རེབ་ཐོག་མདའ།
ལོ་ཟླའི་ཁ་དོག་སེམས་ལ་ལྷུང་བའི།།
ཀྱག་ཀྱོག་འཚོ་བའི་ཁུགས་སོ་འདི་ནས།།
གཞོན་དུས་གྲོགས་ཀྱིས་དུངས་སེམས་འོ་མ།།
ཟླ་བར་བསྐུར་བའི་སེམས་གཏམ་ཡིན་སོང་།།
གྱེས་བྲལ་གདུང་བ་ལུས་ལ་གྱོན་ནས།།
དུས་བཞིའི་ཚ་གྲང་ཚོར་བས་མྱོང་དུས།།
བརྕེ་བ་དྲོན་མོས་ནང་སེམས་བྲིས་པའི།།
དྲན་གདུང་སེམས་པ་རྒྱང་ལ་ཤོར་ཡོད།།
གངས་རི་མཐོན་པོའི་ཕ་རོལ་དེ་ནས།།
དགུ་ཀློང་རིང་མོའི་བཞུར་སྒྲའི་ལྷན་དུ།།
སྐྱིད་ལ་སྡུག་གི་འཚོ་བ་ཟབ་མོ།།
འཛུམ་གྱིས་བསུས་པའི་ངང་ཚུལ་དྲན་གི།
ཚན་རྩལ་རིག་གནས་འཕེལ་རྒྱས་ཀློང་ནས།།
སྐད་འཕྲིན་དྲ་བའི་ཀློང་ལ་ཉུལ་དུས།།
ལོ་ངོ་བཅུ་ཡི་ངོགས་སུ་བྲིས་པའི།།
སྙིང་གཏམ་དྲོན་མོ་སེམས་ནས་ཤོར་ཐལ།།
ཆོས་གྲྭ་ཆེན་པོའི་ཚོགས་ར་འགྲིམ་ནས།།
ཆོས་ཀྱི་དབྱངས་རྟ་ངག་ལ་གྱེར་རྗེས།།
འདུ་འཛི་ཆེ་བའི་ཁྲོམ་ལ་ཉུལ་ནས།།
མངར་མོའི་ཟས་ལ་རོལ་བ་དྲན་གི།
དབྱར་གྱི་མེ་ཏོག་སྤང་ན་འཛུམ་དུས།།
ཟས་རིགས་འཛོམས་པའི་གླིང་ཀ་ཞིག་ནས།།
ཉི་མ་ཟླ་བའི་ངོ་གདོང་རུམ་པའི།།
མཉམ་འཛོམས་དུས་ཡུན་ཡང་ཡང་དྲན་གི།
དགུན་གྱི་ཁ་བའི་རྣམ་ཤེས་དཀར་པོ།
ས་ཆེན་གོ་ལའི་མགྲོན་དུ་སླེབས་དུས།།
འོ་ཇ་དཀར་པོ་དལ་གྱིས་འཐུང་བཞིན།།
ཁ་བརྡའི་ཀློང་གི་མཚན་མོ་དྲན་གི།