རེབ་ཐོག་མདའ།
ང་ལ་ཨ་མས་བསླབ་པའི་གདངས་ཅིག་ཡོད།།
ང་ལ་ཨ་ཕས་གནང་བའི་ངག་ཅིག་ཡོད།།
དེ་ལ་དབྱངས་གསལ་གཉིས་ཀྱི་སྲོག་ཞུགས་ཡོད།།
དེ་ལ་སུམ་རྟགས་གཉིས་ཀྱིས་གྲོགས་མཛད་ཡོད།།
ང་ལ་བཙན་པོ་ཞིག་གི་དཔའ་དེ་མངའ།།
ང་ལ་མཁས་པ་ཞིག་གི་བློ་དེ་ལྡན།།
དེ་ལ་སྙིང་རྗེ་ཅན་གྱི་སེམས་ཞིག་ཡོད།།
དེ་ལ་དཔྱོད་ཤེས་ལྡན་པའི་མིག་ཅིག་ཡོད།།
ང་ལ་ནང་བསྟན་ཟེར་བའི་གཞུང་ཞིག་ཡོད།།
ང་ལ་ལོ་རྒྱུས་རིང་བའི་གཏམ་ཅིག་ཡོད།།
དེ་ལ་བདེ་སྡུག་གླེང་བའི་མཐུ་ཞིག་ཡོད།།
དེ་ལ་རང་བཙན་ཡིན་པའི་བདེན་པ་ཡོད།།
ང་ལ་རིག་གཞུང་ཟབ་མོའི་བསམ་བློ་ལྡན།།
ང་ལ་སྲོལ་རྒྱུན་མཐུག་པོའི་མགོ་བོ་ལྡན།།
དེ་ལ་གནའ་དེང་ཟུང་དུ་སྦྲེལ་ནས་ཡོད།།
དེ་ལ་ལྟ་བ་ཅུང་ཙམ་མཁྲེགས་སེ་ཡོད།།
ང་ལ་ཆོལ་གསུམ་འབོད་པའི་སྤུན་ཞིག་ཡོད།།
ང་ལ་གྲུབ་མཐའ་མང་བའི་ཆོས་ཞིག་ཡོད།།
དེ་ལ་ཕྱོགས་ཞེན་མེད་ཀྱང་གཟུར་ནས་ཡོད།།
དེ་ལ་རྩོད་རྒྱུ་མེད་ཀྱང་འགལ་ནས་ཡོད།།
ང་ལ་རྒྱུ་འབྲས་འཆད་པའི་ཁ་ལྕེ་བདེ།།
ང་ལ་དཀོན་མཆོག་བཀུར་བའི་དད་འདུན་མངའ།།
དེ་ལ་རྒྱུ་དང་འབྱོར་བས་བསླུ་ཞིག་ཡོད།།
དེ་ལ་རྨོངས་དད་ཁོ་ནས་གཡེང་བཞིན་ཡོད།།
ང་ལ་གངས་རིས་བསྐོར་བའི་ཡུལ་ཞིག་ཡོད།།
ང་ལ་སྦྲ་ནག་སྨུག་པོའི་ཁྱིམ་ཞིག་ཡོད།།
དེ་ལ་མཚོན་ཆ་ཐོགས་པའི་རྟ་དམག་ཡོད།།
དེ་ལ་ཙག་གིས་བསྡམས་པའི་རི་ཤུལ་ཡོད།།
ང་ལ་རྩམ་པ་བརྫི་བའི་རྩལ་ཞིག་ཡོད།།
ང་ལ་སྨུག་པོ་གདུང་གི་ཁོག་དེ་ཡོད།།
དེ་ལ་དུངས་པའི་སེམས་དེ་བོར་ནས་ཡོད།།
དེ་ཡི་གཤིས་ཀ་ཅུང་ཙམ་འགྱུར་ནས་ཡོད།།
ང་ལ་བསྲེས་སྐད་འདྲེས་མའི་ངག་ཅིག་ཡོད།།
ང་ལ་གཤིས་ཀ་བཅོས་མའི་སེམས་ཅིག་ཡོད།།
དེ་ལ་རྒན་གཞོན་ཚང་མ་སྣང་མེད་ཡིན།།
དེ་ལ་ད་དུང་ནུབ་ལུགས་བསྲེས་བཞིན་ཡོད།།
ང་ལ་བོད་སྐད་དག་མའི་ཁོལ་ཡུག་ཅིག།
ང་ལ་བོད་གཤིས་ལྡན་པའི་ཕུ་ནུ་ཞིག།
ང་ཡི་འཇིག་རྟེན་འདི་ལ་མེད་ཅི།།
ང་ཡིས་ད་དུང་བཙལ་ཏེ་མ་རྙེད་ཐལ།།
2014 /6 /20 ཉིན་མི་ཁ་ཤས་ཀྱི་གླེང་མོལ་ཐོས་རྗེས།
༼ང་ལ་བོད་སྐད་དག་མའི་(ཁོལ་ཡུག)་ཅིག།
ང་ལ་བོད་གཤིས་ལྡན་པའི་ཕུ་ནུ་ཞིག།
(ང་ཡི་འཇིག་རྟེན་འདི་ལ་མེད་ཅི།།)
ང་ཡིས་ད་དུང་བཙལ་(ཏེ་)མ་རྙེད་ཐལ།།༽
གོ་རྒྱུ་ཚོར་རྒྱུ་མེད་ནིའི་མཐའ་རྐང་བཞི།
རྔ་མ་མགོ་ལ་བརྩངས་ནས་བརྒྱུགས་བཞག་ཟིག།
ཕ་མ་བཟང་བོའི་ངག་ནི་རེད་མི་འདུག།
ཐོན་མིའི་བཀའ་དྲིན་བསམ་ནས་མ་བྲིས་ཟིག།
ཅི་ཟེར་འགྲེལ་ཞིག་ཡོད་ན་ཅི་མ་རུང་།། ཧ་ཧ་ཧ།