བློ་སེམས་རྩེ་གཅིག་གིས་སྲིད་ཞུ་ཞུ་མཁན་
   ཞིག་རྒྱ་གཞུང་གིས་མནར་གཅོད་འོག་འདས་དྲུང་དུ་བྱིན་སོང་།ཁོང་གིས་གང་མཛད་ཡོད་པ་ཐམས་ཅད་རྒྱ་ནག་གཞུང་གི་རྩ་ཁྲིམས་དང་བཅའ་ཁྲིམས།ཡུལ་ཁྲིམས་སོགས་གང་ལའང་འགལ་མེད།ཡིན་ན་ཡང་མནར་གཅོད་བཏང་སྟེ་རྐྱེན་ལམ་དུ་བཏང་སོང་།
   ང་ཚོའི་བློས་ཐུབ་ཀྱི་གྲོགས་པོ་ཚོས་རྩ་ཚིག་སེམས་ལ་ཉོར།
   གཞན་བཙན་བྱོལ་བོད་གཞུང་དང་བོད་ཀྱི་བདེ་སྡུག་ཐད་ཀྱི་སྐྱིད་སྡུག་ཚོགས་པ་ཚང་མས་དམ་པ་ཁོང་གི་སྐུའི་གསང་གསུམ་གྱི་མཛད་རྗེས་མི་མཁྱེན་ཡང་།གོང་གི་རྒྱུ་མཚན་འདིས་ཟུར་ཙམ་མཁྱེན་པར་གནང་སྟེ།ཁོང་གི་མཚན་དང་བཅས་ཏེ་བོད་ཀྱི་བསྟན་པ་ཆབ་སྲིད་ལ་སྲིད་ཞུ་སྒྲུབ་མཁན་ཞིག རྒྱ་གཞུང་གིས་ནག་
   མེད་ཉེས་འཛུགས་ཀྱིས་དོན་མེད་མནར་གཅོད་འོག་རྐྱེན་འདས་སུ་བཏང་བ་ཐོ་འགོད་ཀྱིས།ཁོང་རྒྱལ་གཅེས་དཔའ་བོའི་གྲས་སུ་འགོད་རོགས་ཞུ་བ་ལགས།་གསལ་བཤད་འདི་འགོད་རྒྱུའི་ཐད་ནང་ཁུལ་གྲོས་བསྡུར་ཚར་ལྔ་ལ་བྱས་པ་ཡིན། འདིར་ཁོང་ལ་ཡ་ང་
   བའི་མནར་གཅོད་བཏང་བའི་སྐོར་བྲིས་མེད།ཤེས་འདོད་ཡོད་ན་དམ་པ་གང་ཞལ་བཞུགས་པའི་སྐབས།ཁོང་གི་དངོས་མྱངས་གསུངས་པ་ཁག་གཞིར་བཟུང་རྒྱུ་ཡིན་པ་དང་།དམ་པ་གང་གི་ནང་མི་ཚང་མར་ཞུ་རྒྱུ།ཁྱེད་རྣམ་པར་བཀའ་འདྲི་མ་ཞུ་བར།ཁོང་གི་ལོ་རྒྱུས་ས་བོན་གསལ་བསྒྲགས་བསྐྱངས་བར་དགོངས་འགལ་མེད་པ་ཞུ་བ་ལགས།མཐར་དམ་པ་གང་གི་མཛད་རྗེས་ཚང་མས་ཤེས་ཡོད་པ་དག་རགས་ཙམ་མ་བགྲངས་ན།རྨོག་རུ་བསྟན་པའི་ཁྱབ་བསྒྲགས་ལྟ་བུ་དེ་ཡང་གང་ལེགས་སུ་འདུག་ཀྱང་།དམ་པ་གང་གི་རྣམ་ཐར་གྱི་ཆ་ཕྲ་མོར་རྒྱུ་ཚོགས་ཁ་གསབ་ལྟ་བུའི་ཚུལ་གྱིས།ཚོགས་ཞུགས་ཐུབ་པ་རྣམས་མཉམ་འདུས་ཀྱིས་གྲོས་ཐག་བཅད་དེ་གསལ་བསྒྲགས་འདི་སྤེལ་བ་ལགས་ཤིང་།མ་འོངས་བའི་བོད་ཀྱི་ཕྱི་རབས་པ་རྣམས་ལ།བོད་སྔ་རབས་པས་འདི་ལྟར་བོད་དོན་ལ་འབད་ཡོད་པ་ངོ་འཕྲོད་ཐབས་སུ།ཁོང་གི་ལོ་རྒྱུས་ཀྱི་ས་བོན་དུ་འགྱུར་བའི་སྨོན་ལམ་དང་བཅས།གངས་རི་ར་བས་བསྐོར་བའི་ཞིང་ཁམས་སུ།།ཕན་དང་བདེ་བ་མ་ལུས་འབྱུང་བའི་གནས།།སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི།།སྐུ་ཚེ་སྲིན་མཐའི་བར་དུ་བརྟན་གྱུར་ཅིག།
   སྲས་བཅས་རྒྱལ་བའི་སྤྱན་སྔར་གངས་ཅན་ཞིང་།།ཡོངས་བཟུང་རྒྱ་ཆེ་སྨོན་ལམ་གང་མཛད་པའི།།འབྲས་བཟང་དེང་འདིར་མྱུར་དུ་འཆར་བར་གསོལ།།སྣང་སྟོང་ཆོས་ཉིད་ཟབ་མོའི་རྟེན་འབྲེལ་དང་།།མཆོག་གསུམ་ཐུགས་རྗེས་མཐུ་དང་བདེན་མཐུས་སྟོབས།།རྒྱུ་འབྲས་བསླུ་མེད་བདེན་མཐུས་བདག་ཅག་གིས།།སྨོན་པའི་དོན་རྣམས་བཀག་མེད་མྱུར་འགྲུབ་ཤོག འཇམ་དཔལ་དཔའ་བོས་ཇི་ལྟར་མཁྱེན་པ་བཞིན།།ཀུན་ཏུ་བཟང་པོ་དེ་ཡང་དེ་
   བཞིན་དེ།།དེ་དག་ཀུན་ཀྱི་རྗེས་སུ་བདག་སྒྲུབ་ཕྱིར།།དགེ་བ་འདི་དག་ཐམས་ཅད་རབ་ཏུ་བསྔོ།།དུས་གསུམ་གཤེགས་པའི་རྒྱལ་བ་ཐམས་ཅད་ཀྱིས་བསྔོ་བ་གང་ལ་མཆོག་ཏུ་བསྔགས་པ་དེར།།གདག་གི་དགེ་བའི་རྩ་བ་འདི་ཀུན་ཀྱང་།།བཟང་པོ་སྤྱོད་ཕྱིར་རབ་ཏུ་བསྔོ་བར་བགྱིས།།དགེ་བ་འདི་ཡིས་སྐྱེས་བོ་ཀུན།།བསོད་ནམས་ཡི་ཤེས་ཚོགས་རྫོགས་ཤིང་།།བསོད་ནམས་ཡི་ཤེས་ལས་བྱུང་བའི།།དམ་པའི་སྐུ་ཉིད་ཐོབ་པར་ཤོགསྨོན་ལམ་ལོག་པས་རྒྱལ་བའི་བསྟན་པ་ལ།།འཁུ་བའི་ནག་ཕྱོགས་གཟུགས་ཅན་གཟུགས་མེད་སྡེའི།།བསམ་སྦྱོར་ངན་པའི་འཇིགས་པ་མ་ལུས་པ།།མཆོག་གསུམ་བདེན་པའི་རྩ་ནས་གཅོད་གྱུར་ཅིག།

   ་