ལོ་མ་རྒྱལ།
དབྱར་ལྗོངས་ལ་ཡོད་ཚད་ཆབ་རོམ་འཁྱགས་ཏེ་མཁྲེགས་གཟུགས་ཀྱིས་རེངས་བ་འདི་མཐོང་ན།
ཁྱོད་ཀྱི་ལྗང་མདོག་དང་སྐྱེས་སྟོབས་ལ་ནམ་ཡང་དར་ཆགས་མི་རུང་།
སྐབས་དེར། ཁྱོད་ཀྱིས་ཨ་ཕའི་ཁ་ཆེམས་ཡང་ཡང་སེམས་སུ་དྲན་དགོས།
སྐབས་དེར། ཁྱོད་ཀྱིས་ཨ་མའི་རེ་སྒུག་དེ་ཡང་གཏན་ནས་བརྗེད་མི་ཉན།
མཚམས་མཚམས་སུ། ནམ་མཁའ་ལ་སྤྲིན་ནག་འཐིབས་ཏེ་དྲག་ཆར་འབབ་ན་ཡང་།
མཚམས་མཚམས་སུ། རླུང་དམར་གཡུགས་ནས་ཁྱོད་ཀྱི་སྐྲ་ལོ་བསྣོགས་ན་ཡང་།
ཉི་མ་ལ་ནམ་ཡང་འོད་ཟེར་གྱིས་ཁེངས་ཤིང་།
དེ་ན་ནག་ཐིག་སོགས་ཅི་ཡང་མེད་པ་དེ་ཡང་ཁྱོད་ཀྱིས་ཤེས་དགོས།
སུ་ཞིག་གིས་ས་མཐའ་ནས་ཕ་ཡུལ་མི་དྲན་ཟེར་བ་ནི་སྐྱག་རྫུན་ཡིན།
ཡིན་ན་ཡང་། ཕ་ཡུལ་ནི་ནམ་ཡང་ཁྱོད་ཀྱིས་ཕ་ཡུལ་ཡིན་པ་དེ་འགྱུར་བ་གཏན་ནས་མེད།
ད་ནི་ཁྱོད་རང་རྒོད་པོ་ཞིག་སྟེ།
རང་ཉིད་ཀྱི་གཤོག་རྩལ་ལ་བརྟེན་ནས་རང་ཉིད་ཀྱི་ནམ་འཕང་གཅོད་དགོས།
ཕ་མའི་དྲིན་ལན་འཇལ་མ་ཐུབ་ཅེས་ཁྱོད་རང་འགྱོད་པ་ཡང་སྐྱེས་སྲིད་དེ།
ཡིན་ན་ཡང་། ཕ་མའི་རེ་བ་ནི་ཁྱོད་ལ་རང་ཉིད་ཀྱི་ཡངས་ཤིང་མཛེས་པའི་ནམ་མཁའ་ཞིག་ཡོད་ན་བསམ་པ་དེ་ཡིན།
དེ་བས། ཁྱོད་ཀྱིས་གཤོག་རྩལ་མངོན་ཏེ་ནམ་འཕང་གཅོད་དང་།
དེ་ནི་ཕ་མའི་དྲིན་ལན་འཇལ་བ་ཡིན།
ཕ་ཡུལ་གྱི་ནམ་མཁའ་ནས་རྟག་པར་སྐར་མདའ་ས་ལ་ཟགས་ཀྱིན་འདུག
ཕ་ཡུལ་གྱི་རྩྭ་ཐང་གི་སེར་ཆེན་དང་རི་ལྕོག་གི་མེ་ཏོག་ཀྱང་ཉིན་རེར་ནས་ཇེ་ཉུང་རེད།
མ་འོངས་པ། ཁྱོད་ཀྱིས་ཕ་ཡུལ་གྱི་ནམ་མཁའ་ལ་ཉི་ཟླ་འདྲེན་དགོས།
མ་འོངས་པ། ཁྱོད་ཀྱིས་ཕ་ཡུལ་གྱི་རྩྭ་ཐང་ལ་མེ་ཏོག་གདབ་དགོས།
ཨ་མས་ཕྱག་འཚལ་ཐེངས་རེ་རེར་ཁྱོད་ལ་གསོལ་བ་བཏབས་ཡོད།
ཨ་ཕས་བསང་འཇོག་ཐེངས་རེ་རེར་ཁྱོད་ཀྱི་དོན་དུ་སྐྱབས་འཇུག་ཞུ་ཡོད།
མཛེས་སྡུག་ལྡན་པའི་དབྱར་གཞུང་ཞིག་ལ།
ང་ཚོ་ལྷན་དུ་འཛོམས་ཏེ་ལྷ་སར་འགྲོ་དགོས།
༠༧།༡༢།༢༠༡༣