ཕ་ཡུལ།
གྲང་རླུང་སིར་སིར།
འགྲོ་ལམ་ཀྱག་ཀྱོག
ད་དུང་སྣུམ་ཤིག་ཤིག་གི་རྡོ་ཧྲུག་དང་གཙང་ཆུའི་རླབས་རྒྱུན་དག་ནི།
ཕ་ཡུལ་གྱི་སེམས་པ་དག་གི་ངོགས་སུ།
ནམ་ཡང་འབུར་རྐོས་རི་མོ་བཞིན་གསལ་ལྷམ་མེར་བཀྲ་ནས་ཡོད།
ཕ་ཡུལ་གྱི་རླུང་བུ་རྔུབ་ལེན་བགྱི་བར་དོགས་ཟོན་བགྱི་དགོས་མེད།
ཕ་ཡུལ་གྱི་དྭངས་ཆུར་ཧུབ་གསུམ་རྒྱག་པར་འཁྲུལ་ཚགས་ཀྱི་དགོས་ཁོ་དེ་བས་མེད།
ཕ་ཡུལ་གྱི་གནམ་སྔོན་པོ་དང་སྤྲིན་དཀར་པོ།
ཕ་ཡུལ་གྱི་རི་ཆུ་འཕྲང་གསུམ།
ད་དུང་གངས་དཀར་ལྷུན་པོའི་འགྱིང་ཉམས་དག་ནི།
སྔར་བཞིན་བརྟན་ལྷིང་ངེར་རང་བྱུང་གི་མཛེས་པ་ངོམ་གྱིན་འདུག
སྔར་བཞིན་དྭངས་གཙང་དང་གདོད་མའི་རང་མདངས་མངོན་གྱིན་འདུག
སྤྲིན་དཀར་པོ་བསེར་བུས་གཞོག་འགྲོ་བ་དེ།
དུས་ཀྱི་འགྱུར་བ་མཚོན་གྱིན་ཡོད་དམ།
གཙང་པོའི་ཆུ་མོ་ཐུར་ནས་ཐུར་ལ་བཞུར་འགྲོ་བ་དེས་ཀྱང་།
འཕོ་འགྱུར་ཟེར་བ་དེར་འགྲེལ་རྒྱག་གིན་ཡོད་དམ།
གང་ལྟར་ཕ་ཡུལ་གྱི་སེམས་པ་དག་གི་ནང་རོལ་དུ།
ངའི་བྱིས་དུས་ཀྱི་དྲོ་སྣང་དེ་མི་འདུག
ངའི་བྱིས་དུས་ཀྱི་མ་བཅོས་པའི་འཛུམ་མདངས་དག་ཡལ་ཟིན་འདུག
སྤྲིན་པ་ཡར་བཞུད་དང་མར་བཞུད་ཀྱི་བར་ནས།
གཙང་ཆུའི་ཐུར་མཆོང་གི་རླབས་རྒྱུན་གསེང་ནས།
ཕ་ཡུལ་གྱི་སེམས་པ་དག་བསླུ་བྲིད་གཞན་ཞིག་གི་འོག་ཚུད་ཟིན་འདུག
གང་ལྟར་ཕ་ཡུལ་གྱི་སེམས་པ་དག་གིས།
རང་བྱུང་གི་མཛེས་པ་དང་མ་བཅོས་པའི་འཚོ་བ་དག
སྔ་ས་ནས་བརྗེད་ཟིན་འདུག
ཕ་ཡུལ་གྱི་ནམ་མཁའ།
ཁ་སང་སྔོ་སང་ངེ་ཡིན་པའི་ཕ་ཡུལ་གྱི་ནམ་མཁའ་དེ།
དེ་རིང་ཅུང་མོག་པོ་ཡིན་པའི་སྤྲིན་པས་ཕྱེད་འགེབས་བྱས་འདུག
དེ་རིང་གི་ནམ་མཁས་རྣམ་འགྱུར་ཅི་འདྲ་ཞིག་བསྟན་རུང་།
ཁོ་བོས་ཕ་ཡུལ་གྱི་ནམ་མཁའི་ཉིན་གྱི་ཉི་འོད་དང་སྤྲིན་ཚོམ།
དྭངས་རླུང་བསིལ་མ། གངས་རིའི་དབུ་རྩེ་མཐིང་མདོག་ལ་འདྲེས་པའི་མཛེས་པ་དག
ནམ་ཡང་བརྗེད་ཐབས་མི་འདུག
གངས་རིའི་ཧྲག་བར་ནས་མཚན་མོའི་ཟླ་བ་ཆར་ཚུལ་དང་།
གཅེན་པོ་དང་ལྷན་དུ་སྐར་ཆེན་དང་སྨིན་དྲུག་མཛུབ་མོས་གྲངས་ཚུལ་དག་ནི།
དེ་བས་བརྗེད་ཐབས་མི་འདུག
ཉི་འོད་དྲོན་པོའི་འོག་ལྷོད་འཇགས་སེ་ཡིན་པའི་བདག་གི་ཕ་ཡུལ།
རླུང་འཚུབ་ཀྱི་ཤུར་སྒྲའི་ཁྲོད་འདར་སིག་སིག་ཡིན་པའི་བདག་གི་ཕ་ཡུལ།
བདག་གི་ཕ་ཡུལ་དང་ཕ་ཡུལ་གྱི་ནམ་མཁས།
བདག་ལ་སྐྱོ་བ་དང་སྤྲོ་བ་འདྲེས་པའི་སྨྲེང་སེམས་ཤིག་དཀྱིལ་ནས་འོང་།
ཕ་ཡུལ་དང་ཕ་ཡུལ་གྱི་ནམ་མཁས་་་་་་་་
………………………….
༡༩་༢་༢༠༡༣
ཡག་་ཐོག་ཡག་བཞག་རེད་འདུག
ཨ་རོག་ནག་པོ་བྱོན་པ་ལེགས་སོ།།
ཤིན་ཏུ་ལེགས།