སྲས།
རེ་ཡུལ་ཁ་པར་འཕྲུལ་གྱི་བྱ་མ་རྟས།།
སིལ་སིལ་སྙན་པའི་གདངས་ཀྱིས་རྒྱང་ནས་འབོད།།
དྲོད་འཁྱིལ་གཞིས་ནས་སླེབས་པའི་གསུང་འཕྲིན་ཞིག།
ཤག་ཤག་ཆུ་མོའི་ཟོལ་གྱིས་སེམས་ལ་བཞུར།།
ཡབ་ཡུམ་བརྩེ་བ་སྣུམ་པོའི་ཉེ་ངོགས་སུ།།
སུམ་ཐབ་གྲོགས་སུ་བདམས་པའི་སྲིང་ཆུང་མ།།
རྒྱང་འཐེན་གནས་ལམ་ཕྲ་མོར་བཅོལ་བའི་གཏམ།།
བསམ་ཞིང་བསམ་ཞིང་སྙིང་གི་ཕྱེད་ཀ་འཁྱགས།།
སྨྲེང་བ་རྒྱང་ལ་བཏེགས་པའི་གནས་འགྲིམས་སྤྱི།།
འཁྲེང་ཞེན་མཆི་མས་རས་སུ་བཅད་མིན་མོད།།
བརྒྱད་གཉིས་ལང་ཚོ་བསུས་པ་ངའི་ནུ་མོ།།
ལོ་ན་ཧ་ཅང་སྲབ་པར་ལྷག་སྡུག་འཆོར།།
ཕ་མའི་འཛུམ་རླབས་དྲོ་བའི་གཞིས་ཆུང་དེར།།
གྱ་ནོམ་འབྱོར་བའི་ཕུན་ཚོགས་དབེན་ཀྱང་བླ།།
འཇམ་པའི་རྨི་ལམ་བསྒྲིག་པའི་མིང་སྲིང་དག།
ཕྱོགས་དང་ཕྱོགས་སུ་འཁྱར་ན་ཞེ་སེམས་འགས།།
སྣ་ལྔའི་སྐྲ་དར་བསྐྱོད་པའི་ཚོན་འོག་ན།།
སེམས་པ་ཕྱི་ལ་འཁྲེན་པའི་སྲིང་ཆུང་མ།
རབ་རུབ་རུ་བའི་མཐའ་ནས་ཅུང་སྒུགས་དང་།།
རྒྱང་རིང་ཨ་ཁུའི་སེམས་ཀྱིས་ཁྱོད་ལ་སྙེག།
རྩམ་སྐྱ་ཟས་སུ་ཆད་པའི་ལྡོམ་བུ་པར།།
རྒྱུ་ནོམ་དངུལ་གྱི་རྫོངས་པ་ཅང་མེད་མོད།།
ཞེ་འདང་གངས་རི་གཙང་མར་བཞུས་པའི་ཆབ།།
མིག་ཆུ་ཕོར་བ་གང་གི་གྱེས་ཆང་འདེགས།།
རྒྱུ་ཆེན་གཅེས་མས་གཡུ་བྱུར་རྒྱན་དུ་འཁུར།།
དཔོན་ཆེན་བུ་མོས་གསེར་དངུལ་རྫོངས་པ་འཐུ།།
སྲབ་འཇམ་ཚར་དཀར་ལྟེབ་ཀྱི་ཟོ་བཟང་མས།།
ལྷན་སྐྱེས་གཤིས་ཀ་དེ་ཉིད་གྲོགས་སུ་ཁྱེར།།
དགུང་བགྲེས་ཡབ་ཡུམ་འཛུམ་འཛུམ་བཞིན་གྱིས་འཚོས།།
ཚེ་གཅིག་ཁྱོ་ཀ་བྱམས་བྱམས་ཐབས་ཀྱིས་སྐྱོངས།།
རྒྱུས་མེད་གྲོང་ན་ཕུབ་པའི་སྦྲ་ཆུང་གན།།
ཁྱོད་ལ་ལས་ཀྱིས་བསྐྲུན་པའི་གཞིས་ཀ་ཉིད།།
གཏམ་ཡན་ན་བུན་གཏིབས་པའི་ཡུལ་གྲུ་དེར།།
སུན་སྣང་གདུང་བའི་ཁུར་པོ་ཐེག་དཀའ་དུས།།
སྲོད་ཁའི་རླུང་བུ་འཇམ་པོར་གཞས་སྐུར་དང་།།
ལྕམ་དྲལ་རྨི་ལམ་ཞིང་ནས་ཡང་ཡང་མཇལ།།
ལག་ཆུང་སྲབ་ལ་འཇུས་པའི་སྲིང་ཆུང་མ།།
ད་ནི་མིག་ཆུ་ཕྱེ་ལ་ལམ་དུ་ཆས།།
གཟན་སྣེ་རླུང་གིས་འཐེན་པའི་ཕུ་བོར་ཡང་།།
ཚད་ཐུབ་གླེགས་བམ་སློག་པའི་ལས་ཀ་ལྕི།།
བྱིན་རླབས་དྲི་བསྩུང་གཡོ་བའི་ཉེེར་ལེན་དུ།།
ངག་རིག་འཕྲིན་གྱི་མེ་ཏོག་སྐྱེས་སུ་སྐུར།།
སྤྲང་པོར་རིང་ནས་བྱམས་པའི་ཏཱ་རེ་མ།།
རྒྱང་བཞུད་ནུ་མོ་གཡས་དང་གཡོན་ནས་སྐྱོར།།
རྩོམ་ཡག་པོ་འདུག་ད