སྐྱེས་སར་ཀླུ་སྒྲུབ།
ནཱལནྡཱ་ཞིབ་འཇུག་ཅེས་པའི་དེབ་འདི་ཕྲན་སྐྱེས་སར་ཀླུ་སྒྲུབ་ཀྱིས་བརྩམས་པ་ཞིག་ཡིན་ལ། དེབ་ཀྱི་རྩ་བའི་ས་བཅད་ཁག་ནི། དང་པོ། གླེང་སློང་བའི་གཏམ། གཉིས་པ། སངས་རྒྱས་ཤཱཀྱ་ཐུབ་པའི་རྣམ་ཐར། གསུམ་པ། སངས་རྒྱས་ཆོས་ལུགས་ཀྱི་སྤྱི་བབ་གནས་ཚུལ། བཞི་པ། གསང་སྔགས་ཀྱི་གོ་དོན་མཚམས་སྦྱོར། ལྔ་པ། ཐེག་ཆེན་སངས་རྒྱས་ཀྱི་བཀའ་ཡིན་ནམ། དྲུག་པ། དཔལ་ནཱལནྡཱའི་བྱུང་རབས། བདུན་པ། ནཱལནྡཱའི་འཇིག་རྐྱེན་དང་བདག་གི་བསམ་གཞིགས། བརྒྱད་པ། པཎ་གྲུབ་བཅུ་བདུན་གྱི་བྱུང་རབས། དགུ་པ། མཇུག་བསྡུ་བཅས་ལས་གྲུབ་པ་ཞིག་ཡིན་ཞིང། བརྗོད་དོན་གཙོ་བོ་ནི་ནཱལནྡཱ་ཞེས་པའི་མཚན་དོན་ནས་བཟུང་མཐར་ཁ་ཆེའི་དམག་གིས་ནཱལནྡཱའི་གཙུག་ལག་སློབ་གཉེར་ཁང་རྩ་གཏོར་བཏང་ཚུལ་ཚུན་གྱི་ལོ་རྒྱུས་དང། འབྲེལ་ཡོད་གལ་ཆེའི་གནད་དོན་ཁག་ཁྱོན་ཡོངས་ནས་ཉམས་ཞིབ་བརྒྱུད་རྩོམ་འབྲི་བྱས་པ་ཞིག་ཡིན། དེབ་འདིའི་ནང་དཔལ་ནཱལནྡཱའི་གཙུག་ལག་སློབ་གཉེར་ཁང་གི་བྱུང་རབས་དང། སློབ་གཉེར་ཁང་དེའི་འཇིག་རྐྱེན། སློབ་གཉེར་ཁང་དེ་དང་འབྲེལ་ཡོད་ཀྱི་པཎ་གྲུབ་བཅུ་བདུན་གྱི་བྱུང་རབས་བཅས་ས་བཅད་འདི་གསུམ་གཙོར་འདོན་གྱིས་བྲིས་སྟབས། ད་ཕན་བོད་ཀྱི་སྐད་ཡིག་ནང་ནཱལནྡཱའི་ལོ་རྒྱུས་ཐོག་ཆེད་དུ་ཞིབ་འཇུག་རྩོམ་འབྲི་བྱས་པ་ཐོག་མ་དང་ཞིབ་ཚགས་ཆེ་ཤོས་སུ་གྱུར་ཡོད།
དཔེ་དེབ་འདི་བརྒྱུད་ནས་བོད་བརྒྱུད་སངས་རྒྱས་ཆོས་ལུགས་ཀྱི་གཞུང་དང་མན་ངག མཚན་ཉིད་རིག་པ་བཅས་ཀྱི་འབྱུང་ཁུངས། དཔལ་ནཱལནྡཱའི་གཙུག་ལག་སློབ་གཉེར་ཁང་གི་བྱུང་འཕེལ་འཇིག་གསུམ་སྐོར་འཐུས་ཚང་ཞིག་རྟོགས་ཐུབ་པས་བོད་རིག་པ་སྤྱི་དང། ལྷག་པར་ནང་བསྟན་མཚན་ཉིད་རིག་པའི་ལོ་རྒྱུས་ལ་ཞིབ་འཇུག་དང་དོན་གཉེར་ཅན་ཚོར་ཐུགས་ཕན་སོས་ངེས་ཤིག་ཡོད། དེ་མཚུངས་དེབ་འདི་རྡ་ས་བོད་ཀྱི་དཔེ་མཛོད་ཁང་གིས་དཔེ་སྐྲུན་འགྲེམས་སྤེལ་བྱེད་བཞིན་ཡོད་སྟབས་དོན་གཉེར་ཅན་ཚོས་དེ་ལྟར་འབྲེལ་བ་གནང་འོས་ཤིང། དེབ་རིན་ཧིན་སྒོར་ ༢༥༠ ཡིན་པ་བཅས་ཐུགས་འཇགས་འཚལ།
Library of Tibetan Works and Archives
Gangchen Kyishong
Dharamsala 176215
HP, India
Contact to the Office:
Email: info[at]ltwa.net, Email: office[at]ltwa.net
Tel: +91 (0)1892 222467 Fax: +91 (0)1892 223723
དཔེ་དེབ་འདི་འདྲ་ཞིག་ལེགས་འགྲུབ་བྱུང་བ་དེར་བཀྲ་ཤིས་བདེ་ལེགས་ཞུ། དུས་ཚོད་དང་གོ་སྐབས་བྱུང་ན་ཐེངས་ཤིག་ཀློག་ངེས་ཡིན། ཨོ་རེད་ལགས། ཤོག་གྲངས་ག་ཚོད་ཅིག་ཡོད་པ་རེད་དམ།
དཔེ་ཡག་པོ་རེད།
བཀུར་འོས་ཀློག་པ་པོ་ཁྱེད་ཀྱིས་ཕྲན་གྱི་དཔེ་དེབ་ཀྱི་ཤོག་གྲངས་ཐད་བཀའ་འདྲི་གནང་ལན་འབུལ་རྒྱུར།
གུས་པའི་དེབ་འདིར་རྩོམ་ཡིག་དངོས་དང་རེའུ་མིག་ལྷན་ཤོག་ངོས་ ༢༥༢ དང། ལོ་རྒྱུས་དང་འབྲེལ་བའི་དཔར་རིགས་བཅས་ལྷན་དུ་ཤོག་ངོས་ ༢༦༠ ཡོད་ལགས་ན་དེ་ལུགས་དགོངས་འཇགས་ཞུ་རྒྱུ་དང། ཁྱེད་ཀྱིས་ཞིབ་ཀློག་འདྲ་གནང་ཐུབ་ཚེ་དེ་ལུགས་ཀྱིས་ཕྱིན་ཆད་ཁ་སྐོང་དང། ལེགས་བཅོས་བྱེད་རྒྱུ་ཡོད་མིན་བཅས་ཀྱི་དགོངས་འཆར་གནང་ན་དགའ་བསུ་ཞུ་རྒྱུ་ལགས་ཞེས་སྐྱེས་སར་ཀླུ་སྒྲུབ་ཀྱིས་སྤེལ།
༢༥༢་་་་་༢༦༠
སྐྱེས་སར་ཀླུ་སྒྲུབ་ལགས། ཉིད་ཀྱིས་ལྗག་ལན་གནང་བ་དེར་ཐུགས་རྗེ་ཆེ་ལགས། གོ་སྐབས་ཤིག་བྱུང་དུས་མགོ་ནས་གཞུག་བར་དུ་ཐེངས་ཤིག་ཀློག་ངེས་ཡིན་ལགས། དེས་ན་ང་རང་གི་བསམ་ཚུལ་ཞིག་འབུལ་ཆོག་པ་ཞུ། ཤོག་གྲངས་ཉིས་བརྒྱ་དྲུག་བཅུ་མ་གཏོགས་མེད་པ་ཡིན་ན། ཧིན་སྒོར་ཉིས་བརྒྱ་ལྔ་བཅུ་བྱོས་དེ་བཙོང་བ་ཡིན་ན་དངོས་ནས་གོང་ཆེ་དྲག་མེད་འགྲོ ལྷག་པར་དུ་ཀློག་ན་འདོད་པའི་ཀློག་མཁན་དབུལ་བོ་ཚོ་ལྷག་དུ་དཀའ་ངལ་ཞིག་སྤྲད་པ་རེད། ད་དུང་། སློབ་མ་དང་རྡ་སའི་སྲང་གི་ལས་ཀ་ཙག་ཙག་བྱེད་མཁན་གྱི་བོད་ཡིག་ལ་དུངས་ཞེན་ཆེ་མཁན་དེ་ཚོས་ཉིན་ཁ་ཤས་རིང་དུ་ལས་ཀ་བྱས་པ་ཡིན་ན་ད་གཟོད་ཧིན་སྒོར་ཉིས་བརྒྱ་ལྔ་བཅུ་ལག་དུ་རེག་མིན་དེ་ཡང་བཤད་དཀའ་བ་ཉིད་རང་རྡ་ས་ལ་བཞུགས་མཁན་ཞིག་ཡིན་པས་མཁྱེན་ངེས་རེད་ལགས། འདི་ལ་དངོས་ནས་བསམ་གཞིགས་ཤིག་གནང་ཐུབ་པ་ཡིན་ན་ཡག་པོ་མེད་འགྲོ
བཀུར་འོས་སྐུ་ཞབས་ལགས༌༌༌
ནཱལནྡཱ་ཞིབ་འཇུག་ཅེས་པའི་དེབ་དེའི་དཔར་སྐྲུན་བདག་དབང་སོགས་ཚང་བོད་ཀྱི་དཔེ་མཛོད་ཁང་དུ་ཡོད་པ་ལས། གུས་པའི་རང་ལག་ཏུ་མེད་སྟབས་རིན་གོང་ཁེ་བོ་བྱེད་ཐབས་བྲལ། ཡིན་ཡང། སྐུ་ཉིད་ཀློག་འདོད་ཆེ་བ་དང། དཔེ་དེབ་དེ་ཉིད་བླུ་རྒྱུར་དཀའ་ངལ་ཡོད་ན་གུས་པས་ཁྱེད་ལ་དེབ་འབུལ་ལམ་ཞུ་ཆོག དེར་བརྟེན་ཁྱེད་ཀྱིས་གུས་པའི་གློག་འཕྲིན་ཁ་བྱང་ཐོག་འབྲེལ་བ་གནང་རོགས། kyisar@yahoo.com/kyisar1981@gmail.com