རེབ་ཐོག་མདའ།
ཇོ་མོ་བླ་རིའི་མགོ་འཕང་དགྱེ་ནས་ཡོད་དམ།།
རྨ་འབྲི་རྫ་གསུམ་ཤུགས་ཀྱིས་བཞུར་གི་ཡོད་དམ།།
མདོ་དབུས་ཁམས་ཕུ་ནུ་བདེ་མོ་ཡིན་ནམ།།
མ་བརྗེད་གྲོགས་ཀྱིས་ལན་གཅིག་བསྐྱེལ་རྒྱུ་བྱུང་ན།།
སྐྱིད་ཀྱིསའཛུམ་ཆུང་འཁྱིལ་བའི་ཕ་ཡུལ་དེ་ན།།
ཨ་མའི་སེམས་ཀྱིས་སྨོན་ལམ་རྒྱང་ལ་བཏབས་འདུག།
དགུན་གྱི་ནམ་ཟླ་འཁུར་བའི་རི་གྲོང་འདི་ན།།
མི་རྐྱང་སེམས་པ་གངས་རིའི་གྲོང་ལ་འཁྲེང་ཡོད།།
སྣ་བརྒྱའི་མེ་ཏོག་བཞད་པའི་རྩྭ་ཐང་སྟེང་གི །
སྙིང་སྡུག་མཛའ་མོས་མཛའ་གཞས་རྒྱང་ལ་བསྲིངས་ཐལ།།
ནམ་ཟླ་འཁྱག་གིས་བསྡམ་པའི་ས་མཐའི་གྲུ་ན།།
ཁེར་རྐྱང་སེམས་པ་སྤང་གི་བུ་མོར་ཆགས་ཡོད།།
ཟླ་བའི་རྨི་ལམ་འཁྲུངས་པའི་སྦྲ་ནག་སྨུག་པོ།།
མཚམས་སྤྲིན་དམར་པོའི་ཀློང་ན་ཁེར་རྐྱང་ལྷག་ཀྱང་།།
དུས་བཞིའི་ནམ་ཟླ་རུམ་པའི་གངས་རི་མཐོང་དུས།།
ཕ་ས་ཕ་ཡུལ་ཕྱོགས་ལ་སེམས་འདི་ཐོགས་གི།
ཡིག་དྲུག་ངག་ན་གྱེར་བའི་དབྱངས་རྟ་སྙན་མོ།།
སྐྲ་དཀར་རྒན་མོས་རྒྱང་རིང་ཨ་ཇོར་བསྐུར་ཐལ།།
མིག་ཟུང་མཆི་མས་བརླན་པའི་ཕ་ཡུལ་ཕྱོགས་ལ།
ལྷ་དང་བླ་མའི་སྤྱན་གྱིས་གཟིགས་རྒྱུ་བྱུང་ན།།
མཐོ་སྒང་གངས་རིའི་ཕ་ཡུལ་ཁ་བའི་གྲོང་ན།།
དད་འདུན་གཙང་མའི་རེ་སྒུག་རྒྱང་ལ་འཐེན་འདུག།
རང་དབང་རྡ་སའི་རི་ཁུག་དོག་མོའི་གཞུང་ནས།།
བླ་མའི་བྱིན་རླབས་ཐོབ་པའི་སྐྱབས་མཇུག་ཞུ་ཆོག།
གཞིས་བྱེས་གཉིས་སུ་གྱེས་པའི་ལོ་ཟླའི་ཁྲོད་ནས།།
སྐྱབས་བཅོལ་ལོ་ཟླ་ཞིག་གི་མིང་བྱང་ལྕི་ཡང་།།
ལས་དབང་ཟད་པོའི་འདབས་ཀྱི་ང་དང་ཨ་ཇོས།།
ཁ་བའི་གངས་རིའི་ལས་དབང་སྙིང་ལ་བརྐོས་ཆོག།
ཀ་ཁའི་ལས་དབང་གླེང་བའི་སློབ་རྭའི་གྲུ་ན།།
ཕ་སྐད་གཙང་མའི་ཁ་ལྕེ་རླུང་གིས་འཁུར་དུས།
གངས་རིའི་ཕ་ཡུལ་བོར་བའི་རང་དབང་ཚང་འདི།།
གཞན་སྐད་བོད་སྐད་བསྲེས་པའི་གཞུང་ལ་འཐིམས་འདུག།
རེ་བ་གཞན་ལ་བརྒྱབ་ནས་དུས་ཕྱེད་འགོར་ཐལ།།
རི་དང་གཙང་པོས་རྒས་ཉམས་ལུས་ལ་གྱོན་འདུག།
ས་མཐའི་འཚོ་བའི་ཀློང་ནས་ཨ་ཐང་ཆད་ཀྱང་།།
ཕ་ཡུལ་ལམ་ཐག་རི་ཆུ་སྟོང་གིས་བཅད་འདུག།
༢༠༡༢ ཟླ ༡ ཚེས ༡༢ ཉིན་ཕ་ཡུལ་ལ་ཆས་པའི་གྲོགས་པོ་ཞིག་དང་ཁ་བརྡ་བྱས་རྗེས།