བོད། ལྷ་ཀླུ་གཉན་གསུམ
སྐྱེ་དུས་སུ་ངའི་རང་ངོ་མི་ཤེས་ཟེར་ན་འགྲིག ད་དུང་། སྐད་ཆ་ཡང་བཤད་ག་ལ་ཤེས། གཅིག་ཤེས་པ་དེ་ནི་ངུ་རྒྱུ་དེ་རེད། ལྟོགས་པའི་ཚེ་ན་ངུ་། དགའ་བའི་ཚེ་ན་དགོད། དགའ་སྐྱོ་ཆགས་སྡང་ནི་རང་ལག་དུ་ཡོད་པ་རེད། གཅིག་མི་ཤེས་པ་དེ་ནི་རང་ངོ་རེད་ལ། སྐད་ཡིག་གང་གི་ཁུངས་སུ་ཡང་མི་གཏོགས་པའི་མི་བུ་ཞིག་རེད།
ལོ་ཟླ་རིམ་འདས་ཀྱི་རྗེས་སུ། ངས་སྐད་ཆ་བཤད་། སྐད་ཆ་དེ་ནི་བོད་སྐད་རེད། རྒྱུ་མཚན་ནི་ངའི་ཕ་མ་གཉིས་ཀ་བོད་མི་རེད། ཁོང་རྣམ་པ་གཉིས་ཀྱིས་ང་ལ་བསླབ་པ་དེ་ཡང་བོད་སྐད་ལས་གཞན་ཞིག་གང་དུ་ཡོད། དེ་ནས་བཟུང་ངས་བཤད་ཤེས་པའི་སྐད་ཐོག་མ་དེ་ནི་བོད་སྐད་ཡིན་ལ། ང་ལ་བོད་པའི་རྣམ་ཤེས་ཤིག་ཡོད་པ་དེ་ནས་བཟུང་ངེས་འཛིན་བྱས་ན་འགྲིག་པ་ཡིན།
ལོ་ཟླའི་གནས་བབ་དང་། བྱིས་པའི་ལོ་ཚད་དང་བསྟུན་ནས་ངའི་ཕ་མ་གཉིས་ཀྱིས་ང་རང་སློབ་གྲྭ་ཞིག་ལ་བསྔགས། སློབ་གྲྭ་དེ་ནས་ཀྱང་ངས་བོད་ཀྱི་སྐད་ཡིག་སྤྱངས། ང་རང་ཡང་བོད་ཀྱི་སྐད་ཡིག་ལ་དགའ་བའི་མི་བུ་ཆུང་ཆུང་ཞིག་དུ་གྱུར། དེ་ནས་བཟུང་། ང་རང་གི་ཤེས་པ་དེ་ནི་བོད་ཡིག་རེད། ངས་ཀྱང་རང་ཉིད་ལ་དབང་བའི་སྐད་ཡིག་ནི་བོད་ཀྱི་སྐད་དང་ཡི་གེ་ཡིན་པ་ཤེས་པའི་ལམ་ཕྲན་དང་བོ་དེ་ནས་བྱུང་།
ལམ་ཕྲན་དེ་ནས་ང་རང་ག་ལེར་སོང་དུས། ང་ལ་ང་ལས་ལྷག་པའི་རིན་ཐང་ཞིག་ཡོད་པ་ཤེས་སོང་། དེ་ནི་ང་རང་གི་སྐད་ཡིག་ལས་རྙེད་པའི་མི་བུའི་འདུ་ཤེས་དང་། མི་བུའི་བསམ་བློ། མི་བུའི་ནུས་པ། མི་བུའི་གོ་རྟོགས། མི་བུའི་མདུན་པ། དེ་དག་གི་གསང་དུ་ཡང་། གསང་བའི་ཡིག་འབྲུ་ལས་འབུར་བའི་བསྐལ་བ་སྟོང་གི་གསེར་སྲང་གི་བཞེང་བའི་གཙུག་ལག་གི་གླེག་བམ་ཆེས་མི་ཉུང་བ་ཞིག་མིག་ལམ་དུ་ཤར་ནས་འོང་དུས། རང་ཉིད་ཀྱི་འགན་འཁྲི་ནི་རང་གི་ཚེ་སྲོག་ལས་ཀྱང་ལྕི་བ་ཤེས་སུ་བཅུགས།
སྐབས་འདི་འདྲ་ཞིག་ལ། བར་ཆད་ཀྱི་རླུང་འཚུབ་ཅིག་གིས། སྡོང་ལཽ་འདྲ་བའི་ང་ཡི་མི་ཚེ་ལ་སྐད་ཅིག་རེ་རེ་བཞིན། མི་འདོད་ཀྱང་ལྡོག་དུ་མེད་པའི་འགྱུར་བ་ཆེན་པོ་བྱུང་། དེ་ནས་བཟུང་། ངས་བཤད་དགོས་པ་དེ་ཡང་རང་ཉིད་ཆུང་ནས་བསླབ་པའི་སྐད་ཡིག་དེ་མིན་ལ། རང་ཉིད་ཆུང་ནས་འདྲིས་པའི་ཤ་གསེང་རུས་གསེང་ལ་འཇར་བའི་རྩམ་དྲི་འཐིལ་བའི་བོད་སྐད་དེ་མིན། ཡིན་ཡང་། ངས་ཉིན་རེ་བཞིན་སྤྱོད་ཀྱིན་པ་དེ་ནི་མི་བུ་གཞན་ཞིག་གི་ཐོབ་ཐང་དང་བདག་དབང་ཡོད་པའི་སྐད་ཡིག་ཞིག་དུ་གྱུར་ཡོད་ཀྱང་། དེ་ཡིས་ང་ལ་བརྩེ་བ་སྟེར་ཐུབ་ཀྱི་མི་འདུག་ལ། དེ་ཡིས་ང་ལ་ནམ་ཡང་སེམས་པ་བརླན་ཐུབ་ཀྱི་མི་འདུག ད་དུང་། དེ་ཡིས་ང་རང་བོད་མི་ཡིན་པའི་བདེན་དབང་དེ་ཡིན་བྱེད་ཐུབ་མ་སོང་།
ངས་ཀྱང་ང་རང་ངོ་མ་ཤེས་པར་ལོ་ངོ་གང་ཙམ་ཕྱིན་སོང་།
ང་ཡང་སྟོན་རླུང་གིས་ཁུར་བའི་ཤིང་ལོ་ཞིག་དང་འདྲ་ལ་རང་གི་འཁོར་ཡུག་ནས་བྲལ་དགོས་བྱུང་མོད། འདས་བའི་ལོ་འདི་ཚོ་ནང་ལ་བོད་སྐད་དང་བོད་ཡིག་གང་ཐུབ་ཐུབ་ཀྱིས་བེད་སྤྱོད་བྱེད་བཞིན་ཡོད། ༩༠་ནང་ཀློག་ཀླད་དར་ཡོང་སྐབས་བོད་ཡིག་ཀློག་ཀླད་ཐོག་འབྲི་བའི་ཆ་སྐྱེན་མེད་སྐབས་སྨྱུག་ཐོག་ནས་ཐག་རིང་གི་ཡུལ་མི་དང་གྲོགས་པོ་ལ་བོད་ཡིག་ཐོག་འཕྲིན་ཡིག་བྲིས་ལ་རིམ་གྱིས་tcrcསོགས་སྤྱད་ནས་བོད་ཡིག་ཀློག་ཀླད་ཐོག་བེད་སྤྱོད་ཐུབ་སོང་། ད་ནི་ཉིན་ལྟར་iPad དང་iPhone སོགས་བརྒྱུད་བོད་ཡིག་ཐོག་བརྡ་འཕྲིན་དང་ཀློག་འཕྲིན་འབྲི་བཞིན་པ་དང་ལྷག་པར་ཉིན་རེའི་ཁ་པར་ཐོག་མ་དེ་ཡང་བོད་སྐད་ཐོག་ཕ་ཡུལ་ན་ཡོད་པའི་ཚོང་རོགས་སོགས་ཡིན་པས་དགའ་སྣང་ཞིག་འདུག
བསོད་ནམས་ལགས། ང་ཚོས་ག་ལེར་ཞིབ་དུ་རང་གིས་གདོང་ལ་བལྟ་ཐེངས་རེར། དབུགས་རིང་རེ་འཐེན་པ་ལས་ཐབས་གཞན་ཞིག་ཇི་ལྟར་རྙེད་པར་བརྩོན་དགོས་མིན་དེ་ཡི་ཕྱོགས་སུ་བསམ་བློ་ཨེ་བཏང་ལགས།
སངས་རྒྱས་བསྟན་པ་ཆོས་དར་ལགས། ཁྱེད་རང་ནི་སྔོན་ཐོན་དང་ཡར་རྒྱས་ཀྱི་ལམ་དུ་ཡོད་ཀྱང་། འུ་ཅག་གི་མི་རིགས་འདིའི་བདེ་སྡུག་གི་ལས་དབང་དེ་ནི་ད་དུང་ཡིད་སྐྱོ་བ་ཞིག་གི་གནས་བབ་ཁྲོད་དུ་ཡོད་དུས། སྐུ་ཉིད་ལ་་དེ་ཡི་ཐད་དུ་བསམ་ཚུལ་ག་རེ་ཡོད་དམ།
བོད། ལྷ་ཀླུ་གཉན་གསུམ་ལགས།
ངས་བལྟས་ན་འུ་ཅག་གངས་ཅན་པའི་ལས་དབང་འདི་ལ་ཡིད་སྐྱོ་དགོས་གཅིག་པོ་མ་ཡིན་པར་ཡིད་དགའ་དགོས་བ་ཞིག་ཡང་མཐོང་།
སྐྱོ་དགོས་བ་ནི་བརྗོད་མ་དགོས་བར་ང་རང་ཚོའི་རང་ས་གཞན་ལ་ཤོར་ཡོད་པ་ལས་བྱུང་།
འོན་ཀྱང་དགའ་དགོས་བ་དེ་ནི་ང་ཚོའི་མི་རབ་སྔོན་མ་དག་གིས་ང་ཚོ་ལ་བསྟན་པའི་ལམ་ཁ་དེ་ཡིན། སྔོན་ང་རང་ཡང་སྐྱབས་བཅོལ་བོད་གཞུང་གིས་འབྱོན་མི་འདུག་ཞེས་དང་བོད་པ་ལ་སྔོན་ཐོན་གྱི་བསམ་པ་མི་འདུག་ཞེས་སྐྱོན་བཙལ་མཁན་ཞིག་ཡིན།
ད་ལྟ་ངས་སེམས་བཀུག་ནས་བལྟས་ན་ང་ཚོའི་མི་རབ་སྔོན་མ་ཚོས་རང་ས་ཤོར་ནས་རྐང་འགོར་ལྷམ་དང་ཁ་ཕོར་ནང་ཟ་མ་མེད་པར་ཡོད་ཚད་ཀྱི་ཡོད་ཚད་ཡུལ་ལ་ལྷག་ནས་སྐྱབས་བཅོལ་ལ་སླེབས་དུས་མྱོན་པ་མ་ཆགས་པར་ལམ་ལས། ཤིང་གནག་གཅོད་པ་སོགས་དཀའ་ལས་བརྒྱབ་ནས་ང་ཚོ་བོད་པ་ཞེས་ཆོལ་གསུམ་གཅིག་སྒྲིལ་གྱི་བཙན་བྱོལ་གཞུང་འདི་བཙུག་ཐུབ་ཡོད་པ་འདི་ནི་བདག་ཅག་བོད་པ་ཕྱི་རབ་པ་རྣམས་དགའ་དགོས་བ་ཞིག་རེད་འདུག