ཕོ་མོ་འདྲ་མཉམ་ནི་རང་བཞིན་གྱིས་མ་ཡིན་ནོ།

རྡོ་མེ་འབུད།

ལོ་ངོ་བཅུ་ལྷག་གི་སྔོན་ནས་བཟུང་བོད་ཕྱི་ནང་ཀུན་ཏུ་ཕོ་མོ་འདྲ་མཉམ་དང་བུད་མེད་ཀྱི་ཐོབ་ཐང་རྩོད་ལེན་སོགས་ཀྱི་ཐ་སྙད་མང་པོ་ཞིག་རང་ཉིད་བསམ་བློ་བ་དང་རྩོམ་པ་པོ་ཡིན་ཟེར་བའི་བུད་མེད་ཚོའི་ཁ་ནས་གཅིག་རྗེས་གཉིས་མཐུད་སྒོས་འུར་གྱིན་འདུག
སྤྱིར་ན་ས་སྒང་ཧྲིལ་བོ་འདིའི་སྟེང་ནས་སྤྱི་བོ་གནམ་བསྟན་གྱི་ཀུན་ལ་འདྲ་མཉམ་དང་རང་དབང་། ཐོབ་ཐང་སོགས་དགོས་པ་ནི་སྨོད་མེད་ཅིག་ཡིན་པ་གདོན་མི་ཟ། ཡིན་རུང་དེ་དག་ནི་མི་བུ་སྒེར་ངོས་ཀྱི་བསམ་བློའི་སྟོབས་ཤུགས་དང་སྒེར་ཚུགས་ཀྱི་ལྟ་བ། ལྷན་སྐྱེས་ཀྱི་ནུས་སྟོབས་སོགས་རྐྱེན་མང་པོ་ཞིག་ལས་བྱུང་དགོས་པ་མ་གཏོགས། ངེད་ཅག་ལ་དེ་དག་མཁོ་ཞེས་འུར་སྒྲོགས་ཙམ་གྱིས་གང་ཡང་མི་ཡོང་ངོ་།

བུད་མེད་ཅིག་གི་ངོས་ནས་མཚོན་ན་ཁོ་ཚོར་ལྷན་སྐྱེས་ཀྱི་ནུས་སྟོབས་དང་སྒེར་ཚུགསཀྱི་ལྟ་བ། ཕུགས་འདུན་སོགས་གང་ཅིའི་ཐད་ནས་སྐྱེས་པ་ཞིག་དང་བསྡུར་ན་དེ་ནི་གནམ་ས་ལྟ་བུའི་ཧེ་བག་ཆེན་པོ་ཡོད་ངེས། དྲང་མོར་བཤད་ན། ཁོ་ཚོའི་དམིགས་འདུན་རིང་ཤོས་ནི་རང་ཉིད་ཀྱི་ཁྱིམ་འཛིན་གྱི་བྱ་བ་ལེགས་པོ་ཞིག་བྱུང་ན་དེ་ཙམ་གྱིས་འདོད་མོས་འཐུས་འགྲོ་བ་དེ་རེད། ཁོ་ཚོས་རང་ཉིད་ཀྱི་བསམ་བློའི་ནུས་བ་དང་ཕུགས་འདུན་དེ་ཉིད་སྔོགས་འདོད་ཀྱི་འདོད་མོས་ཙམ་ཡོད་རུང་དུས་དང་གཤིབས་ན་དམ་བཅའ་ནི་བྱེ་མའི་འཆང་བུ་བཞིན་རླུང་གིས་འཁུར་འགྲོ་ཞིང་མཐར་ཐུག་ན་རང་ཉིད་ཀྱི་བསམ་བློའི་ནུས་ཤུགས་དང་། སྒེར་ཚུགས་སྒོས་འགྲེང་འདོད་རུང་དེའི་ནུས་བ་ནི་ཡོད་མི་དཔེ་དེ་རེད།

དེ་ནི་གཞན་གྱིས་སྒེར་གཅོད་སྒོས་འཕྲོག་པ་མ་ཡིན་ལ། ཕོ་མོ་སོ་སོའི་ལྷན་སྐྱེས་ཀྱི་བསམ་བློ་དང་ནུས་བ་ལས་གྲུབ་པ་ཞིག་རེད། ངས་འདི་ལྟར་གླེང་ཙམ་ནས་བུད་མེད་ཚོས་ཁོ་ཚོར་ཁྱད་གསོད་དང་བརྙས་ཟེར་ཤས་ཆེ་མོད། ཁྱེད་ཅག་གིས་འཛམ་གླིང་འདིར་སྤྱི་འགྲོས་སྒོས་བསམ་ཞིབ་ཐེངས་ཤིག་བྱོས་དང་། དེང་གི་ཆར་སྔོན་ཐོན་གྱི་མི་རིགས་དང་རྒྱལ་ཁབ་གང་ཡིན་རུང་སྲིད་འབྱོར་རིག་གསུམ་གཙོས་བྱ་བཞག་གང་ཡིན་རུང་བུད་མེད་ཁ་ཤས་ཤིག་མ་གཏོགས་གཙོ་བོ་ནི་སྐྱེས་པ་ཚོས་ཕྲག་ཏུ་བླངས་ཡོད་པ་མངོན་གསལ་རེད། དེ་ཡང་ལྷན་སྐྱེས་ཀྱི་ནུས་བ་སྒོས་བར་སྟོང་དེ་འདྲ་ཞིག་ལྷག་ཡོད་པ་མ་གཏོགས། ཁོ་ཚོས་བུད་མེད་ཚོར་ཐོབ་ཐང་མ་སྤྲད་པ་དེ་ཙམ་མ་རེད། དེ་འདྲ་ཞིག་མིན་ཚེ་བུད་མེད་ཚོས་གོང་གི་ཐ་སྙད་དེ་དག་ཁར་འཁྱེར་ནས་འུར་དགོས་དོན་གང་ཡང་མེད།

དགོད་བྲོ་བ་ཞིག་ལ་བཙན་བྱོལ་བོད་པའི་བུད་མེད་ཁ་ཤས་ཤིག་གིས་ཁོ་ཚོས་བུད་མེད་ཀྱི་ཐོབ་ཐང་དང་འདྲ་མཉམ་གྱི་ལྟ་བ་རྩོད་ལེན་བྱེད་ཀྱི་ཡོད་ཟེར། ཡང་གཅིག་བཤད་ན་ཁྱེད་ཚོས་རྩོད་ལེན་བྱེད་ཀྱིན་པའི་ཐོབ་ཐང་དང་འདྲ་མཉམ་དེ་ནི་གང་ཞིག་ཡིན་ནམ། ཁྱེད་ཚོར་གང་ཞིག་གི་ཐོབ་ཐང་དང་འདྲ་མཉམ་མི་འདུག་གམ། ཡང་སྙིང་ནི་ཁྱོད་ཚོར་དམིགས་གསལ་སྒོས་གཞུང་ཞབས་དང་ལས་མེད་ངང་གླ་ཕོག་རེ་སྟེར་དགོས་ན་མ་གཏོགས་གཞན་ཅི་ཞིག་ཡིན་ནམ།
མདོར་ན་དམིགས་བསལ་སྒོས་ཁྱེད་ཅག་གི་རང་དབང་དང་འདྲ་མཉམ་ཐོབ་ཐང་སོགས་ཐོབ་ཐུབ་པ་ཞིག་ཡིན་ན་དེ་ནི་བུད་མེད་ཚོའི་ངོ་ཚ་ཞིག་ཡིན་པ་ལས་གཞན་ཞིག་གིས་སྒེར་གཅོད་བྱས་པའི་གནད་དོན་མ་རེད། དམིགས་བསལ་ཟེར་བའི་ཚིག་འདིས་ནི་རང་ཉིད་ནུས་མེད་ཅིག་ཡིན་པ་གོ་བ་མ་གཏོགས། རང་ཉིད་ལ་སྒེར་ངོས་ཀྱི་བསམ་བློའི་སྟོབས་ཤུགས་དང་། སྒེར་ཚུགས། ལྷན་སྐྱེས་ཀྱི་ནུས་བ་སོགས་ཡོད་ན་ཁྱེད་ཚོར་དམིགས་བསལ་ཟེར་བའི་ཚིག་དེ་བེད་སྤྱོད་བྱེད་དགོས་དོན་མེད། ཁྱེད་རང་ཚོས་བུད་མེད་ཀྱི་ལས་དབང་ལ་ཁ་ལོ་བསྒྱུར་འདོད་ན་རང་བཞིན་གྱིས་གྲུབ་པའི་ཆོས་ཉིད་ཅིག་གི་མགོ་སྟིང་སློག་དགོས་པ་རེད། དེ་ནི་རྨི་ལམ་ཞིག་ལས་མ་འདས་མོད། རྨི་ལམ་དེ་ཡང་ཁྱེད་ཚོས་རྨིས་ཆོག་གི་རེད། རྨིས་རུང་རྨི་ལམ་ཞིག་ལས་མ་འདས་པས་མངོན་གྱུར་མི་འབྱུང་བའང་ཆོས་ཉིད་རེད།

བོད་ཕྱི་ནང་ཀུན་ཏུ་མང་པོ་ཞིག་གིས་འཇམ་དབྱངས་སྐྱིད་དང་དཔའ་མོ་སོགས་བོད་ཀྱི་བུད་མེད་ཀྱི་ཚབ་མཚོན་ལ་བགྲེང་བ་ནི་ཁྱེད་རང་ཚོའི་ངོ་གནོང་དགོས་པ་ཞིག་མ་གཏོགས་ཁྱོད་ཚོའི་གཟི་བརྗིད་ཅིག་མ་རེད། མི་རིགས་ཀྱི་ཞེན་ཁོག་གཅིག་པོ་སྟེང་ནས་ཁོ་ཚོ་ལས་ད་རུང་གཞན་བོད་ཕྱི་ནང་ཀུན་ན་བགྲེང་ཆོག་ཆོག་གི་བུད་མེད་གང་མང་རེ་ཡོད་ངེས་ལ་ཁོ་ཚོའི་མི་རིགས་ལ་བཅིངས་བའི་ཞེན་ཁོག་ནི་ངས་ཀྱང་ཡི་རངས་བྱེད་ངེས། དེ་ཙམ་གྱིས་ཁྱོད་རང་ཚོས་ཚབ་མཚོན་ལ་བགྲེང་དགོས་པ་ཡིན་ན་དངོས་ནས་དགོད་བྲོ་བ་ཁོ་ནའོ། ཁོ་ཚོ་ལ་རྒྱུས་མངའ་ཡོད་མཁན་ཞིག་གི་ངོས་ནས་བལྟས་ན་ད་གཟོད་ཁོ་ཚོས་བོད་པའི་བུད་མེད་ཀྱི་ཚབ་མཚོན་བྱེད་ཐུབ་མིན་དེ་ཤེས་ངེས།

མདོར་ན་བུད་མེད་ཚོའི་རང་དབང་དང་འདྲ་མཉམ། ཐོབ་ཐང་སོགས་ནི་བུད་མེད་རང་ངོས་ཀྱི་ལྷན་སྐྱེས་ཀྱི་ནུས་བ་ཞིག་ལས་ཡོང་དགོས་པ་མ་གཏོགས་ཁྱོད་ཚོའི་འུར་སྒྲོགས་དེ་ཙམ་གྱི་ཡོང་བ་ནི་ནམ་ཡང་མི་སྲིད་དོ། དེ་བས་ཕོ་མོ་འདྲ་མཉམ་མི་དགོས་པ་མ་ཡིན་མོད་རྡོ་ནི་ནམ་ཡང་སྲ་མཁྲེགས་དང་ཆུ་ནི་ནམ་ཡང་གཤེར་བ་ཡིན་པ་གནས་ལུགས་ཤིག་ཡིན་པ་ནང་བཞིན་ཕོ་མོའི་སོ་སོའི་ལྷན་སྐྱེས་ཀྱི་ནུས་བ་གྲུབ་སྟངས་ལས་ཕོ་མོ་འདྲ་མཉམ་རང་བཞིན་གྱིས་མ་ཡིན་པས་ས་སྟོང་ལ་མདའ་སྟོང་མ་ཡིན་ན་ཁྱེད་ཚོས་ཐོབ་ཐང་དེ་རྩད་ཆོག་ཆོག་ཅིག་ཡིན་ལ་ངས་ཀྱང་ཁྱེད་ཅག་གི་ངལ་བ་དེ་འབྲས་མེད་ཅིག་མིན་པར་སྨོན།