ཐེ་བོ་ཤེས་རབ་རྒྱ་མཚོ།
ད་ཆ་ངའི་ཕ་ཡུལ་གྱི་མི་ཚོས་བཤད་ཀྱིན་པའི་སྐད་ཆའི་དབྱངས་འགྲོས་འགྱུར་ནས་ཡུན་རིང་སོང་ཡོད་པ་འདྲ།
ང་རང་ཕ་ཡུལ་དང་གྱེས་ནས་མི་ལོ་ཧྲིལ་པོ་བཅུ་གཅིག་འགོར་སོང༌། མི་ལོ་བཅུ་གཅིག་གི་ཡར་སྔོན་ངའི་ཕ་ཡུལ་དུ་ནང་ཁུལ་ཕན་ཚུན་གླེང་མོལ་བྱེད་སྐབས། བོད་སྐད་ཀྱི་ཐ་སྙད་གང་མང་ཞིག་གི་ཚབ་ཏུ་རྒྱ་སྐད་ཀྱི་ཐ་སྙད་སྤྱད་ནས་གོ་བརྡ་སྤྲོད་ཀྱི་ཡོད་པ་དང༌། སྐབས་དེར་ངས་ཀྱང་ངའི་ཕ་ཡུལ་གྱི་མི་ཚོ་ནང་བཞིན། ཕན་ཚུན་ནང་ཁུལ་ལ་སྐད་ཆ་བཤད་དུས། སྒྲ་གདངས་དེ་ཙམ་དག་རྒྱུ་མེད་པའི་རྒྱ་སྐད་ཀྱི་ཐ་སྙད་གང་མང་ཞིག་བོད་སྐད་ལ་བསྲེས་ནས་བཤད་ཡོད་པ་སྨྲོས་ཅི་དགོས། འདས་ཟིན་པའི་མི་ལོ་བཅུ་གཅིག་གི་དུས་ཡུན་དེ། དེ་འདྲ་རིང་རྒྱུ་མེད་ནའང༌། མི་ལོ་བཅུ་གཅིག་གི་རྗེས་ཀྱི་དེ་རིང༌། ངས་རང་ཉིད་ཀྱིས་བཤད་པའི་སྐད་ཆ་འདི་རྦད་དེ་དཔག་ཚད་སྟོང་ཕྲག་གིས་ངའི་ཕ་ཡུལ་གྱི་མི་ཚོས་བཤད་ཀྱིན་པའི་སྐད་ཆའི་རྗེས་སུ་ལྷག་ཡོད་པ་ཚོར་བྱུང༌། ངས་ང་རང་དེ་ལྟར་ཕ་ཡུལ་གྱི་མི་ཚོས་བཤད་ཀྱིན་པའི་སྐད་ཆའི་རྗེས་སུ་ལྷག་ཡོད་པ། ཁ་པར་ཐོག་ནས་གླེང་མོལ་ཐེངས་གཅིག་བྱས་རྗེས་ད་གཟོད་ཧ་ཅང་གསལ་པོ་བྱས་ནས་ཚོར་བྱུང༌།
མི་ལོ་བཅུ་གཅིག་གི་ཡར་སྔོན་ལོ་ན་བཞི་ཅན་གྱི་ངའི་ཕུ་བོའི་བུ་མོ་ཆུང་ཆུང་དེ། ད་ཆ་ལོ་ན་བཅོ་ལྔར་སོན་པའི་སློབ་མ་ཞིག་ཆགས་ཡོད་པ་དང༌། ཁོ་མོའི་མིང་ལ་བཀྲ་ཤིས་སྒྲོལ་མ་ཟེར། ང་རང་ཕ་ཡུལ་ལ་ཡོད་དུས་ཁོ་མོ་ལོ་ན་བཞི་ལས་སོན་མེད་པའི་བུ་མོ་ཧ་ཅང་ཆུང་ཆུང་ཞིག་ཡིན་སྟབས། སྐབས་དེར་ཁོ་མོས་ང་ལ་དམིགས་བསལ་སྐད་ཆ་ག་རེ་བཤད་ཡོད་མེད་དང༌། ཁོ་མོས་བཤད་པའི་སྐད་ཆའི་ནང་ད་ལྟ་ནང་བཞིན་རྒྱ་སྐད་ཀྱི་ཐ་སྙད་འདྲེས་ཡོད་མེད་ངའི་དྲན་པའི་ཡུལ་དུ་མེད་ནའང༌། ཁ་སང་དགོང་ཁར། བོད་ནང་དུ་ཡོད་པའི་ངའི་ཕུ་བོ་ལ་ཁ་པར་བཏང་ནས་གླེང་མོལ་བྱེད་སྐབས། ངའི་ཕུ་བོས་ང་ལ། བཀྲ་ཤིས་སྒྲོལ་མ་ལ་སྐད་ཆ་བཤད་ཀྱི་ཡིན་ནམ། ཁོ་མོ་སློབ་གྲྭ་ནས་ཕྱིར་བསླེབས་འདུག ཅེས་པ་ལྟར་ངས་ཀྱང་ཕུ་བོའི་སྐད་ཆ་དང་ལེན་བྱས་ནས་ལོ་ན་བཅོ་ལྔར་སོན་པའི་ཁོ་མོ་དང་སྐར་མ་ལྔ་ཙམ་ཁ་བརྡ་བྱས་པ་ཡིན། འོན་ཀྱང་སྐར་མ་ལྔའི་རིང་གི་ཁོ་མོའི་ཁ་བརྡའི་ནང་རྒྱ་སྐད་ཀྱི་ཐ་སྙད་འདྲེས་མེད་པའི་སྐད་ཆ་དག་མོ་ཚིག་གཅིག་ཡོད་པ་ནི། ཁོ་མོས་ཐོག་དང་པོ་ཁ་པར་ལག་ཏུ་བླངས་མ་ཐག ཨ་ཁུ་ཁྱོད་བདེ་མོ་ཡིན་ནམ། ཞེས་པ་འདི་ཡིན་ལ། དེ་མིན་ལོ་ངོ་བཅུ་གཅིག་གི་ཡར་སྔོན་ངའི་ཕ་ཡུལ་གྱི་མི་ཚོས་སྐད་ཆ་བཤད་སྐབས་གཏན་ནས་མི་བསྲེས་པའི་རྒྱ་སྐད་ཀྱི་ཐ་སྙད་མང་པོ་མང་པོ་ཞིག་བསྲེས་ནས་བཤད་བྱུང་སྟབས། ཁོ་མོས་བཤད་པའི་སྐད་ཆའི་ནང་དོན་ཕྱེད་ཀ་ཙམ་ལས་ངས་གཏན་ནས་ཧ་གོ་མ་སོང་ལ། ཁོ་མོས་ཀྱང་ངས་བཤད་པའི་སྐད་ཆའི་ཕྱེད་ཀ་མང་ཕྱོགས་ཀྱི་ནང་དོན་ཧ་གཏན་ནས་གོ་ཐུབ་ཀྱི་མི་འདུག་པར་བརྟེན། གོ་བརྡ་འཕྲོད་ལ་མ་འཕྲོད་ཀྱི་ངེད་གཉིས་ཀྱི་ཁ་བརྡ་དེ། དེ་ལྟར་བཤད་མཚམས་བཞག་པ་ཡིན་ལ། ངེད་གཉིས་ཁ་པར་ནང་ནས་གོ་བརྡ་མི་འཕྲོད་པའི་སྐད་ཆ་དེ་དག་ནི། ཁོ་མོས་སློབ་སྦྱོང་བྱེད་སའི་སློབ་གྲྭའི་ཁོར་ཡུག་དང་འབྲེལ་བ་ཡོད་པའི་ཐ་སྙད་ཆེས་སྤྱིར་བཏང་བ་རྐྱང་རྐྱང་སྟེ། དགེ་རྒན་དང༌། སློབ་ཚན། འཛིན་གྲྭ་སོགས་ཀྱི་སྐོར་ནས་རེད།
ང་ཕྱིར་ནང་ལ་བསླེབས་རྗེས་ངས་མུ་མཐུད་དེའི་ཐོག་ལ་བསམ་བློ་བཏང་བ་ཡིན། མི་རིགས་ཤིག་གི་ལོ་རྒྱུས་ཐོག་ནས་བཤད་ན། ལོ་ངོ་བཅུ་གཅིག་གི་དུས་ཡུན་ནི་ཧ་ཅང་ཐུང་ཐུང་ཞིག་ཡིན་ནའང༌། མི་རེ་རེའི་མི་ཚེའི་ལོ་རྒྱུས་ལ་བལྟས་ནས་བཤད་ན། ལོ་ངོ་བཅུ་གཅིག་གི་དུས་ཡུན་ནི་དེ་འདྲའི་ཐུང་ཐུང་ཞིག་གཏན་ནས་མ་རེད་ལ། ལྷག་པར་དུ་མི་རེ་རེ་ལ་བརྟེན་ནས་གྲུབ་པའི་མི་རིགས་ཤིག་གི་ལོ་རྒྱུས་ལ་བལྟས་ནས་བཤད་ན་དེ་བས་ཀྱང་དུས་ཡུན་ཐུང་ཐུང་ཞིག་གཏན་ནས་མ་རེད།
མི་ལོ་བཅུ་གཅིག་གི་ཡར་སྔོན་གྱི་ངའི་ཚ་མོ་ཆུང་ཆུང་དེ་མི་ལོ་བཅུ་གཅིག་གི་རྗེས་ཀྱི་དེ་རིང་འདི་འདྲ་ཞིག་ཏུ་གྱུར་ཡོད་སྟབས། ཡང་བསྐྱར་མི་ལོ་བཅུ་གཅིག་གི་རྗེས་ཀྱི་དེ་རིང༌། འདི་འདྲའི་གཅེས་འོས་པའི་དེ་རིང་གི་ངའི་ཚ་མོ་ཆུང་ཆུང་འདིའི་བུ་མོ་དེ་ཇི་འདྲ་ཞིག་ཏུ་འགྱུར་རྒྱུ་ཡིན་ནམ་སྙམ་ནས་ང་ལ་གློ་བུར་དུ་སེམས་འཚབ་ཅིག་ངམ་ངམ་ཤུགས་ཤུགས་ཀྱིས་བསླེབས་སོང༌།
དུས་ཚོད་དང་འཆར་གཞིའི་སྐོར་ལ་བོད་མི་ཚོས་མ་འདང་བ་ཡོད་པ་ནི་ཞུ་མ་དགོས་པ་ཞིག་རེད། ལོ་འདི་ལ་འཛིན་གྲྭ་བཅུ་གཉིས་ལ་འགྲོ་བཞིན་པའི་སློབ་མ་ཞིག་ལ་མཚོན་ན། ལོ་བཞིའི་ནང་ཚུན་ཧ་ལམ་ལས་ཀ་ལ་ཞུགས་གི་རེད། ད་ལྟ་བཙན་བྱོལ་ནང་དུ་ལོ་འདི་ལ་འཛིན་གྲྭ་བཅུ་གཉིས་པའི་ནང་ཡོད་པའི་སློབ་མའི་གྲངས་འབོར་དང་། ལོ་བཞིའི་རྗེས་ཀྱི་ཁོང་ཚོའི་ལས་ཀའི་འཆར་གཞི་ལ་བརྟགས་དགོས་པ་འདུག
དེ་བཞིན་བོད་རྒྱ་ཞི་མོལ་འདི་མགོ་ཚུགས་པའི་ལོ་ ༡༩༧༩ ལོ་ཡིན་པ་ཆ་བཞག་ན། ལོ་དེ་ལ་སྐྱེས་པའི་བྱིས་པ་དམར་འབྱར་དེ་ད་ལྟ་ཕ་མ་ཆགས་ཡོད། ང་ཚོའི་སེམས་ནང་ ཉིས་སྟོང་ལོའི་རྟེན་འབྲེལ་སྐབས་༧རྒྱལ་བ་རིན་པོ་ཆེས་ CNN སྟེང་དུ་གསུང་འཕྲིན་གནང་བ་དེ་དྲན་ཤག་རེད། ལོ་འདི་ལ་སྐྱེས་པའི་བྱིས་པ་དེ་ད་ནི་སློབ་གྲྭ་ལ་འགྲོ་བཞིན་ཡོད།
ལོ་འདི་ ༢༠༠༨ རེད། ང་ཚོས་མ་འོངས་པའི་ལོ་བཞིའི་རིང་ཅི་བྱེད་ཀྱི་འཆར་གཞི་ཞིག་ཡོད་དམ། དུས་ཚོད་འདིའི་ནང་ད་དུང་ང་ཚོ་བོད་རྒྱ་ཞི་མོལ་ལ་འཐམས་ནས་འདུག་རྒྱུ་རེད་དམ།
ཁྱེད་ཀྱིས་གསུངས་པ་བཞིན། ང་ཚོས་དུས་ཚོད་ཀྱི་འཁོར་ལོ་ལ་འགྲོགས་པའི་འགྱུར་བ་འདི་ངོས་འཛིན་བྱེད་མ་ཐུབ་ན། རྐུབ་ལ་མེ་ཤོར་ཡང་མ་ཚོར་བ་ཞིག་ཡོང་གི་རེད།
I couldn’t understand what is the meaning of the artcle well. Could you explain me what is your planning for our future?