ནུབ་ཕྱོགས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་།

རྔ་བ་རྒྱལ་ཁམས་པ།

ཀ་དག་རྫོགས་པ་ཆེན་པོའི་ཞིང་ཁམས་ན།།
ལྷུན་གྲུབ་སྐུ་གསུམ་ཉམས་ཀྱི་རོལ་བ་ཅན།།
ཐུགས་རྗེ་སྒྱུ་འཕྲུལ་གཡོ་བའི་བཀོད་པ་ཉིད།།
བྱང་ཆུབ་སྒྲུབ་པའི་སྙིང་བོར་བདག་གིས་བསྟེན།།

དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ནི། མཁན་ཆེན་ཞི་བ་འཚོ་དང་། སློབ་དཔོན་པདྨ་འབྱུང་གནས། ཆོས་རྒྱལ་ཁྲི་སྲུང་ལྡེ་བཙན་ཏེ། མཁན་སློབ་ཆོས་གསུམ་དུ་གྲགས་པའི་སྐུ་རིང་ལ་བཞེངས་པའི་བོད་བརྒྱུད་སངས་རྒྱས་ཆོས་ལུགས་ཀྱི་དགོན་སྡེ་རྙིང་ཤོས་ཀྱི་གྲས་ཤིག་རེད། ཁོ་བོ་བསོད་ནམས་དམན་པས། ལོ་རྒྱུས་ཀྱི་ཆུ་རྒྱུན་རིང་ཞིང་། བྱིན་རླབས་ཀྱི་ནོར་བུས་གཏམས་པའི་ཆོས་གྲྭ་དེར་དངོས་སུ་མཇལ་རྒྱུའི་སྐལ་བ་མ་ལྡན། བོད་ཀྱི་བསྟན་སྲིད་ལ་བསམ་ཡུལ་འདས་པའི་ཆགས་འཇིག་བྱུང་བ་ནས། སྰ་ལའི་སྨན་ལྗོངས་སུ་འབོད་པའི་ཆོས་དང་སྲིད་ཀྱི་སྙིང་བོ་འཛིན་སྐྱོང་དང་བཅས་པ། རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་དགོས་བྱུང་། དུས་དེ་ནས་བཟུང་། ཆོས་བརྒྱུད་སོ་སོ་རྗེས་འཇུག་དང་བཅས་པ། རྒྱ་བལ་འབྲུག་གསུམ་གྱི་ནང་རིམ་གྱིས་སླེབས་ཤིང་། རང་རང་གི་གྲུབ་མཐའ་འཛིན་སྐྱོང་སྤེལ་གསུམ་གྱི་ཆོས་གྲྭ་དང་། སྒྲུབ་གནས་ཆེ་ཆུང་གང་མང་གསར་བཞེངས་ཀྱིས། བོད་ཡུལ་གྱི་ཤམ་བྷ་ལའི་ཞིང་བཀོད་ཅིག མི་ཡུལ་གྱི་གྲུ་ག་སོ་སོ་ན་བཞེངས་ཨེ་ཐུབ་ལྟ་བཞིན་ཡོད། རྒྱ་གར་གྱི་སེ་འབྲས་དགེ་གསུམ་དང་། ཨོ་རྒྱན་སྨིན་གྲོལ་གླིང་། རིམ་བཏེགས། དབྱིན་ཡུལ་གྱི་བཀའ་བརྒྱུད་བསམ་ཡས་གླིང་། ཨ་རིའི་ཨོ་ཏྲི་ཡ་ན་ལྟ་བུ་ནི་དེའི་དཔེ་མཚོན་ཞིག་ཡིན་ཞེས་བཤད་ཀྱང་ཆོག ཉེ་བའི་ཆར་བདག་གི་ཆུང་མ་མ་བུ་གཉིས། ཨ་རིའི་ནོས་ཡོག་སྟོད་ཀྱི་དབེན་པ་ཞིག་ཏུ་ཆགས་པའི༧རྒྱལ་བ་ཀརྨ་པའི་གདན་ས “ཀརྨ་ཐེག་གསུམ་ཆོས་ཀྱི་འཁོར་ལོ”ཞེས་འབོད་པའི་ཆོས་སྡེ་དེ་ཉིད་ཀྱི་ལོ་རེའི་གནས་སྐོར་གྱི་ལས་འཆར་ནང་འཛུལ་ཞུགས་བྱས། གནས་སྐོར་དེ་ནི་བདུན་གཅིག་གི་རིང་། ནོས་ཡོག་སྟོད་ཀྱི་ས་ཁུལ་ནང་ཡོད་པའི་བོད་བརྒྱུད་ནང་བསྟན་གྱི་མཆོད་རྟེན་ཁག་དང་། ཆོས་ཚོགས་དག་གི་ནང་མཆོད་མཇལ་གསོལ་སྨོན་བྱེད་པའི་ལས་རིམ་ཞིག་རེད། མ་བུ་གཉིས་གནས་སྐོར་ཚར་ནས་ཕྱིར་སླེབས་འཕྲལ། ངས་ཆུང་མར་གནས་ལམ་གྱི་ལོ་རྒྱུས་ཡིད་དུ་འོང་བ་མང་བོ་བཤད་རྒྱུ་འདུག དེ་ལས་ང་ལ་ལྷག་པར་ཡང་དོ་སྣང་བྱུང་བ་ཞིག་ནི། ནོས་ཡོག་སྟོད་ཀྱི་སྦས་ཡུལ་ཞིག་ན། སངས་རྒྱས་ཀྱི་ཞིང་ཁམས་ལྟ་བུའི་ཆོས་ཚོགས་ཤིག་ཡོད་པར་བཤད་པ་དེ་ཡིན། ངས་སྟབ་སྟབ་པོར་མོ་རང་གིས་སྤྲད་པའི་སྒྲོག་བྱང་བརྒྱུད། ཆོས་ཚོགས་དེའི་དྲྭ་རྒྱའི་འཇིག་རྟེན་གྱི་ནང་མཉུལ་ཞིབ་ཀྱི་མགོ་བརྩམས། དགོན་པ་དེ་ནི་སྔ་འགྱུར་རྙིང་མའི་ཕ་ས་ཀ་ཐོག་རྡོ་རྗེ་གདན་གྱི་ཆོས་བརྒྱུད་འཛིན་པ། མཁན་པོ་དཔལ་ལྡནཤེས་རབ་དང་། མཁན་པོ་ཚེ་དབང་དོན་རྒྱལ་ཞེས་ཞུ་བའི་སྤུན་མཆེད་ཟུང་གིས་ཕྱག་བཏབ་པ་ཞིག་ཡིན་པར་ཤེས་རྟོགས་བྱུང་། དགོན་པ་དེའི་མཚན་ལ”པདྨ་བསམ་ཡས་གླིང”ཞེས་འབོད་པ་མ་ཟད། དེ་ནི་ནུབ་ཕྱོགས་ཀྱི་བསམ་ཡས་དགོན་པ་ཡིན་པར་འགྲེལ་བརྗོད་གནང་འདུག དེར་བརྟེན་བདག་གིས་བོད་ཀྱི་བསམ་ཡས་དགོན་པ་མཇལ་མ་མྱོང་མོད། ནུབ་ཕྱོགས་འཕྲུལ་གྱི་རྒྱལ་ཁམས་ཤིག་ནས་བསམ་ཡས་དགོན་པ་མཇལ་རྒྱུ་བྱུང་ན། ཇི་འདྲའི་སྐལ་བ་བཟང་བོ་ཞིག་རེད་ཨང་སྙམ་དུ་སྦས་ཡུལ་དེ་མཇལ་འདོད་ཀྱི་འདུན་པ་ཤུགས་དྲག་པོ་ཞིག་སྐྱེས་ཤིང་། འདི་ལོའི་ཨ་རིའི་རྒྱལ་སྟོན་དུས་ཆེན་གྱི་གུང་སེང་དང་བསྟུན་ནས་ཉིན་ཁ་ཤས་རིང་། བསམ་ཡས་དགོན་པ་ཐེ་བས་ནོས་ཡོག་སྟོད་ཀྱི་ཡུལ་སྐོར་ས་ཚིགས་འགའ་ཞིག་གི་ནང་སྤྲོ་བསང་ལ་འགྲོ་རྒྱུར་ཐག་བཅད། ང་ཚོ་ལམ་དུ་མ་ཆས་གོང་དུ་ངའི་ཆུང་མས། མགྲོན་ཁང་དང་། སྤྲོ་གསེང་ས་ཚིགས། ལམ་སྟོན་ས་བཀྲ་ཚོན་དང་ལྡན་པ་བཅས་གྲ་སྒྲིག་འཐུས་ཚང་གནང་། རྒྱལ་སྟོན་དུས་ཆེན་གྱི་སྔ་ཉིན་ལས་ཀ་ནས་སྔ་དགོངས་ཞུས་ཏེ། ངའི་ཁྱིམ་ཚང་དང་། ཆུང་མའི་མ་རྒན། ཆུང་མའི་སྤུན་རྒན་པའི་བཟའ་ཟླ་བཅས། ང་ཚོ་མི་ལྔ་རླངས་འཁོར་ཆེ་བ་ཞིག་བཏང་སྟེ་ཡུལ་སྐོར་གྱི་ལམ་དུ་ཞུགས།

ཉིན་དེའི་ང་ཚོའི་ས་གནས་ཀྱི་གནམ་གཤིས་ནི། མཁའ་དབྱིངས་ཕལ་ཆེར་སྤྲིན་དཀར་གྱི་འདབ་མ་སྟུག་པོ་དག་གིས་ཀུན་ཏུ་གཡོགས་ཤིང་། མཚོ་རླབས་ཀྱིས་དེད་པ་ལྟ་བུའི་བསིལ་རླུང་འཇམ་པོ་དག་ནི་ཁ་ཕྱོགས་ངེས་མེད་དུ་ལྡང་། ཉི་མའི་འོད་སྣང་ཤིན་ཏུ་ཚ་དྲོད་ཆེའང་། རེས་འཆར་རེས་ནུབ་ཀྱི་འགྱུར་ལྡོག་མང་བས་དབྱར་དུས་ཀྱི་ཚ་སྒང་ཞིག་ལ་ལྟོས་ན། རླངས་འཁོར་གྱི་ནང་དྲོད་གྲང་སྙོམ་པོ་ཡིན་པས་ལུས་སེམས་གཉིས་ཀ་འགྲོ་བདེ་འདུག་སྐྱིད་ལྟ་བུའི་ཚོར་སྣང་སྐྱེས། སྐབས་དེར་ད་དུང་མི་རྣམས་བདུན་མཇུག་རིང་བོའི་རྒྱལ་སྟོན་དུས་ཆེན་ལ་འགྲུལ་བསྐྱོད་ཀྱི་མགོ་མ་ཚུགས་སྟབས། ང་ཚོ་བྱ་འཕུར་བ་ལྟར་ལམ་ཁ་ཆེ་ཆུང་མང་བོ་སྐད་ཅིག་སྐད་ཅིག་གིས་བགྲོད་ཐུབ་པ་བྱུང་། ང་ཚོ་ལམ་དུ་བུད་ནས་ཆུ་ཚོད་གཅིག་དང་ཕྱེད་ཀ་ཡས་མས་ཤིག་ནས། ང་ཚོའི་མངའ་སྡེ་དང་། ནོས་ཡོག་སྟོད་མའི་ས་གནས་སྤྲེལ་མཚམས་ཀྱི་མཐའ་མཚམས་ས་ཁུལ་ནང་སླེབས་ཤིང་། ནགས་ཚལ་ཅན་གྱི་རི་དང་། གཙང་བོ་རྒྱུ་བའི་གཤོངས་བ། ཐར་ཐོར་དུ་ཆགས་པའི་གྲོང་དང་གྲོང་རྡལ་ཁ་ཤས་བརྒྱུད་སྐབས། དེ་སྔོན་བཙན་བྱོལ་དུ་ཡོང་སྐབས་བརྒྱུད་མྱོང་བའི་བལ་ཡུལ་གྱི་ས་ཆ་འགའ་རེའི་རྣམ་པའང་ཡིད་ངོར་ངང་གིས་དྲན། རེ་ཞིག་ནས་རི་བོ་དང་རི་ཕྲན་དག་ནི། ང་ཚོ་ལས་རྒྱང་རིང་ནས་རྒྱང་རིང་དུ་ཆས་ཤིང་། རྟ་ནོར་ཅན་གྱི་འབྲོག་ཐང་ཡངས་པོ་དང་། དེ་དག་གི་ངོགས་ན་གནས་པའི་འབྲོག་ཁྱིམ་སྐྱ་བོ། ད་དུང་མ་རྨོས་པའི་ལོ་ཏོག་སྐྱེས་པའི་ས་ཞིང་ཆེ་ཆུང་དང་། ཐར་ཐོར་དུ་གནས་ཤིང་ཞིག་གསོ་བྱེད་མ་མྱོང་བའི་སོ་ནམས་པའི་སྡོད་ཁང་རྙིང་བ་རྣམས་ནི། གནའ་བོའི་དུས་རབས་བར་མའི་ཡོ་རོབ་སྤྱི་ཚོགས་ཤིག་གི་རྣམ་པ་ལྟ་བུར་སྣང་། ས་ཁུལ་འདི་དག་གི་ནང་དཔལ་འབྱོར་བསྡུ་རུབ་ཀྱི་འཁོས་ཀ་ཆེན་པོ་དེ་འདྲ་མེད་པ་འདྲ་ནའང་། གྲོང་ཁྱེར་ནང་གི་བྲེལ་ཟིང་དང་། དངངས་སྐྲག་གི་རྣམ་པ་ལྟ་བུ་ཅིའང་མཐོང་རྒྱུ་མེད་པས། སེམས་ནང་རང་བཞིན་གྱིས་ངལ་གསོ་དང་། ཞི་འཇམ་གྱི་ཚོར་སྣང་ཞིག་སྐྱེས་བྱུང་། ང་ཚོ་ལམ་དུ་བུད་ནས་ཕལ་ཆེར་ཆུ་ཚོད་གཉིས་ལྷག་ཅིག་འགོས་སོང་ཡང་། ཞིང་འབྲོག་གིས་བཟུང་བའི་སའི་ཐང་ག་ཆེ་ཆུང་དག་ནི་ད་དུང་རྫོགས་རྒྱུ་ཞིག་མི་འདུག་པས། ནོས་ཡོག་མངའ་སྡེ་འདིའི་རྒྱ་ཁྱོན་དེ་ཇི་འདྲའི་ཆེ་བ་ལ་སྙམ་དུ་ཡང་ཡང་བསམ་གཞིག་གི་གནས་སུ་ཚུད། བར་སྐབས་ཤིག་ནས་རླངས་འཁོར་གྱི་རྒྱུ་ལམ་མཐོ་ནས་མཐོ་རུ་དང་། ཁ་ཞང་ཆུང་ནས་ཆུང་དུ་འགྲོ་བཞིན་པ་ལྟར།

སྨུག་སྤྲིན་ཇེ་འཐུག་དང་། ཆར་ཞོད་ཀྱང་ཆེ་རུ་འགྲོ་བའི་མགོ་བརྩམས། མདུན་རྒྱབ་ཀྱི་རླངས་འཁོར་དག་ནི། ཉེན་བརྡའི་གློག་ཞུ་ཡང་ཡང་སྤོར་བཞིན་ག་ལེར་འགྲོ་བཞིན་པ་མཐོང་། ང་ཚོའི་ཕྱོགས་སྟོན་འཁོར་ལོའི་ནང་གསལ་བ་ལྟར་ན། བསམ་ཡས་སུ་སླེབས་རྒྱུར་ད་དུང་མ་ལེ་ཉི་ཤུ་ལྷག་ཅིག་འགོར་རྒྱུ་ཡིན་པར་བཤད། ནམ་མཁའ་ན་སྤྲིན་འཁྲིགས་ཤིང་གློག་མར་འཁྱུགས། དྲག་ལ་རྩུབ་པའི་འབྲུག་སྒྲ་ཡང་ཡང་གྲགས། ཆར་ཞོད་ཆེ་བས་ལམ་ཁའང་ཕལ་ཆེར་མཐོང་དཀའ་བར་གྱུར། དུས་དེ་ཙ་ན་ངའི་ཆུང་མས་ཁྱེད་ཚོས་བདུག་སྤོས་ཀྱི་དྲི་མ་ཞིམ་པོ་ཚོར་གྱི་འདུག་གམ། ཞེས་སྨྲས་པ་དང་ཆབས་ཅིག ངའི་ཁུ་བོ་རྡོ་གྲུབ་མགར་ར་མཁན་པོའི་གཟིམས་ཆུང་ནང་གི་དྲི་མ་དང་ཨ་ན་མ་ན་ཞིག་ངས་སྣ་ལམ་དུ་ཚོར་ཞིང་། སྨུག་སྤྲིན་གྱི་ཀློང་ན་ཆགས་པའི་དགོན་རྙིང་དམར་པོ་ཞིག རང་བཞིན་གྱིས་སེམས་ངོར་འཆར་དུ་བཅུག དེ་ནས་ཆུ་ཚོད་ཕྱེད་ཀ་ཙམ་སོང་མཐར། “སངས་རྒྱས་ལམ་ཆེན”ཞེས་བཏགས་པའི་ལམ་ཕྲན་ཞིག་གི་སྟེང་སླེབས།

རིམ་པས་ཆར་ཞོད་འཇགས་ཤིང་། སྤྲིན་དཀར་གྱི་ཕུང་བོ་དག་ཀྱང་ག་ལེར་ཡར་རི་རྩེ་དང་མཁའ་དབྱིངས་སུ་ལྡོག ཟླ་གམ་གྱི་ཀ་ཡང་བསྣོལ་བ་ལྟ་བུའི་རི་སྣ་ཞིག་གི་འཁྲིས་སུ “པདྨ་བསམ་ཡས་གླིང”ཞེས་བཀོད་པའི་སྒོ་བྱང་ཆུང་ངུ་ཞིག་ཡོད་པ་མཐོང་ཞིང་། ངའི་ཆུང་མས་འདི་རེད་འདི་རེད་ཅེས་བཤད་ཞོར་ག་ལེར་གཡོན་ངོས་ཀྱི་ལམ་ཕྲན་དེའི་ནང་འཛུལ། རི་སྣ་དེ་ནས་གྱེན་དུ་བསྲིངས་པའི་ལམ་ག་དོག་མོ་དེ་བརྒྱུད་ནས་ཡར་ཤུགས་ཀྱིས་བསྐྱོད། ལམ་དེའི་གཡས་གཡོན་ཤིང་ནགས་ཀྱི་ཁྲོད་དུ་བོད་ལུགས་དར་ལྕོག་འགའ་རེ་དང་། ཐོག་ཁང་དམར་པོ་ཁ་ཤས་རེའང་མཐོང་རྒྱུ་འདུག ང་ཚོས་རླངས་འཁོར་ཅུང་བཙན་ཐབས་སུ་བསྐོར་ནས། ཁང་རྩེག་དམར་པོ་རྒྱ་ཕིབས་ཅན་བར་ཁྱམས་ཤིང་གི་ར་བས་ཀུན་ཏུ་བསྐོར་བ་ཞིག་རྒྱབ་ངོས་ནས་ཐད་ཀར་ཕྱིན། ཉི་ཟླ་གདན་དུ་བཏང་བ་ལྟ་བུའི་རིའི་ཕང་བར་གཙུག་ལག་ཁང་ཐོག་རྩེག་གསུམ་ཅན། པདྨ་ར་གའི་མདངས་དང་ལྡན་པ། བྱུ་རུའི་རྒྱ་ཕིབས་ལ་གསེར་ཟངས་ཀྱི་ཆོས་འཁོར་དང་། རི་དྭགས་ཐབས་ཤེས་ཟུང་གིས་བརྒྱན་པ། ཐིག་དང་། རྒྱལ་མཚན། གན་ཇི་ར་ནམ་མཁའ་དང་འདྲེས་པ། ཀུན་དགའ་ར་བའི་དྲྭ་བ་དྲྭ་ཕྱེད་ཀྱི་ཚབ་ཏུ་ཆོས་ཀྱི་འཁོར་ལོ་ལུ་གུ་རྒྱུད་དུ་སྦྲེལ་བས་ཀུན་ནམ་མཛེས་པར་བྱས་པ་ཞིག་མཇལ། དེ་ནི་དངོས་གནས་ནུབ་ཕྱོགས་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ངམ། ཟངས་མདོག་དཔལ་གྱི་རི་བོ་ཞེས་ཨོན་རྒྱན་སངས་རྒྱས་གཉིས་པའི་ཞིང་ཁམས་ཀྱི་བཀོད་པ་ཞིག་རེད་ཅེས་བཤད་ཀྱང་མི་ཆོག་པ་མི་འདུག་སྙམ། རི་སྐེད་དེ་ནས་ཁ་ཕར་འཁོར་ནས་བལྟས་ཚེ། ལྗང་མདོག་ལྡན་པའི་སྤང་ཐང་དང་། སྤྲིན་དཀར་གྱིས་འཁྱུད་པའི་ཤིང་ནགས་ཅན་གྱི་རི་ཕྲེང་དག་ནི། རྨ་བྱས་སྒྲོ་གུར་ཕིབ་པ་ལྟར་མཛེས་ཤིང་ཡིད་དུ་འོང་བ་ཞིག་རེད། ང་རྫུ་འཕྲུལ་གྱི་བཀོད་པ་ལྟ་བུའི་སྦས་ཡུལ་གྱི་མཚར་ལྗོངས་དེས་བཟི་ནས་དལ་ཅིག་ལ་ཧད་དེ་ལུས། དེ་ནས་ང་ཚོས་རླངས་འཁོར་ས་དེའི་ནགས་ཁུག་ཅིག་ཏུ་བཞག་ནས། གཤམ་གྱི་ཐོག་རྩེག་གཉིས་ཅན་གྱི་ཁང་པ་དམར་པོ་དེའི་ཕྱོགས་སུ་ཕྱིན། ལམ་བར་ནས་ཆོས་པ་འགའ་རེ་མཇལ་ཞིང་། དེ་དག་གི་ཞི་དུལ་བག་ཡོད་ཀྱི་རྣམ་འགྱུར་ལས། ཆོས་ཚོགས་འདིའི་བསླབ་པ་སློབ་གཉེར་གྱི་སྤུས་ཀའང་རོབ་ཙམ་རེ་རྟོགས་ཐུབ་པ་བྱུང་། ང་ཚོ་ཁང་བ་དེར་འཛུལ་ནས་སྣེ་ལེན་པར་མགྲོན་ཁང་སྔ་འཛིན་གྱི་ངོ་སྤྲོད་ཁང་གླ་ཕུལ་རྗེས། ནང་ལོགས་སུ་ཞིབ་བལྟ་བྱས་པས། ཁང་བ་དེ་ནི་དགེ་འདུན་གྱི་རུང་ཁང་ཡིན་པར་ཧ་གོ

སྣེ་ལེན་པས་གྲོས་སྟོན་ལྟར་ཡར་གཙུག་ལག་ཁང་གི་ཕྱོགས་སུ་དགུང་ཚོགས་ལ་མཇལ་དུ་ཕྱིན། རུང་ཁང་ནས་གཙུག་ལག་ཁང་བར་ཕལ་ཆེར་སྐར་མ་ལྔ་དྲུག་ཅིག་འགྲོ་དགོས་ཤིང་། ལམ་ཁའང་སྐེད་ལམ་བར་མ་བར་དུ་རྡོ་ཤོག་བཏང་བའི་ཀྱག་ཀྱོག་གི་ཐེམ་པ་དང་། དེ་ནས་རྡོ་ཤོག་བཏང་བའི་ཐེས་སྐས་རིམ་པ་གཉིས གཡས་གཡོན་དུ་ཟངས་རག་ཀྱི་ན་བཟའ་བཀབ་པའི་མ་ཎིའི་འཁོར་ལོར་འཁོར་སྟེགས་རྒྱ་ཕིབས་བྱ་འདབ་དང་ལྡན་པ་བསྟར་ཆགས་སུ་བསྒྲིགས་པ། ང་ཚོས་འཁོར་ལོ་དེ་དག་སྐོར་གྱིན་སྐོར་གྱིན་གཙུག་ལག་ཁང་གི་མདུན་ངོས་ཀྱི་ཆོས་རའི་ཐོག་སླེབས། ཉིན་དེར་དགོན་པའི་འདུ་ཁང་གི་སྒོ་ཆེན་ཕྱེས་མེད་སྟབས། དགོན་པའི་གཡས་ངོས་གློ་སྒོ་ནས་ནང་དུ་འཛུལ། ཉི་གདུགས་དང་ལྷམ་མགོ་ཕུད་ནས་ག་ལེར་འཛུལ་སྒོ་ནང་མ་ཕྱེས་ཏེ་ནང་དུ་ཕྱིན། གཙུག་ལག་ཁང་ནས་མཆེད་ཡོང་བའི་དྲི་མ་ནི། གོང་ནས་བཤད་པ་ལྟར་ངའི་ཁུ་བོ་རྡོ་གྲུབ་མཁན་ཆེན་གྱི་གཟིམས་ཁང་ནང་གི་དྲི་མ་དེ་དང་གཅིག་པ་རེད་ལ། ང་ཚོས་མ་ལེ་ཉི་ཤི་ལྷག་གི་ཕར་རྒྱབ་ནས་ཚོར་བྱུང་བའི་དྲི་མའང་དེ་རེད། གཙུག་ལག་ཁང་དེར་འཛུལ་མ་ཐག་ཧ་ཅང་ཆ་རྒྱུས་ཆེ་བའི་འདུ་ཁང་ཞིག་ཏུ་སླེབས་པ་ལྟ་བུའི་སྣང་བ་ཤར་ཞིང་། འདུ་ཁང་ལས་གྲགས་ཡོང་བའི་རྔ་སྒྲ་དང་། ཟབ་ཅིང་བརྗིད་པའི་འདོན་རྟ་དབྱངས་ཀྱིས། བརྗོད་མི་ཤེས་པའི་བྱིན་རླབས་ཀྱི་ནུས་པ་ཞིག་ངའི་ཤ་གསེང་རུས་གསེང་དུ་ཐིམ་བཞིན་པའི་ཚོར་བ་བྱུང་། ང་ཚོས་སྒོ་ཆེན་ནང་མ་ག་ལེར་ཕྱེས་ཏེ་ནང་དུ་བལྟས་པས། གསལ་ལ་མི་གསལ་བའི་འདུ་ཁང་དེའི་ཁོར་ཡུག་ཚང་མ། རྒྱལ་བའི་སྐུ་གསུང་ཐུགས་རྟེན་གྱིས་བར་མཚམས་མེད་པར་བྱུར་བུར་གཏམས་འདུག་པ་མཇལ་ཞིང་། ཟངས་གསེར་ལས་གྲུབ་པའི་བརྗིད་ཆགས་བཞེངས་ལེགས་ཀྱི་སྐུ་བརྙན་དག་ནི། གློན་སྒྲོན་གྱི་འོད་དཀར་དང་བསྡེབས་ནས་ང་ཚོར་དགྱེས་བརྩེའི་སྤྱན་གྱིས་གཟིགས་བཞིན་འདུག ཚིགས་འོག་མ་འདིར་དགེ་འདུན་པ་ལྔ་བརྒྱ་ཡས་མས་ཤོང་ངེས་ཀྱི་ཁོར་ཡུག་ཡངས་མོ་ཞིག་འདུག་ཀྱང་། དགུང་ཚོགས་སུ་ཕྱི་རྒྱལ་ཆོས་པ་མི་མགོ་བརྒྱད་ལས་ཕེབས་མི་འདུག ང་ཚོས་གུས་ཕྱག་ཕུལ་རྗེས་དགུང་ཚོགས་ལ་ཕེབས་མཁན་དག་གི་རྒྱབ་ངོས་ཀྱི་རྐུབ་སྟེགས་ཐོག་རིམ་པར་བསྡད་ནས། དགུང་གྲོའི་ཉམས་ལེན་གྱི་ཆོ་གར་ཞུགས། ངས་རང་ཉིད་ཀྱི་འཁྲིས་སུ་ཡོད་པའི་དེབ་གཟུགས་ཅན་གྱི་དཔེ་ཆ་དེ་ལག་ཏུ་བླངས་ནས། དཔེ་ཆ་དེའི་དབུ་མཇུག་ཚང་མར་རོབ་བལྟས་ཤིག་བྱས་པ་ཡིན། དཔེ་ཆ་དེར་སྙིང་ཐིག་རྩ་གསུམ་གྱི་གསོལ་མཆོད་བསྔོ་སྨོན་ཙམ་ལས། འཇིག་རྟེན་རང་ག་བའི་ལྷ་དྲེགས་པ་ཅན་དེ་འདྲའི་གསོལ་མཆོད་གང་ཡང་མཐོང་མ་བྱུང་། ཇེ་ཞིག་ནས་དགུང་ཚོགས་མཇུག་བསྡུས་ཤིང་། ཚོགས་ཞུགས་དག་གིས་ང་ཚོར་དགའ་བསུའི་ལག་འཇུ་དང་། ཁ་བརྡ་ལྷུག་པོར་གནང་ཞིང་། དགུང་ཚོགས་ཀྱི་དབུ་མཛད་ཕྱི་རྒྱལ་བ། ལོ་ན་སུམ་ཅུ་ཡས་མས་ལ་སླེབས་པ། བཙུན་པའི་ཆ་ལུགས་ཅན་ཞིག་ཕེབས་ནས་ང་ཚོ་ལ་འཚམས་འདྲི་གནང་། རབ་བྱུང་དེ་ནི་གསུང་སྐད་ལྷོད་ཆགས་ཤིང་འཇམ་པ། བཙུན་ཚུགས་ཀྱི་སྤྱོད་ལམ་ཡིད་དུ་འོང་བ་ཞིག་འདུག ང་ཚོས་ཁོང་ལ་ཞུས་དོན་ལྟར། གླིང་དེའི་གཞི་འཛིན་བླ་མ། མཁན་པོ་ཚེ་དབང་དོན་རྒྱལ་མཆོག་ལ་དགུང་ཁའི་ཆུ་ཚོད་བརྒྱད་པའི་སྟེང་མཇལ་འཕྲད་ཀྱི་དུས་བཏབ། དེ་ནས་ང་ཚོ་རུང་ཁང་དུ་ཕྱིན་ནས་དགུང་ཟས་ལ་རོལ། ཉིན་དེའི་ནུབ་ཟས་ནི་བྲོ་བཅུད་ཅན་གྱི་ཕྱི་ལུགས་ཀྱི་འབྲས་བསྔོས་མ་དང་། སྔོ་ཚལ། སྣུམ་འཁུར་གྲུ་བཞི་སྔོ་ཚལ་དང་། ཆུར་མར་གྱི་ནང་འཚངས་ཅན། འཚིག་ཇ། ཤིང་ཐོག ཏན་ཤིང་བག་ལེབ་བཅས་རེད། འབྲེལ་ཡོད་དག་གིས་གསུངས་པ་ལྟར་ན། ཆོས་ཚོགས་འདིར་དཀར་ཟས་ལས་དམར་ཟས་སྤྱོད་ཀྱི་ཡོད་པ་མ་རེད་ཟེར། ཟས་གཡོ་སྦྱོར་བྱེད་སྟངས་ཀྱང་། འདང་ཙམ་ལས་ཟ་མ་ཐུབ་པར་ལྷག་འགྲོ་ངེས་དེ་འདྲ་བཟོ་གི་མི་འདུག ཚོས་ཚོགས་འདིའི་ནང་ཕོ་མོ་ཚང་མ་གཤིས་སྤྱོད་ལེགས་ཤིང་། སེམས་ཁམས་ཀུ་ཡངས་པོ་ཅན་ཞེ་གཅིག་ཡིན་པའི་ཚོར་སྣང་བྱུང་། ནུབ་ཚལ་གྲུབ་རྗེས་རླངས་འཁོར་བཏང་སྟེ། གཙུག་ལག་ཁང་གི་གཡོན་ཕྱོགས་ཀྱི་ལམ་ཕྲན་བརྒྱུད་སྐར་མ་ཁ་ཤས་སོང་བས། མཁན་པོའི་གཟིགས་ཤག་དམར་པོ་ཐོག་རྩེག་གཉིས་ཅན། རྒྱབ་ངོས་ནགས་ཚལ་དང་། མདུན་ངོས་ལྡུམ་རས་བརྒྱན་པ་ཞིག་ཏུ་སླེབས། གཟིམས་ཁང་དེ་ནས་ཕར་བལྟས་ན། སྨུག་དུང་དུང་གི་རི་ཚོགས་དང་། ལྗང་དེམ་དེམ་གྱི་སྤངས་ཐང་། ས་གཞི་དང་ནམ་མཁའ་སྤྲེལ་བ་ལྟ་བུའི་རྒྱང་རིང་གི་གནམ་མཐའི་ལྗོངས་བཀོད་ནི། མིག་སྔར་བཤམས་པའི་མཛེས་སྡུག་ལྡན་པའི་ཐང་ག་ཞིག་དང་འདྲ་བ། གཟིམས་ཁང་གི་ཆགས་ཡུལ་ས་ཁད་མཐོ་ཞིང་། མདུན་ཕྱོགས་མིག་རྒྱང་གང་གི་བར་ས་ཆ་དམའ་རུ་དམའ་དུ་སོང་བས། བྱིང་རྨུགས་རང་བཞིན་གྱིས་སངས་ཤིང་། བརྗོད་མི་ཤེས་པའི་དགའ་ཚོར་དང་། རིག་པ་ངང་གིས་གསལ་ཡོང་ངེས་ཤིག་ལོས་ཡིན་སྙམ། ང་ཚོས་ག་ལེར་གཟིམས་ཁང་གི་སྒོ་བརྡུངས། རེ་ཞིག་ནས་ཨིན་ཇིའི་བུད་མེད་ཅིག་ཨེ་ཡིན་སྙམ་པ། ལོ་ན་དྲུག་ཅུ་ཡས་མས་ཤིག་ཏུ་ཕེབས་པ། རབ་བྱུང་གི་ཆས་ཅན་ཞིག་སླེབས་ནས་སྒོ་ཕྱེས། མོས་རྒྱུས་སྟོན་ལྟར། ང་ཚོས་ལྷམ་མགོ་ཕྱི་ལ་ཕུད་ནས། སྐས་འཛེགས་བརྒྱུད་ཐོག་ཁང་གི་སྟེང་དུ་སོང་བ་ཡིན། རིན་པོ་ཆེ་གཟིམས་སྒོའི་འཁྲིས་ཀྱི་བཞུགས་སྟེགས་ཤིག་གི་ཐོག་བཞུགས་བསྡད་འདུག ང་ཚོས་གུས་ཕྱག་དང་མཇལ་དར་རེ་ཕུལ་བ་ཕྱིར་སློག་གནང་བྱུང་། ཕར་བལྟས་ཚོད་ལ་མཁན་པོ་འདི་བ་དགུང་ལོ་དྲུག་ཅུའི་སྨད་དུ་ཕྱིན་པ། ཞལ་ཁྱིམ་གོར་གོར་དབུ་སྐྲ་སྔོ་ཕྱེད་དུ་གྱུར་པ། སྒམ་ཚིགས་ཆེ་བ། ཞི་ཞིང་འཇམ་པ། གུས་ཚིགས་ཡང་ཡང་མངོན་པ། མཇལ་སྤྲོ་བ་ཞིག་བཞུགས། ཕྲན་གྱིས་ང་ཚོ་རེ་རེ་བཞིན་ངོ་སྤྲོད་བྱས་ཤིང་། ཁྱད་པར་དུ་ངའི་བུ་ཆུང་གི་སྨན་བཅོས་བརྒྱུད་རིམ་ཆ་ཚང་ཞིག་སྙན་ཞུ་བྱས། རིན་པོ་ཆེ་མཆོག་གིས་ཀྱང་། ཁོང་གི་སྐུ་མཆེན་མཁན་ཆེན་དཔལ་ལྡན་ཤེས་རབ་དང་། ཆོས་ཚོགས་ཀྱི་འཆད་ཉན་སློབ་གཉེར་སོགས། ཐོར་བུ་ཐོར་བུའི་ཚུལ་དུ་ང་ཚོ་ལ་ངོ་སྤྲོད་མདོར་བསྡུས་རེ་གནང་བ་བཅས། ང་ཚོས་ཕན་ཚུན་བཀའ་མོལ་ཆུ་ཚོག་གཅིག་ལྷག་གི་རིང་བྱ་རྒྱུའི་གོ་སྐབས་བྱུང་། ངས་ཤེས་རྟོགས་བྱུང་བ་ཞིག་ལ། མཁན་པོ་སྐུ་མཆེད་འདི་གཉིས་ཀར་རྒྱལ་བསྟན་སྤྱི་དང་། ཁྱད་པར་བཀའ་རྙིང་ཆོས་བརྒྱུད་ཀྱི་བཀའ་དབང་ཟབ་ཁྲིད་མན་ངག་རིན་ཐང་དང་བྲལ་བ་དུ་མས་ཐུགས་རྒྱུད་ཀུན་ནས་ཕྱུག་ཅིང་། གདོང་མར་ཅན་གྱི་ཡུལ་དུ་དམ་པའི་ཆོས་སྤེལ་མཁན་གྱི་དུས་མཐའི་དཔའ་བོ་མདུང་ཐུང་ཅན་རེ་རེ་ཡིན་པར་བསམས། གཟིམས་ཁང་གི་སྟེང་ཤོད་གཉིས་ཀ་སྐུ་གསུང་ཐུགས་རྟེན་གྱིས་ཡོངས་སུ་གང་ཡོད་པ་མ་ཟད། གཟིམས་ཁང་ནང་ལོགས་ཀྱང་གཟིམས་ཁང་གི་ཕྱིའི་བཀོད་པར་ལྟོས་ན། རྒྱུ་སྤུས་བཟང་ཞིང་ཁམས་གཙང་ཡིད་དུ་འོང་བ་ཞིག་རེད། ང་ཚོས་བླ་མར་མཇལ་ནས་ཕྱི་ལ་ཐོན་སྐབས། སྨུག་སྤྲིན་སྟུག་པོ་ལྷབ་ལྷིབ་ལྡང་བའི་བར་སྣང་དག་ཏུ། ནུབ་ལ་ཉེ་བའི་ཉི་རྒས་ཀྱི་འོད་སྣང་དང་འགྲོགས་པའི་མཚམས་སྤྲིན་དམར་སེར་བཀྲགས་མདངས་ཅན་ཞིག་མཐོང་ཞིང་། མཚམས་སྤྲིན་དེའི་ཀློང་ན་རྩ་གསུམ་གྱི་ལྷ་ཚོགས་ལྟ་བུའི་སྤྲིན་གྱི་རྣམ་པ་ངོ་མཚར་ཅན་མང་བོ་མཇལ་ཞིང་། འདི་དཀོན་མཆོག་གསུམ་གྱི་ཐུགས་རྗེའི་བྱིན་རླབས་ང་ཚོར་འཕྲོས་པ་ཞིག་ལོས་ཡིན་སྙམ་དུ། ཐལ་མོ་སྦྱར་ནས་མཚམས་སྤྲིན་དམར་སེར་དེའི་ངོགས་སུ་ཡང་ཡང་བལྟས། སྦྲང་ཆར་ཟམ་ཟིམ་ཞིག་དང་ལྷན་དུ་ང་ཚོ་ཕྱིར་རུང་ཁང་དུ་སླེབས། སྣེ་ལེན་ཡིག་ཚང་ནས་མགྲོན་ཁང་གི་ཨང་གྲངས་བླངས་རྗེས། རླངས་འཁོར་མུ་མཐུད་བཏང་སྟེ་ཕར་མགྲོན་ཁང་གི་ཕྱོགས་སུ་བསྐྱོད། ང་ཚོའི་མགྲོན་ཁང་གི་སྒོ་རྟགས་གཅིག་ནི “་བཟོད་པ”ཞེས་པ་དང་། གཅིག་ཤོས་དེ་ནི “སྦྱིན་པ”ཞེས་པ་དེ་རེད། མགྲོན་ཁང་དེ་ནི་ཐོག་རྩེག་གསུམ་དང་ལྡན་པ། མདུན་རྒྱབ་ནགས་ཀྱིས་བསྐོར་བ། ཕྱི་ནང་གི་བཟོ་བཀོད་དང་རྒྱུ་སྤུས་ཀྱང་ཤིན་ཏུ་ཡག་པོ་ཡོད་པར་ཚོར། མགྲོན་ཁང་ནང་ངོས་ཀྱི་གང་ཡིན་སར་ལྷ་དང་། བླ་མ། ཡིད་དམ་སོགས་ཀྱི་སྐུ་ཐང་བྱིན་ལྡན་མང་བོ་མཇལ་དུ་ཡོད་པས། མགྲོན་ཁང་དེར་བསྡད་ན་ནམ་རྒྱུན་གྱི་ནམ་རྟོག་དཀྱུས་མ་ལས། དགེ་སེམས་ཀྱི་སྣང་བ་ཞིག་རང་བཞིན་གྱིས་མ་སྐྱེས་རང་སྐྱེས་ལྟ་བུ་རེད། ངེད་ཅག་གི་ཁང་མིག “བཟོད་པ”ནི། འོད་ཤོད་དུ་ཡོད་པས་མ་རྒན་དང་། སྤུན་རྒན་གྱི་བཟའ་ཟླ་གཉིས་དེར་བསྡད། “སྦྱིན་པ”ནི་བར་ཁང་ན་ཡོད་པས། ངའི་ཁྱིམ་ཚང་དེར་བསྡད། ཇེ་ཞིག་ནས་ངའི་ཆུང་མ་མ་བུ་གཉིས་ཁྲུས་བརྒྱབ་རྗེས། ཤག་དེའི་ནང་ན་ཁང་མིག་ཆུང་ངུ་ཉལ་ཁྲི་གཉིས་ཅན་ཞིག་ཡོད་པ་དེའི་ནང་། ལབ་རྡོལ་སྣ་ཚོགས་ཤིག་བྱེད་བཞིན་པའི་མུ་ནས་གཉིད་དུ་ཡུར། ཁང་ཆུང་དེའི་ཕྱི་རོལ་ན་ཞལ་ཟས་རོལ་སའི་ཁང་བ་ཅུང་ཆེན་པོ། གུ་རུ་རིན་པོ་ཆེ་དང་། མཁན་པོ་སྐུ་མཆེད་ཀྱི་སྐུ་པར་བཞུགས་པའི་མཆོད་སྟེགས་མཆོད་བཤམས་ཅན། རྩིག་པའི་ངོས་སུ་ཆོས་སྐུ་ཀུན་ཏུ་བཟང་བོ། ལོངས་སྐུ་རྡོ་རྗེ་སེམས་པ། སྤྲུལ་སྐུ་དགའ་རབ་རྡོ་རྗེ། སློབ་དཔོན་པདྨ་འབྱུང་གནས། ཕུར་བ་རྡོ་རྗེ་གཞོན་ནུ། རྗེ་བཙུན་སྒྲོལ་མ་ལྗང་མོ་བཅས་ཀྱི་སྐུ་ཐང་བཀྲགས་མདངས་ཅན་རེ་བཞུགས། ངས་སོབ་སྟེགས་ཐོག་གི་གདན་འཐུག་པོ་དེ་ཕྱིར་བཏོན་ནས་ཐང་དུ་བཏང་བའི་ཐོག་ཏུ་བསྡད་དེ། མཇུག་མ་གྲུབ་པའི་སྤྱོད་འཇུག་གི་ལེའུ་བདུན་པ་ནས་མཇུག་བར་བཏོན། རྙིང་ཐིག་སྔོན་འགྲོའི་བླ་རྣམ་པར་བསྐྱལ་རྗེས་གཉིད་དུ་ཡུར། མཚན་མོར་དེར་ང་ལ་རྨི་ལམ་གྱི་སྣང་བ་ངོ་མཚར་བ་དགའ་ཞིང་ཡིད་སྐྱོ་དགོས་པ་ཞིག་བྱུང་། ངའི་རྨི་ལམ་ནང་ང་རང་སྔོན་མར་སླེབས་མ་མྱོང་བའི་དབེན་གནས་ཤིག་ཏུ་སླེབས་ཏེ། རིན་པོ་ཆེ་སྣ་ཚོགས་ལས་གྲུབ་པ་ཞིག་ཨེ་ཡིན་སྙམ་པའི་ལྷ་ཁང་ལྟ་བུ་ཞིག་གི་ནང་བསྡད་འདུག བར་སྐབས་ཤིག་ནས་གནས་དེར་ར་སྐོར་ཆེན་པོ་ཞིག་ཡོད་པ་རང་བཞིན་གྱིས་སྒོ་ཕྱེས་ཏེ། རླངས་འཁོར་ཞིག་ནང་དུ་སླེབས། རླངས་འཁོར་དེ་ལས་ངའི་བུ་ཡིན་པ་འདྲ་བོ་ཞིག་དང་། ཨ་རིའི་རླུང་འཕྲིན་གྱི “དྲྭ་སྣང་གི་བོད”ཀྱི་ལེའུ་ཚན་མདོ་འཛིན་མ། ཚེ་རིང་སྐྱིད་ཅེས་པ་གཉིས་སླེབས་བྱུང་། ཚེ་རིང་སྐྱིད་ཀྱིས་གོས་ཆེན་ནག་པོའི་ལྭ་བ་ཧོར་ཐེལ་ཅན་སྲམ་ཕྲ་མོའི་མཐའ་རྒྱན་དང་ལྡན་པ་ཞིག་གོན། དབུ་སྐྲ་རིང་བོ་ཕྱེད་སླས་མ་ཕྱེད་སྤྱི་བོར་བཅིངས་པའི་དབུས་སུ་གཡུའི་གཙུག་རྒྱན་བཏགས་པ། རྒྱབ་ཏུ་རས་ཁུག་དཀར་པོ་ཞིག་གི་ནང་། འབྲས་ཐེག་ཚོད་ཅིག་ཁུར་ནས་སླེབས་བྱུང་། སྐབས་དེར་ང་མོ་རང་ངོས་ཟིན་ལ་མ་ཟིན་ལ་ཞིག་ཏུ་གྱུར། འོན་ཀྱང་། ངའི་སྣང་བར་མོ་ང་དང་ཆེས་ཤིན་ཏུ་ཉེ་བོ་དང་འཆམ་པོ་ཡོད་པ་ཞིག་གི་སྣང་བ་ཤར། མོས་ཀྱང་ཆེས་ཤ་ཚ་བོ་དང་། སྤྲོ་མདོག་ཅིག་གིས་ང་ལ། ཁྱེད་ཚོ་དཔེ་མི་ཟད་པའི་ཡག་པོ་བྱུང་སོང་། གནས་འདིར་ཡོང་བར་ལས་སླ་བོ་ཡོད་པ་མ་རེད། ཁྱེད་ཀྱི་རླངས་འཁོར་དེ་འཁོར་སྟེགས་མཐོན་པོ་དང་ཤུགས་ཆེན་པོ་ཞིག་ཡིན་སྟབས། ཁྱེད་རང་འདི་གར་སླེབས་ཐུབ་བྱུང་བ་རེད། ཅེར་བཤད་ཞོར་ང་ལ་སྣེ་ལེན་ཞབས་ཞུ་འདྲ་ཞིག་བྱེད་ཀྱིན་འདུག ངས་མོའི་གདོང་བར་ཐད་ཀར་བལྟས་ནས། ཨ་ཙི། ཁྱེད་ཀྱིས་དེ་འདྲའི་སྐུ་ངལ་བཀྱོན་དགོས་པ་མ་རེད། ཅེས་ལབ་སྐབས། མོས་ངོ་གདོང་བྲིས་ཐང་གི་ངོས་སུ་མཇལ་རྒྱུ་ཡོད་པའི་ལྷ་མོ་ཞིག་གི་ཞལ་ཁྱིམ་དུ་གནས་འགྱུར། དབུ་ཐོད་དང་། མཁུར་བ་སོགས། འོད་འཚེར་བའི་དངུལ་གྱི་ཕྱེ་མས་བརྒྱན་པ་ཞིག་ཏུ་གྱུར། བུད་མེད་མཛེས་མ་ཞིག་རེད་ལབ་ན། མཛེས་མའི་ཁྱད་ཆོས་ཞེས་པ་འདི་རེད་ཅེས་ངོས་བཟུང་མེད་པ། མ་རེད་ལབ་ན། ཡིད་དབང་མེད་དུ་གཡོ་ཞིང་འཕྲོག་འགྲོ་བ་ཞིག་རེད། ངའི་སེམས་ལ་དགའ་སྐྱོ་འདྲེས་མའི་ཚོར་བ་ཞིག་ཤར་བའི་མུ་ནས་གཉིད་ལས་སད། དུས་དེ་ནས་བཟུང་ད་ལྟའང་ཚོར་བ་དེ་ཡལ་རྒྱུ་མི་འདུག ཡིན་པ་ནི་འདི་ལྷ་མོ་ཚེ་རིང་མཆེད་ལྔ་རེད་བསམ་གྱིན་འདུག ངའི་ཁྱིམ་རྒྱུད་སྔ་འགྱུར་རྙིང་མ་དང་། དེ་ལས་རྙིང་ཐིག་པ་རེད། ངའི་ཁུ་བོ་ཞལ་བཞུགས་སྐབས། མ་གཟའ་དམ་གསུམ་དང་། སྔགས་སྲུང་ཨེ་ཀ་ཙ་ཏི། ལྷ་མོ་ཚེ་རིང་མཆེད་ལྔ་། གནོད་སྦྱིན་ཙིའུ་དམར་བོ། ཞིང་སྐྱོང་དུད་ཁྲོད་ཀྱི་ལྷ་མོ་སོགས། རྒྱུན་དུ་གསོལ་མཆོད་གནང་གི་ཡོད་པ་རེད། ཁོང་སྐུ་གཤེགས་རྗེས་ང་ཚོས་གསོལ་མཆོད་དེ་འདྲ་ཞིག་བྱེད་ཐུབ་ཀྱི་ཡོད་པ་མ་རེད། ང་རང་ངོས་ནས་ལྷ་མོ་ཚེ་རིང་མཆེད་ལྔར་ཆུང་དུས་ནས་སྙིང་ཉེ་བོ་འདྲ་ཞིག་ཡོད། ཨ་རིར་སླེབས་ནས་སྔ་འགྱུར་རྙིང་མའི་ཆོས་ཚོགས་ཤིག་ཏུ་སླེབས་པ་ཐེངས་དང་བོ་ཡིན་པས། སྔ་འགྱུར་བའི་ཆོས་སྲུང་དག་གིས་དགའ་བསུ་གནང་བ་ཞིག་ཨེ་ཡིན་ནམ་བསམ་གྱིན་ཡོད། ཕྱི་ཉིན་ངས་ཆུང་མར་རྨི་ལམ་དེ་བཤད་པ་ཡིན། མོས་དེ་ནི་མ་དང་མཁའ་འགྲོས་དགའ་བསུ་ཞིག་རེད། ཅེས་ཐེ་ཚོམ་མེད་པར་སྨྲས། ངས་ཀྱང་ཡིན་མདོག་བྱས། ང་ཚོས་ཅ་དངོས་ཚང་མ་བསྡུ་གསོག་གིས་རླངས་འཁོར་དུ་བཅུགས་རྗེས། ཡང་བསྐྱར་གཙུག་ལག་ཁང་དུ་མཆོད་མཇལ་ལ་ཕྱིན་པ་ཡིན། ཆོས་ཚོགས་ཤིག་གི་འདུ་ཁང་ལ་འདི་ལས་ལྷག་པའི་བཟོད་བཀོད་དང་། རྒྱུས་སྤུས་བཟང་བོ་ཅན་ཞིག་ད་སྔ་ཡུལ་ཕྱོགས་འདིར་སླེབས་ནས་མཐོང་མ་མྱོང་། དངོས་གནས་ཧ་ལས་པ་ཞིག་རེད། པདྨ་བསམ་ཡས་གླིང་འདིར། བོད་ཀྱི་བསམ་ཡས་ལྟར་ཚིགས་གསུམ་འདུག་ཅིང་། དེ་དག་གིས་ཐེག་པ་རིམ་པ་དགུ་དང་། ཆོས་ལོངས་སྤྲུལ་གསུམ་གྱི་ཞིང་ཁམས་མཚོན་པར་བཤད། དགོན་པའི་བར་ཁྱམས་ཀྱི་རྩིག་ངོས་སུ། སངས་རྒྱས་ཀྱི་མཛད་རྣམ་དང་། སྲིད་པའི་འཁོར་ལོ། རྒྱལ་ཆེན་སྡེ་བཞི། མཆོེད་ཕྲེང་། འདོད་ཡོན་རྣམ་ལྔ་སོགས། སྒྱུ་རྩལ་གྱི་རྣམ་པ་ཕུན་སུམ་ཚོགས་པའི་ལམ་ནས་བྲིས་འདུག ཁྱད་པར་དུ་དོ་སྣང་བྱུང་བ་ཞིག་ནི། དགོན་པ་འདིར་ཕྱག་འདེབས་མཛད་པོ་མཁན་པོ་སྐུ་མཆེད་ཀྱི་རྣམ་པར་ཐར་བ་ཞིག་ལྡེབས་རིས་ཀྱི་ལམ་ནས་གསོན་གཟུགས་ལྟ་བུར་བཀོད་ཡོད་པ་དེ་ཡིན། སྤྱིར་བྲིས་ཐང་གི་གཤམ་དུ་སྦྱིན་པའི་བདག་པོའམ། ལྷ་བྲིས་པ་རང་ཉིད་ཀྱི་གཟུགས་རིས་རེ་དྲན་རྟེན་དང་། ཡིད་སྨོན་གྱི་ཚུལ་དུ་འབྲི་སྲོལ་ཡོད་པ་དེ་ལྟའང་། དགོན་བདག་ཅིག་གི་རྣམ་ཐར་ལོ་རྒྱུས་འདུ་ཁང་རྩིག་ངོས་སུ་བཀོད་པ་ནི་མཐོང་དཀོན་པ་ཞིག་ཡིན། འདི་ནི་ཕྱི་ལུགས་ལྟར་བཀའ་དྲིན་རྗེས་དྲན་མཚོན་བྱེད་ཀྱི་རྣམ་པ་རྨད་དུ་བྱུང་བ་ཞིག་རེད། ཚིགས་འོག་མ་འདི་ནི་སྐུ་གསུམ་ལས་སྤྲུལ་སྐུའི་ཞིང་ཁམས་ཀྱི་བཀོད་པར་ངེས་ཤིང་། རྟེན་གཙོར་འདུ་ཁང་དབུས་སུ་བསྐྱངས་ཁྲི་ལྔ་ཡས་མས་ཅན་གྱི་སྟོན་པ་སངས་རྒྱས་གཙོ་འཁོར་གསུམ། དེའི་གཡས་ཕྱོགས་སུ་ཨོ་རྒྱན་རིན་པོ་ཆེ་གཙོ་འཁོར་གསུམ། གཡོན་ཕྱོགས་སུ་སྒྲོལ་ལྗང་གཙོ་ལྷར་བཀོད་པའི་སྒྲོལ་མ་ཉེར་གཅིག་གི་གསེར་སྐུ་ཤིན་ཏུ་སྒྲིག་ལེགས་པ། དེའི་གཡོན་ངོས་སུ་རིག་བྱེད་མ་དང་མཁའ་སྤྱོད་མ་སོགས་བཞུགས། གཙུག་ལག་ཁང་གི་ནང་ལོགས་རྩིག་ངོས་སུ་ཚོན་མདངས་རྣམ་པར་བཀྲ་བའི་སྔ་འགྱུར་རྙིང་མའི་བླ་རྒྱུད་ཀྱི་ལྡེབས་བྲིས་སྣ་ཚོགས། བོད་རང་གི་ཆོས་སྡེ་དང་གནས་ཆེན་གྲགས་ཆེ་དག་གིས་མཚོན། ངོ་མཚར་ཞིང་ཁམས་ཀྱི་བཀོད་པ་ཡིད་དུ་འོང་བ་དུ་མས་གཏམས། ལྡེབས་རིས་ཀྱི་བྲིས་རྒྱུའང་དཀྱུས་མའི་རྫས་སྦྱོར་འདྲེས་པའི་ཚོན་མདངས་དེ་འདྲ་མ་ཡིན་པར། རང་བྱུང་ཁམས་ཀྱི་རྡོ་རིགས་ཁ་དོག་སྣ་ཚོགས་པ་འདུལ་སྦྱོང་བྱས་པའི་རྡོ་ཚོན་གྱིས་བྲིས་པ་ཤིག་ཡིན་པར་བཤད། གཙུག་ལག་ཁང་འདིའི་མཐིལ་ཞལ་ཚང་མར་རྡོ་ཀ་མ་རུ་པ་བཏང་ཡོད་པས། རྒྱུ་འགྲུལ་བྱེད་སྐབས་ཙན་དན་དམར་པོའི་པང་གཅལ་ཞིག་གི་སྟེང་འགྲོ་བ་ལྟ་བུའི་སྣང་བ་ཤར། བར་ཁང་ནི། པདྨ་བསམ་ཡས་གླིང་གི “ཞི་འཚོ་དཔེ་མཛོད་ཁང”རེད། དེ་ནི་སྐུ་གསུམ་ལས་ལོངས་སྐུའི་བཀོད་པ་རེད། དཔེ་མཛོད་ཁང་དེར་རྒྱལ་བའི་བཀའ་བསྟན་གཙོ་བོར་གྱུར་པའི་རྒྱ་བོད་མཁས་གྲུབ་སྐྱེས་ཆེན་དག་གི་རྣམ་ཐར་ལོ་རྒྱུས་དང་། གསུང་འབུམ་སོགས། དཔེ་གཟུགས་དང་དེབ་གཟུགས་གང་རུང་གི་རྣམ་པར་བཞུགས་ཤིང་། ཁྱད་པར་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་བཀའ་བསྟན་དཔེ་སྡུར་ཁང་གིས་དཔེ་སྡུར་དང་དཔེ་སྒྲིག་ཞུས་པའི་བསྟན་འགྱུར་སྤུས་ལེགས། དེབ་གཟུགས་སུ་བསྐྲུན་པ། པོད་ཕྲེང་བརྒྱ་དང་བཅུ་གསུམ་གྱི་བདག་ཉིད་ཅན་འགྲམ་ཆུ་ལྡང་ཡུལ་ཞིག་བཞུགས། གཞན་ཡང་། པ་ལེའི་སྐད་དང་། རྒྱ་གར་གྱི་སྐད་ཡིག། ཨིན་སྐད། རྒྱ་ནག་སྐད་ལ་སོགས་པའི་ཐོག་བཞུགས་པའི་ཤེས་རིག་གི་རྣམ་གྲངས་ཤིན་ཏུ་མང་བོ་ཞིག་ཡོད་པ་འདྲའང་ཞིབ་བལྟ་བྱ་རྒྱུའི་དུས་ཚོད་མ་བྱུང་། བར་ཁང་གི་དབུས་སུ་ཁྲུ་བཞིའི་ཚད་ཅན་གྱི་འཕགས་པ་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་། དེའི་མདུན་ངོས་སུ་བསྐྱངས་ཁྲུ་གཅིག་གི་ཚད་དང་ལྡན་པའི་ཐུབ་པ་གཙོ་འཁོར་གསུམ། དེའི་གཡས་ཕྱོགས་སུ་ཐུགས་རྗེ་ཆེན་པོ་ཕྱག་བཞི་བ། གཡོན་ཕྱོགས་སུ་རྡོར་སེམས་དཔའ་བོ་གཅིག་པ་འཁོར་ཐུབ་པ་རིགས་ལྔས་བསྐོར་བ། དེའི་འཕྲོ་སངས་ཤཀྱྰ་ཐུབ་པ་ཁྲུ་གསུམ་གྱི་ཚད་ཅན། གཡས་འཇམ་དཔལ་དང་གཡོན་སྒྲོལ་ལྗང་སོགས། བསྐོས་བླུག་གི་ལྷ་སྐུ་བྱོན་ལེགས་ཆེ་ཆུང་སྣ་ཚོགས་པ་དང་། བར་ཁང་ཕུག་གི་གྲུ་ག་གཡས་མ་ན། གནུབས་ཆེན་སངས་ཡེ་ཤེས། རྩ་གསུམ་གླིང་བ། ཕ་དམ་པ་རྒྱ་གར་སོགས་དང་། གྲུ་ག་གཡོན་མ་ན། གྲུབ་ཆེན་ཐང་སྟོན་རྒྱལ་པོ། སྤྲུལ་བའི་གཏེར་ཆེན་བདུད་འཇོམས་འཇིགས་བྲལ་ཡེ་ཤེས་རྡོ་རྗེ། རྩེ་ལེ་སྣ་ཚོགས་རང་གྲོལ། དཔལ་རྡོ་རྗེ་འཇིགས་བྱེད་གྲུ་གཉིས་ཀྱི་ཚད་ཅན་བཅས་བཞུགས་ཤིང་། དེ་དག་གི་རྒྱབ་ངོས་ཧྲིལ་བོ་རྒྱལ་བའི་བཀའ་འགྱུར་དང་། རྙིང་མ་རྒྱུད་འབུམ་གཙོ་བོར་གྱུར་བའི་སྔ་འགྱུར་གྱི་མཁས་གྲུབ་སྐྱེས་ཆེན་དག་གི་གསུང་འབུམ་གྱིས་བར་མཚམས་མེད་གང་ཡོད། ད་དུང་ཁོར་ཡུག་ན་བཀྲགས་མདངས་ཆེ་བའི་བྲིས་ཐང་ཡིད་དུ་འོང་བ་སྣ་ཚོགས་ཤིག་བཤམས་ཡོད་སྟབས། ངོ་སྤྲོད་མ་བྱས་ཚེ་ལམ་སེང་འདི་དཔེ་མཛོད་ཁང་ཞིག་ཡིན་པ་ཚོར་དཀའ། གལ་སྲིད་ཁྱེད་རང་རིག་པའི་གཞུང་ལུགས་ལ་སློབ་སྦྱོང་དང་། ཉམས་ཞིབ་བྱེད་མཁན་ཞིག་ཡིན་ཚེ། དཔེ་མཛོད་ཁང་འདིར་དཔེ་མང་ལྟ་ཀློག་ཉམས་ཞིབ་ཀྱི་རྒྱུ་ཆ་མོད་པ་མ་ཟད། ཁོར་ཡུག་གཙང་ཞིང་ཡིད་དུ་འོང་བ། ཁ་ཁུ་སིམ་པོ། བློ་རིག་རང་བཞིན་གྱིས་དྭངས་ཡོང་ངེས་ཞིག་རེད། གཙུག་ལག་ཁང་གི་སྟེང་ཁང་ནི། ཆོས་སྐུའི་ཞིང་ཁམས་ཀྱི་མཚོན་དོན་རེད། ལྷ་ཁང་དེའི་རྟེན་གཙོར་དབུས་སུ་མགོན་པོ་འོད་དཔག་མེད་གཙོ་འཁོར་གསུམ། དེའི་གཡས་སུ་མཆོད་རྟེན་མི་ཚད་ཙམ། སངས་རྒྱས་ཀྱི་འདྲ་སྐུ་ཁྲུ་གཉིས་ཀྱི་ཚད་ཅན། གཡོན་ཕྱོགས་སུ་རྗེ་བཙུན་སྒྲོལ་ལྗང་། ཚེ་དཔག་མེད། ཐུགས་རྗེ་ཆེན་པོ་ཕྱག་སྟོང་སྤྱན་སྟོང་སོགས། ལྷ་བླ་ཡིད་དམ་གྱི་སྐུ་གཟུགས་ཆེ་ཆུང་མཎྜལ་གྱི་ཚོམ་པུ་བཀོད་པ་བཞིན་དུ་མཛེས། སྟེང་ཁང་གི་རབ་གསལ་ནས་ཕྱི་ལ་བལྟས་ན། སྨུག་དུང་དུང་གི་ནགས་རི་དང་། ལྗང་ཐང་ཐང་གི་སྤང་ལྗོངས། མཐིང་མདོག་གི་ནམ་ཁར་འཁྱིལ་བའི་སྤྲིན་དཀར་གྱི་ཚོམ་པུ་སྣ་ཚོགས། ལག་མཐིལ་དུ་བཀོད་པ་ལྟར་མཐོང་ཐུབ་པས། སྣང་སྲིད་རིག་པའི་ཆོ་འཕྲུལ་དུ་འཆར་ཐུབ་བའི་རྟེན་འབྲེལ་ཞིག་མ་བསྒྲིགས་ངང་གིས་འགྲིགས་འདུག་བསམས། ནུབ་ཕྱོགས་ཀྱི་པདྨ་བསམ་ཡས་གླིང་ནི། སྐུ་བལྟམས་ནས་ད་བར་དགུང་ལོ་ཉི་ཤུ་རྩ་དྲུག་ལས་སོང་མེད་ནའང་། དེའི་ཕྱི་ནང་གི་བཟོ་བཀོད་དང་། སྐུ་གསུང་ཐུགས་རྟེན་གྱི་རྣམ་བཞག དམ་པའི་ཆོས་ཀྱི་ཉམས་ལེན། རང་བཞིན་གྱིས་ཚོར་ནུས་པའི་བྱིན་རླབས་ཀྱི་ནུས་པ། ད་དུང་ཨེ་ཀར་ལྔ་བརྒྱ་ཡོད་པའི་ཁོར་ཡུག་གི་མཚར་ལྗོངས་དག་གིས། གནས་འདིར་ནི་མི་ལོ་བརྒྱ་ཕྲག་མང་བོའི་ཕར་རྒྱབ་ནས་བརྒྱུད་ཡོང་བའི་བྱིན་རླབས་ཀྱི་ཚན་ཁ་མཐོན་པོ་ཞིག་དང་། རང་བྱུང་འཇིག་རྟེན་གྱི་གསང་བ་འཛོམས་པའི་མཐུ་ནུས་ཀྱི་ཟིལ་དངར་བརྗོད་མི་ཤེས་པ་ཞིག ས་འོག་གི་གཏེར་བཞིན་འཁྱིལ་ཡོད་པ་ཚོད་དཔག་བྱེད་ཐུབ་པ་ཞིག་རེད། མི་ཡུལ་ནས་དངོས་དུ་རྙེད་པའི་རྨི་ལམ་གྱི་ཞིང་ཁམས། དཔལ་ལྡན་པདྨ་བསམ་ཡས་གླིང་། བཀྲ་ཤིས་ཞལ་བྲོ།