གཞུང་པ་ཚེ་དབང་བསོད་ནམས།
དེང་སྐབས་རང་རེ་བཙན་བྱོལ་སྤྱི་ཚོགས་ནང་སྲིད་སྤྱིའི་འོས་བསྡུ་སླེབ་ལ་ཉེ་བའི་སྐབས་འདིར་སྔོན་འགྲོའི་འོས་བསྡུ་མི་མང་ནས་མ་གནང་སྔོན་དུ་གཞུང་ཞབས་ཟུར་པ་ཡིན་ཟེར་མཁན་དང་། སྤྱི་ཟུར་ཡིན་ཟེར་མཁན། ཆབ་སྲིད་བརྩོན་ཟུར་ཡིན་ཟེར་མཁན་སོགས་མི་སྣ་ཁག་གཅིག་ནས་ཕྱོགས་གཏོགས་དང་། འགོ་འདྲེན། སྐབས་ཚོལ། གྲལ་རིམ་དམངས་གཙོ་ལ་འགན་ཁུར་ནས་རང་གི་འདོད་ཕྱོགས་ཀྱི་མི་སྣ་སྲིད་སྐྱོང་གི་འོས་མིར་གསལ་བསྒྲགས་དང་རྒྱབ་སྐྱོར་སོགས་ངོ་དེབ་དང་དྲ་ལམ་ནང་ཁྱབ་སྤེལ་བྱེད་བཞིན་པ་དེ་དག་གཞི་རིམ་འོས་འཕེན་རྒྱ་ཆེ་མི་མང་གིས་བསམ་སྤྱོད་རང་དབང་ལ་བརྡོ་ཕོག་དང་ཆོལ་གསུམ་བོད་མིའི་ཆིག་སྒྲིལ་ལ་ཉམས་ཆགས་འགྲོ་གཞིའི་ལས་འགུལ་དེ་རིགས་བཙན་བྱོལ་བོད་མིའི་བཅའ་ཁྲིམས་དང་བཙན་བྱོལ་བོད་མིའི་འོས་བསྡུའི་སྒྲིག་གཞི་དང་ཕྱོགས་མཐུན་བྱུང་ཡོད་མེད་ཐེ་ཚོམ་ཆེན་པོའི་ནང་ལྷག་པ་ནས་དབུས་འོས་བསྡུ་ལྷན་ཁང་ནས་ཞིབ་འཇུག་ནན་པོ་གནང་དགོས་པ་མ་ཟད་ཆོལ་གསུམ་བོད་མིའི་ཆིག་སྒྲིལ་ལ་སླར་ཡང་ཉམས་ཆགས་འགྲོ་རྒྱུའི་བྱ་སྤྱོད་ཞིག་ལ་ངོས་འཛིན་དང་བཅས་ཁྱབ་ཆེ་བའི་འོས་འཕེན་རྒྱ་ཆེ་མི་མང་ནས་བཙན་བྱོལ་བོད་མིའི་བཅའ་ཁྲིམས་དང་བཙན་བྱོལ་བོད་མིའི་འོས་བསྡུའི་སྒྲིག་གཞི་ལ་འགན་ཁུར་ནས་སྔོན་འགྲོའི་སྲིད་སྤྱིའི་འོས་བསྡུ་དེ་དག་མི་མང་རང་གི་རྣམ་སྤྱོད་ལ་འགན་ཁུར་ནས་མང་གཙོའི་ཐོབ་ཐང་འོས་བསྡུའི་ལས་རིམ་ནང་ཆ་ཤས་ལེན་དགོས་པ་ལས་ཕྱོགས་གཏོགས་དང་། འགོ་འདྲེན། སྐབས་ཚོལ། གྲལ་རིམ་དམངས་གཙོ་ལ་ཁ་ཕྱོགས་ནས་གཞན་གྱི་སླུ་འཁྲིད་འོག་རང་གི་མང་གཙོའི་ཐོབ་ཐང་གཞན་ལག་ཏུ་མ་ཤོར་བའི་འགན་ཁུར་བཞེས་དགོས་པའི་འབོད་བསྐུལ་དང་བཅས་མང་གཙོ་དང་ཁྲིམས་ཀྱི་དབང་བསྒྱུར་ལ་འགན་ཁུར་ནས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིའི་ཀྱང་བཙན་བྱོལ་སྤྱི་ཚོགས་ནང་ཕྱོགས་གཏོགས་དང་། འགོ་འདྲེན། སྐབས་ཚོལ། གྲལ་རིམ་དམངས་གཙོའི་དྲི་ངན་འཇུག་བསྡུས་ནས་མང་གཙོ་དང་། དྲང་བདེན། དྲ་མཉམ། ཕྱི་གསལ་ནང་གསལ། ཁྲིམས་ཀྱི་དབང་བསྒྱུར་འོག་བཙན་བྱོལ་མི་མང་འཚོ་ཐུབ་པའི་སྨོན་པ་བཟང་པོའི་རྒྱན་ཏེ་རེ་ཞིག་འདིར་འཇུག་བསྡུས་པའོ།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢༠༢༠ སྤྱི་ཟླ་ ༡༢ ཚེས་ ༡༧ ཉིན་རང་ཁྱིམ་དུ་ཟིན་བྲིས་སུ་བཏབ་།