ཕ་ཡུལ་གྱི་དངངས་སྐྲག

གཡང་སྐྱབས་རྒྱལ་གྱིས།
ཉིན་ཁ་ཤས་གོང་གི་ཞོགས་ཀ་སྔ་མོ་ཞིག་ལ་ཕྲན་ལ་ཁ་པར་ཞིག་འབྱོར་ནས། རེབ་གོང་རོང་བོ་དགོན་གྱི་གྲྭ་འཇིགས་མེད་ཟླ་བ་འཛིན་བཟུང་བྱས་པ་རེད་ཟེར། ཁོང་དང་ལྷན་དུ་གྲྭ་བ་གཞན་འགའ་ཡང་འཇུས་པ་རེད་ཟེར། ད་ནངས་ཀྱང་ང་ལ་ཁ་པར་ཞིག་འབྱོར་ནས། ཁ་སང་དེ་རིང་རེབ་གོང་རོང་བོ་དགོན་པའི་དགེ་འདུན་པ་སུམ་བཅུ་ཐམ་པ་གར་ཡོད་ཆ་མེད་(Missing)ཡིན་པ་དང་། གྲྭ་པ་གཅིག་དམར་གསོད་བཏང་བ་(Mudered)རེད་ཟེར།


འཛིན་བཟུང་དང་དམར་གསོད་ནི་ལོ་འདིའི་ཟླ་བ་གསུམ་པ་ཚུན་ནས་ང་ཚོ་བྱེས་སྡོད་བོད་མི་ཚོས་མཐོང་ཞིང་ཐོས་པའི་སྐད་ཆ་ཞིག་ཡིན་བརྟེན། ང་ལ་ཡང་བློ་འཚབ་འཕར་མ་ཞིག་མ་བྱུང་། འོན་ཀྱང་། ངས་ཁ་པར་ལ་ཉན་བཞིན་པའི་སྐབས་དེར་ངའི་སྙིང་རླུང་སྟོད་ལ་འཚངས་ཤིང་གཟུགས་པོར་འཚབ་ཤ་ལངས། དེ་ནི་ང་དང་ངའི་གྲོགས་པོ་ཁུ་བྱུག་༼མིང་ངོ་མ་མིན་༽གཉིས་ཀའི་ཕྱོགས་ནས་མི་གཞན་ཞིག་གིས་ཁ་པར་ལ་ཉན་བཞིན་ཡོད་པའི་བློ་དྭོགས་ཡོད་པའི་རྐྱེན་གྱིས་ཡིན། ང་ནི་ཨ་རི་ལ་སྡོད་མཁན་ཞིག་ཡིན་སྟབས་དམིགས་བསལ་གྱི་འཚབ་ཤ་ལངས་དགོས་དོན་ཞིག་གང་ན་ཡོད། ང་ཚོའི་ཁ་བརྡ་དེ་ཡང་རིམ་གྱིས་བྱ་རོག་སོ་རྟོག་གི་བསྟན་བཅོས་ལྟ་བུ་ཞིག་ལས་ཅི་ཡང་མ་ཡོང་།

དུས་རབས་ཉེར་གཅིག་པའི་ནང་གི་ང་ཚོའི་འབྲེལ་ལམ་ནི་ཁ་པར་དང་། མྱུར་འཕྲིན། གློག་འཕྲིན། དྲ་རྒྱ་སོགས་རྒྱ་ཆེ་བ་ཞིག་ཡོད། འོན་ཀྱང་དེ་ཚང་མ་ལ་ཡིད་ཆེས་ཐུབ་པ་གཅིག་ཀྱང་མེད། གྲྭ་པ་སུམ་བཅུ་གར་ཡོད་ཆ་མེད་ཡིན་པ་དེ་དུས་ཚོད་ནམ་ནས་རེད། གྲྭ་པ་ཚོ་ཐོག་མར་གང་ནས་བཟུང་། གྲྭ་པ་དེ་ཚོའི་མིང་དང་ལོ་རྒྱུས་གང་འདྲ་རེད། གྲྭ་པ་དེ་ཚོའི་འདྲ་པར་རེ་ཨེ་ཡོད། གྲྭ་པ་དེ་ཚོའི་ཕ་མ་སྤུན་མཆེད་ཚོས་ཅི་ཟེར། དགོན་པའི་ནང་གི་ཉིན་རེའི་འཚོ་བ་གང་འདྲ་ཡིན། འདི་འདྲའི་དྲི་བ་མང་པོ་ཞིག་ངས་རང་གི་མ་མགལ་ལ་སོས་མནན་ནས་ཁོག་ཏུ་འཇུག་དགོས་བྱུང་།

གྲོགས་པོ་ཚོ། གོང་གསལ་གྱི་སྐོར་ལ་གནས་ཚུལ་སོ་མ་རེ་ཐོས་ན། འདིར་གསུངས་རོགས་གནང་།