གཉན་ཆེན་གྱིས།
རྡ་སའི་རི་ངོགས་རང་གི་ཕ་ཡུལ་འདྲ།།
ལོ་ངོ་བཅུ་ཕྲག་འདི་ནས་བསྐྱལ་བ་ཡིན།།
གྲོགས་པོ་གྲོགས་མོ་འདི་ནས་བསྒྲིགས་པ་ཡིན།།
བཟང་ས་རྒྱན་ས་འདི་ན་མང་བ་ཡོད།།
སྐད་ཆ་བཟང་ངན་གཉིས་ཀ་གོ་ས་ཡིན།།
ཕ་ཡུལ་གཅིག་པའི་དཔུང་རོགས་སྒྲིག་ས་ཡིན།།
ཕ་མ་མེད་པའི་དྭ་ཕྲུག་མང་ས་ཡིན།།
ཏཱ་ལའི་བླ་མར་རྟག་པར་མཇལ་ས་ཡིན།།
ཨ་ནེ་གྲྭ་བའི་འདུ་འཛི་ཆེ་ས་ཡིན།།
གྲྭ་བ་ཇོ་མས་སྙིང་གཏམ་བཤད་ས་ཡིན།།
གྲྭ་ལོག་ལྟ་ལོག་མང་བོ་འདུ་ས་ཡིན།།
བན་ཏེ་བོན་པོ་གཉིས་ཀ་མཐུན་ས་ཡིན།།
གསར་འབྱོར་རྙིང་འབྱོར་རྩོད་པ་རྒྱག་ས་ཡིན།།
དབུལ་ཕྱུག་བཟང་ངན་གཉིས་ཀ་འཛོམས་ས་ཡིན།།
གཡོ་ཅན་བླུན་པོས་མཁས་མདོག་སྟོན་ས་ཡིན།།
མཁས་པའི་བགྲོ་གླེང་རྟག་པར་ཡོད་ས་ཡིན།།
ཞིང་བ་འབྲོག་པས་ཡི་གེ་སྦྱང་ས་ཡིན།།
རྨོངས་པ་མཁས་པའི་གོ་འཕང་འཐོབ་ས་ཡིན།།
བཀའ་སློབ་འཆད་ཉན་ཆོས་ཀྱི་གདན་ས་ཡིན།།
སྲིད་ཀྱི་བྱེད་སྒོ་རྒྱལ་ས་གཉིས་པ་ཡིན།།
བྱ་བྱེད་མང་ན་ཁྲམ་པ་ཆགས་ས་ཡིན།།
རྒྱ་ཡི་སོ་ཉུལ་འདུར་རྒྱུག་ཆེ་ས་ཡིན།།
སོས་དལ་བག་ཕེབས་དུས་ཚོད་སྐྱེལ་ས་ཡིན།།
ཡིག་ཆ་མེད་ན་བར་དོ་ཆགས་ས་ཡིན།།
ནུབ་ཕྱོགས་ཡུལ་ལ་འཕུར་འགོ་བརྩམས་ས་ཡིན།།
རང་ཡུལ་དྲན་ནས་ཕྱིར་ལ་ལོག་ས་ཡིན།།
བྱང་ཕྱོགས་ཁ་བ་ཅན་ནས་སྨོན་ས་ཡིན།།
ནུབ་ཕྱོགས་བདེ་བ་ཅན་ནས་དྲན་ས་ཡིན།།
༢༠༡༣ ༩ ༣༠ ཉིན།
རྡ་ས་ལྷ་ས་ཆུང་ཆུང་འདི་ན།
དབྱིན་མོ་ལྷ་མོ་མཛེས་མ་མང་ས།།
གསར་རྒོད་ལྷ་རིགས་སྐྲ་རིང་གཞོན་ནུ།
དགའ་བདེ་ལྷ་ཡི་འདུ་རར་འཁྱམ་འདྲ།