ངམ་རིང་ཡོན་ཏན་རྒྱ་མཚོ།
རང་རེའི་མི་རིགས་འདི་ནི་དཀར་ཕྱོགས་ཆོས་ལ་མོས་ཤིང་སེམས་རྒྱུད་བཟང་བའི་མི་རིགས་ཤིག་ཡིན་པ་འཛམ་གླིང་སྟེང་ཡོང་གྲགས་མིན་ཀྱང་སྐྱེ་བོ་མི་ཉུང་བ་ཞིག་གིས་དེ་ལྟར་ངོས་འཛིན་བྱེད་ཀྱི་ཡོད། རྒྱབ་ལྗོངས་དེའི་འོག་འཛམ་གླིང་སྐྱེ་འགྲོ་མང་པོ་ཞིག་གིས་བོད་མི་རིགས་ལ་དགའ་ཞེན་དང་མི་རིགས་དེའི་ཆོས་རིག་ལ་དང་ཞེན་ཆེན་པོ་བྱེད་ཀྱི་ཡོད། དེ་ཡང་མདོར་བསྡུས་ནས་བརྗོད་ན། འཛམ་གླིང་སྐྱེ་བོ་ཚོས་ཆེས་ཡིད་སྨོན་བྱེད་ཡུལ་ནི་བོད་ཀྱི་ནང་ཆོས་ཡིན་ལ་ནང་ཆོས་ཀྱི་ཤེས་རིག་ལ་བརྟེན་ནས་ཁོ་ཚོས་རང་ཉིད་ཀྱི་མི་མངོན་པའི་བསམ་བློའི་འཁུར་པོ་ཡང་ཏུ་གཏོང་ཐབས་བྱེད་ཀྱི་ཡོད་ལ་ནང་ཆོས་ཀྱི་སློབ་གསོར་བརྟེན་ནས་ཁོ་ཚོས་སྙོག་འཛིང་ཆེ་བའི་སྤྱི་ཚོགས་དེ་ཞི་བདེའི་ཁོར་ཡུག་བཟང་པོ་ཞིག་ལ་བསྒྱུར་རྒྱུར་འབད་ཐབས་བྱེད་ཀྱི་ཡོད་པ་རེད། གང་ཡིན་ཟེར་ན། ནང་ཆོས་ནི་ཡོད་ཚད་གཟུགས་མེད་ཀྱི་ལྷ་ལ་སྐྱབས་བརྟེན་འཚོལ་བར་མཛུབ་འཁྲིད་བྱེད་མཁན་གྱི་ཆོས་ལུགས་རང་ག་བ་ཞིག་མིན་པར་དེ་བས་ནང་ཆོས་ནི་ཚན་རིག་དང་མཐུན་ལ་གཏན་ཚིག་རང་བཞིན་གྱིས་ཕྱུགས་པའི་ཆོས་ལུགས་ཤིག་ཡིན་པ་དེས་ཡིན། དེ་ནི་ཤེས་ཡོན་གྱི་ཆུ་ཚད་མཐོ་བའི་ཕྱི་གླིང་པ་རྣམས་ཀྱིས་ནང་ཆོས་ལ་དགའ་ཞེན་དང་དད་གུས་བྱེད་པའི་རྒྱུ་མཚན་གཙོ་བོ་དེ་རེད། དེས་ན་རྒྱུ་མཚན་མཐོང་ནས་ནང་ཆོས་ལ་དད་པ་བྱེད་མཁན་གྱི་ནུབ་གླིང་བ་ཕལ་མོ་ཆེས་གང་འདྲ་ཞིག་ལ་ནང་ཆོས་ཟེར་མིན་དང་དེའི་དགོངས་དོན་གཙོ་བོ་གང་ཡིན་མི་དམན་ཙམ་རྟོགས་ཀྱི་ཡོད་ལ་དེ་རྟོགས་པ་རྒྱུ་མཚན་དུ་བྱས་ནས་ཁོ་ཚོས་ནང་ཆོས་ཀྱི་རིན་ཐང་གླེང་གི་ཡོད་པ་རེད། འོན་ཀྱང་བློ་ཕང་བ་ཞིག་ལ་སངས་རྒྱས་པའི་ཆོས་ལུགས་བོད་མི་རིགས་ཀྱི་རྣམ་ཤེས་ཀྱི་སྙིང་དབུས་སུ་ཞུགས་ནས་ད་བར་དུས་རབས་བཅུ་བཞི་ཙམ་ཕྱིན་ཟིན་ཀྱང་ང་ཚོ་མི་ཉུང་བ་ཞིག་གིས་ནང་ཆོས་ཀྱི་དགོངས་དོན་སྙིང་པོ་བདེན་པ་བཞི་དང་། ལྟ་བ་བརྟེན་བྱུང་སྤྱོད་པ་འཚེ་མེད་ཀྱི་རྣམ་བཞག་ལས་ཡོངས་སུ་འགོངས་ཏེ་ལྷ་འབོད་ཀླུ་འབོད་ཀྱི་ཆོ་ཁ་དེ་དག་ནང་ཆོས་ཀྱི་སྙིང་པོར་བརྩིས་ཏེ་དེར་ཤི་འཐམ་རོ་འཐམ་བྱེད་ཀྱི་ཡོད་པ་རེད། དཔེ་མཚོན་ཙམ་གླེང་ན། རང་རེའི་སྤྱི་ཚོགས་ནང་དར་ཁྱབ་ཆེ་བའི་མོ་རྒྱག་པའི་ལུགས་སྲོལ་དེ་རེད། ལ་ལས་མོ་རྒྱག་པ་སོགས་པའི་རང་རེའི་ཆོས་ལུགས་ཀྱི་བྱེད་སྒོ་མི་ཉུང་བ་ཞིག་བོན་ལུགས་ཡིན་པར་བརྗོད། གང་ལྟར་ཡང་ལུགས་སྲོལ་དེ་དག་གིས་ང་ཚོའི་མི་རིགས་འདིའི་བསམ་བློ་དམ་པོར་བཅིངས་ཡོད་ལ་འཆིངས་ཐག་དེའི་ཁྲོད་ནས་ང་ཚོ་ད་དུང་ཡང་མཐར་མེད། དེ་ཡང་རང་རེ་མི་ཉུང་བ་ཞིག་གིས་གལ་ཆེའི་གནད་དོན་གང་ཞིག་ཐག་གཅོད་བྱེད་སྐབས་རང་ཉིད་ཀྱིས་ཀླད་པ་སྤྱད་ནས་ཐག་གཅོད་མི་བྱེད་པར་བླ་མའམ་མོ་བ་གང་རུང་ཞིག་གི་མདུན་དུ་བཅར་ནས་མ་འོངས་མངོན་གཟིགས་ཀྱི་སྐྱབས་འཇུག་ཞུ་གི་ཡོད་ལ་ལུང་རིག་དང་གཏན་ཚིག་ཀྱི་རྒྱབ་བརྟེན་ཡོད་མིན་ལ་མ་བལྟོས་པར་མོ་ཡི་མཇུག་འབྲས་གཞི་ལ་བཞག་ནས་གནད་དོན་ཐག་གཅོད་བྱེད་ཀྱི་ཡོད། ལུགས་སྲོལ་དེའི་ནང་གཞོན་ནུ་ཕོ་མོའི་བརྩེ་དུང་དང་མ་འོངས་ཀྱི་མདུན་ལམ་ཡང་ཚུད་ཀྱི་ཡོད་པ་རེད། དེ་ཡང་གཞོན་ནུ་ཕོ་མོ་གཉིས་ལྷད་མེད་བརྩེ་དུང་གི་དྲ་བའི་ནང་ཚུད་སྐབས་ཕ་མས་གཞོན་ནུ་གཉིས་ཕན་ཚུན་བརྩེ་དུང་ཟབ་ཞན་དང་། ལྟ་སྤྱོད་མཐུན་མིན་སོགས་མིག་མདུན་གྱི་དངོས་ཡོད་གནད་དོན་ལ་རྟག་དཔྱད་མི་བྱེད་པར་གཞོན་ནུ་གཉིས་ཀྱི་མདུན་ལམ་དེ་མོ་བའི་ལག་ཏུ་འཇོག་གི་ཡོད། ཐད་ཀར་བརྗོད་ན་མོ་བའི་ལག་ནང་གི་ཕྲེང་རྡོག་བརྒྱ་དང་བརྒྱད་ནས་ཕྲེང་རྡོག་གསུམ་གྱིས་གཞོན་ནུ་གཉིས་ཀྱི་མ་འོངས་པའི་རེ་བ་དང་། ཕུགས་འདུན། བརྩེ་སེམས་སོགས་ཡོད་ཚད་ཐག་གཅོད་ཀྱི་ཡོད། གལ་ཏེ་མོ་དེ་གཞོན་ནུ་གཉིས་ཀྱི་འདོད་འདུན་བཞིན་མ་བབ་པར་དེའི་མཇུག་འབྲས་ལ་བརྩི་བཀུར་མ་བྱས་ཚེ་ཁོ་ཚོས་ལྟ་ལོག་དང་ལོག་སྤྱོད་པ་ལ་སོགས་པའི་ཞ་ནག་ཞིག་མི་འདོད་བཞིན་དུ་གྱོན་དགོས་ཀྱི་ཡོད་པ་རེད། དྲང་པོར་བརྗོད་ན། ང་ཡང་དེའི་ནང་གི་གཅིག་ཡིན། ངའི་ལྷད་མེད་པའི་བརྩེ་དུང་གི་འཆིངས་ཐག་དང་དེའི་མངའ་དུ་སྦྲུམས་པའི་ཕུགས་བསམ། མ་འོངས་པའི་རེ་བ་སོགས་ཡོད་ཚད་མོ་བའི་ལག་གི་འཕྲེང་རྡོག་གསུམ་གྱིས་རྩ་མེད་དུ་བཟོས་སོང་།
ད་དུང་ང་དང་འདྲ་བའི་རང་རིགས་གཞོན་ནུ་ཅི་ཙམ་གྱི་བརྩེ་དུང་གི་ལས་དབང་དེ་མོ་བའི་ལག་ནང་གི་འཕྲེང་རྡོག་གསུམ་གྱིས་ཐག་གཅོད་བྱ་རྒྱུར་བསྡད་ཡོད་དམ། མཁྱེན་ཡངས་ཀློག་པ་པོ་རྣམས་པ། ཁྱེད་རྣམས་ཀྱིས་ཡང་སྙིང་ང་ཚོའི་ལུགས་སྲོལ་དེ་དང་འདྲ་བ་དག་ཡང་དག་ཡིན་མིན་ལུང་རིགས་ཀྱི་རྒྱབ་བརྟེན་བསྣམས་ཏེ་འདིར་ཕེབས་དང་། ངས་ཁྱེད་རྣམས་སྒུག་བཞིན་ཡོད།
ད་དུང་དུས་ག་ལ་ཚད་ཆོལ་ཁ་གཅིག་མིན་། ཆོས་ལུགས་གཅིག་མིན་། སྲུང་མ་མཐུན་མིན་། མི་རིགས་གཅིག་མིན་། ལུས་ལ་དྲི་མ་དྲོ་མི་དྲོ་། མི་ཚང་དེ་གཤན་རྒྱུད་ཡིན་མིན་། ཤིང་བཟོ་ཡི་རྒྱུད་པ་ཡིན་མིན་། རྡོ་བཟོ་ཡི་རྒྱུད་པ་ཡིན་མིན་། མགར་རྒྱུད་ཡིན་མིན་། འཛེམ་སྲོལ་ངན་པ་འདི་དག་ནི་། བོད་རྒྱལ་ཁབ་ཡར་རྒྱས་འགྲོ་བར་ལམ་དཀྱིལ་གྱི་བཀག་རྡོ་ཉག་གཅིག་གོ །