འབྲུག་འབུམ།
མདང་ནུབ་ཆུ་ཚོད་བཅུ་གཅིག་ཡས་མས་སུ་བདག་གིས་ངོ་དེབ་སྟེང་ནས་རྩོམ་ཡིག་ཅིག་བཀླགས་པ་ཡིན། རྩོམ་ཡིག་དེའི་མགོ་མཇུག་བར་གསུམ་ནི་མདོ་སྨད་པ་སྐོར་ཞིག་གིས་ལར་ཞེན་དང་དུང་ཞེན་ཡོད་མདོག་གིས་གན་དང་འདི་མདོ་སྨད་སྤྱི་འཐུས་ཀྱི་འོས་མིར་ལེགས་ཤིང་། ལས་ཀ་འདི་ལས་རབས་དང་སློབ་གྲྭ་ག་གེ་མོར་སོང་རབས་གླེང་སྟེ་ཤེས་འཇོན་དང་བྱས་རྗེས་སོགས་རི་བོ་ལས་མཐོ་ཞིང་རྒྱ་མཚོ་ལས་ཟབ་པའི་བསྟོད་ཚོགས་ཀྱི་ཡིག་ཉོག་མང་བོས་གྲུབ་པ་ཞིག་རེད། ཡིན་ན་ཡང་། རྩོམ་ཐུང་དེའི་ཤུགས་ཀྱིི་བསྟན་དོན་དང་འདྲེས་བའི་ལར་ཞེན་ནི་ཆུང་ས་རང་རིགས་སྐྱབས་བཅོལ་བ་དང་ཆེ་ས་བོད་མི་ཡོངས་ཀྱི་དོན་མ་ཡིན་པར་སྡེ་བ་ཚོ་བ་ཙམ་གྱི་ཞེན་ཁོག་དང་། ལུང་ཚན་སོ་སོ་འམ་ཡུལ་ཕྱོགས་གཅིག་པ་ཚོས་ཁ་རུབ་བྱས་ནས་གྲོས་ཁ་བསྡུར་ཡོད་པ་ནི་ཡིག་ངོ་ཆོད་པ་ཙམ་ཀྱིས་རྟོགས་ཐུབ་པར་ཐེ་ཚོམ་ཡེ་ནས་མི་འདུག
བདག་ལ་མཚོན་ན་མི་དེ་དག་ལ་སྒེར་ངོས་ནས་ཁབ་སྐུད་ཙམ་གྱི་རྕོད་རྙོག་དང་སྡང་སེམས་ཏིལ་འབྲུ་ཙམ་ཞིག་ཀྱང་མེད་མོད། ཁ་བ་གངས་རིའི་ལྗོངས་ཀྱི་ལས་དབང་ནི་ཉིན་རེ་ནས་ཉིན་རེར་མར་ངོའི་ཟླ་བཞིན་འགྲིབ་པའི་འཇིགས་དངངས་ཀྱིས་ད་རེས་ཀྱི་མདོ་སྨད་སྤྱི་འཐུས་ཀྱི་འོས་མི་དེ་ནི་ཞེན་ཁོག་དང་ཚོ་ཁག་སྒེར་གང་རུང་གིས་ཤུགས་རྐྱེན་མེད་པའི་དྲང་བོ་དྲང་བཞག་དང་ཤེས་འཇོན་ལྡན་ཞིང་དཀྱེལ་ཡངས་ཅན་གྱི་མི་བུ་ཚད་ལྡན་ཞིག་དགོས་པ་ནི་ངས་རྩོམ་ཡིག་འདི་འབྲི་དགོས་པའི་རྒྱུ་མཚན་གཙོ་བོ་ལགས།
སྐུ་ཞབས་ཞོགས་དུང་སོགས་ཀྱིས་འགོ་བརྩམས་པའི་བདག་དཔེ་ཚོགས་དང་བླ་དཔེ་ཚོགས་སོགས་མི་གཞིའི་རིན་ཐང་དང། མཛེས་དཔྱོད་ལྟ་ཚུལ། དྲང་བདེན་དང་འདྲ་མཉམ། མི་བུའི་ཐོབ་ཐང་དང་རྩིས་ཐང་སོགས་མདོར་ན་མི་ཞེས་པ་དཔེ་དེབ་དེ་དག་གི་སྤྱི་སྙིང་དུ་བཟུང་ནས་བྲིས་ཡོད་པ་དེ་དག་ང་ཚོའི་མིག་མདུན་ལ་བསྟར་བ་ནས་བཟུང། བོད་མི་མང་དག་ཅིག་གིས་ཁ་ནས་མི་གཞི་དང་འདྲ་མཉམ་སོགས་མ་ཎི་བགྲེང་བགྲེང་བྱེད་བཞིན་ཡོད་མོད། འདི་ལྟ་བུའི་ལས་དོན་ཕྲན་ཚེགས་ཀྱི་སྟེང་ལ་བབས་ཚེ་རང་ཕྱོགས་གཙིགས་སུ་བཟུང་ཞིང་གཞན་ཕྱོགས་ཡལ་བར་དོར་ནས། དྲང་བདེན་དང་འདྲ་མཉམ་སོགས་ལ་མིག་ཞགས་ཙམ་ཡང་མི་འཕེན་པར་རང་ཕྱོགས་ཀྱི་མི་དེ་ལ་འོས་འཕེན་རྐྱང་དང་གཞན་ཕྱོགས་ཀྱི་མི་དེའི་འཇོན་ནུས་དང་ཤེས་ཚད་མཐོང་ཡང་མ་མཐོང་ཁུལ་བྱེད་པ་ནི་ང་ཚོ་རྒུད་པ་ནས་རྒུད་པའི་ཕྱོགས་སུ་འགྲོ་བཞིན་པའི་རྟགས་མཚན་གསལ་བོ་ཞིག་ཅི་ལ་མིན།
ཕྱོགས་ཞེན་དེས་བསླངས་བའི་ན་ཟུག་ནི་བོད་མི་གཞོན་རབས་པ་མང་དག་ཅིག་གི་ཡ་ཆུང་ཁོག་ན་སྦྲུལ་གྱི་ཚང་ལྟར་བརྡོལ་ཞིང་ལྷག་པར་དུ་བཙན་བྱོལ་སྤྱི་ཚོགས་ཀྱི་ཁྲོད་ན་ས་ཕྱོགས་དང་། ལུང་ཚན། ཚོ་ཁག ཆོལ་ཁ། ཆོས་ལུགས་སོགས་ཀྱི་ཕྱོགས་ཞེན་ཤུགས་ཆེར་ཡོད་པ་ནི་བདག་གིས་ཚམ་ཚོམ་མེད་པར་སྨྲ་སྤོབས། དེས་ན་འུ་ཅག་ཆོས་འཇིག་རྟེན་གང་གི་ཆ་ནས་ཀྱང་རྒུད་པ་ནས་རྒུད་པའི་ཕྱོགས་སུ་འགྲོ་བཞིན་པ་མཐོང་ཞིང་ང་ཚོའི་མི་གཞི་ཀུན་སྤྱོད་དང་ང་ཚོའི་རང་དབང་ཐོབ་ཐང་ཡང་ཁ་གཡང་ཙམ་ལས་ལག་ལེན་དང་རྒྱབ་ཀྱིས་ཕྱོགས་ཚེ་“བོད་རེ་བས་ཕོངས་”ཞེས་པའང་དོན་ལ་གནས་བའི་ལེགས་བཤད་ཡང་དག་ཅིག་མ་ཡིན་ནམ།
དེ་བས་ན་ཟུག་དེ་དག་དང་གཏན་བྲལ་བྱེད་འདོད་ཚེ་རང་ཉིད་ནས་འགོ་རྩོམ་དགོས་ཤིང་བརྩམས་ནས་ཀྱང་རྣག་ཐོག་ཁབ་གཙགས་ཞེས་པའི་དཔེ་ལྟར་ལག་ལེན་མཐའ་འཁྱོལ་བྱེད་དགོས་པ་ནི་བོད་སྙིང་ཅན་དག་གིས་སེམས་ལ་འཛིན་རྒྱུའི་ཚིག་དང་རུམ་ལ་འཇོག་རྒྱུའི་བྲོ་ཡིན་ནོ།།
༢༠༡༣/༡༢/༡༧