ཕུ་ཡི་གངས་རི་ཁྱོད།

མེ་ཏོག་དཀར་པོ།
དགུན་གསུམ་འཁྱག་གིས་བསྡམ་ནས་ངལ་མ་སོང་ངམ། ཁྱོད་ད་དུང་ཁ་བའི་རས་དཀར་གྱོན་ནས་སྡུག་སྒོམ་རྒྱག་གི་ཡིན་ནམ།
ལྟོས་དང་།
མ་གི་མདའ་ཡི་མཚོ་དང་མཚེའུས་བག་ཁུམ་དང་སྒྱིད་ལུགས་དོར། གསར་གཏོད་དང་གསར་འདྲེན་གྱི་རང་བཞིན་གྱི་མར་ཁུ་འཐུང་ཏེ་འཁྱག་རོམ་བཏོར་ནས་ཉ་དང་ངང་པའི་བདེ་སྐྱིད་ལ་གསོན་དབུགས་སྟེར་གི་མིན་འདུག་གམ།
ད་དུང་ཉོན་དང་།
ཤག་ཤག་ཟེར་བའི་ཆུ་སྒྲ་དེ་ཡང་གཙང་པོ་དེ་མདུན་ནས་མདུན་དུ་བསྐྱོད་པའི་ངར་སྒྲ་ཡིན་ནོ།།
ད་ནི་དཔའ་ངར་བསྐྱེད་ལ་སྨུག་སྤྲིན་གྱི་ལྭ་བ་དེ་རལ་ཐོངས། སྐྱི་སེར་གྱི་རླུང་བུ་དེ་རྡོག་པས་བརྫིས་ལ་ཤོག དཀར་པོ་དཀར་པོ་ཡི་ཁ་བ་རླུང་ལ་བསྐུར་ཞོག ངམ་ནག་པའི་གདོང་པ་དེ་དཀྲུས་ནས་ཤོག
སྤྲོ་བ་མཆོག་ཏུ་སྤར་ཏེ། འབའ་དང་འབུའི་སིར་སྒྲ་ཉོན་དུ་ཤོག བྱ་དང་བྱིའུའི་མགྲིན་གླུ་ཉོན་དུ་ཤོག སྤྲ་དང་སྤྲེའུའི་སྒྱུ་རྩལ་ལྟ་རུ་ཤོག
ཉི་ཤུ་རྩ་གཅིག་པའི་དུས་རབས་ཀྱི་མེ་ཏོག་འབུས་དང་འབུས་བཞིན་འདུག ཚེ་སྲོག་གསར་པའི་ལྡུམ་བུའི་རྩེ་མོར་ཅི་ཞིག་བྱ་འདོད་ཀྱི་ཟིལ་པ་ཁྲོམ་ཁྲོམ་དུ་འདུག
༠༤་༠༤་༡༣ ཉིན་བྲིས།