ཕྱི་རྒྱལ་དུ་ཡོད་པའི་སློབ་གྲྭ་བ་ཚོ།

རྒྱལ་ནང་དུ་ཡོད་པའི་ཀྲུངགོའི་སྤྱི་དམངས་ཞིག་གིས།
ནགས་ཤོད་ཡེ་ཤེས་བསྟན་འཛིན་གྱིས་བསྒྱུར།

རྒྱ་ཆེ་བའི་ཕྱིར་སྐྱོད་རྒྱལ་གཅེས་ཀྱི་སྤུན་ཟླའི་སློབ་གྲོགས་ཚོ། ཁམས་བཟང༌། ང་ནི་རྒྱལ་ནང་དུ་ཡོད་པའི་ཀྲུང་གོའི་སྤྱི་དམངས་ཞིག་ཡིན། མ་གཞི་ཁྱོདཚོའི་ལུས་པོ་ཕྱི་རྒྱལ་དུ་ཡོད་མོད། དུས་དང་རྣམ་པ་ཀུན་ཏུ་མེས་རྒྱལ་སེམས་ལ་བཅངས་ཤིང་དོ་ཁུར་བགྱི་བཞིན་ཡོད་པ་ངས་ཤེས་ཀྱི་ཡོད། ཨོ་རྩེད་ཀྱི་དཔལ་འབར་བརྒྱུད་སྤྲོད་ཕྱི་རྒྱལ་ནས་མཇུག་བསྒྲིལ་ལ་ཉེ་བའི་གོ་རིམ་ཁྲོད་དུ་ཁྱོད་ཚོས་དེར་ཁྲོམ་སྐོར་སོགས་ཀྱི་རྣམ་པའི་ཐོག་ནས་མེས་རྒྱལ་ལ་རྒྱབ་སྐྱོར་མཚོན་པ་བྱས་ཡོད།

ངས་ཁྱོད་ཚོར་ཡི་རངས་བྱེད་ཀྱིན་ཡོད། ཅི་ཞིག་གི་ཕྱིར་དུ་ཞེ་ན། ནུབ་སྡོད་པ་ཚོས་ཀྲུང་གོར་སྐྱོན་བརྗོད་བྱེད་པའི་སྐབས་སུ་ཁྱོད་ཚོ་མདུན་དུ་བཅར་ཏེ་ཀྲུང་གོར་རྒྱབ་སྐྱོར་དང་མཚང་འབྱིན་བྱེད་མཁན་ཚོར་ངོ་རྒོལ་བྱ་ཕོད་ཀྱི་ཡོད། ཡིན་ནའང་ནུབ་ཕྱོགས་པ་ཚོའི་སྐྱོན་བརྗོད་དེས་ཀྱང་ཀྲུང་གོའི་ཡར་རྒྱས་ལ་སྐུལ་འདེད་བྱེད་པའི་ཆ་རྐྱེན་ཞིག་ཏུ་སོང་བ་བསམས་མྱོང་ངམ། གལ་ཏེ། ནུབ་ཕྱོགས་པ་ཚོའི་སྐྱོན་བརྗོད་མེད་ཚེ་ཀྲུང་གོ་ད་དུང་ཡང་མི་ལོ་སུམ་ཅུའི་ཡར་སྔོན་གྱི་གནས་སྟངས་དེར་རང་སོར་ལུས་ཡོད།

ང་ཁྱོད་ཚོར་སྨོན་པ་འཆོར་གྱིན་ཡོད། གང་ལགས་ཤེ་ན། ཁྱོད་ཚོ་ཉེན་རྟོག་པའི་སྲུང་སྐྱོབ་འོག་ནས་སོ་སོས་འཛིན་པའི་ལྟ་ཚུལ་ཚད་མར་སོང་མིན་ལ་ལྟོས་པ་མེད་པར་ཡོངས་བསྒྲགས་ངང་སྦྱར་ཡིག་དང་དར་ཆ་བསྒྲེངས་ནས་ཁྱོད་ཚོའི་ཆབ་སྲིད་ཀྱི་ལྟ་ཚུལ་གསལ་སྟོན་བྱེད་ཀྱི་ཡོད། ཡིན་ནའང༌། ང་ཚུད་པའི་ཀྲུང་གོའི་ས་ཁོངས་ན་ཡོད་པའི་མི་འདི་ཚོ། གལ་ཏེ་ཁྱོད་ཚོ་ལྟར་དུ་སྦྱར་ཡིག་དང་དར་ཆ་བསྒྲེངས་ནས་གཞུང་ལམ་དུ་སོང་ཚེ་ཉེན་རྟོག་པའི་ལྟ་སྐྱོང་མེད་པ་ལྟ་ཅི། ད་དུང་བཙོན་འཇུག་གི་ཉེས་དམིགས་ལས་ཐར་དཀའ་བའི་ཚོད་རེད། ཐ་ན། ངས་དྲྭ་ལམ་ནས་རྩོམ་ཡིག་འདི་འདྲ་ཞིག་འདོན་སྤེལ་བྱས་མོད། ཡིན་ནའང༌། རང་སོ་སོའི་བདེ་འཇགས་ཀྱི་ཆེད་དུ་སེམས་ངལ་བྱ་དགོས་ཀྱི་ཡོད། སྐུ་ཞབས་ཧུའུ་ཅའ་སོགས་ལྟ་སྤྱོད་མི་མཐུན་པའི་མི་སྣ་ཉུང་མིན་ཞིག་ལ་དཀའ་སྡུག་ཕོག་པ་དེས་ངེད་ཚོས་དོགས་ཟོན་ཆེ་སྐྱེད་མི་བྱ་ཐུ་མེད་རེད།

གོ་ཐོས་ལྟར་ན། ཡང་ཁྱོད་ཚོས་འདི་ལྟ་བུའི་ལྟ་སྤྱོད་མི་མཐུན་པའི་མི་སྣར་བཙན་གནོན་བགྱིད་པའི་ཀྲུང་ལུགས་ཀྱི་བྱ་ཐབས་འདི་ཨ་རིར་ཁྱེར་འདུག་ཟེར་ལ། ཝང་ཆིང་ཡོན་དུ་འབོད་པའི་ཀྲུང་གོའི་ཕྱི་སྐྱོད་སློབ་གྲྭ་བ་ཞིག་གིས་ཨ་རིའི་ཁྲིམས་ལུགས་ལྟར་ཁྱོད་ཚོ་དང་ཆབ་སྲིད་ལྟ་ཕྱོགས་ཐ་དད་པ་འགའ་འགྲེལ་བརྗོད་བྱས་པ་ཙམ་གྱིས་ཁྱོད་ཚོས་ཡ་ང་བའི་གདུག་རྩུབ་དང་ངན་སྨྲས་ཕོག་ཡོད་ལ་ཁོང་མི་སྒེར་གྱི་གསང་བ་ཡང་ཕྱིར་བསྒྲགས་བྱས་ཡོད། CNN གྱི་ཁ་ཧྥུ་ཏིས་ཀྱང་ཕལ་ཆེར་རང་ཉིད་ལ་སྔོན་རྟོགས་ཀྱི་རིག་པ་འདི་ཙམ་ཡོད་པར་ཁེར་དགོད་འཆོར་བཞིན་ཡོད། འདི་འདྲར་ལྟ་དུས། མེས་རྒྱལ་གྱིས་ཁྱོད་ཚོར་བླུད་པའི་སྤྱང་ཀིའི་འོ་མས་འདི་འདྲའི་བོགས་ཐོན་པ་ལ་ཨང༌། རེ་བ་ལ་ཁྱོད་ཚོས་འབད་བརྩོན་གྱིས་མེས་རྒྱལ་གྱི་ཀླ་ཀློའི་གོམས་སྲོལ་འདི་དར་རྒྱས་གོང་འཕེལ་དུ་བཏང་སྟེ་རིང་མིན་གོ་ལ་ཟླུམ་པོའི་ཕྱོགས་གང་དུའང་ཀྲུང་གོ་ནང་བཞིན་གྱི་ཁྲིམས་སྐྱོང་མི་ཡོང་བའི་བརྩོན་ལེན་གྱིས་ཤིག

ང་ཁྱོད་ཚོར་སྨོན་པ་འཆོར་གྱིན་ཡོད། ཁྱོད་ཚོས་CNN དང་ BBC མཐོང་བ་ཙམ་མ་ཟད། CCTV ཡང་མཐོང་གི་ཡོད། ཡིན་ནའང་ང་ཚོས་ CCTV འབའ་ཞིག་མཐོང་བ་ལས་ CNN དང་ BBC མཐོང་ཐུབ་ཀྱི་མེད། ཐ་ན། ད་དུང་མི་མང་པོ་མང་པོ་ཞིག་གིས་འཇིག་རྟེན་འདིའི་སྟེང་དུ་ CNN དང་ BBC ཡོད་པའང་ཧ་གོ་གི་མེད། དེའི་ཕྱིར་དོན་ངོ་མར་ཅི་ཞིག་བཤད་སྟངས་འགྲིག་མེད་ནས་ཁྱོད་ཚོ་དང་ང་ཚོའི་སྲིད་གཞུང་གཉིས་ཀར་ཁོང་ཁྲོ་ཆེན་པོ་བསླངས་སོང་བའང་ཤེས་ཀྱི་མེད། ང་ཚོས་འུ་ཚོའི་སྲིད་གཞུང་གི་ལྟ་ཕྱོགས་ཁོ་ན་མཐོང་གི་ཡོད་པ་ལས་འུ་ཚོའི་མི་དམངས་ལ་དངོས་འབྲེལ་དྲང་འབྲེལ་གྱི་བསམ་ཚུལ་ཅི་ཞིག་ཡོད་པ་ཤེས་རྟོགས་ཐུབ་ཀྱི་མེད། གལ་ཏེ། ཁྱེད་རྣམ་པས་ང་ཚོས་ཀྱང་ CNN དང་ BBC ལ་ངོ་རྒོལ་བྱེད་པར་རེ་བ་བྱེད་ཀྱི་ཡོད་ཚེ། དང་ཐོག་ང་ཚོས་ཁོ་པ་ཚོའི་རང་དབང་ལ་ལྟ་ཉན་གྱི་གོ་སྐབས་།ཐོབ་དགོས་ཀྱི་ཡོད།

ང་ཁྱོད་ཚོར་སྨོན་པ་འཆོར་གྱིན་ཡོད། ཁྱོད་ཚོ་ཕལ་མོ་ཆེ་ཕུལ་བྱུངགི་མི་སྣ་རྐྱང་རེད་ལ་རྒྱལ་ནང་དུའང་མཐོ་རིམ་སྤྱི་ཚོགས་ནང་འཚོ་སྡོད་བྱེད་བཞིན་ཡོད། ཁྱོད་ཚོ་ཕལ་ཆེ་བ་འདས་ད་གང་རུང་དུ་སློབ་སྦྱོང་གཟེངས་སུ་ཐོན་ལ་འབྱུང་འགྱུར་རམ་ད་ལྟའི་སྤྱི་ཚོགས་ནང་གལ་ཆེའི་མི་སྣ་ཡིན་པས་ཆེ་ཆུང་ལ་མ་ལྟོས་པར་མིང་དུ་གྲགས་པའི་མི་སྣ་ཞིག་རེད། ཡིན་ནའང༌། ཀྲུང་གོའི་མི་གྲངས་ཕལ་ཆེ་བ་དམའ་འབྲིང་སྤྱི་ཚོགས་ན་འཚོ་བཞིན་ཡོད་པས་ཁོང་ཚོར་དབང་འབྱོར་གང་ཡང་མེད། ཀྲུང་གོའི་ཞིང་པ་དུང་ཕྱུར་དགུ་ཙམ་ཡོད་པའི་ནང་དུ་མང་པོ་ཞིག་ཧ་ཅང་གི་དབུལ་ཕོངས་རེད། གྲོང་ཆེར་ནང་ཁུལ་གྱི་དམའ་འབྲིང་ཡོང་སྒོ་ལས་མེད་པའི་མི་འདི་དག་ཀྱང་ཉིན་ཐོག་ཟླ་ཐོག་ཏུ་ཟོག་རིན་དང་ཁང་གླས་ཡི་མུག་བཞིན་ཡོད། ཁྱོད་ཚོ་གང་མང་ཞིག་གིས་ཁོང་ཚོའི་སྐྱིད་སྡུག་མྱོང་ཚུལ་ལ་རྒྱུས་ལོན་འགན་བཞེས་ཀྱི་འདོད་འདུན་མེད་པའང་ངས་ཧ་གོ་དོན་རྟོགས་ཡིན། ཁྱོད་ཚོས་ཨ་རི་དང་ཡུ་རོབ་ཀྱི་གྲོགས་པོ་དག་ལ་མཐོར་ལྟ་བྱ་བཞིན་ཡོད་ནའང་ང་ཚོ་ལུང་ཁུག་གི་མི་འདི་ཚོར་ཐུར་ལྟ་བྱ་བཞིན་ཡོད།

ང་ཁྱོད་ཚོར་སྨོན་པ་འཆོར་གྱིན་ཡོད། ཅིའི་ཕྱིར་དུ་ཞེ་ན། ཁྱོད་ཚོ་ཕལ་ཆེ་བའི་དཔལ་འབྱོར་གནས་བབ་བཟང་བས་ཕ་མ་ཚོས་ཕྱི་རྒྱལ་དུ་སློབ་སྦྱོང་ལ་འགྲོ་རྒྱུའི་རྒྱབ་སྐྱོར་ཡང་བྱས་ཡོད། མ་གཞི་ཨ་རི་དང་ཡུ་རོབ་རྒྱལ་ཁབ་ཀྱི་ཚད་མཐོའི་སློབ་ཡོན་དང་འཚོ་བའི་གྲོན་དངུལ་ལ་གདོང་གཏོད་དགོས་ནའང༌། ཁྱོད་ཚོ་ལ་གནོན་ཤུགས་གང་ཡང་མེད། རྒྱལ་ནང་གི་མི་སེར་མང་ཆེ་བའི་ངོས་ཐད་ནས་གླེང་ན། ཁྱོད་ཚོའི་ཕ་མ་ནི་སྐུ་དྲག་མིན་ན་ཕྱུག་བདག་རེད་ལ་འབྱོར་ལྡན་གྱི་ཚོང་པ་མིན་ན་དབང་ཆེན་གྱི་དཔོན་པོ་རེད། དེའི་སྟེང་དུ་སྒྲིག་གཞིའི་ནང་ཁོངས་ཀྱི་མཐོ་རིམ་ཤེས་ལྡན་མི་སྣར་ང་ཚོས་ཁ་ཐུབ་ཀྱི་མེད། སྤྱིར་བཏང་བྱས་ན་རྒྱལ་ནང་གི་སློབ་ཡོན་འདིས་ནུབ་ཕྱོགས་རྒྱལ་ཁབ་དང་བསྡུར་ས་ཡེ་ནས་མི་འགྲོ་ནའང༌། ང་ཚོས་སྔར་ལྟར་གདོང་ལེན་བྱ་དཀའ་བས་འདི་དོན་དུ་སེམས་ངལ་མི་བྱ་ཐུ་མེད་རེད། ཐ་ན། ཁྱིམ་ཚང་ཁ་ཤས་དོན་གནད་འདིས་རྐྱེན་པས་སྐྱོ་སྡུག་གིས་མནར་ནས་ཡོད། ང་ཚོ་ཕལ་ཆེ་བ་ལ་ཁྱོད་ཚོ་ལྟ་བུའི་རྟེན་ས་བཟང་བའི་གཉེན་ཉེ་མེད་པས་ང་ཚོ་རང་ཉིད་འབའ་ཞིག་ལ་བརྟེན་དགོས་ཀྱི་ཡོད། གལ་ཏེ། ཁྱོད་ཚོ་ལ་སེམས་ཐག་པ་ནས་ཚད་མཐོའི་སྤྱོད་ལམ་འགན་བཞེས་ཀྱི་བློ་སེམས་མཆིས་ཚེ། ཁྱོད་ཚོས་འཛད་གྲོན་དུ་འགྲོ་བཞིན་པའི་རྒྱུ་རྫས་དེས་སྔར་ཉེས་སླར་ཡང་གསོག་མིན་ཐད་སོ་སོ་ནས་བསམ་ཞིབ་བྱ་འོས་པ་དང༌། གཉེན་ཉེ་ཚོས་ཀྱང་རྒྱལ་ཁབ་འདིའི་དོན་དུ་དགོས་ངེས་ཀྱི་ལེགས་སྐྱེས་ཕུལ་ཡོད་མེད་སོགས་བསམ་དགོས་པ་ལས། རང་སོ་སོས་འུད་སྒྲོག་བྱ་བཞིན་པའི་རྒྱལ་གཅེས་རིང་ལུགས་ཟེར་བ་དང༌། ཐ་ན། སྤུན་ཟླ་དེ་ཚོས་ལྟ་ཚུལ་ཐ་དད་པ་འགའ་འགྲེལ་བརྗོད་བྱས་པ་ལ་ཡང་འགན་ཁུར་ཞན་དྲགས་པ་བཅས་རེད།

ང་ཁྱོད་ཚོར་སྨོན་པ་འཆོར་གྱིན་ཡོད། གང་ལགས་ཤེ་ན། ཁྱོད་ཚོ་སྒེར་སྡོམ་གྱི་ཆབ་སྲིད་སྒྲིག་གཞི་འདིའི་འོག་ཏུ་འཚོ་སྡོད་བྱ་དགོས་ཀྱི་ཡོད་པ་མ་རེད། ཁྱོད་ཚོ་ཕལ་ཆེ་བ་ཕྱི་རྒྱལ་དུ་གང་ཟག་རང་སོ་སོར་ནུབ་ལུགས་ཀྱི་ཚད་ལྡན་ཆབ་སྲིད་དང་དཔལ་འབྱོར་འཚོ་བར་རོལ་མྱོང་བྱ་བཞིན་ཡོད་པ་ཙམ་མ་ཟད། དེ་དང་མཉམ་དུ་ཁྱོད་ཚོའི་ཕ་མ་ཚོ་ཡང་རྒྱལ་ནང་དུ་སྤྱི་ཚོགས་རིང་ལུགས་ལམ་སྲོལ་གྱི་ཁྱད་འཕགས་རང་བཞིན་ལ་ལོངས་སྤྱོད་བཞིན་ཡོད། འོན་ཏེ། བློ་སེམས་ཕངས་པ་ཞིག་ལ། མ་གཞི་ང་ཚོས་སློབ་དེབ་ཀྱི་ནང་ནས་སྤྱི་ཚོགས་རིང་ལུགས་ཀྱི་ཁྱད་འཕགས་རང་བཞིན་རྟོགས་སོང་ལ། གསར་ལམ་ཁག་བརྒྱུད་ནས་ཁྱོད་ཚོ་ནུབ་ཕྱོགས་སུ་རང་དབང་དང་དམངས་གཙོར་ལོངས་སྤྱོད་བཞིན་ཡོད་པ་ཧ་གོ་ནས་ཡོད། དེ་ལྟ་མོད་ཀྱི། ང་ཚོས་ནུབ་ཕྱོགས་པའི་རང་དབང་དང་དམངས་གཙོ་ལ་དངོས་སུ་རྒྱུས་མྱོང་བྱུང་མེད་པ་མ་ཟད། སྤྱི་ཚོགས་རིང་ལུགས་ཀྱི་ཁྱད་འཕགས་རང་བཞིན་གྱི་ལམ་སྲོལ་དེར་ཡང་དངོས་སུ་མྱོང་བ་ཐོན་མེད། ང་ཚོའི་ཁྲོད་ཀྱི་ཅི་འདྲའི་མི་མང་པོ་ཞིག་གིས་རྒྱལ་ཁབ་འདིའི་དོན་དང་སྲིད་གཞུང་འདིའི་སླད་དུ་ཆབ་སྲིད་ཀྱི་སྒྲིག་གཞིའི་གནད་དོན་སྣ་ཚོགས་པའི་ཉེར་ལེན་ལས་དཔལ་འབྱོར་དང༌། ཆབ་སྲིད། ལུས་པོ། བསམ་བློ། བཅས་ཀྱི་སྟེང་ནས་འདྲ་མཉམ་མིན་པའི་བྱ་སྤྱོད་མྱངས་ཚར་ལ། ཐ་ན། འཕྲོ་བརླག་ཀྱང་བཏང་ཚར།

ང་ཁྱོད་ཚོར་སྨོན་པ་འཆོར་གྱིན་ཡོད། གང་གི་ཕྱིར་ན། ཁྱོད་ཚོས་ཕུགས་བསམ་སྣ་ཚོགས་པ་ཡིད་ངོར་བཅངས་ཏེ་ཕྱི་རྒྱལ་དུ་ཕྱིན་པ་རེད་ལ། གང་མང་མང་ཞིག་གིས་ཨ་རིར་བཅངས་པའི་ཕུགས་འདུན་དང་ཧྥ་རན་སི། ཨོ་གླིང་བཅས་ཀྱི་ཕུགས་རེ་མངོན་འགྱུར་བྱུང་བ་རེད། འོན་ཏེ། ང་དང་རྒྱལ་ནང་དུ་ཡོད་པའི་ཆེས་མང་བའི་མི་འདི་ཚོ། སྒྲིག་གཞི་འདིའི་འོག་ནས་སྐབས་འཕྲལ་གྱི་བདེ་དགའ་འཚོལ་རྒྱུ་ཁོ་ན་ཙམ་ལས། ང་ཚོས་ཧམ་འདོད་ཀྱི་ཕུགས་རེ་མང་པོ་འཛིན་ཕོད་ཀྱི་མེད་པས་གཞི་རིམ་གྱི་བདེ་འཇགས་དང་རང་དབང་འགའ་ཞིག་ལ་རེ་སྨོན་བྱེད་རྒྱུ་ཙམ་རེད། ཡིན་ནའང༌། དེ་དང་མཉམ་དུ་ང་རང་མགོ་འཐོ་ས་ཞིག་ནི། ཁ་གདངས་ཚད་ལ་རྒྱལ་གཅེས་ཀྱི་དྲང་བདེན་སྐྱོང་མཁན་ཁྱོད་ཚོ། ཅིའི་ཕྱིར་དུ་ཁྱོད་ཚོ་ཡོངས་སུ་དགའ་མགུ་ཡི་རངས་ཐོབ་སའི་རྒྱལ་ནང་དུ་བསྡད་དེ་ཁོའི་འཕེལ་རྒྱས་ལ་རྒྱབ་སྐྱོར་མི་བྱེད་པ་རེད་དམ། ཁྱོད་ཚོ་ནི་ཅིའི་ཕྱིར་དུ་ཁྱོད་ཚོ་རྩ་ནས་མི་དགའ་སའི་ཨ་རི་དང་ཧྥུ་རན་སི་སོགས་ཀྱི་ནུབ་ཕྱོགས་རྒྱལ་ཁབ་དག་ཏུ་འཚོ་སྡོད་བྱ་འདོད་པ་རེད། འདི་ལྟར་ཁྱོད་ཚོ་སེམས་གཏིང་ནས་དགའ་བའི་མེས་རྒྱལ་གྱིས་ཀྱང་དོན་ངོ་མར་ཁྱོད་ཚོའི་ལས་སློབ་སོགས་ཀྱི་ཁོར་ཡུག་ལ་འདོད་བློ་ཁེངས་པ་ཞིག་མེད་སོང་བ་ཨེ་རེད། ཁྱོད་རང་མི་ཞིག་ལ་སེམས་པ་ཤོར་བའི་ཚེ། ཁོང་དང་མི་ཚེ་མཉམ་སྐྱེལ་གྱི་རེ་བ་བྱེད་ངེས་རེད་མོད། ཁྱོད་ཚོ་ཀྲུང་གོ་ལ་དགའ་ཞིང་ཆགས་པ་དེའི་ཚེ་ན་ཅིའི་ཕྱིར་དུ་ཡུལ་བྱོལ་གྱི་འཚོ་བ་བདམས་པ་རེད། གཅིག་བྱས་ན་ཁྱོད་ཚོས། ནུབ་གླིང་གི་ཕུལ་བྱུང་ལག་རྩལ་མངོན་པར་སྦྱངས་ནས། ཕྱིར་ནུབ་གླིང་པ་ཚོར་འགོག་རྒོལ་བྱ་ཟེར་བ་ཡིན་གྱི་རེད་ལ་ངས་ཀྱང་བརྗོད་ཚིག་འདིར་དགའ་བོ་བྱེད་ཀྱི་ཡོད། ཡིན་ནའང༌། གལ་ཏེ་ཁྱོད་ཚོའི་ཁྱིམ་མི་གནས་སྤོ་ཐུབ་པ་དང༌། ཡང་ན། མི་སེར་ལག་ཁྱེར་རག་ཐུབ་ཙམ་ཞིག་བྱུང་ན། ཁྱོད་ཚོའང་རྒྱལ་ནང་དུ་ཕྱིར་ལོག་འདོད་ཡོད་ཀྱི་མ་རེད་པ། བརྒྱ་ལ་ལོག་པའི་དབང་དུ་བཏང་ནའང་ཁྱོད་ཚོས་ཕྱིའི་བཙན་འཛུལ་ལ་བཀག་འགོག་དང་རྒྱལ་ཁབ་ཡར་རྒྱས་ཀྱི་ལས་དོན་ག་ཙམ་བསྒྲུབས་ཡོད་དམ། ཁྱོད་ཚོ་མེས་རྒྱལ་ལ་མི་དགའ་བ་སྲིད་དམ། རྒྱལ་ཁབ་འདིས་ཁྱོད་ཚོར་བཟའ་འཐུང་སེམས་ངལ་མེད་པ་སྦྱར་ལ། ཐ་ན། འབྱོར་ལྡན་དང་དཔོན་ཆེན་གྱི་ས་ལ་བསྐྱལ་ཡོད། ཁྱོད་ཚོ་ནི་རྒྱལ་ཁབ་འདིའི་ཁེ་བཟང་རག་མཁན་ཚོ་རེད། ཁྱོད་ཚོས་ཁོ་པར་དག་འབུད་མི་བྱེད་པ་སྲིད་དམ། ཀྲུང་གོར་གནའ་གཏམ་ཞིག་ཡོད་པ་སྟེ། ལངས་ཏེ་བཤད་ན་རྐེད་པ་མི་གནོད་ཟེར་བ་ལྟར། ཁྱོད་ཚོ་ད་ལྟ་ཕྱི་རྒྱལ་དུ་ཡར་ལངས་ཐུབ་པའི་མི་ཞིག་ཆགས་འགྲོ་གི་ཡོད་པས། ངེད་རྒྱལ་ནང་དུ་ཡོད་པའི་མགོ་སྒུར་གཉའ་ཞུམ་གྱི་སྤུན་ཟླ་འདི་ཚོར་རྩ་བ་ནས་སྣང་བ་རྒྱ་ཡན་དུ་བྱས་ཡོད།

ཁྱོད་ཚོའི་ཁྲོད་ཀྱི་མི་ག་ཙམ་གྱིས་མི་ལོ་བཅུ་དགུའི་ཡར་སྔོན་གྱི་གནམ་བདེ་སྒོ་མོ་ཆེའི་ཐང་ཆེན་གྱི་དོན་རྐྱེན་དེ་བརྒྱུད་མྱོང་བ་ཤེས་ཀྱི་མེད་ལ། ཁྱོད་ཚོས་སྐབས་ཐོག་དེའི་གནས་ཚུལ་ལ་རྒྱུས་ལོན་ག་ཙམ་ཡོད་པའང་ངས་ཤེས་ཀྱི་མེད། མི་ལོ་བཅུ་དགུའི་ནང་མེས་རྒྱལ་གྱི་དཔལ་འབྱོར་དེས་འཛམ་གླིང་ཡོངས་ཧང་སངས་སུ་བཅུག་པའི་གྲུབ་འབྲས་ལ་ཁྱོད་ཚོ་ཞེན་ཆགས་ནས་ཡོད་པ་དང་སྦྲགས། ཁོ་བའི་ཆབ་སྲིད་ཀྱང་འཛམ་གླིང་ཡོངས་སྐྱི་གཡའ་དགོས་པའི་ཕྱི་ནུར་གྱི་བྱུང་བ་དེར་མནོ་བསམ་བཞེས་མྱོང་ངམ།

བློ་ཕངས་པ་ཞིག་ལ། མ་གཞི་ཁྱོད་ཚོ་ཁྲིམས་ཐོག་ནས་ཀྲུང་གོའི་མི་ཞིག་ཡིན་མོད་ཀྱི་ཡིན་ནའང་ཁྱོད་ཚོས་ཀྲུང་གོར་འཛིན་པའི་རྒྱུས་མངའི་ཚད་གཞི་ནི་ཀྲུང་གོར་རྒྱུན་སྡོད་ཀྱི་ཕྱི་རྒྱལ་གསར་འགོད་པ་འདི་དག་དང་བསྡུར་ཐབས་གཏན་ནས་མེད། ཁྱོད་ཚོས་ཁ་གདངས་ཚད་དུ་བོད་རང་བཙན་ལ་ངོ་རྒོལ་ཡོད་ཟེར། འོན་ཏེ། བོད་མི་དམངས་ཀྱི་དངོས་ཡོད་འཚོ་བའི་གནས་སྟངས་ལ་རྒྱུས་ལོན་ཅི་ཡང་མེད། དེར་བརྟེན་ཀྲུང་གོའི་གནད་དོན་འདྲ་མིན་གྱི་ཐད་ནས། ཐ་ན། ཁྱོད་ཚོ་ལ་སྨྲ་བརྗོད་ཀྱི་དབང་ཆའང་ཡོད་མི་འོས་པ་ཞིག་རེད།

ང་ཡང་མེས་རྒྱལ་ལ་དགའ་ཞེན་ཡོད། ཡིན་ནའང༌། ཁྱོད་ཚོ་ལྟར་ཕྱི་རྒྱལ་ལ་ཕྱིན་ཡོད་པ་མ་རེད་ལ། དེ་འདྲའི་ཡིད་སྨོན་ཡང་འཆོར་གྱིན་མེད། ང་ནི་འདི་ལྟར་རྒྱལ་ནང་དུ་བསྡད་ནས་རྒྱལ་ཁབ་འདིའི་ཆབ་སྲིད་དང་དཔལ་འབྱོར་འཛུགས་སྐྲུན་ནང་ཞུགས་ཀྱིན་ཡོད། གང་ལགས་ཤེ་ན། རྒྱལ་གཅེས་ཟེར་བ་ཁ་ཡོད་ལག་ཡོད་ཀྱི་ལག་ལེན་ལ་བལྟ་དགོས་པ་ལས་ཚིག་སྐམ་ཁ་ལ་ཡོད་མེད་ལ་བལྟ་རྒྱུ་དེ་མ་རེད། ངས་མེས་རྒྱལ་ལ་ཐལ་དྲག་པའི་བསྔགས་བརྗོད་ཀྱང་བྱེད་ཀྱིན་མེད། དེ་ཅིའི་ཕྱིར་ཞེ་ན། ཧ་ཅང་མང་དྲགས་པའི་བསྔགས་བརྗོད་ཀྱིས་རྒྱལ་ཁབ་འདི་ཚད་བརྒལ་གྱི་ང་རྒྱལ་སྐྱེ་འོང་བ་དང༌། རྒྱལ་ཁབ་འདིས་རང་ཉིད་ཀྱང་བརླགས་འོང༌། དེའི་ཕྱིར་ན། སྐབས་འགའ་རེར་རྒྱལ་ཡོངས་ཀྱིས་གཟེངས་བསྟོད་དང་རང་རང་གིས་ཆེ་བརྗོད་བྱེད་པའི་ཚེ་ན། ང་དང་མི་མང་པོ་ཞིག་གིས་གཅིག་མཚུངས་ཀྱིས་རྒྱལ་ཁབ་འདིར་སྐྱོན་མཚང་གི་རྣམ་འགྱུར་འཛིན་པ་དེ་ནི་རང་ཉིད་ཀྱི་ཕྲུ་གུའི་ནོར་འཁྲུལ་ལ་སྐྱོན་བརྗོད་བྱེད་པ་དང་གཅིག་པ་རེད།

རྒྱལ་གཅེས་ཀྱི་ཕྱི་སྐྱོད་སློབ་གྲྭ་བ་ཚོ། ངའི་རེ་བ་ལ་ཁྱོད་ཚོས་འདི་ལྟ་བུའི་རང་འདོད་མ་བྱེད་ཅིག ཁྱོད་ཚོས་རྒྱུས་ལོན་མེད་པའི་སྤྱི་ཚོགས་རིང་ལུགས་ཀྱི་ཀྲུང་གོར་མང་ཐལ་གྱི་བསམ་འཆར་འདོན་མ་ཡོང་རོགས། ཁྱོད་ཚོའི་དབང་ཤེད་ཀྱིས་སླར་ཡང་ངེད་ཅག་གི་ལྟ་ཚུལ་ལ་གཉའ་གནོན་མ་བྱེད་རོགས། གལ་ཏེ། ཁྱོད་ཚོས་རྒྱལ་ཁབ་འདིར་སྙིང་ནས་དུང་བ་ཡོད་ན་རྒྱལ་ཁབ་འདིའི་བཅོས་བསྒྱུར་ལ་རོགས་ཕན་དང་རྒྱལ་ཁབ་འདིའི་འཕེལ་རྒྱས་ལ་གྲོགས་དན་མཛོད་ཅིག ནམ་ཡང་ལོ་རྒྱུས་ཀྱི་ཟིན་ཐོའི་ནང་དུ་སྐྱིད་ཉལ་རྒྱག་ཏུ་མི་འཇུག་པར་རྒྱུན་ཆད་མེད་པར་མདུན་སྐྱོད་བྱ་རུ་ཆུགས་ཤིག ཞོར་དུ་ཁྱོད་ཚོས་ནུབ་ཕྱོགས་རིག་གནས་ཀྱི་ཉིང་བཅུད་ཐོབ་པར་འབོད་ཅིག སྐྱི་ལྤགས་ལྟ་བུའི་ཐབས་ཆག་ཅིག་སྦྱངས་ནས་ཚུར་ལོག་སྟེ་ཕྱི་གླིང་བའི་སྡུག་འདྲེ་རྫུན་མ་ཞིག་བྱེད་མ་ཡོང་རོགས།

རྒྱལ་ནང་དུ་ཡོད་པའི་ཀྲུང་གོའི་སྤྱི་དམངས་ཞིག་གིས། ༢༠༠༨ ༤ ༢༨ ལ།

མ་རྩོམ་བོད་ཀྱི་ཡིག་སྒྱུར་ཁང་ནས་པར་སྐྲུན་འགྲེམས་སྤེལ་ཞུས་པའི<>ཞེས་པའི་ནང་འཁོད་ཡོད་པས་དེར་གཏུག་ན་འཐུས།