མུ་ཏིག
རི་བོ་འདིའི་ཚུར་རོལ། རི་བོའི་ཕ་རོལ་གྱི་སེམས་པ་འཁོར་ས་ཡིན། རྣམ་ཤེས་ཁྲི་སྟོང་གི་མཐའ་མའི་ངལ་གསོ་ས་ཡིན། ཁོང་ཚོའི་དག་ཞིང་ལྟ་བུའི་གནས་མཆོག་འདི་ནས། མི་མང་པོ་ཞིག་དྲན་གདུང་གིས་རྒས་སོང་བ་སུ་ལ་མི་གསལ། མི་མང་པོ་ཞིག་རེ་སྒུག་གིས་འདས་ཟིན་པ་གནའ་གཏམ་སྒྲིག་མ་དེ་འདྲ་ག་ལ་ཡིན། སྤྲིན་དཀར་གན་འདི་ལྟར་བཞུད་འགྲོ་ན། ལུག་ཁྱུ་ཞིག་དེ་ལྟར་ཡོང་གི་ཡོད་པ་དྲན། རི་བོའི་མགོ་འཕངས་དེ་ཅུང་ཙམ་དམའ་མོ་བྱེད་ན། ཕ་ཡུལ་མཐོང་ན་མི་འདོད་པའི་མི་སུ་ཡོད།
གཞན་ཡུལ་ན་རྒས་ཀྱིན་པ་ང་ཚོ་རེད། ང་ཚོ་རི་བོའི་ཕ་རོལ་ལ་ལྟ་ལོབས་སུ་སོང་བའི་མི་དག་ཡིན། སྐབས་འདིར་གླུ་བ་ཡ་ཏུང་དྲན་དགོས་བྱུང་། ༼ང་ཇི་སྲིད་བར་དུ་ཡོང་ན། ཕྱིར་ལ་ཐོན་ཡོད།༽ ཅེས་པའི་དྲན་གདུང་གི་གླུ་དབྱངས་དེ་སེམས་ཀྱིས་མྱོང་དགོས་བྱུང་། ང་ཚོའི་སེམས་ན་དག་ཞིང་རེ་ཡོད། སྤྲིན་དཀར་འོག་གི་གྲོང་ཚོ་དེ། ངའི་དག་ཞིང་ཡིན། སེམས་ཀྱི་དག་ཞིང་ཡིན། ལུས་ཀྱི་དག་ཞིང་ཡིན། རྣམ་ཤེས་ཀྱི་དག་ཞིང་ཡིན།
སྤྲིན་དཀར་བཞིན་ཕར་ཕར་བསྐྱོད་ཀྱིན་དེ་སེམས་པ་རེད། སྤྲིན་དཀར་བཞིན་ཚུར་ཚུར་ལངས་བཞིན་པ་དེ་ཡང་སེམས་པ་རེད། རི་རྒྱུད་འདིའི་ཕར་ཚུར་གྱི་སེམས་པ་མང་པོ། དུས་ཚོད་ཀྱིས་རྨས་སོང་བ་འདྲ། ལོ་ཟླས་བསྐྱུར་སོང་། དྲན་གདུང་གིས་རྒུད་སོང་། མཚམས་རེར། ས་མཐའ་དང་ཕ་ཡུལ། ཤར་ནུབ་ཀྱི་སྤྲིན་པ་ལྟར་འདྲེས་རྒྱུ་བྱུང་ན་བསམ། ངོ་བོ་དབྱེར་མེད་དུ་་་་་་་་་།
སྙན་ངག་མ་མུ་ཏིག་ལགས་ཀྱིས་དེང་སང་ཕ་ཡུལ་མང་དུ་དྲན་གྱིན་ཡོད་ཚོད་རེད། སྙན་རྩོམ་འདིས་ང་ལ་ཡང་ཕ་ཡུལ་དྲན་པའི་སྐུལ་མ་བཏང་བྱུང་། འདི་ལྟར་ཕ་ཡུལ་དྲན་གྱིན་ང་ཚོ་ས་མཐའ་ནས་མཉམ་དུ་རྒས་པར་འགྱུར།