ཕ་མར་སྤྲིངས་བའི་སེམས་ཀྱི་ངུ་ངག

དགའ་བ་ནས།

ལེ་དབར་ཁྲི་མ་འབུམ་གྱིས་ཆོད་པའི་སྡེ་རྐྱང་གྲོང་སྟོང་ས་ཞིག་ན།།
ཇ་རྐྱང་རྩམ་ཐང་ཟས་སུ་འཐུས་པའི་མི་ཚེའི་ཕྲེང་བ་བསྐོར་མཁན་མ།།
ཟས་གོས་གནས་མལ་མ་ཆད་མ་སྟོང་ཉིན་ཞག་རེ་རེའི་འཚོ་བའི་ཁྲོད།།
རེ་བའི་མིག་ཞགས་རྒྱང་ལ་གཏད་པའི་དྲིན་ཆེན་ཨ་མ་སྙིང་རེ་རྗེ།།

དགུན་གསུམ་གངས་དང་གྲང་རླུང་ཀློང་ལ་ཐབ་ཁ་གསོ་བཞིན་བུ་ཕྲུག་བསྐྱངས།།
དཔྱིད་གསུམ་རྩྭ་དང་རྩི་ཏོག་འཐུ་བཞིན་རི་ཐང་འགྲིམས་ཏེ་སྒོ་ཟོག་འཚོ།།
དབྱར་གསུམ་འདམ་དང་དྲག་ཆར་གསེབ་ལ་འོ་མ་འཇོ་བཞིན་ཕྱུར་མར་བསགས།།
སྟོན་གསུམ་རྩ་བསྡུས་གྲོག་མ་བརྐོས་ཏེ་བུ་ཡུག་ངོགས་ལ་ངལ་བ་སྤྱད།།

བགྲང་བྱ་བཅུ་ཡི་ཡ་སྔོན་ཞིག་ནས་འཛོམས་སྐལ་བྲལ་བའི་ཡུམ་ཆེན་མ།།
མི་ཚེ་གཅིག་ལ་སྙིང་དང་འདྲ་བའི་ལུས་སྦྱིན་སྲོག་གི་ཟེའུ་འབྲུ་མ།།
སྐལ་བ་སྟོང་གི་འཆི་གསོན་བར་ནས་ཡ་ཆུང་སེམས་ཀྱིས་གཅེས་པའི་མ།།
སེམས་འཁྲེན་ལྕི་མོས་རྒྱ་མཚོ་འཁྱིལ་བའི་མིག་ཆུའི་བདག་པོ་ཁྱེད་ལས་མེད།།

མེད་མུག་འཚོ་བ་རྨང་ནས་སྟོང་བའི་ས་མཐའི་ལམ་འཕྲང་སྐྱ་བོའི་ངོགས།།
བྱམས་བརྩེ་སྟོང་གི་འོད་ཞགས་ལྡན་པའི་མ་ལོའི་བཀའ་དྲིན་བློ་ལ་སྒོམ།།
ཕུགས་བསམ་ཆེ་མ་ཆུང་གི་སླད་དུ་མ་འགྲིམས་ཀ་མེད་ལམ་དོག་ནས།།
དྲན་སླ་བརྗེད་དཀའ་མི་ཞིག་མཆིས་པ་དྲིན་ཆེན་ཁྱེད་ལས་སུ་ཞིག་ཡོད།།

ཨ་ཕ།

དྲིན་ཆེན་ཨ་མ་གླེང་སློང་བྱེད་ཀྱིན་ཞེ་ལ་ཐོགས་པའི་མྱི་ཞིག་མཆིས།།
མི་ལོ་བདུན་གྱི་ཡ་སྔོན་ཞིག་ནས་ཕྱིར་འཁོར་མེད་པའི་གླིང་ཞིག་ལ།།
འཚོ་སྐལ་བཟང་པོ་གློ་བུར་ཟད་དེ་ཕྱི་མའི་ལམ་དུ་ཆས་ཟིན་སྐད།།
ཡུལ་གྱར་བུ་ངས་ཐོས་པའི་མོད་ལ་སྐྱོ་ནས་སྙིང་དམར་ས་ལ་ཟགས།།

ཆུ་འཁྱག་གྲང་མོ་སྙིང་ལ་བརྫངས་ལྟར་ཡིད་སེམས་སྡུག་པའི་ན་ཟུག་དེས།།
འགྲོ་འདུག་གནས་མལ་ཚུགས་ཀ་ཤོར་ཏེ་ངུ་ངག་ཤོར་བ་གྲངས་མེད་ཡིན།།
གསོན་ན་སྲོག་ལྟར་གཅེས་པའི་ཕ་རྒན་བྲལ་བས་ཤུལ་ལ་སྡུག་བསྔལ་ཞིག །
འཆི་ན་ཁྱེད་དང་ངོ་འཛོམས་མེད་པས་འཚོ་བའི་རེ་ཞགས་འཇའ་ལྟར་ཡལ།།

ཤུལ་དུ་ལུས་པའི་བུ་ཕྲུག་ཅིག་གིས་ས་མཐའི་ལམ་བུ་འཁྱོག་པོ་ནས།།
ཁྱིམ་བདག་མེད་མེད་པའི་དྭ་ཕྲུག་བཞིན་དུ་སྤྲང་ལམ་བརྒྱུད་དེ་གང་སར་ཉུལ།།
རི་ཆུ་སྟོང་གི་ཕར་ལ་ཆས་ཀྱང་ཕ་ཁྱེད་འཕྲད་པ་མི་སྲིད་དུས།།
སེམས་པ་གསོན་པ་ས་ལ་ལྷུང་སྟེ་གདུང་བའི་མཆིལ་མས་ངོ་གདོང་བརླན།།

དཔྲལ་བའི་མིག་དང་ཁོག་པའི་སྙིང་ལྟར་ཚེ་རབས་འདི་ཀོའི་སྐྱབས་མགོན་ཕ།།
ཉིན་མོའི་ཉི་དང་མཚན་མོའི་ཟླ་བཞིན་བདག་གི་ལམ་སྒྲོན་མུན་གསལ་ཕ།།
འཆི་བདག་བཙན་པོའི་རླུང་ནག་འཚུབ་ཏེ་ཕྱིར་གླིང་ཁམས་ལ་བདས་པའི་རྗེས།།
ལས་དབང་མུག་པོའི་དུད་ནག་འཁྲིགས་ཏེ་རྐང་ལམ་ཁྲ་མོ་འགག་སྟེ་ཐལ།།