ཀླུ་སྨྱོན་ཧེ་རུ་ཀ
སྔོ་བསང་གི་ནམ་མཁའ་ནས་ཅི་ཙམ་ཉན་ཡང་ཚིམ་པ་མེད་པའི་གདངས་དབྱངས་ཤིག་བཞུར་འོངས།
དབྱངས་རྟ་དེའི་ལྟེབས་གཉེར་རེ་རེའི་བར་ན་མི་ལོ་ཁྲི་ཕྲག་གི་བརྩེ་དུང་གི་རྒྱ་མཚོ་འཁྱིལ་འདུག་ཅིང་།
དབྱངས་རྟ་དེའི་མཛེས་སྡུག་གི་ཕྱི་ཤུན་གྱི་ངོས་སུ་འཇིག་རྟེན་འདིའི་ཆེས་མཛེས་པའི་རྟོགས་བརྗོད་དག་བྲིས་འདུག
གདངས་དབྱངས་དེའི་བཞུར་རྒྱུན་གྱིས་མི་ལོ་སྟོང་ཕྲག་གི་སྐྱོ་གདུང་ཅིག་ཅར་སེལ་ཐུབ་ཅིང་།
གདངས་དབྱངས་དེའི་དྲི་ཞིམ་གྱིས་མི་ཚེ་ཧྲིལ་བོ་ཞིག་གི་སུན་སྣང་ཡང་བསུབ་ཐུབ།
གདངས་དབྱངས་དེ་ཆར་བའི་ཀློང་ནས་ཆར་བ་དང་འགྲོག་སྟེ་འབབ་བཞིན་འདུག་ལ།
དེ་ནི་འཇའ་ཚོན་གྱི་ཀློང་ན་འཇའ་ཚོན་དང་སྡེབས་ནས་འཚེར་བཞིན་འདུག
གདངས་དབྱངས་དེ་ནམ་གུང་ག་ལེར་སྙན་ངག་མཁན་གྱི་འབྲི་དེབ་ཀྱི་བར་དུ་གཉིད་ནས་སྡོད་ཅིང་།
གདངས་དབྱངས་དེ་ཞོགས་པར་ཡུན་གྱིས་རི་མོ་མཁན་གྱི་པུར་རྩེ་རུ་འཁྱིལ་ནས་འདུག
ས་སྲོས་རེ་རེ་བཞིན་གདངས་དེ་ནམ་མཁའ་ངོས་སུ་མཚམས་སྤྲིན་དམར་པོའི་ཟོལ་གྱིས་ལྡང་བར་བྱེད་ཅིང་།
ཉིན་གུང་གི་དུས་དེར་དབྱངས་དེ་ས་གཞིའི་ཕང་བར་གཙང་པོ་ཞིག་གི་ཚུལ་དུ་རྒྱུ་བཞིན་ཡོད།
གདངས་དེའི་ཀློང་ནས་བྱིས་པ་དག་ཀྱང་ངུ་མཚམས་བཞག་ནས་གཉིད་དུ་ཡུར་བ་དང་།
དབྱངས་དེའི་ཀློང་ནས་མི་སེམས་ཀྱི་ཞེ་སྡང་དག་ཀྱང་བྱམས་བརྩེའི་ངོ་བོར་འགྱུར་འགྲོ
གདངས་དེ་ཐོས་པ་ཡིན་ན་དམག་འཁྲུག་གི་ནད་རྙིང་དག་ཀྱང་ཤུལ་མེད་དུ་སོས་ཐུབ་ཅིང་།
དབྱངས་དེས་ཁྱབ་ཚད་ཀྱི་འཇིག་རྟེན་དག་ན་སྡུག་བསྔལ་གྱི་མིང་ཙམ་ཡང་རྙེད་དུ་མེད།
དགོན་པའི་ལྷ་ཁང་གི་ཡང་སྟེང་ན་གདངས་དེ་དུང་དཀར་ཆ་འབུད་ཅིག་གི་གཟི་བྱིན་དང་འགྲོག་ནས་ཕྱོགས་བཞིའི་རི་ཚོགས་ཀྱི་ཀློང་དུ་འཐིམ་བཞིན་ཡོད་ལ།
གྲོང་ཁྱེར་ཆེན་པོའི་འཇའ་ཚོན་གློག་གཞུ་དག་གི་འོད་སྣང་གི་ཁྲོད་དུ་དབྱངས་དེ་ཇི་སྲིད་བར་དུ་ཁྲ་ཆིལ་སྦར་ཆིལ་དུ་འཚེར་བཞིན་འདུག
གདངས་དེའི་ཀློང་ན་སྨད་འཚོང་མ་དག་གིས་ཀྱང་རང་ལུས་ཚོང་རྫས་སུ་གྱུར་པར་ཕངས་སེམས་ཚད་མེད་སྐྱེ་བཞིན་ཡོད་ཅིང་།
དབྱངས་དེའི་རྡུལ་ཕྲན་རེ་རེས་ཁྱབ་ཚད་ཀྱི་སྲང་བར་དག་ན་ཆོམ་རྐུན་དག་གིས་ཀྱང་ནམ་མཁའི་ལྷ་ལ་ནོངས་པ་བཤག་བཞིན་ཡོད།
མཛེས་སྡུག་གི་ནགས་ཀློང་དུ་གདངས་དེའི་བསྡུས་གཟུགས་སུ་གྲུབ་པའི་ལོ་མ་ལྗང་ཁུའི་ཚོགས་ཀྱིས་ཁྱེད་ལ་བསུ་བ་བྱེད་བཞིན་ཡོད་ཅིང་།
ཁུ་སིམ་པའི་ཞིང་གྲོང་དུ་དབྱངས་དེའི་ལག་པས་གཡུར་དུ་ཟ་བའི་གསེར་མདོག་གི་སྟོན་འབྲས་དག་ལ་བྱིལ་བྱིལ་བྱེད་བཞིན་ཡོད།
དགུན་གསུམ་གྱི་ཁ་བ་དཀར་པོའི་འདབ་མ་རེ་རེའི་ངོས་སུ་ཁྱོད་ཀྱིས་གདངས་དེས་བྲིས་པའི་སྒྱུ་རྩལ་གྱི་ཁྱད་ཆོས་ལྡན་པའི་རི་མོ་སྣ་ཚོགས་ཤིག་མཐོང་ཐུབ་ཅིང་།
དཔྱིད་གསུམ་གྱི་འཇམ་རླུང་དལ་བར་ལྡང་བའི་ཁྲོད་དུ་ཡང་ཁྱེད་ཀྱིས་དབྱངས་དེས་ཁྱེར་ཡོང་བའི་བདེ་སྐྱིད་ཀྱི་འཚོ་བར་རོལ་ཆོག
གདངས་དེ་ལ་རྡུལ་ཕྲན་མཚོན་ཆ་ཡོད་ཚད་ནུས་མེད་དུ་གཏོང་ཐུབ་པའི་བྱིན་རླབས་ཀྱི་ནུས་ཤུགས་ལྡན་ལ།
དབྱངས་དེ་ལ་མི་ཡུལ་གྱི་མཚོན་ཆ་ཡོད་ཚད་མེ་ཏོག་ཏུ་བསྒྱུར་ནུས་པའི་ཡ་མཚན་གྱི་གསང་བ་ཡང་འདུག
གདངས་དེར་འཐིམ་ཐེངས་རེ་རེར་ང་ཚོས་མི་རྣམས་ཀྱི་སྐྲ་མདོག་དང་ཆོས་ལུགས་གང་ཡིན་བརྗེད་འགྲོ་ཞིང་།
དབྱངས་དེར་ཉན་ཐེངས་རེ་རེ་བཞིན་ལྟ་གྲུབ་མི་འདྲ་བ་དང་བསམ་ཚུལ་མི་འདྲ་བ་དག་ཀྱང་གཞི་གཅིག་གི་ཀློང་དུ་འདྲེས་འགྲོ
དོ་དགོང་ངས་གདངས་དེ་ལ་རོལ་མྱོང་བྱེད་བཞིན་སྙན་ངག་ཐུང་ཐུང་ཞིག་འབྲི་བཞིན་ཡོད་ལ།
སང་ཉིན་ཁྱེད་ཀྱིས་དབྱངས་དེར་ཉན་བཞིན་གཏམ་རྒྱུད་རིང་མོ་ཞིག་འབྲི་བཞིན་ཡོད་པར་སྨོན།
སྙན་ངག་མཁན་སྐུ་ཞབས་ཀླུ་སྨྱོན་ལགས།།།།།།།།།།།།།།།།།།།། ཐུག་རྗེ་ཆེ། ཧ་ཅང་གི་སྙན་པོ་འདུག རང་ཉིད་ནི་སྙན་ངག་འབྲི་མི་ཤེས་ཀྱང་ཀློག་གྱུུར་དགའ་པོ་ཡོད།
འཕན་པོ་བསྟན་དར་ལགས་ཕེབས་ནས་དགོངས་ཚུལ་གསུངས་པར་ཐུགས་རྗེ་ཆེ་ཞུ། ངའི་སྙན་ངག་ཡིན་ཁུལ་འདི་དག་ལ་དགེ་སྐྱོན་གང་ཡོད་གསུང་རྒྱུར་དགའ་བསུ་ཡོད།
རེད་ཨ། གདངས་དབྱངས་དེ་ཅི་འདྲའི་སྙན་ཞིང་འཇིབས་ལ། གདངས་དབྱངས་དེ་ཅི་འདྲའི་ཡིད་དུ་སིམ་བདེ་བ། གདངས་དབྱངས་དེ་ཅི་འདྲའི་སྣུམ་ཞིང་བག་ཕེབས་ལ། གདངས་དབྱངས་དེ་ཅི་འདྲའི་ཆིག་སྒྲིལ་གྱི་ནུས་པ་ལྡན་པ་ཞིག་ཨང།
རེད་ཨང། གདངས་དབྱངས་དེ་ཅི་འདྲའི་སྙན་ཞིང་འཇིབས་ལ། གདངས་དབྱངས་དེ་ཅི་འདྲའི་ཡིད་དུ་སིམ་བདེ་བ། གདངས་དབྱངས་དེ་ཅི་འདྲའི་སྣུམ་ཞིང་བག་ཕེབས་ལ། གདངས་དབྱངས་དེ་ཅི་འདྲའི་ཆིག་སྒྲིལ་གྱི་ནུས་པ་ལྡན་པ་ཞིག་ཨང།
དེ་འདྲའི་གདངས་དབྱངས་སྙན་མོ་ཞིག་ཐོས་མ་མྱོང་།
དེ་གཞོམ་མེད་གྱི་སྒྲ་དབྱངས་ཡིན་ནམ་དེང་རབས་ཀྱི་རོལ་ཆ་ཞིག་ཡིན།
དེ་ཅི་ཞིག་གི་གདངས་ཡིན་ད་དུང་ཤེས་མ་ཐུབ།
དེ་འདྲའི་གདངས་སྙན་ཞིག་རོལ་ཐུབ་ན་མི་ཚེ་འདིའི་དོན་སྙིང་ཡང་རྙེད་པ་འདྲ།་་་་་་་ཤུ་རེ་ཁོ།
ཁྱེད་སྙན་ངག་པའི་ཁ་མ་གསལ་བ་ཡིན་གྱི་མ་རེད། ང་ཀློག་པ་པོའི་སེམས་མ་གསལ་བ་ཡིན་གྱི་རེད།