ཆ་འགག་མེ་བསྟན།
—ཕྱི་ལོ་ ༢༠༡༣ ཟླ་ ༦ ཚེས་ ༨ ཉིན་གླིང་ཚ་ཚེ་བརྟན་རྡོ་རྗེ་བོར་བརླགས་སུ་སོང་བར་ཕྱིར་མིག་ལྟ་བ།
ཁོང་ནི་བོད་བཙན་པོའི་གདུང་རྒྱུད་ཅིག་ཡིན་ལ། ཁོང་ནི་སྐད་ཡིག་དང་རིག་གནས། བྱུང་རབས་དང་ཡུལ་སྲོལ་སོགས་ཁྱོན་ཡོངས་ནས་རྒྱ་ནག་དང་ཐ་དད་པའི་རི་བོ་ཧི་མ་ལ་ཡི་སྙིང་ཁམས་སུ་ཆགས་པའི་བོད་རྒྱལ་ཁབ་ཀྱི་ཕ་མེས་ཡང་མེས་ཚོའི་གཅེས་ཕྲུག་ཅིག་ཡིན།
ཚང་མས་ཤེས་གསལ་ལྟར། དེ་ནི་བོད་དོན་ཞི་བའི་འཐབ་རྩོད་པ་གླིང་ཚ་ཚེ་བརྟན་རྡོ་རྗེ་ལགས་ཡིན་ཞིང་། གཡུལ་སའི་དཔའ་པོ་ལྟར་ཁོང་གི་སེམས་ཤུགས་ནི་ངར་ཤུགས་ཆེན་པོས་གྱེན་དུ་འཕྱོ་བཞིན་པའི་མེ་ལྕེ་དང་འདྲ་ལ། ཁོང་གི་ལངས་ཕྱོགས་ནི་འགྱུར་མེད་རྟག་བརྟན་ངང་༧གོང་ས་ཏཱ་ལའི་བླ་མའི་དབུ་འོག་དབུང་འདེགས་ལ་མཐའ་གཅིག་ཏུ་ཕྱོགས་པ་དེའོ།།
ལོ་ངོ་བདུན་གྱི་ཡར་སྔོན་ཁོང་གར་སོང་ཆ་མེད་དུ་མ་འགྱུར་བར། ཁོང་གི་ཡོད་ཚད་ཡིག་འབྲུ་རྐང་གཉིས་ནང་བསྡུ་ཐུབ་པ་ནི། “འཐབ་རྩོད”
ཅེས་པ་དེ་ཡིན། གླིང་ཚའི་འཐབ་རྩོད་དེ་བོད་རིགས་ནང་ཁུལ་གྱི་འཐབ་རྩོད་མིན་ལ། ཁ་དང་སྣའི་འཐབ་རྩོད་ཀྱང་དེ་བས་མིན། གླིང་ཚའི་འཐབ་རྩོད་དེ་དགྲ་བོ་རྒྱ་དམར་གཞུང་ལ་འཐབ་ཅིང་རྒོལ་ནས་རང་མི་རིགས་ཀྱི་བདེན་པ་རྩོད་རྒྱུ་དེ་ཁོ་ནའོ།།
ཁྱོད་ཤི་ང་གསོན་གྱི་ཁྲག་གི་མཚོ་མོ་ཞིག་མི་འཁྱིལ་བའི་ཆེད། འཚེ་མེད་ཞི་བའི་དམ་བཅའ་ཞིག་ས་གཞིར་བཏིང་ཞིང་། རང་རྒྱལ་གཞན་ཕམ་གྱི་ཞེ་འཁོན་ཟུར་དུ་བཞག་ནས་སེམས་དང་སེམས་པ་མཐུན་པའི་དབུ་མའི་ལམ་གྱི་དར་ཆེན་དགུང་དུ་འཕྱར། ཀི་འདེབས་བཞིན་རླུང་རྟ་གཏོར་བཞིན། རྒྱལ་ས་ལྷ་ས་ཁྲག་གིས་བརྫིས་པའི་ལོ་རྒྱུས་ཀྱི་ཉིན་མོ་དེར། བོད་མི་རིགས་ཀྱི་དཔའ་རྟུལ་དང་འཐབ་མོ་བའི་རྒྱལ་ས་སྟེ། རྡ་རམ་ས་ལ་ནས་ལམ་དུ་ཆས།
དེ་ནི་ནུབ་ཕྱོགས་སུ་དངུལ་འཚོལ་བར་ལམ་ལ་ཆས་པ་མིན་ལ། ཤར་ཕྱོགས་སུ་ཡུལ་སྐོར་དུ་ཆས་པ་ཡང་མིན་པར། བོད་མི་རིགས་ཀྱི་ལས་དབང་རྙིད་པོ་དེར་ཟུངས་ཤུགས་གསར་པ་ཞིག་སྐྲུན་ཆེད། གངས་སེང་གི་དར་ཆ་བརྗིད་ཆེན་དེ་གངས་ལྗོངས་ནས་གནམ་ལ་འདེགས་ཆེད། ཕོ་བྲང་པོ་ཏ་ལའི་གསེར་ཁྲི་སྟོང་བར། དོན་དམ་གྱིས་བཞུགས་འོས་པའི་དམ་པ་གང་དེ་གདན་འདྲེན་ཆེད། ཡོད་ཚད་ནས་ཡོད་ཚད་བློས་བཏང་ཞིང་། ཡོད་ཚད་ཀྱི་ཡོད་ཚད་ཞེར་བཅང་ནས་འཕགས་ཡུལ་ནས་ལམ་དུ་ཆས་ཤིང་། ཙི་ནར་གདོང་གཏད་ནས་གངས་སེང་གི་ངར་སྐད་ལྟ་བུའི་བདེན་པ་བསྒྲགས་ཤིང་། ཉི་མའི་འོད་སྣང་ལྟར་དགྲ་ཕྱོགས་ཀྱི་མུན་པ་སེལ་ཕྱིར་ཉིན་དང་ཞག བདུན་ཕྲག་དང་ཟླ་བ་བསྐྱལ།
འདི་ལྟར་དཔའ་རྒོད་ཅིག་གིས་ངར་སྐད་དང་། འོད་སྣང་གི་དབུ་ཁྱུད་བྲིས་ནས་ཟླ་གཉིས་ལྷག་སོང་མཚམས། དཔའ་ངར་གྱིས་ཕྱུག་པའི་གླིང་ཚ་གར་སོང་ཆ་མེད་དུ་གྱུར། ཉིན་དེ་ནས་བཟུང་། དཔའ་རྟུལ་ཁོང་། འབྲུག་སྟོང་གི་སྐད་སྒྲ་དུས་གཅིག་ཏུ་འཇགས་པ་དང་། འོད་སྣང་ཁྲི་མ་འབུམ་སྐད་ཅིག་ཉིད་དུ་ཡལ་བ་ལྟ་བུར་གྱུར་ཏེ། ཤུལ་ཏུ་ལྷག་པ་ནི། འཁུན་སྒྲ་དང་ངུ་འབོད། སྨེ་ངག་བཅས་ཡིན་ཞིང་། ངག་ནས་བཟློ་བ་ཡང་། དཔའ་རྟུལ་ཁོང་གང་དུ་བཞུད་དང་། སླར་གང་ནས་རྙེད་ཅེས་པ་དེ་ཙམ་དུ་ཟད།
མུན་ནག་གི་ཉིན་མོ་དེ་ནས་བཟུང་དཔའ་རྒོད་ཁོང་འཚོལ་བའི་སྐུལ་མ་ཁྲི་མ་འབུམ་ཤར་ནུབ་ཀྱི་ཡུལ་གྲུ་སོ་སོར་བསྐྱལ་ཞིང་། ལྷ་སྲུང་མའི་གྲོགས་དང་འཕྲིན་ལས་ལ་རེ་བའི་བསང་གསེར་སྐྱེམས་ཀྱི་གཙང་བོའི་བཞུར་རྒྱུན་ཡང་ཡུན་ནས་ཡུན་དུ་བསྲིངས།
འོན་ཀྱང་། ཁ་ངན་ཞིག་གིས་བཤད་པ་ལྟ་བུའི་སྙིགས་དུས་འདིར། དོན་དམ་གྱི་དཔའ་རྒོད་འདི་ལྟ་བུར་ཆོས་སྐྱོང་ཚོས་ཁ་འཛིན་སྡོངས་གྲོགས་མི་བྱེད་ལ། གདོང་དམར་བོད་པ་ཚང་གི་ཁ་རྗེ་དབང་ཐང་ཆེད་ཡིན་རབས་ཤོད་བཞིན་པའི་ཚོགས་སྡེ་སུས་ཀྱང་། བོད་ཀྱི་ལོ་རྒྱུས་ཀྱི་ཉིན་མོ་དེར། དཔའ་རྒོད་སུ་ཞིག ཅི་ཞིག་གི་ཆེད་དུ། ཇི་ལྟར་བྱས་ནས། གང་དུ་ཡལ་སོང་བར་སུས་ཀྱང་མི་འདྲི། སུས་ཀྱང་མི་གླེང་། གཅིག་བྱས་ན་ཁོང་ཚོས་གླེང་གཞིའི་བརྗེད་ཐོ་ནས་བསུབ་ཡོད་ཀྱང་སྲིད།
འོན་ཀྱང་ང་ནི་ལས་དབང་ཞིག་གིས་དཔའ་རྒོད་ཁོང་ལ་མཇལ་མྱོང་ལ། ཁོང་གི་བྱེད་སྒོ་འགར་དངོས་སུ་བཞུགས་མྱོང་། ཇི་ལྟར་ཡང་། ངས་སླར་ཡང་། ང་བོད་མི་རིགས་ཡིན་འདོད་མཁན་གྱི་སྐྱེ་བོ་རེ་རེར། ང་དང་ང་ཚོའི་ཚོགས་པས། བོད་བསྟན་པ་ཆབ་སྲིད་ཆེད། ནུབ་འཕྱི་ཉལ་དང་། ནངས་སྔ་ལངས་བྱེད་བཞིན་ཡོད་སྙམ་ཆེ་བ་ཚོར། འུ་ཚོ་ཚང་མའི་ཆེད་དུ་དཔའ་སྐད་བསྒྲགས་མྱོང་མཁན་དེ། འུ་ཚོ་ཚང་མའི་ཆེད་དུ་བཞུད་སོང་བ་དེ། ད་ཆ་ལོ་ངོ་བདུན་གྱི་རྗེས། ཁྱེད་ཀྱིས་ཁོའི་ཡོད་ཚད་བརྗེད་ངེས་སུ་བཏང་ཡོད་དམ། ཡང་ན་རྒྱུ་མཚན་ཐན་ཐུན་ཞིག་ལ་ཁེན་ཏེ་ནམ་ཡང་མི་གླེང་རྒྱུའི་དམ་བཅའ་བྱས་ཡོད།
ངས་ནི་དུས་ནམ་དུ་ཡང་། བོད་མི་ས་ཡ་དྲུག་པོས་དཔའ་རྟུལ་ཁོང་བརྗེད་མེད་པར་ཤོག་ཅེས་སྨོན་ལམ་འདེབས་བཞིན་ཡོད། ང་ཚོ་རང་དབང་ལུང་བ་ཞིག་ཏུ་ལྷོད་ཉལ་བྱས་ཏེ་ཐག་རིང་ཐག་རིང་ཞིག་དང་། ཕ་རོལ་ཕ་རོལ་ཞིག་ཏུ་ཅིག་མ་འགྲིག་པ་གླེང་རྒྱུ་ལས།
ང་ཚོའི་མིག་མདུན་ནས་ཅི་ཞིག་བྱུང་སོང་བ་དེ་ཅི་བས་ཀྱང་གླེང་དགོས་ངེས་དང་། ཤེས་དགོས་ངེས་སུ་མཐོང་བ་དེ་ཅིས་ཀྱང་མ་བརྗེད་ཟེར་འདོད་པ་ཙམ་མོ།།
ཕྱི་ལོ་ ༢༠༢༠ ཟླ་ ༤ ཚེས་ ༢༠ ཉིན། Paris, FRANCE
གླེང་རིན་ཅན་པོ་གླེང་འདུག ལེགས་སོ། དེང་སང་ ཁོང་ལ་རྗེས་དྲན་དང་ཁོང་གི་ཤུལ་ལུས་ནང་མི་ཚོར་ལྟ་རྟོག་ཅུང་རེ་བྱེད་པའི་སྐད་འཕྲིན་ཚོགས་པ་ཞིག་འདུག དེ་དག་ལ་རྗེས་སུ་ཡི་རང་ཞུ།
གླིང་ཚ་ཤི་གསོན་གང་ཡིན་མི་ཤེས་པ་དེ་ཡ་མཚན་རེད།