རླངས་བཛྲ།
༄༅། །ཡུན་རིང་ཕྱི་ལ་འཁྱམས་པའི་དབང་གིས་བྱམས་ལྡན་གྱི་ཕ་མ་གཉིས་ལ་ཐུག་འཕྲད་བྱེད་པའི་རེ་བས་ལོ་ཟླ་མང་པོ་དལ་གྱིས་རྫོགས་པ་དང་། ལྷག་པར་དུ་ད་ལོ་ ༢༠༢༠ ་ལོའི་ནང་། ཕ་རྒན་ལོ་བརྒྱད་ཅུར་སོན། བོད་མདོ་སྨད་ཀྱི་ཡུལ་སྲོལ་གོམས་གཤིས་ལ། གྱ་སྟོན་བྱེད་པའི་རྟེན་འབྲེལ་མཛད་སྒོ་ཞིག་སྤེལ་སྲོལ་ཡོད།
དེ་ནི་བུ་ཕྲུག་རྣམས་དང་གཉེན་ཉེ་ཀུན་གྱིས་མི་ལ་ཚེ་རིང་ཞིང་གཞི་ལ་གཡང་འཁྱིལ་བའི་རྟགས་དང་རྟེན་འབྲེལ་དུ་བརྩིས་ཏེ། འདུ་འཛོམས་རྒྱ་གང་ཆེ་བྱས་ནས་དགའ་སྤྲོ་ཆེན་པོའི་ངང་རོལ་བའི་སྲོལ་ཡོད་པ་ཇི་ལྟ་བ་བཞིན། བདག་གིས་ཀྱང་བས་མཐའི་ཡུལ་ནས་ཨ་མ་དང་སྤུན་སྲིང་། ཚ་བོ་ཚ་མོ་རྣམས་དང་ལྷན་དུ་ཕ་རྒན་གྱི་གྱ་སྟོན་ལ་འཛོམས་ཐུབ་པའི་རེ་བ་ལ་སྙིང་ལ་བཅངས་ནས། ཡུལ་ཁྲིམས་ཀྱི་འགྲོ་ལུགས་དང་མཐུན་པར་གཞུང་ཚབ་རིམ་པར་ཆོག་མཆན་ཞུ་ཞུས། ཆོག་མཆན་རག་མིན་དང་རག་ཀྱང་རང་གི་འདོད་པ་ལྟར་དུས་ཚོད་གཏན་འཁེལ་སོགས་བསམ་ཐོག་ཏུ་ཡོང་བ་ཤིན་ཏུ་དཀའ་མོད། སྟབས་ལེགས་པ་ཞིག་ལ། ཕ་ཡུལ་དུ་གཉེན་འཕྲད་ལ་ཡོང་ཐུབ་པའི་ཆོག་མཆན་ཐོབ། ལོ་ན་བགྲེས་པའི་ཕ་རྒན་གྱི་གྱ་སྟོན་ལ་དམིགས་ནས་ཆོག་མཆན་སྤྲད་སོང་བསམ་ཡོད།
གང་ལྟར། ཆོག་མཆན་ཐོབ་མ་ཐག་གནམ་གྲུའི་འཛིན་བྱང་ཉོས་ཤིང་དུས་ཚོད་ཉེར་བཞིའི་ནང་ལམ་དུ་ཆས་ཏེ་རང་ཉིད་སྡོད་ས་ནས་ཧོང་ཀོང་བརྒྱུད་པེ་ཅིང་། དེ་ནས་ཟི་ལིང་དུ་འབྱོར། དེར་བདག་གི་ནུ་བོ་དང་ཚ་བོ་གཉིས་བཅས་བསུ་བར་སླེབས་འདུག དེ་ནས་ང་ཚོ་ལྷན་དུ་རླངས་འཁོར་ཆུང་ངུ་ཞིག་ལ་བསྡད་ནས་ཕ་ཡུལ་རེབ་ཀོང་དུ་ཆས། ཕུག་ལམ་མང་པོ་འཛུལ་ནས་མཚན་མོའི་ཆ་ལ་བདེ་ལེགས་ངང་རང་སྡེ་ཆུང་ཆུང་དེར་འབྱོར།
དེར་ཕ་མ་གཉིས་གཙོས་པའི་གཉེན་ཉེ་ཚོས་གཉིད་ལ་ཡང་མ་འཛེམ་པར་མཚན་དཀྱིལ་བར་དུ་བསྒུགས་ནས་བསྡད་འདུག ཕ་ཡུལ་གྱི་གཉེན་ཉེ་ཚོའི་ལྷད་མེད་ཀྱི་བརྩེ་འདང་དེས་ང་ཕྱིར་འབྱོར་ཐེངས་རེར་དུང་ཞེན་དང་སྙིང་སྟོབས་ཀྱང་འགྲན་མེད་ཅིག་སྤྲོད་ཀྱིན་ཡོད། ད་ཐེངས་ཕྱིར་འབྱོར་བ་ནི་ལོ་ཉེར་བཞིའི་རྗེས་སུ་ཕ་མ་སྤུན་སྲིང་དང་ལྷན་དུ་འཛོམས་པའི་ལོ་གསར་དང་པོ་དེ་ཡིན། དེར་མ་ཟད་ཕ་རྒན་གྱི་གྱ་སྟོན་ཡང་ཡིན་པས་རང་ཁྱིམ་ཆུང་ངུའི་དབང་དུ་བྱས་ན་དགའ་བ་བསམ་གྱིས་མི་ཁྱབ་པ་ཞིག་ཡིན་པ་སྨོས་ཅི་དགོས།
གྱ་སྟོན་གྱི་མཛད་སྒོ་ནི། ལོ་གསར་ཚེས་གསུམ་མམ་ལྔ་གང་རུང་ལ་བྱེད་སྲོལ་ཡོད་པས། ཚེས་གསུམ་ལ་རྟེན་འབྲེལ་བྱེད་པར་གཏན་འཁེལ་བྱས་པ་ཡིན། ལོ་མཇུག་གི་ཉིན་དག་དང་ལོ་གསར་ཚེས་གཅིག་ནས་བཟུང་གཉེན་ཉེ་དང་འཚོ་བ་རྣམས་ཀྱིས་ཁྱིམ་གྱི་མཐུན་རྐྱེན་དང་བསྟུན་ནས་གྲ་སྒྲིག་གང་ཡོད་བྱས། ཚེས་གསུམ་གྱི་ཉིན་གང་པོར་རང་སྡེ་དང་ཡུལ་ལུང་གཞན་གྱི་གཉེན་ཉེ་དག་ལམ་ཐག་རིང་བོ་ལ་མ་འཛེམ་པར་གྱ་སྟོན་ལ་ཡོང་བའི་འགྲུལ་པའི་འདུ་འཛོམས་ཀྱི་བྲེལ་ཟིང་བར་མ་ཆད་པར་བྱུང་། ཉིན་དེར་གྱ་སྟོན་གྱི་བྱ་བ་ཐམས་ཅད་བཀྲ་ཤིས་བདེ་ལེགས་ངང་གྲུབ།
ཚེས་བཞི་ནས་སྡེ་གཞན་ན་ཡོད་པའི་གཉེན་ཉེ་རྒན་པ་དག་ལ་རིམ་བཞིན་འཚམས་འདྲིར་འགྲོ་འཆར་ཡོད་མོད། སྟབས་མ་ལེགས་པ་ཞིག་ལ། ཚེས་བཞི་ནས་བཟུང་རྒྱ་ནག་རྒྱལ་ཡོངས་ལ་༼ཏོག་དབྱིབས་ནད་དུག༽གི་རིམས་ནད་སྔོན་འགོག་གི་ལས་འཆར་ལག་བསྟར་བྱས་ཏེ། འགྲུལ་བཞུད་ཡོད་ཚད་བཀག་སྡོམ་བྱས་པ་མ་ཟད་རོང་པོ་དགོན་པའི་ཆོ་འཕྲུལ་སྨོན་ལམ་དང་། རེབ་ཀོང་སྔགས་མང་གི་ཆོས་ཐོག སྡེ་བ་སོ་སོའི་གཉེན་སྟོན་དང་མཛད་སྒོ་ཚང་མ་གནས་སྐབས་རིང་སྤེལ་མི་ཆོག་པའི་བཀག་རྒྱ་བསྡམས་སོང་བ་དང་། ཚེས་ལྔ་ནས་ནང་མི་ཕྱིར་མི་གཏོང་བ་དང་ཕྱི་མི་ནང་ལ་མི་གཏོང་བ་དངོས་སུ་ལག་བསྟར་བྱས་སོང་།
ང་རང་པེ་ཅིང་གནམ་ཐང་བརྒྱུད་ནས་ཡོང་རྐྱེན་ཞང་ངམ་ཡུལ་ཚོའི་འགོ་ཁྲིད་ཀྱིས་རྩ་འཛུགས་བྱས་པའི་སྡེ་བའི་རྐང་རྗེན་སྨན་པ་དང་རྫོང་དང་ཡུལ་ཚོའི་ལས་བྱེད་འགའ་ཡོང་ནས་ཉིན་བཅུ་བཞིའི་རིང་ཉིན་རེར་ཚ་དྲོད་ལ་བརྟག་དཔྱད་ཐེངས་གསུམ་རེར་ བྱས་སོང་། དེ་དུས་ས་གནས་ན་ནད་པ་དེ་འདྲ་མེད་པས་འདི་འདྲའི་བཀག་འགོག་བྱེད་དགོས་ཀྱི་ཨེ་ཡོད་སྙམ་པའི་མི་འདོད་པའི་ཚོར་བ་ཤུགས་ཆེ་སྐྱེས་སོང་། རིམ་བཞིན་ནད་དུག་དེ་མདོ་སྨད་མཚོ་སྔོན་གྱི་ཡུལ་ཁ་ཤས་ལ་ཁྱབ་ཡོད་པ་ཤེས་རྗེས་སྔོན་འགོག་གི་ནུས་པ་ཤུགས་ཆེ་རུ་མ་བཏང་ན་ཉེན་ཁ་ཡོད་པའི་དོགས་སློང་ཡང་ཟློག་མེད་དུ་འཆར། བསམ་བློ་ཞིབ་མོ་ཞིག་བཏང་རྗེས། རང་རེའི་ཡུལ་འདིར་ནད་དུག་འགོག་པའི་ཐབས་ལམ་གཅིག་རང་ཡོད་པ་ཁོ་ན་ནི་འགྲུལ་ལམ་གཅོད་རྒྱུ་ལས་ལྷག་པའི་ཐབས་གཞན་ཞིག་མེད་པ་གཞི་ནས་ཤེས། ཞིང་དང་ཁུལ། རྫོང་དང་ཡུལ་ཚོ་ནས་སྡེ་བའི་འགོ་ཁྲིད་རྣམ་པ་ཚོས་རང་ནུས་གང་ལྕོགས་ཀྱིས་ས་གནས་སོ་སོ་ནས་སྔོན་འགོག་གི་ནུས་པ་གང་ཐུབ་བསྒྲུབས་པས་ཅུང་ཙམ་བློ་བདེ་བ་བྱུང་།
ཡིན་ནའང་། རྒྱལ་ཡོངས་ལ་ནད་དུག་གི་ཁྱབ་ཚད་དང་འཆི་ཚད་ཡང་ཤུགས་ཆེ་རུ་འགྲོ་བཞིན་པ་གསར་ལམ་ཁག་བརྒྱུད་ཐོས་པའི་ཚེ་ན་བློ་བག་བདེ་བོ་ཞིག་རྩ་བ་ནས་མ་རེད། ནད་དུག་གི་བློ་འཚབ་དང་གནད་དོན་གཅིག་པོ་མ་ཡིན་པར་དཔལ་འབྱོར་དང་འཚོ་གནས་ལ་ཡང་གྱོང་གུད་ཆེན་པོ་སྤྲོད་ཀྱིན་ཡོད་པས་འགྲུལ་ལམ་གཏན་དུ་འགོག་པ་ཚོང་ལས་ཡར་རྒྱས་འགྲོ་བཞིན་པའི་རྒྱལ་ཁབ་ཞིག་ལ་མཚོན་ན་ལས་སླ་བོ་ཞིག་རྩ་བ་ནས་མ་རེད། རྒྱ་ནག་སྲིད་གཞུང་གིས་ཟླ་གཅིག་ལ་རྒྱལ་ཡོངས་ཀྱི་ཟས་རིགས་ཚོང་ཁང་དང་སྨན་བཅོས་གཉིས་ཀྱི་ཚོང་ལས་མ་གཏོགས་ཡོད་ཚད་ལས་མཚམས་བཞག
སྐབས་འདིར། ཟས་ཚོང་གི་རིན་འཕར་ན་ཉེས་ཆད་ལྗིད་མོ་གཅོད་པ་དང་། གྲོང་ཁྱེར་རེ་འགའ་ན་ཟླ་རེར་དངོས་རིན་དང་ཁང་རིན་སྤྲོད་མཁན་རིགས་ལ་ཕྱེད་བཅག་བྱས་པ་སོགས་ནི་དམངས་ཕན་གྱི་བྱ་བ་ཞིག་ཏུ་བརྩིས་ཆོག འདི་ནི་ལོ་རྒྱུས་ཀྱི་ལེའུ་གསར་བ་དང་གླེགས་བམ་གསར་བ་ཞིག་རེད། རང་ཉིད་ཀྱིས་མིག་མཐོང་ལག་ཟིན་དུ་ཡུལ་མི་ཚོས་སྡེ་འདབས་ཀྱི་འགོག་སྒོའི་ས་ཚིགས་ཀྱི་ལྟ་སྲུང་བ་རྣམས་ལ་བཟའ་བཏུང་གི་མཐུན་རྐྱེན་ཡང་མ་སྐུལ་དྭང་བླངས་ངང་སྦྱར་སོང་། དེས་ནི་སྡེ་དམངས་ཀྱིས་རིམས་ནད་སྔོན་འགོག་ལ་རྒྱབ་སྐྱོར་དངོས་སུ་ཡོད་པའི་རྣམ་པ་མངོན་གསལ་ཅན་ཡིན་པ་མཚོན་ཐུབ། སྔོན་འགོག་གི་ཆེད་དུ་མུ་མཐུད་ནས་སྤྱི་ཡོངས་ནས་ལས་མཚམས་བཞག་ན་ཕན་གནོད་ལུང་མ་བསྟན་ཞིག་ལས་འབྱུང་འགྱུར་གྱི་ཕན་འབྲས་ལ་དམིགས་པའི་དགེ་མཚན་ཞིག་ཁ་ཚོན་ཡང་གཅོད་དཀའ་བར་འདུག
དེང་གི་ཆར། ཞིང་ཆེན་ནང་ཁུལ་ལ་འགྲོ་ཡོང་གི་ཆོག་མཆན་ཡོད་པར་བྱས་འདུག ཡིན་ནའང་། རྒྱ་ནག་ནས་མཚོ་སྔོན་ཕྱོགས་སུ་ཁྱིམ་ཚང་སྤོར་ནས་ཡོང་ཡོད་པའི་མི་མང་པོ་ཞིག་རྒྱ་ནག་ནང་ལ་ཕར་གུང་སེང་ལ་སོང་ནས་ཕྱིར་ཡོང་བཞིན་ཡོད་པས་ས་གནས་མི་དམངས་ཀྱིས་དེ་ལ་སེམས་ཁྲལ་བྱེད་ཀྱིན་འདུག་མོད། ཡིན་ནའང་། ཁོང་ཚོ་གཏན་སྡོད་བྱེད་ས་འདིར་ཕྱོགས་ཡིན་པས་བཀག་འགོག་བྱེད་པར་སྟབས་ཧ་ཅང་གི་མི་བདེ་བ་ཞིག་ཆགས་འདུག ཡུལ་མི་ཚོས་ཁོང་ཚོར་ཕྱིར་བདེ་ཐང་ངང་ལོག་པར་དགའ་བསུ་དང་ཆབས་ཅིག་རིམས་ནད་ཡོད་མེད་ཀྱི་དོགས་སློང་ཡང་ངང་གིས་བྱེད་པའི་རྣམ་འགྱུར་མི་མངོན་ག་མེད་རེད། གལ་ཏེ། ནད་དུག་ས་ཕྱོགས་འདིར་ཁྱབ་ཚེ་ཁོར་ཡུག་དང་སྨན་པ། སྨན་བཅོས་སོགས་ཕྱོགས་གང་ཐད་ནས་རྒྱ་ནག་དབུས་ཀྱི་ཞིང་ཆེན་དག་ལས་་མཐུན་རྐྱེན་སྦྱོར་བའི་ནུས་པ་ཧ་ཅང་ཞན་པས་ཆེས་ཛ་དྲག་ཅན་དུ་འགྱུར་ངེས། དེར་བརྟེན། དེ་ལས་ཐར་བའི་བྱ་ཐབས་གཞན་ལས་ལྷག་པ་ཞིག་མེད་པ་ཕལ་ཆེར་གསལ་པོ་ཡིན་པས་ས་གནས་མི་དམངས་ཀྱིས་དོགས་ཟོན་ནན་མོ་བྱེད་བཞིན་འདུག
ད་ནི་འཛམ་གླིང་གི་རྒྱལ་ཁབ་དང་ཡུལ་གྲུ་ཁག་ཏུའང་ཉིན་རེ་བཞིན་རིམས་ནད་ཁྱབ་ཆེ་རུ་འགྲོ་བཞིན་ཡོད་པས། བོད་རྒྱ་ཆེའི་མི་དམངས་ཡོངས་ཀྱིས་རང་ས་ནས་སྣང་མེད་དུ་མི་འཇོག་པར་ནད་ཡམས་སྔོན་འགོག་ལ་སྒོ་ཀུན་ནས་འབད་པ་ལྷུར་ལེན་བྱ་རྒྱུ་ཧ་ཅང་གི་གལ་ཆེན་དུ་མཐོང་།
སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་གྱུར་ཅིག །འགྲོ་བའི་ནད་ནི་མ་ལུས་པ། །རྟག་ཏུ་འབྱུང་བ་མེད་པར་ཤོག །རིམས་ནད་སྔོན་འགོག་གི་ལས་འགུལ་མིག་ཟིན་ལག་མཐོང་གི་ཡུལ་ནས་བྲིས། ༢༠༢༠-༢-༢༥ ལ།