ཕོ་བྲང་ནགས་མའི་ལྡིང་ཁང་།

གསལ་ལེ་རྒྱལ།

ཕོ་བྲང་ནགས་མའི་ལྡིང་ཁང་ནི་སེང་གེ་བློ་བཟང་གི་ཕོ་བྲང་ཡིན་པས་མི་ལ་ལས་སེང་གེ་ཕོ་བྲང་ཟེར་ཅིང་མི་ལ་ལས་ཕོ་བྲང་ནག་མོའི་ལྡང་ཁང་ཡང་ཟེར། གང་ལྟར་ཕོ་བྲང་འདི་རི་བོ་མཐོན་པོ་ཞིག་གི་སྐེད་ན་ཡོད་ནའང་ནགས་ཚལ་སྟུག་པོ་ཞིག་་གི་དཀྱིལ་ན་ཡོད་པས། སེང་གེ་བློ་བཟང་ཚང་གི་སེང་ཕྲུག་ཚོས་རི་སྐྱེས་རི་དྭགས་མང་པོ་མཐོང་མྱོང་བ་ལས་ནགས་ཚལ་འདིའི་ཕྱི་རུ་མི་ཡི་འཇིག་རྟེན་ཞིག་ཡོད་པ་ཤེས་ཀྱིན་མེད་ལ། ནོར་རྫི་སྤེན་པ་ཚང་གི་ནོར་གནག་ཚོའང་དེ་བཞིན་ཡིན།

ནོར་རྫི་སྤེན་པ་ནི་འཁྱམས་པོ་ཡུལ་མེད་ཅིག་ཡིན་པས་ས་གཡར་མ་ཞིག་གི་ཐོག་ན་ངུར་མི་ཤེས་པའི་ནོར་གནག་རྫུན་མ་འགའ་འཚོས་ནས་བསྡད་ཡོད། དོན་རྐྱེན་དེ་མ་བྱུང་བའི་སྔོན་ལ་སེང་གེ་བློ་བཟང་དང་ནོར་རྫི་སྤེན་པ་གཉིས་གྲོགས་པོ་ཡིན། དྲང་མོར་བཤད་ན་ནོར་རྫི་སྤེན་པའི་གདོང་དབྱིབས་ནི་རྡོ་སེང་ཞིག་དང་འདྲ་བོ་ཡོད་པས་ཁོ་གཉིས་གྲོགས་པོར་གྱུར་བ་དེའང་ལས་དབང་གིས་གྲུབ་པ་ཡིན་ངེས་ལ། ད་དུང་ནོར་རྫི་སྤེན་པས་ནོར་འཚོ་སའང་སེང་གེ་ཕོ་བྲང་གི་གཡས་གཡོན་དེ་རུ་ཡིན།

སེང་གེ་བློ་བཟང་དང་ནོར་རྗི་སྤེན་པ་གཉིས་ལ་སྤྱི་མཚུངས་ཀྱིས་ཤ་ཚ་ཞིང་སྙིང་ཉེ་ལ་ཁོང་གཉིས་ཀས་གུས་བརྩི་བྱེད་ས་ཞིག་ཡོད་པ་ནི་ཨ་ཅེ་དྲང་བདེན་སྒྲོལ་མ་ཡིན། ཨ་ཅེ་དྲང་བདེན་སྒྲོལ་མ་ནི་རི་བོང་ཞིག་ཡིན། ནམ་ཡིན་ཡང་ཁོང་གཉིས་ལ་ཁ་རྩོད་ཅུང་ཙམ་ཤོར་ཚེ་སུ་ཡིན་ཡང་ཨ་ཅེ་དྲང་བདེན་སྒྲོལ་མར་འདྲི་ཟེར་ངེས་ཡིན།

ན་ནིང་ཞིག་ལ་སེང་གེ་ཕོ་བྲང་ནས་གསེར་གི་རྐུབ་སྟེགས་ཤིག་བོར་བརླག་ཏུ་སོང་པ་དེ་སེང་གེ་བློ་བཟང་གིས་ནོར་རྗི་སྤེན་པས་བརྐུས་པ་རེད་ཅེས་ནོར་རྗི་སྤེན་པར་རྐུས་བཙུག ཡིན་ནའང་ནོར་རྗི་སྤེན་པས་ཁོ་རང་རྐུན་མ་མིན་པས་ནམ་ཡང་ངེས་ལེན་མེད་ཅེས་གནས་ལུགས་གསུམ་བདེན་པའི་རྒྱབ་རྩར་དྲངས་པས་སེང་གེ་བློ་བཟང་གིས་གོ་ཐོས་བཅུ་རྒྱུ་མཚན་དུ་དྲངས་ནས་ངར་ངར་བྱས། ནོར་རྗིས་སྤེན་པས་ཁྱོད་ཀྱིས་ང་ལ་མ་ཉེས་ཁག་གཡོགས་བྱས་སོང་ཞེས་སྐད་བརྒྱབས་ནས་སེང་གེ་ཕོ་བྲང་ཡོམ་ཡོམ་འདར་བར་བྱས་པས་སེང་གེ་བློ་བཟང་གིས་་དེ་ན་ཁྱོད་ཀྱིས་ཨ་ཅེ་དྲང་བདེན་སྒྲོལ་མ་ལ་གཏུགས་་ཅེས་ལོ་དེའི་ཟླ་གསུམ་བའི་ཚེས་བཅུ་ཉིན་ཡང་བསྐྱར་ངར་ངར་བྱས།

ནོར་རྗི་སྤེན་པས་ང་ལ་ཐབས་གཞན་མི་འདུག་ཅེས་ངུ་གིན་ངུ་གིན་ཨ་ཅེ་དྲང་བདེན་སྒྲོལ་མར་གཏུག་ཏུ་སོང་། ཨ་ཅེ་དྲང་བདེན་སྒྲོལ་མས་གནས་ཚུལ་ལ་རྒྱུས་ལོན་བྱས་རྗེས་ཡུན་གྱིས་བལྟ་ཞེས་པ་ཙམ་ལས་སྐབས་ཐོག་དེར་ཅི་ཡང་མ་བཤད། ཟླ་འགའ་འགོར་རྗེས་ཨ་ཅེ་དྲང་བདེན་སྒྲོལ་མས་སྐད་བཏང་བ་བཞིན་ནོར་རྫི་སྤེན་པས་རང་གི་ནུ་མོ་རྣམ་རྒྱལ་ཚེ་སྐྱིད་ཁྲིད་ཅིང་སེང་གེ་བློ་བཟང་གིས་རང་གི་སྐུ་ཚབ་འགའ་དང་རྩོད་ལེན་པ་སེང་གེ་གྲགས་པ་མངགས་ནས་ཨ་ཅེ་དྲང་བདེན་སྒྲོལ་མའི་མདུན་དུ་སོང་། ཝ་མོ་མོ་གཅིག སྐྱ་ཀ་གཉིས། ཁྭ་ཏ་གསུམ། ད་དུང་ལྟུལ་ལི་འགའ་བཅས་བདེན་དཔང་གི་ཚུལ་དུ་ཡོང་།

ནོར་རྫི་སྤེན་པ་རྡོ་སེང་གེ་ཞིག་དང་འདྲ་བར་ཁ་ཅི་ཡང་མི་གྲགས་པར་མགོ་སྒུར་ནས་བསྡད། ནུ་མོ་རྣམ་རྒྱལ་ཚེ་སྐྱིད་ཀྱིས་གནས་ལུགས་གསུམ་ལ་འགྲེལ་བཤད་བཅུ་བརྒྱབས་ཤིང་སེང་གེ་གྲགས་པས་གོ་ཐོས་བཅུ་ལ་ལོག་འགྲེལ་དགུ་བརྒྱབས། ཨ་ཅེ་དྲང་བདེན་སྒྲོལ་མས་ཞིབ་ཀྱིས་ཉན་རྗེས་རང་གི་གདོང་ལ་ཡིད་ཆེས་ཀྱི་ཉམས་གསོན་པོ་ཞིག་ཤར་བའི་མོད་ལ། སེང་གེ་བློ་བཟང་ལགས། ནོར་རྫི་སྤེན་པ་རྐུན་མ་རེད་མི་འདུག ཟླ་གཅིག་མ་བརྒལ་པའི་ནང་དུ་ཁོང་ལ་དགོངས་དག་ཞུས། དེ་ནས་ཁྱེད་གཉིས་འགྲིག་པ་ཡིན་ཞེས་བཤད་ཉན་གྱི་མཇུག་བསྡུས། སེང་གེ་གྲགས་པས་ཚིག་གི་མགོ་ན་ཨ་ཅེའང་མེད་པར་དྲང་བདེན་སྒྲོལ་མ་དྲང་བདེན་མ་རེད་ཅེས་སྐད་བརྒྱབས། སེང་གེ་བློ་བཟང་དྲང་བདེན་གྱི་རྒྱ་མ་ལས་ལྷུང་སྟེ་ས་ལ་ཤུགས་ཀྱིས་བརྡབས་པས་ཟླ་འགའ་ལ་ངག་མི་འཁྲོལ་པར་གྱུར།

ཕྱིས་སུ་སེང་གེ་བློ་བཟང་གིས་མྱི་ཟོག་གཉིས་འཆམ་མཐུན་ཡོང་བའི་ཆེད་དུ་དྲང་བདེན་སྒྲོལ་མའི་སྐད་ཆར་གུས་བརྩི་བྱེད་ཀྱི་ཡིན་ཞེས་བཤད་ནའང་བརྡབ་སྐྱོན་དེའི་དབང་གིས་དགོངས་དག་སོགས་ཐ་སྙད་ལྗིད་མོ་དག་ད་དུང་ངག་ནས་ཐོན་མི་ཐུབ་པར་གྱུར།

༢༠༡༩ ལོའི་ཟླ ༡༡ པའི་ཚེས་༢༩ ལ་ཕ་རེ་སི་ནས།