འབའ་སྲས།
གསེར་གྱི་འོད་ཟེར་འཕྲོ་བའི་གནས་མལ་གྱི་སྟེང་ན།།
རྨི་ལམ་མངོན་སུམ་བསྒྱུར་བའི་རྫུ་འཕྲུལ་གྱི་རྐང་བ།།
གཙུག་ཕུད་རལ་བའི་མེ་ཏོག་རྡུལ་ཆབ་ཀྱིས་བཀྲུས་ཏེ།།
བྱམས་པའི་ཁང་བཟང་བརྩིགས་པའི་བཙན་པོ་ཞིག་ཕེབས་སོང་།།
རྟ་མཆོག་བང་གིས་རྒྱུགས་པས་གནམ་ས་གཉིས་ཕྱེས་ཤིང་།།
འབྲོང་གི་རྭ་རྩེ་རྐང་བའི་རྨུ་ཐག་ལ་བསྒྲིལ་ཏེ།།
ཆུ་འཛིན་དཀར་པོ་དཀྲིགས་པའི་ཕོ་བྲང་གི་གནས་ནས།།
སྤྱན་ཆུ་ས་ལ་ཟགས་པའི་ལྷ་རྗེ་ཞིག་ཕེབས་སོང་།།
མཚོ་འོག་གཏེར་རྡོ་ཐབ་ཀྱི་བུད་ཤིང་ལ་བཏུས་ཤིང་།།
འཇའ་ཡི་དར་ཐག་མེ་རོ་དཀྲུག་བྱེད་དུ་བཀོལ་པའི།།
རིན་ཆེན་བྱུ་རུ་ཟས་ཀྱི་སྙིང་བོ་རུ་བཙོ་བའི།།
འཇིག་རྟེན་གསར་བ་སྐྱོང་བའི་བདག་མོ་ཞིག་ཕེབས་སོང་།།
ལྗོན་ཤིང་འདབ་མ་རྒྱལ་སྲས་རྣ་བདུན་གྱིས་སྤྲས་ཏེ།།
རྩྭ་རྐང་འཇག་མ་གནམ་འདེགས་ཀ་བ་རུ་བསླངས་ཤིང་།།
སྐར་མའི་གྲོང་ཁྱེར་འཛིན་མའི་གཞི་ཁྱིམ་དུ་བཞེངས་པའི།།
ཐབས་འཕྲུལ་ཕྱག་ཟུང་བདེ་བའི་བཟོ་བོ་ཞིག་ཕེབས་སོང་།།
༠༥/༠༢/༡༤ ཕྱི་དྲོར།
ལོ་རྒྱུས་ཁ་ལོ་བསྒྱུར་ན་བཙན་པོ་དངོས། བསམ་སྤྱོད་ནད་ཡམས་སེལ་ན་ལྷ་རྗེ་མཆོག
རིགས་ཀྱི་ལར་ཞེན་སྐྱོང་མཁས་ཁྱིམ་བདག་མ། གླིང་ཆེན་ཞི་བདེར་འགོད་པའི་བཟོ་བོ་སུ།
དེ་དག་དེ་ལ་སྙིང་འདིས་མཆོད་པ་འབུལ།
འགྲེལ་བཤད་ཅིག་མེད་ན་གོ་ས་མ་རེད། སུ་ཞིག་གཤེགས་སོང་བ་རེད་དམ། ཡང་ན། བསྡུས་བརྗོད་ཀྱི་ལམ་ནས་སུ་ཞིག་ལ་སྐྱེལ་མ་བྱེད་ཀྱིན་ཡོད་དམ། སྙན་ངག་ན་འདིའི་ངོ་རྫོགས།
སྐྱེལ་མ་མ་རེད། བསུས་མ་རེད། བླ་ཁོ་ཉི་མ་འདྲ་བོ།
ཡ་ཡ། སྙན་ངག་པ་འབའ་སྲས་སམ་གནམ་གྱི་ངོ་སོ་བསྟོད།
རྣམ་པ་ཚོ་བཀའ་དྲིན།
སུ་ཕེབས་པ་ཡིན་ནམ།་ང་ནི་ད་ལྟ་ད་དུང་ཡང་བསྡད་ཡོད།
་་་ འཇིག་རྟེན་གསར་བའི་རྒྱལ་སྲས་རྣ་བདུན་གྱིས་སྤྲས་ཏེ ་་་་་
འདི།
འཇིག་རྟེན་གསར་པའི་རྒྱལ་སྲས་སྣ་བདུན་གྱིས་སྤྲས་ཏེ
ཞེས་དགོས་འདུག་སྙམ་ལགས།
ཕེབས་པ་ནི། འགྲོ་རྒྱུ། འགྲོ་བཞིན་པ། ཕྱིན་པའམ་འགྲོ་ཚར་བ་གསུམ་གའི་ཞེ་སར་སྦྱར་ཆོག་གོ
དིང་གི་སྤྱི་སྐད་ཞེ་ས་ལ།
ཁོང་ མདང་ ཕེབས་ སོང་།
ཁོང་ དེ་རིང་ ཕེབས་བགྱིད་ འདུག
ཁོང་ སང་ཉིན་ ཕེབས་བགྱི་ རེད།
ཁོ་ མདང་ ཕྱིན་ སོང་།
ཁོ་ དེ་རིང་ འགྲོ་བགྱིད་ འདུག
ཁོ་ སང་ཉིན་ འགྲོ་བགྱི་ རེད།