ཕམ་ཁ་མདུན་དུ་ལེན་པའི་ལུགས་སྲོལ་མེད།།

ཀོ་ལི་གྷལ་གཞུང་པ་ཚེ་དབང་བསོད་ནམས།

 
ཀ་བཤད་ཁ་བཤད་སྨྲ་བརྗོད་རང་དབང་ལ།།
འཁོན་སེམས་དུག་གི་ཚེར་མ་ཡ་རེ་ང་།།
གང་བསམ་ཡིག་ཐོག་འགོད་པའི་བློ་སྤོབས་ལ།།
ང་རྒྱལ་ཕྲག་དོག་རང་སེམས་རང་གིས་བསླུས།།

ཅི་བྱ་གཏོལ་མེད་སྤྱི་ཚོགས་དཀྲུགས་པའི་ལས།།
ཆེ་མཐོང་ཡིད་ཆེས་རང་མིང་བསྐུང་བའི་འོག །
ཇུས་མེད་འགན་འཁུར་དྲ་ནང་འཛུལ་བ་འཁྲུལ།།
ཉོན་མོངས་སྡུག་བསྔལ་གཞན་ལ་སྨོད་པ་འདིས།།

ལྟས་ངན་མིང་རྫུན་ལྷག་བསམ་དམར་པོ་འདི།།
ཐོས་པ་ཙམ་གྱིས་སྤྱི་ཚོགས་དཀྲུགས་ལ་མཁས།།
དོན་མེད་ཁུངས་མེད་ནག་ཁུང་མཛུབ་སྟོན་རིགས།།
ནམ་ཡང་གཞན་ཕན་མིན་པ་ཤེས་པར་གྱིས།།

དཔོན་ལ་མཐོ་འབྱར་བྱེད་པའི་གཤིས་ངན་མེད།།
ཕམ་ཁ་མདུན་དུ་ལེན་པའི་ལུགས་སྲོལ་མེད།།
བོང་བ་གསེར་ལ་ནོར་མཁན་དྲ་འབུ་མིན།།
དམན་ལ་རྟག་ཏུ་འཚེ་བའི་གོམས་གཤིས་མེད།།

རྩ་བའི་གཏམ་བརྗོད་རྒྱལ་སྤྱིའི་ཁྲིམས་ཀྱིས་བསྟན།།
ཚད་བཀག་བྱེད་པ་གུང་ཁྲན་དམར་པོའི་ལུགས།།
རྫབ་དོང་ནང་གི་མེ་ཏོག་ཧ་ལུའི་རིགས།།
ཝ་སྤྱང་དམར་པོ་མགོན་མེད་དུད་འགྲོའི་དགྲ།།

ཞ་ར་འོན་པ་འཇིག་རྟེན་ལས་ཀྱིས་སྦྱིན།།
བཟང་སྤྱོད་དོར་ནས་གཞན་ལ་འགྲན་མཁན་ཚོ།།
འུར་གཏམ་མ་ཤོད་རང་མིང་བཀོད་ན་བཟང་།།
ཡ་རབས་བྱ་བས་སྤྱི་ཚོགས་བསྲུང་ན་དགའ།།

རང་མིང་ལྐོག་ཏུ་སྦས་ནས་མིང་རྫུན་འོག །
ལབ་སྟོང་ལུང་སྟོང་གཞན་སེམས་དཀྲུགས་པ་ན།།
ཤེས་རབ་རལ་གྲི་སོ་གཉིས་རང་མགོ་རྨས།།
སེམས་བཟང་གཏམ་དང་ལྷག་བསམ་འགན་ཁུར་ལ།།

ཧེ་བག་མེད་པའི་ཀ་བཤད་རྫོགས་མཐའ་མེད།།
ཨ་རོ་དྲ་འབུ་མཆན་འདེབས་རང་མིང་འཁོད།།

ལྷག་བསམ་འགན་ཁུར་ཡིན་ན་རང་མིང་བཀོད།།
ལྷག་བསམ་ཁུངས་ཐུབ་ཡིན་ན་མདུན་དུ་འཐོན།།
ལྷག་བསམ་ནུས་མེད་དྲ་ནང་འཛུལ་མཁན་ཚོ།།
ལྷག་བསམ་ཅན་གྱི་མདུན་ལམ་མ་འགོག་ཅིག །