ཕྱི་སྡོད་ཡུལ་ཤུལ་བས་བདུན་ཚིགས་སྨོན་ལམ་གསུངས་པ།

མི་རྐང་གླིང་བུ།

དེ་རིང་མདོ་ཁམས་ཡུལ་ཤུལ་བ་རང་བྱུང་གི་རྐྱེན་ངན་བྱུང་ནས་ཉིན་གྲངས་བདུན་པ་དང་། ཕྱི་མིག་གཅེར་བཞིན་བཞུད་སོང་བའི་འདས་པོ་དེ་དག་གི་བདུན་ཚིགས་དང་པོ་དེ་རེད། དུས་ཚིགས་འདི་བོད་རྒྱུད་ནང་བསྟན་ཉམས་ལེན་བྱེད་མཁན་དག་གི་དབང་དུ་བྱས་ན་གལ་འགངས་ཆེ་བའི་ཉི་མ་ཞིག་རེད།

དེ་རིང་རྣམ་ཤེས་ཁྲི་སྟོང་མང་པོ་དེ་དག་ལ་ང་ཚོས་གྱེས་མཇལ་ཞུ་དགོས་ལ་མ་བཅོས་པའི་འཛུམ་ཆུང་མདུན་དུ་བསུས་ནས་ག་ལེར་ཕེབས་ཞེས་ཞུ་དགོས། དེས་ན་དེ་རིང་འཛམ་གླིང་གང་སར་འཁོད་པའི་བོད་རིགས་སྤྱི་དང་། ལྷག་པར་ཡུལ་ཤུལ་བ་དེ་དག་གིས་གཤིན་པོ་དེ་དག་ལ་བཀའ་སྡེ་སྡོད་གསུམ་གྱིས་སྐྱེལ་མ་བྱེད་བཞིན་ཡོད་ལ་ལམ་ཕ་རོལ་ཏུ་ཕྱིན་པ་དྲུག་གིས་རྫོང་བ་བྱེད་བཞིན་པ་ཡིན། ད་དུང་སེམས་ཁོང་གི་མུན་པ་ཟབ་ས་ནས་སྣང་གསལ་གྱི་མར་མེ་རེ་སྦར་ཡོད་ལ་ཕྱི་མིག་གི་འཁྲེང་ཞེན་རེ་རེ་ལ་མ་ཎི་དྲུག་འགྱུར་གྱིས་ངག་རྟ་རེ་རེ་དྲངས་ཡོད། དེ་ལྟར་དུ་འདི་ན་གཞན་དབང་གི་ལུང་པར་སྐྱབས་བཅོལ་ཞིང་། རྒྱ་མཚོའི་ཕར་རོལ་ཚུལ་རོལ་གྱི་འགྲམ་ན་གནས་པའི་ཡུལ་ཤུལ་བ་དེ་དག་གིས་ནམ་ཕྱེད་བར་དུ་བཞུད་ཟིན་པའི་ཕ་མ་སྤུན་མཆེད་རེ་རེའི་འཛུམ་མདངས་ཡིད་ལ་ཤར་བཞིན་དུ་སྨོན་ལམ་དྲི་མ་མེད་པས་རྫོང་བ་བྱས་སོང་། །