གནས་ཚུལ་མཁོ་སྤྲོད་པ་ཤེར་འོས་སྒོམ་སྒྲུབ་ཆོས་ཚོགས།
དེ་ཡང་ཐའེ་ཝན་ནི་ནང་པ་སངས་རྒྱས་པའི་བསྟན་པ་དར་རྒྱས་ཆེན་པོ་ཡོད་པའི་རྒྱལ་ཁབ་ཅིག་ཡིན་ཞིང་། ཐའེ་ཝན་རང་གི་ས་གནས་ཀྱི་གཙོ་བོའི་ཆོས་བརྒྱུད་རྒྱ་བརྒྱུད་ནང་བསྟན་ལས་གཞན་ད་དུང་། བོད་བརྒྱུད་ནང་བསྟན་ཡང་དར་རྒྱས་ཆེན་པོ་ཡོད་པ་དང་། ད་དུང་ལྷོ་བརྒྱུད་ནང་བསྟན་གྱི་ཆོས་ཚོགས་དང་རྗེས་འབྲངས་པའང་ཡོད།
ཉེ་བའི་ལོ་འདི་དག་གི་རིང་ལ་དམིགས་བསལ་དུ་ཐའེ་ཝན་རྒྱལ་སྤྱིའི་བོད་བརྒྱུད་ནང་བསྟན་ཞིབ་འཇུག་ཚོགས་པའི་གཙོ་བོའི་སྣེ་ཁྲིད་དང་ལམ་སྟོན་སྐུལ་འདེད་བཅས་བརྒྱུད་དེ་ཐའེ་ཝན་གྱི་ས་གནས་ཀྱི་ནང་པ་དག་དང་བོད་བརྒྱུད་ནང་བསྟན་བར་སྔར་མེད་ཀྱི་འབྲེལ་ལམ་གསར་པ་ཞིག་ཡོང་བཞིན་ཡོད་པ་དང་། དེ་ནི་ས་གནས་ཀྱི་བོད་བརྒྱུད་ནང་པའི་བསྟི་གནས་ཁག་དང་རྒྱའི་དགོན་པ་དག་གི་བླ་ཆེན་རྣམ་པའི་བར་དུའང་ནང་བསྟན་དང་འབྲེལ་བའི་བགྲོ་གླེང་དང་། མཛད་རིམ་ཆེ་ཆུང་མང་པོ་མཉམ་འབྲེལ་གྱིས་གོ་སྒྲིག་བྱེད་པ་དང་། ཐའེ་ཝན་གྱི་རྒྱལ་སྤྱིའི་དགེ་འདུན་མཆོད་པ་ལྟ་བུ་ནང་པའི་ཆོས་ཕྱོགས་ཀྱི་སྡིང་ཆ་ཆེ་ཤོས་དག་ཏུའང་བོད་བརྒྱུད་ནང་བསྟན་དང་འབྲེལ་བའི་དཀྱིལ་འཁོར་ལོགས་སུ་གོ་སྒྲིག་ཞུ་བ་སོགས་ཡོང་བཞིན་ཡོད་པ་བཞིན། ཞིབ་འཇུག་ཚོགས་པའི་ཚོགས་གཙོ་ཟུར་བ་དང་ད་ལྟའི་འགན་འཛིན་ལྷན་ཚོགས་ཀྱི་ཁོངས་མི་ཡིན་པའི་བླ་མ་ཡེ་ཤེས་རབ་རྒྱས་མཆོག་གིས་ཐེངས་འདིར་ཡང་དམིགས་བསལ་བརྒྱུད་པ་གསུམ་གྱི་གནས་བརྟན་སྡེ་སྣོད་འཛིན་པ་དག་མཉམ་དུ་འཛོམས་པའི་ཆོས་ཕྱོགས་ཀྱི་མཛད་རིམ་ཧ་ཅང་གལ་ཆེན་ཞིག་གོ་སྒྲིག་ཞུས་གནང་ཡོད།
དེ་ཡང་བླ་མ་ཡེ་ཤེས་རབ་རྒྱས་མཆོག་གིས་དབུ་ཁྲིད་པའི་ཁོང་གི་ཆོས་ཚོགས་ཀྱིས་མཛད་རིམ་འདི་གོ་སྒྲིག་གནང་བ་དང་། དེ་ཡང་ཐོག་མའི་ཆར། སྨན་བླའི་སྟོང་མཆོད་ཆེན་མོ་ཞེས་པའི་མཛད་རིམ་འདི་རྒྱལ་ས་ཐའེ་པེ་ལ་གཞི་རྒྱ་ཆེན་པོའི་ཐོག་ནས་འཚོགས་རྒྱུར་གྲ་སྒྲིག་ཞུས་པར་མ་ཟད། མི་སྟོང་ཡས་མས་འདུ་རྒྱུའི་འཆར་གཞི་བཞག་པ་དང་། རྒྱ་བརྒྱུད་ཀྱི་དགེ་འདུན་པ་ཁོ་ནར་ཡང་ཐོ་འགོད་གནང་མཁན་ལྔ་བརྒྱ་མ་ཟིན་ཙམ་བྱུང་འདུག་ན་ཡང་། ཉེ་ཆར་ཐའེ་ཝན་གྱི་ནད་ཡམས་ཁྱབ་བརྡལ་སྔོན་འགོག་གི་སྒྲིག་ཁྲིམས་དམ་དུ་བཏང་བ་དང་མཉམ་དུ་མི་མང་གི་འདུ་འཛོམས་རིགས་རྒྱ་ཆུང་རུ་བཏང་བའི་བཀའ་རྒྱ་དང་འབྲེལ་ནས་ཁོང་གི་མཛད་རིམ་དེའང་མཐར་ཐའེ་ཀྲུང་དུ་སུ་གོ་སྒྲིག་ཞུས་ཡོད།
དེ་ཡང་བརྒྱུད་པ་གསུམ་གྱི་གནས་བརྟན་དང་བླ་ཆེན་རྒན་གྲས་རྣམ་ཆེད་དུ་གདན་འདྲེན་གྱིས་ཐའེ་ཀྲུང་གི་ཤེར་འོད་སྒོམ་སྒྲུབ་ཆོས་ཚོགས་སུ་གོ་སྒྲིག་ཞུས་པར་མ་ཟད། མཛད་སྒོ་འདིའི་གཙོ་འགན་གོ་སྒྲིག་པ་ནི་བླ་མ་ཡེ་ཤེས་རབ་རྒྱས་ཀྱིས་དབུ་ཁྲིད་པའི་བྱམས་བརྩེའི་ཆོས་གླིང་དང་ཤེར་འོད་སྒོམ་སྒྲུབ་ཆོས་ཚོགས་ཐུན་མོང་གིས་གནང་ཡོད་པ་ལས། སྤྱི་ལོ་༢༠༢༡ ཟླ་ ༡ ཚེས་ ཀྱི་སྔ་དྲོའི་ཆ་ལ་བོད་བརྒྱུད་ནང་བསྟན་གྱི་ཕྱག་ལེན་གཞིར་བཟུང་གིས་སྨན་བླའི་མདོ་ཆོག་གསུངས་པ་དང་། ཉིན་དེའི་ཕྱི་དྲོ་ཐའེ་ཝན་ནང་བསྟན་མཐུན་ཚོགས་ཀྱི་ཚོགས་གཙོ་བླ་ཆེན་ཅིན་ཡའོ་དང་། ཐའེ་ནན་ནང་བསྟན་མཐུན་ཚོགས་ཀྱི་ཚོགས་གཙོ་གནས་བརྟན་མིན་ཀཱང་སོགས་དངོས་སུ་ཆེད་ཕེབས་གནང་བར་མ་ཟད། ལྷོ་བརྒྱུད་ནང་བསྟན་གྱི་ཐའེ་ཝན་གྱི་སྐུ་ཚབ་གནས་བརྟན་མིན་ཀའོ་སོགས་གནས་བརྟན་གསུམ་དང་། དེ་བཞིན་བོད་བརྒྱུད་ནང་བསྟན་གྱི་ཆོས་བརྒྱུད་ཁག་ལྔའི་ཐའེ་ཝན་གནས་བཞུགས་ཇོ་ནང་རྒྱལ་ཚབ་ཆོས་སྣང་རིན་པོ་ཆེ་མཆོག་དང་རྙིང་མའི་ཀཿཐོག་རིག་འཛིན་ཆེན་པོ། བཀའ་བརྒྱུད་ཀྱི་མཁན་པོ་ཚེ་རྣམ་རིན་པོ་ཆེ། ས་སྐྱའི་བཀྲ་ཤིས་རིན་པོ་ཆེ། དགེ་ལུགས་ཕྱོགས་ཀྱི་ལྷ་རམས་པ་ཧ་ཤེན་རིན་པོ་ཆེ་སོགས་ཕེབས་ཡོད་པར་མ་ཟད། བརྒྱུད་པ་གསུམ་གྱི་དགེ་འདུན་པ་གདན་ཁ་གཅིག་ཏུ་འཛོམས་ནས་མཉམ་དུ་ཐའེ་ཝན་གྱིས་མཚོན་པའི་འཛམ་གླིང་སྐྱེ་འགྲོ་ཡོངས་རྫོགས་ནད་ཡམས་སོགས་ཀྱི་གནོད་འཚེ་ལས་ཐར་པའི་སྨོན་ལམ་གནང་ཡོད། ཐའེ་ཝན་ནང་བསྟན་མཐུན་ཚོགས་ཀྱི་ཚོགས་གཙོ་མཆོག་གིས་ཀྱང་ཚོགས་འཛོམས་དེར་དམིགས་བསལ་བསྔགས་བརྗོད་ཆེན་པོ་གནང་བར་མ་ཟད། བོད་བརྒྱུད་ནང་བསྟན་དང་རྒྱ་བརྒྱུད་ནང་བསྟན་ལྷོ་བརྒྱུད་ནང་བསྟན་གསུམ་ཆར་ཡང་སྟོན་པ་གཅིག་གི་བུ་སློབ་ཡིན་པ་དང་། རི་བོ་ཧི་མ་ལའི་ལྷོ་བརྒྱུད་འཕགས་ཡུལ་ནས་ལམ་ཁ་མི་འདྲ་བ་འགའ་ཞིག་བརྒྱུད་ནས་ས་གནས་མི་འདྲ་བར་བརྒྱུད་སོང་བ་ཙམ་ཞིག་ཡིན་པས་ད་ལྟའི་དུས་འདིར་དེ་བས་ཀྱང་བརྒྱུད་པ་ཕན་ཚུན་སེམས་ཐག་ཉེ་བོའི་ཐོག་ནས་མཉམ་འབྲེལ་གྱི་ནུས་པ་མཐོ་རུ་གཏོང་དགོས་པ་སོགས་ཀྱི་ཐད་བཀའ་སློབ་ཟབ་རྒྱས་ཕེབས་ཡོད། མཐར་ཆོས་བརྒྱུད་རིས་མེད་ཀྱི་ཚོགས་ཞུགས་པ་ཚང་མར་གོ་སྒྲིག་གནང་མཁན་་བླ་མ་ཡེ་ཤེས་རབ་རྒྱས་ཀྱིས་ཐུགས་རྗེ་ལེགས་འབུལ་གྱི་མཎྚལ་སོགས་ཕུལ་རྗེས་ཐེངས་འདིའི་མཛད་སྒོ་ཧ་ཅང་ཕུན་སུམ་ཚོགས་པའི་ངང་ནས་མཇུག་སྒྲིལ་གནང་འདུག །
