ཕྱི་མིག་ཀློང་གི་དུས་འཁོར་དབང་ཆེན་ཚར་ལྔ།

–ཀླུ་སྨྱོན།

ཕལ་ཆེར་སྤྱི་ལོ་༡༩༨༨ལོའི་དབྱར་ཁ་ཡིན་བསམས། བདག་ལ་རིག་པའི་གནས་ལྔ་སློབ་གནང་མཁན་མཁས་དབང་དགེ་བཤེས་བྱམས་པ་འཕྲིན་ལས་ཚང་གིས་ཁོང་གི་གཟིམ་ཤག་ཏུ་བོས་གནང་སྟེ། ཁྱོད་ཀྱིས་ཤེས་གསལ་བཞིན་སྔ་ལོར་ངས་རང་དགོན་གྱི་གྲྭ་རིགས་འདོན་བཟང་ཁ་ཤས་བསྡུས་ཏེ་དུས་འཁོར་ཚོགས་པ་ཞིག་བཙུགས་ཡོད།ངས་ཐོས་པ་ལྟར་ན་ཁྱེད་རང་དགོན་འདིའི་གྲྭ་རིགས་འདོན་བཟང་རིགས་ཡག་རྩེ་གྲས་ཤིག་རེད་ཟེར་བས། ཁྱེད་དུས་འཁོར་བའི་ནང་དུ་ཞུགས་ན་ཇི་འདྲ་འདུག ཁྱེད་གྲྭ་རྐྱང་ཡིན་པས་དུས་འཁོར་བ་བྱས་ན་ཆོས་ཉམས་ལེན་གཅིག་པོ་མ་ཡིན་པར་ཟང་ཟིང་གི་ཕྱོགས་ནས་ཀྱང་ཕན་ཐོགས་ཡོད་པ་རེད། ཅེས་གསུངས་སོང་། རྗེ་འདི་བའི་ཞལ་རས་ནམ་རྒྱུན་འཛམ་གྱིས་ཁེངས་ཤིང་ཐུགས་གཤིས་ཧ་ཅང་འཇམ། མདོ་སྔགས་གསོ་རིག་སྒྲ་སྙན་ངག་རྩིས་ས་དཔྱད་སོགས་ལ་མངའ་བརྙེས་ཀྱང་རྟག་པར་དམན་ས་འཛིན། རིག་གསར་སྐབས་ཁོང་གིས་བརྩམས་པའི་དབྱངས་ཅན་མའི་བསྟོད་པ་སྙན་པའི་ཚད་དུ་ཕྱིན་པ་ཞིག་ཀྱང་བཞུགས།

དེ་ནས་བཟུང་སྟེ་བདག་དུས་འཁོར་བ་ཞིག་ཆགས་སོང་། ཡིན་ཡང་དུས་འཁོར་གྱི་ཤོག་ལྡེབས་ལྔ་བརྒྱར་ཉེ་བའི་ཆོ་ག་དེ་བློ་ལ་འཛིན་མི་དགོས་པར་ཤར་ཤར་འདོན་ཐུབ་པ་ཞིག་དགོས། སྔགས་ཡིག་མང་པོ་བརྩེགས་མར་ཡོད་པ་ཙམ་ལས་ཀློག་མི་ཤེས་པ་ཅང་མི་འདུག ལོ་རེར་ཚར་གཅིག་རེ་ཙམ་ལས་འདོན་ཡང་མི་དགོས། གྲོང་པ་རེ་ཟུང་སྦྱིན་བདག་བྱས་ཚེ་གྲོང་དེར་སོང་ནས་སྤྱི་ཁང་ངམ་ཁྱིམ་ཚང་རེའི་ཁང་པར་བསྡད་དེ་འདོན་དགོས། དེ་ཡང་ཞོགས་པའི་ཆུ་ཚོད་བཞི་པ་ཙམ་ལ་ཡར་ལངས་ནས་བཏོན་ན་དགུང་མོའི་ཆུ་ཚོད་དགུ་པ་ཙམ་ལ་དུས་འཁོར་གྱི་ཕྱག་དཔེ་ཆ་ཚང་ཚར་ཐུབ། དུས་འཁོར་འདོན་དུས་རྒྱ་གླིང་འབུད་མཁན་གཉིས་དགོས་པས་བདག་གིས་རྒྱ་གླིང་འབུད་སྟངས་ཀྱང་ལེགས་པར་སྦྱངས།
སྐབས་མང་པོར་གློག་མེད་པས་ཡང་ལའི་འོག་ཏུ་ཀློག་དགོས། ཤོག་ལྡེབས་སྣ་རིང་དྲུག་ཅུ་ཙམ་རེ་ག་ལེར་བཏོན་ཚར་རྗེས་གཞི་ནས་ནམ་ལངས་ཡོང་གི་ཡོད། དེ་དུས་དགེ་བཤེས་ཚང་གིས། དབང་ཕྱོགས་མཁའ་མཐའ་སྔོ་སྐྱར་གྱུར་པ་ན། །སྐྱ་རེངས་དང་པོ་ཤར་ཞེས་མི་དག་གླེང་། །ཞེས་པའི་ཚིག་བཅད་གཉིས་ཡང་ཡང་སྐྱོར་གནང་གི་རེད། ལོ་ཤས་རྗེས་ངས་ཚིག་དེ་བླ་བྲང་དགོན་པའི་སྙན་ངག་མཁན་གྲགས་ཅན་ཞང་སྟོན་བསྟན་པ་རྒྱ་མཚོའམ་ཨ་ཁུ་ཐབས་མཁས་ཚང་གིས་བརྩམས་པའི་རྗེ་བཙུན་སྒྲོལ་མའི་ལོ་རྒྱུས་བསྟོད་པ་གཡུ་ལོ་བཀོད་པའི་དགའ་ཚལ་ཞེས་པའི་སྙན་གྲགས་ཅན་དེ་ལས་མཇལ། དགེ་བཤེས་ཚང་གིས་གསུངས་པ་བཞིན་དུས་འཁོར་འདོན་རྒྱུ་ཅུང་ཟད་ཁག་པོ་ཡོད་ཀྱང་ལོ་ཆུང་ཞིང་རིགས་པ་རྣོ་བས་དེ་ཙམ་དཀའ་ངལ་མ་འཕྲད་པའི་ཁར་ཟང་ཟིང་གི་རྙེད་པ་ཡང་གང་འཚམ་རེ་ཐོབ།
སྤྱི་ལོ་ ༡༩༨༩ ལོའི་ཟླ་བརྒྱད་པའི་ཚེས་བཅུ་བཞི་ནས་རྗེ་བླ་མ་ལྰ་མོའི་ཡོངས་འཛིན་རྡོ་རྗེ་འཆང་ཆེན་པོས་དགུང་གྲངས་གྱ་གཉིས་བཞེས་དུས་ལྰ་མོ་བདེ་ཆེན་ཆོས་འཁོར་གླིང་དུ་དུས་འཁོར་དབང་ཆེན་གསུངས། འདི་དུས་ངེད་ཅག་དགོན་པའི་གྲྭ་དམངས་སྤྱི་དང་འདྲ་བར་དུས་འཁོར་བ་ཚོ་དམིགས་བསལ་གྱི་སྔོན་ཙམ་ལ་བདེ་ཆེན་དགོན་པར་ཕྱིན། རྫོང་ཐོག་ནས་སྤྱི་འཁོར་ལ་བསྡད་དེ་ཟི་ལིང་དུ་ཞག་གཅིག་དང་། ཕྱི་ཉིན་གཅན་ཚ་བརྒྱུད་བདེ་ཆེན་དགོན་པར་བསླེབས། བདེ་ཆེན་ལ་མ་བསླེབས་ཙམ་གྱི་རི་ལམ་ཀྱག་ཀྱོག་དེ་དྲན་ན་ད་དུང་ཤ་འདར་རྒྱག ལོ་མང་རྗེས་སུ་ཞབས་དྲུང་དཀར་པོའི་ཞབས་ཞུ་བ་དང་ཨ་ལགས་འཕྲིན་ལས་རྣམ་གཉིས་རི་ལམ་གཟར་བོ་དེ་ནས་རླངས་འཁོར་དང་མཉམ་དུ་འགྲིལ་ནས་འདས་གྲོངས་ཤོར་ལུགས་ཐོས། རྗེ་བླ་མས་གསོལ་ཚིགས་ཤིག་གི་སྐབས་སུ་བཞུགས་གདན་འོག་ནས་རྒྱ་སྒོར་བརྒྱ་བླངས་ཏེ་གནང་ཞོར་ཁྱོད་ད་དུང་གྲྭ་རྐྱང་ཡིན་གསུངས། བདེ་ཆེན་དགོན་པ་ཧ་ཅང་ཆེ་སྣང་ཤར། ཉི་མ་དེ་ཚོར་སྐྱིད་པོ་དཔེ་མེད་བྱུང་། མི་ཁྲི་བཞི་ཙམ་འདུས། དུས་དབང་གི་སྦྱིན་བདག་སྣང་རའི་གྲོང་བརྒྱད་རེད། དེ་དུས་གཅན་ཚའི་རྫོང་ཐོག་གི་དཔེ་ཁང་ཞིག་ནས་བཀྲ་ཤིས་ཚེ་རིང་གིས་བརྩམས་པའི་དབྱིན་བོད་ཤར་སྦྱར་གྱི་ཚིག་མཛོད་རྒྱབ་ཤོག་སྔོན་པོ་ཅན་དེ་ཐོག་མར་མཐོང་།
སྤྱི་ལོ་ ༡༩༩༠ ལོའི་དབྱར་ཁར་སྤྱི་ཐར་ཤུལ་ཚོ་གསུམ་གྱིས་ཞུས་ངོར་རྗེ་བླ་མས་མང་རའི་བཞུགས་ཁྲི་གོང་མར་དུས་འཁོར་དབང་ཆེན་གསུངས། འདི་སྐབས་ངེད་ཅག་དུས་འཁོར་བ་ཚོས་ཟླ་ཕྱེད་ཅིག་གི་རིང་ལ་ཉིན་རྒྱུན་རས་གུར་ཞིག་གི་ནང་རྡུལ་ཚོན་དཀྱིལ་འཁོར་བཞེངས། སྔ་དྲོ་རྟག་པར་རྗེ་བླ་མ་དགོན་པ་ནས་ཚུར་ཕེབས་ཏེ་དུས་འཁོར་བ་ཚོ་དང་ལྷན་དུ་དུས་འཁོར་ཆོ་ག་བསྡུས་པ་འཇམ་དཔལ་དགོངས་རྒྱན་གསུངས། ནམ་ཟླ་དང་ཟ་མ། ཆོས་གྲོགས་དང་མི་ཚོགས་ཀྱི་འདུ་ལོང་སོགས་སྦྲེལ་བས་སྐྱིད་པོ་བྱུང་། བླ་བྲང་ནས་ཨ་ཁུ་བཛྲ་ཞེས་པའི་སོག་པོའི་དུས་འཁོར་བ་རིག་གནས་ཀུན་ལ་མཁས་པའི་སྐད་གྲགས་ཅན་དེ་བྱོན་ནས་ངེད་ཅག་ལ་མཛུབ་ཁྲིད་ཀྱང་ལན་མང་གནང་།
ཟླ་ལྔ་པའི་ཚེས་བརྒྱད་ནས་བཅོ་བརྒྱད་བར་རྗེ་བླ་མས་དུས་འཁོར་དབང་ཆེན་གསུངས་ཤིང་མི་འབུམ་གཅིག་དང་ཁྲི་གཅིག་ཙམ་འདུས། དུས་དབང་འདི་མ་གསུང་སྔོན་ཙམ་ལ་དུས་དབང་གྲ་སྒྲིག་གི་ཆེད་དུ་གང་སར་ཕེབ་བཞིན་པའི་བདག་གི་བཤེས་གཉེན་བྱམས་པ་འཕྲིན་ལས་ཚང་གློ་བུར་དུ་སྐུ་གཤེགས། ངེད་ཅག་དུས་འཁོར་ཚོས་ཁོང་གི་གཟིམ་ཤག་ཏུ་དགོངས་རྫོགས་ཆེད་དུས་འཁོར་གསུང་བཞིན་པའི་སྐབས་སུ་གློ་བུར་དུ་ས་ཡོམ་ཆེན་པོ་ཞིག་བརྒྱབ། དེ་ནི་ཆབ་ཆའི་ས་འགུལ་ཞེས་པའི་སྐད་གྲགས་ཅན་དེ་རེད།
ཤེལ་ལུང་བཞུགས་ཁྲི་ཞེས་པའི་ཐང་ཆེན་པོ་དེར་དད་ལྡན་ཚོའི་རས་གུར་ནམ་མཁའི་སྐར་ཚོགས་བཞིན་བཀྲ། ཞབས་དྲུང་དཀར་པོ་དང་གཡེར་གཤོང་ཚང་སོགས་བླ་ཆེན་མང་པོ་ཡང་ཕེབས། ཧོ་ཐོག་མཚམས་པ་ཞེས་པའི་རྙིང་མའི་ཨ་ལགས་ཤིག་དང་ཨ་ལགས་གཡུང་དྲུང་ལྷུན་གྲུབ་ཅེས་པའི་བོན་པོའི་བླ་མ་ཞིག་ཀྱང་དུས་དབང་ལ་བཅར། ར་རྒྱ་དང་གཙང་དགོན་པ་སོགས་ཀྱི་གྲྭ་པ་སྟོབས་ཆེན་ཀོ་ལྷམ་ལྗིད་ཁོག་ཆེན་པོ་ཅན་མནབས་པ་མང་པོ་ཞིག་དུས་འདི་ཙམ་ནས་རྗེ་བླ་མའི་དྲུང་དུ་གསུང་ཆོས་ལ་བཅར་མགོ་བརྩམས། དུས་དབང་གི་མཇུག་གྲུབ་པའི་གཏང་རག་གི་སྐབས་སུ་བདག་གི་སློབ་དཔོན་དགེ་བཤེས་བསྟན་འཛིན་ཚང་གིས་མཎཌལ་བཤད་པ་ཕུལ་ཅིང་བདག་གིས་ཁོང་གི་འཁྲིས་སུ་མཎ་བཤད་ཤོག་ལྷེ་དེ་ཚོ་སློག་རོགས་ཞུས། ངེད་ཅག་དུས་འཁོར་བ་ཚོར་རྙེད་པ་ཡང་མང་པོ་ཐོབ།
རྗེ་བླ་མའི་རྣམ་ཐར་ནང་ཨ་ལགས་བླ་ཁོ་ཚང་གིས་ཁོང་ལ་དགོན་པ་གསར་པའི་ནང་བདེ་གསང་འཇིགས་གསུམ་གྱི་ཆོ་ག་འཛུག་དགོས། དུས་འཁོར་མ་འོངས་པར་ས་དར་རྡོ་དར་ཆགས་ཡོང་ཞེས་གསུངས་ཚུལ་འདུག
དེ་རྗེས་བདག་རི་བོ་ཧི་མ་ལ་ཡ་བརྒལ་ནས་རྒྱ་གར་དུ་འབྱོར། ལྷོ་ཕྱོགས་སྙན་ངག་མཁན་རྣམས་ཀྱི་ཕ་སར་ཡོད་དུས། སྤྱི་ལོ་ ༡༩༩༥ ལོའི་སྤྱི་ཟླ་དང་པོའི་ནང་གོང་ས་མཆོག་གིས་དུས་འཁོར་དབང་ཆེན་ཐེངས་ཉི་ཤུ་བ་དེ་གསུངས། སྤྱིར་ན་ཆར་དུས་མིན་ཡང་། མགོན་པོ་མཆོག་ས་གནས་སུ་ཆིབས་སྒྱུར་སྐྱོང་སྐབས་གློ་བུར་དུ་ཆུ་སྤྲིན་ལང་ལོང་དུ་འཁྲིགས་ནས་སྦྲང་ཆར་ཟིལ་མ་དལ་བུས་བབས་པ་ནི་གདུལ་བའི་ཞིང་སར་ཉམས་རྟོགས་ཀྱི་མྱུ་གུ་འབུས་པའི་སྔ་ལྟས་སུ་གླེང་། མགོན་པོ་མཆོག་གིས་དུས་དབང་གི་སྔོན་འགྲོའི་གསུང་ཆོས་ལ་མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བ་གསུངས། འདི་དུས་ཁོང་གི་གསུང་ཐོས་པ་ཐོག་མ་ཡིན་པས་ཚིག་ལ་ལ་མ་གོ་བའི་དཀའ་ངལ་བྱུང་ཡང་མང་ཤོས་གོ་ཐུབ་པས་སྐལ་བ་བཟང་པོ་བྱུང་། མི་གྲངས་ཁྲི་ལྔ་ཙམ་འདུས། ཟང་ཟིང་གི་རྙེད་པ་མང་པོ་ཐོབ། གྲྭ་རྐྱང་མང་པོའི་ཁ་ནང་ལ་མར་ཁུ་འཁྱིལ།
སྤྱི་ལོ་ ༡༩༩༦ ལོའི་ཟླ་བཅུ་གཉིས་པའི་ནང་རྒྱ་གར་ཤར་ཕྱོགས་ས་ལུ་སྒར་དུ་གོང་ས་མཆོག་གིས་དུས་དབང་ཐེངས་ཉེར་བཞི་པ་དེ་གནང་། དེ་དུས་བདག་བལ་ཡུལ་དུ་ཡོད་པས་ཆོས་གྲོགས་འགའ་དང་ལྷན་དུ་སྤྱི་འཁོར་ལ་བསྡད་ནས་རྒྱ་བལ་ས་མཚམས་སུ་བསྐྱོད། ནམ་རྒྱུན་དང་མི་འདྲ་བར་ས་མཚམས་སུ་བཀག་འགོག་དེ་ཙམ་མེད་པར་བལ་ཡུལ་ཧི་མ་ལ་ཡའི་མི་རིགས་ནང་ཆོས་ལ་དད་པ་ཡོད་མཁན་ཧ་ཅང་མང་པོ་ཞིག་དུས་དབང་ཞུ་བར་བཅར། འབྲུག་པ་སྟོང་ཕྲག་མང་པོ་ཡང་བསླེབས་འདུག་ཅིང་། དགོང་མོར་འབྲུག་པ་མང་པོ་ཤིང་སྡོང་གི་འོག་ཏུ་ཉལ་ནས་བསྡད། འབྲུག་མོ་ཚོས་ཆུར་བ་དམར་པོ་ཞིག་མུར་ཏེ་སོ་ཚང་མ་དམར་ཉོག་གེར་ཡོད་པ་དེ་ཡ་མཚན་འདྲ་ཞིག་ཏུ་སྣང་། དེ་དུས་རྒྱ་གར་ལྷོ་ཕྱོགས་ནས་ཕེབས་པའི་རང་གི་ཕ་ཡུལ་གྲྭ་ཚང་གཅིག་པ་དང་ཕ་ཡུལ་གཅིག་པ་མང་པོར་ཐུག་སྟེ་ཉིན་མང་པོར་ལྷན་དུ་སྡོད་རྒྱུ་བྱུང་། མི་ཚོགས་མང་དྲགས་པས་ས་རྡུལ་འཐིབས་ཤིང་འགྲོ་ལམ་མི་རྙེད་པའི་ཚོད་དུ་འདུག མི་འབུམ་གཉིས་ཙམ་འདུས། སྔོན་འགྲོའི་གསུང་ཆོས་གང་གནང་མི་དྲན།
དེ་རྗེས་ལོ་མང་རིང་དུས་འཁོར་དབང་ཆེན་ཞུ་མ་ཐུབ།
ཁོ་བོ་ཨ་རི་སྡེ་མང་གཅིག་སྒྲིལ་རྒྱལ་ཁབ་ཏུ་འབྱོར་ནས་ཡུན་རིང་ཕྱིན་པའི་རྗེས་ཏེ། སྤྱི་ལོ་ ༢༠༡༡ ལོའི་ཟླ་བདུན་པའི་ནང་གོང་ས་མཆོག་གི་རྒྱལ་ས་ཝ་ཤིང་ཁྲོན་དུ་དུས་དབང་ཐེངས་སོ་གཅིག་པ་དེ་བསྩལ། དེ་དུས་བདག་ཀྱང་སྦྱིན་བདག་ཅིག་གིས་འགྲོ་སོང་བཏང་བའི་ཉེར་ལེན་གྱིས་བཅར་ཐུབ་ཙམ་བྱུང་བ་དང་། ཉི་མ་རེ་རེར་ཉིན་ཐོ་བྲིས་ཏེ་ཁ་བརྡ་དྲ་རྒྱའི་སྟེང་སྤེལ། དུས་དབང་གསུང་ས་རྩེད་འགྲན་ཁང་ཆེན་པོ་ཞིག་ཡིན་པས་ཕྱི་རོལ་གྱི་ཨང་གྲངས་བརྒྱ་དང་ལྔ་དྲུག་ལ་བསླེབས་པའི་ཚ་གདུང་དྲག་པོ་དེ་ལས་གཡོལ་ས་ཡག་ཤོས་ཤིག་ཏུ་གྱུར།
འདི་དུས་སྔོན་འགྲོའི་གསུང་ཆོས་གང་གནང་ད་ལྟ་མི་དྲན་ཡང་། ས་དགེ་བཀའ་རྙིང་བཞིའི་ལྟ་བ་དང་དུས་འཁོར་གྱི་བསྐྱེད་རྫོགས་སྦྱར་ཏེ་གསུང་བཤད་ཧ་ལས་པ་ཞིག་གནང་བ་ད་དུང་དྲན་ངོས་སུ་བསྡད་འདུག འདིའི་སྐབས་སུ་ཕ་ཡུལ་གཅིག་པ་དང་ཡུན་རིང་གི་གྲོགས་པོ་དཀོན་མཆོག་སྦྱིན་པ་དང་བསོད་ནམས་ཡེ་ཤེས་སོགས་ལ་འཕྲད་དེ་སྐྱིད་པོ་དཔེ་མེད་བྱུང་། ཕུག་རོན་ནད་པ་ཞིག་ལ་འཕྲད་དེ་སྙིང་རྗེ་ཡོད་ཁུལ་གྱི་ཟློས་གར་ཞིག་ཀྱང་འཁྲབས།
འདི་ལྟར་དུས་འཁོར་དབང་ཆེན་ཚར་ལྔ་ཐོབ་ཀྱང་ཕ་ཡུལ་ནས་དུས་འཁོར་བ་ཡིན་སྐབས་མ་གཏོགས་དུས་འཁོར་ཞེས་པའི་རྒྱུད་སྡེ་གྲགས་པ་ཅན་འདི་ནམ་ཡང་བདག་གི་ཉིན་རེའི་ཁ་འདོན་དུ་འགྱུར་མ་ཐུབ། དེང་སང་དུས་འཁོར་དབང་ཆེན་ཞེས་པའི་དབང་འདི་ལ་མི་ཕལ་མོ་ཆེ་རྒྱུག་བཞིན་འདུག དབང་ཆེན་འདི་འདྲའི་དཀྱིལ་འཁོར་ལན་གཅིག་མཇལ་ན་ཡང་ཚེ་རབས་འབུམ་ཕྲག་གི་སྡིག་པ་འདག་ངེས་རེད། དབང་དོན་ངོ་མ་འཕྲོད་ཀྱང་དབང་གསུང་མཁན་གྱི་བླ་མ་གོང་ས་མཆོག་དང་ས་སྐྱ་གོང་མ་ལྟ་བུའི་སྐྱེས་བུ་དམ་པ་ཚོའི་ཞལ་མཇལ་བ་ཙམ་གྱིས་ཀྱང་ཐར་པའི་ས་བོན་རྒྱུད་ལ་འདེབ་ཐུབ་ངེས་རེད། ཡིན་ཡང་། དུས་འཁོར་དབང་ཆེན་ཞུས་རྗེས་མ་མཐའ་ཡང་དུས་འཁོར་གྱི་བསྟོད་པ།
ཕྲ་རབ་རྡུལ་གྱི་ཆོས་ཉིད་འདས། །
པྲ་ཕབ་པ་ཡི་རང་བཞིན་ཅན། །
རྣམ་པ་ཀུན་གྱི་མཆོག་ལྡན་པའི། །
དུས་ཀྱི་འཁོར་ལོ་དེ་ལ་འདུད། །
ཨོཾ་ཨྰ་ཧྰུྃ་ཧོ་ཧྐྵྨླྺྼྻྻྻྃ་ཧྰུྃ་ཕཊ།
དགེ་བ་འདི་ཡིས་མྱུར་དུ་བདག །
དུས་ཀྱི་འཁོར་ལོ་འགྲུབ་གྱུར་ནས། །
འགྲོ་བ་གཅིག་ཀྱང་མ་ལུས་པ། །
དེ་ཡི་ས་ལ་འགོད་པར་ཤོག །
ཅེས་པ་ལྟ་བུ་རེ་འདོན་དགོས་པར་སྣང་ངོ་།། །།