ཚེ་དབང་རིག་འཛིན།
མིའི་རིགས་འཕེལ་རྒྱས་ཀྱི་ལམ་དུ་བསྐྱོད་པའི་བཀག་རྡོ་ཅི་ཞིག་ལ་འཕྲད་ཡོད་དམ། རང་གཞན་སུ་ཞིག་གིས་བཟོས་པ་ཡིན་ནམ། ཡང་སྙིང་འདི་དག་ལ་གདོང་ལེན་ཇི་ལྟར་བྱས་ན་བཟང་ངམ། དྲི་བ་འདི་དག་གིས་རྐང་བཙུགས་ཏེ་དྲིས་ལན་འཚོལ་བར་རིགས།
དང་པོ། མཚམས་འདི་ནས་དགོས་དབང་གིས་འུ་ཚོའི་ལོ་རྒྱུས་ལ་ཕྱི་མིག་ཅིག་འཕེན། དུས་རབས་བཅུ་བདུན་པའི་ནང་ཨི་ཊ་ལིའི་མཚན་ཉིད་རིག་པ་བ་པཱི་རུ་ནོ་རོ་མའི་མེ་ཏོག་ཐང་ཆེན་དུ་གསོན་བསྲེགས་བྱས་པ་དྲན་འོང་། ཁོང་གིས་མཚན་ཉིད་རིག་པའི་རང་ལུགས་སྟངས་འཛིན་བྱས་པར་བརྟེན་རོ་མའི་ཆོས་ཚོགས་ཀྱིས་ལྟ་ལོག་དང་གདོན་འདྲེར་སྙད་དེ་མནར་གཅོད་གྲངས་མེད་དང་བཅས་སྲོག་ཐོག་ཏུ་བཏང་བ་རེད། གོ་རྟོགས་དམན་པའི་སྤྱི་ཚོགས་ཤིག་ལ་མཚོན་ན་ཡུལ་དུས་གང་དུའང་། ཤེས་ཡོན་པ་རྣལ་མ་ཚོར་འདི་འདྲའི་ཞྭ་ནག་པོ་དང་ཁྲིམས་བཙན་པོ་མགོ་ཐོག་ཏུ་བབས་པ་ཉུང་ཉུང་ག་ལ་ཡིན། ཐ་ན་སོ་སོའི་ཕ་དང་སློབ་དཔོན་གྱིས་ཀྱང་རང་གི་ལྟ་ཚུལ་དང་མ་མཐུན་ན་བུ་དང་སློབ་ཕྲུག་ཀྱང་ལྟ་ལོག་དང་བསྟན་བཤིག་སོགས་ཀྱིས། མི་དཀར་པོར་ཞྭ་ནག་པོ་གཡོགས་ཏེ་རྒྱང་ཕུད་དུ་བཏང་བ་སོགས་སྐྱུག་བྲོ་བའི་ལོ་རྒྱུས་བྱུང་ཡོད། སློབ་དཔོན་ཕྱོགས་གླང་གིས་རང་གི་ཡབ་མེས་ཀྱི་བྲམ་ཟེའི་ཆོས་ལུགས་ལ་དོགས་སློང་དང་དགག་སྒྲུབ་བྱས་པ་དང་། གནས་མ་པའི་སྡེ་བའི་བརྗོད་མེད་ཀྱི་བདག་ཡོད་པའི་ལྟ་ཚུལ་ལ་མི་འཐད་པའི་རྣམ་འགྱུར་བསྟན་པར། རང་གི་ཕ་དང་སློབ་དཔོན་གྱིས་རྒྱང་ཕུད་བཏང་བ་ལྟ་བུ་རེད། རང་ཅག་གི་ཉེ་རབས་ལོ་རྒྱུས་ལ་མཚོན་ན། མང་གཙོའི་ལམ་ལུགས་ལ་ཅུང་རྒྱུས་མངའ་ཆེ་བའི་ལུང་ཤར་རྡོ་རྗེ་ཚེ་རྒྱལ་གྱིས། ང་ཚོའི་བཀས་བཀོད་རྒྱུད་འཛིན་གྱི་ཆབ་སྲིད་ལམ་ལུགས་དེ་མང་གཙོར་བསྒྱུར་རྒྱུའི་སྟ་གོན་བྱས་པར། གོ་རྟོགས་དམན་ཞིང་ལྟ་བ་མཁྲེགས་པའི་གཤེད་མ་དེ་དག་གིས་མིག་འབྲས་བཏོན་པའི་ཡ་ང་བའི་མཇུག་འབྲས་བྱུང་བས། རང་བཅད་ན་རང་ཐུང་བ་དང་། རང་གཞོག་ན་རང་ཕྲ་བའི་བྱས་ཉེས་བཞག་པ་མ་ཡིན་ནམ། མཁས་དབང་དགེ་འདུན་ཆོས་འཕེལ་གྱིས་སྔ་གཞུག་ལོ་བཅུ་ལྷག་གི་རིང་ལ་ཕྱིའི་རྒྱལ་ཁབ་ཏུ་སྤྲང་ཉུལ་གྱིས་དཀའ་སྡུག་སྣ་མང་ལ་མ་འཛེམས་པར་ང་ཚོའི་མུན་ནག་གི་མདུན་ལམ་ལ་འོད་སྣང་རེ་འཕྲོ་ཨེ་ཐུབ་ཀྱི་བསམ་པ་རྣམ་དག་གིས་རེ་འདུན་ཆེན་པོ་འཆང་སྟེ་ཕྱིར་ཕེབས་དུས། ཞེ་མེལ་ཞིང་ཡིད་གཏིང་ནས་ཆད་པ་ཞིག་ལ་ཡང་ང་ཚོའི་ལྟ་བ་སྒེར་གཅོད་དང་རིག་གནས་གཅིག་བསྡུད་ཀྱིས། མིའི་རིགས་ཀྱི་ལྷན་སྐྱེས་ཀྱི་ཐོབ་ཐང་གལ་བོ་ཆེ་དག་ལ་ངོས་འཛིན་དང་བརྩི་མཐོང་ཅི་ཡང་མེད་པའི་རྨོངས་བརྟུལ་མཁན་པོ་ཚོས། ལྟ་ལོག་དང་བསྟན་བཤིག་སྨྱོན་པ་སོགས་དབང་ཡོད་ཀྱིས་ཞྭ་ནག་པོ་གཡོགས་ཏེ་ང་ཚོའི་མདུན་ལམ་ལ་བཀག་རྡོ་ལས་ལྷག་པ་རེ་བཞག་པ་མ་ཡིན་ནམ། ཤེས་ཡོན་པ་རྣལ་མ་ཚོ་ནམ་རྒྱུན་ཕུགས་རྒྱང་གི་སླད་དུ་མང་མང་གི་ཁ་གཏད་དུ་འགྲེང་དགོས་པའང་ཆོས་ཉིད་ཅིག་རེད། དོན་དམ་དུ་ལྟ་ལོག་དང་བསྟན་བཤིག་སོགས་སུ་ཡིན་པ་ལོ་རྒྱུས་ཀྱིས་བདེན་དཔང་བྱེད་ངེས་རེད། འཕྲོས་བཤད་དེ་དག་གིས་འུ་ཚོས་ཅི་ཞིག་ལེན་དགོས་ཟེར་ན། ནག་ཉེས་ལ་ནག་ཉེས་ངོས་ཟིན་གསལ་བོ་ཡོད་པའི་སྒོ་ནས་ཡང་བསྐྱར་དེ་དག་མི་འབྱུང་བའི་གོ་རྟོགས་རྣལ་མ་ཞིག་ལེན་རྒྱུ་དེ་ཡིན། སྤྱིར་ཁ་སང་གི་ལོ་རྒྱུས། དེ་རིང་ཕྱིར་རྟོགས་བྱེད་པའི་དགོས་པའང་། སང་ཉིན་གྱི་སླད་དུ་ཡིན་པ་ལས་ལོ་རྒྱུས་ཀྱི་ཆེད་དུ་འཆད་ཉན་སོགས་ཡིན་མི་རིགས། གཉིས་པ། མིའི་རིགས་འཕེལ་རྒྱས་ཀྱི་ལམ་དུ་བསྐྱོད་པའི་བཀག་རྡོ་རང་བཞིན་སུ་ཞིག་གིས་བཟོས་པ་ཡིན་ཟེར་དུས། འུ་ཚོ་རང་ཉིད་ཀྱིས་རང་ཉིད་ལ་དྲི་རྟགས་ནག་པོ་ཞིག་བརྒྱབ་ཡོད་པ་མ་ཡིན་ནམ། གོང་བཤད་དངོས་ཡོད་ཀྱི་ལོ་རྒྱུས་ཐུང་ཐུང་ཚོས་གསལ་བཤད་ཡང་དག་ཅིག་བྱས་ཡོད་པ་མ་ཡིན་ནམ། དྲན་སྐུལ་རྣལ་མ་ཞིག་བསླངས་ཡོད་པ་མ་ཡིན་ནམ། མི་བུ་ཚོར་དེ་ལྟར་ཡིན་ཡང་། འུ་ཚོར་འདིའི་ཐད་ཀྱི་གོ་རྟོགས་དང་བསམ་བློ་དམན་པས་ངོས་འཛིན་གསལ་བོ་ཞིག་མེད་པ་དཀའ་ཁག་ཅིག་རེད། མིའི་རིགས་ཀྱི་སྔོན་ཐོན་པ་དེ་དག་གིས་ཁ་སང་གི་བྱས་ཉེས་ལ་འགྱོད་བཤགས་བྱས་ཤིང་། སང་ཉིན་སླར་ཡང་དེ་ལྟར་མི་བྱེད་པའི་དམ་བཅའ་བཞག་ཡོད། ཨི་ཊ་ལིའི་རོ་མ་མེ་ཏོག་ཐང་ཆེན་དུ་མཚན་ཉིད་རིག་པ་བ་པཱི་རུ་ནོ་གསོན་བསྲེགས་བྱས་པར་དྲན་གསོའི་རྡོ་རིང་བཙུགས་ཡོད་ཀྱང་། འུ་ཚོའི་བྱས་ཉེས་ལ་འགྱོད་བཤག་མེད་ཅིང་རྡོ་རིང་མེད་པས། འུ་ཅག་གི་བར་ལ་ལེ་དཅ་སྟོང་ཕྲག་གིས་ཆོད་པ་མཚོན་ཡོད་པ་མ་ཡིན་ནམ། བལྟས་བལྟས་རིག་རིག་ལ། མིག་བཙུམ་རྒྱུ་ཡིན་ནམ། ཤེས་ཤེས། གོ་གོ་ལ། མཁྲེགས་འཛིན་བྱ་རྒྱུ་ཡིན་ནམ། ཅིའི་ཕྱིར། འུ་ཚོས་ཀྱང་བྱས་ཉེས་ལ་འགྱོད་བཤག་གི་རྡོ་རིང་ཞིག་འཛུགས་མ་ཐུབ་པ་ཡིན་ནམ། དྲིས་ལན་གསུམ་པ་ཞར་དང་ཞོར་ལ་བཏབ་ཟིན་པས་ཡང་བསྐྱར་ངལ་བ་བརྟེན་མི་དགོས།