ཆ་འགག་མེ་བསྟན།
རྨོངས་པའི་སྨག་གིས་ཁྱབ་པའི་འཛམ་གླིང་འདིར།།
ཆོས་མེད་དྲན་རིག་རྒོད་པའི་རྒྱལ་ཁབ་དག།
བསམ་སྦྱོར་ངན་པའི་ལས་ལ་འབད་དྲག་ཏེ།།
འཇིག་སྐྲག་ཞེད་སྣང་འདི་ལྟར་རང་ཐོག་བབ།།
སྤངས་རྟོགས་ཡོན་ཏན་ཀུན་རྫོགས་བླ་མ་དང་།།
ཞི་བདེའི་ཐུགས་བསྐྱེད་འཛམ་གླིང་ཉི་ཟེར་གྱིས།།
དེང་འདིར་ནད་ཡམས་མྱུར་དུ་ཞི་བའི་ངང་།།
འགྲོ་དྲུག་སེམས་ཅན་བདེ་ལ་འགོད་པར་མཛོད།།
ལས་ཀྱིས་བསགས་པའི་ལས་ངན་འབྲས་བུ་འདི།།
གློག་དམར་བཞིན་དུ་འདི་ལྟར་སླེབས་པའི་ཚེ།།
སྤྱན་རས་གཟིགས་དབང་བསྟན་འཛིན་རྒྱ་མཚོ་མཆོག།
ཁྱོད་ལས་སྐྱབས་གཞན་བདག་ལ་མ་མཆིས་སོ།།
ཞི་བདེའི་དེད་དཔོན་ཕྱག་ན་པདྨོ་དང་།།
འཇིགས་པ་ཀུན་ལས་སྐྱོབ་པའི་རྗེ་བཙུན་མ།།
བྷྱོཿབདུན་འདོད་ཁམས་བདག་མོ་ལ་སོགས་པས།།
མགོན་མེད་ཉམ་ཐག་ནད་ལས་སྐྱོབ་བར་ཤོག།
སྙིགས་མ་ལྔ་བདོའི་དུས་ཀྱི་འཛམ་གླིང་འདིར།།
ཏོག་དབྱིབས་རིམས་ནད་སྲོག་གི་གཤེད་མ་སྟེ།།
འབྱོར་ལྡན་ཕོ་མོ་དབུལ་ཕྱུག་དབྱེར་མེད་པར།།
འཆི་བདག་འཇིག་སྐྲག་མི་འདོད་ངང་གིས་སླེབས།།
འདི་ལྟར་བྱུང་བའི་དངོས་ཡོད་གནས་ལུགས་དག །
ནུབ་ཕྱོགས་ཨ་རིའི་ཡུལ་དང་རྒྱལ་ཁབ་ཡོངས།།
ངེས་ཤེས་རྙེད་དེ་འཛམ་གླིང་ཁོར་ཡུག་ལ།།
རིན་ཆེན་སྲོག་ལས་གཅེས་སྤྲས་གནང་བར་མཛོད།།
སྤྱན་རས་གཟིགས་དབང་ཕྱག་ན་པདྨོ་ཡི།།
འཁོན་རིགས་བསྟན་པའི་གཙུག་རྒྱན་ཁྲི་ཆེན་མཆོག།
བཀའ་བརྒྱུད་སྲོག་ཤིང་རྒྱལ་བ་ཀརྨ་པ།།
རིས་མེད་ནང་བསྟན་ཆོས་བརྒྱུད་ཁག་སོགས་ནས།།
ལས་ཀྱི་སྨིན་པའི་རིམས་ནད་མྱུར་ཞི་པར།།
དེང་འདིར་འཛམ་གླིང་བདེ་སྐྱིད་རྫོགས་ལྡན་ལ།།
རྟག་ཏུ་དཔལ་ལ་རོལ་བར་སྨོན་སེམས་ཀྱིས།།
སྐྱབས་གནས་མཆོག་གསུམ་ཤུགས་དྲག་གསོལ་འདེབས་མཆི།།
དེང་གི་སྐབས་འདིར་འཛམ་གླིང་ཁྱོན་ཀུན་ལ།།
སྨན་བཅོས་བྱེད་སའི་སྨན་ཁང་མ་འདང་བར།།
ལྷ་རྗེ་སྨན་ཞབས་ཡོ་ཆས་དེ་བས་ཀྱང་།།
མཐུན་རྐྱེན་མ་ཚང་སྡུག་གི་བཙོན་ར་བཞིན།།
འདི་ལྟར་གནས་པའི་དོན་དངོས་མཇུག་འབྲས་ལ།།
འཛམ་གླིང་སྐྱེས་འགྲོ་ཀུན་གྱི་བསམ་གཞིག་ངང་།།
གོ་ལར་ཁོར་ཡུག་གཅེས་སྤྲས་ཚུལ་བཞིན་གྱིས།།
མ་སྐུལ་འབད་པ་དོན་ལ་གནས་པར་མཛོད།།
ཧྥ་རན་སིའི་རྒྱལ་ས་ཕ་རེ་སི་ནས།
ཕྱི་ལོ་ ༢༠༢༠ ཟླ་ ༤ ཚེས་ ༢༤ ཉིན་ལ།