བསྟན་འཛིན་ཤེས་རབ།
མི་རིགས་ཀྱི་ཞེན་ཁོག་བྱེད་པ་ནི་རང་ཉིད་ཀྱི་ལ་རྒྱ་སྲུང་བ་ཡིན་ལ། རང་ཉིད་ལ་ཤ་ཚ་ན་ངེས་པར་དུ་མི་རིགས་ཀྱི་བླ་སྲོག་ལ་གཅེས་སྤྲས་བྱེད་དགོས། གནས་ལུགས་འདིའི་རྐྱེན་གྱིས་ན། མི་སུ་ཞིག་ཡིན་རུང་རང་ཉིད་ཀྱི་བླ་སྲོག་ལ་བརྙས་བཅོས་གཏོང་མཁན་ཞིག་མཐོང་ཚེ། མ་མཐར་ས་ལ་རྐང་བརྡབ་ཙམ་ལས་མི་ཐུབ་རུང་དེ་ལྟར་བརྡབ་ངེས་ཡིན་ལ། ནུས་པ་གྲོག་སྦུར་ཙམ་ལས་མེད་རུང་རང་ཚོད་ཀྱིས་འཕག་ཚག་རྒྱག་ངེས་རེད།
དེ་རིང་གཟའ་ཟླ་བའི་གུང་གསེང་གི་དགོང་མོ་འདིར། ཁོ་བོས་ཀྱང་གྲྭ་དམངས་བྱིངས་ནང་བཞིན་ཨ་རིའི་བོད་སྐད་བརྙན་འཕྲིན་གསར་འགྱུར་ལ་བལྟས་པ་ཡིན། གསར་འགྱུར་གྱི་རྗེས་ཐོག་དེ་མ་ཉིད་དུ། ཉེ་སྔོན་བོད་ཀྱི་གྲོས་ཚོགས་ཀྱིས་བསྡུས་པའི་དོགས་འདྲི་དང་ཉན་ཞིབ་ཅེས་པའི་བགྲོ་གླེང་གི་ཚོགས་འདུའི་གནས་ཚུལ་བསྟན་བྱུང་། སྤྱིར་ཁོ་བོས་ཆབ་སྲིད་ཀྱི་གནད་དོན་ཅང་མི་ཤེས་པས་དམིགས་བསལ་གྱི་ཚོར་བ་བཤད་རྒྱུ་ཅང་མི་འདུག་མོད། འོན་ཀྱང་བཀའ་ཁྲི་མཆོག་དང་སྤྱི་འཐུས་རེ་ཟུང་ཞིག་གིས་མིང་ཚིག་ལ་ལ་ཞིག་གི་གོ་བརྡ་འགྲེལ་སྟངས་ཐད་ནས་སེམས་ཁོང་ལ་ཚ་ཤར་རྒྱག་ཅིང་ཡིད་ཁམས་སྐྱུར་གྲང་ངེར་གཏོང་བར་བྱེད།
ད་ལྟའི་བཀའ་ཁྲི་སྟེ་མཁས་དབང་ཟམ་གདོང་རིན་པོ་ཆེ་མཆོག་དུས་རབ་གོང་མའི་ནང་གྲོས་ཚོགས་ཀྱི་ཚོགས་གཙོ་གནང་སྐབས། ཁོང་གིས་མིང་ཚིག་གི་བརྡ་སྤྲོད་པའི་ཁུངས་དབྱིན་ཇི་ལ་མགོ་འདོགས་པའི་སྲོལ་ཕྱེ་ཞིང་། དེ་དང་མཉམ་དུ་བོད་ནང་གི་མཁས་དབང་རྣམ་པར་ཆེད་དུ་མི་འདོད་པའི་རྣམ་འགྱུར་བསྟན་ཏེ། ཁོང་རྣམ་པས་ཞིབ་འཇུག་མཐིལ་ཕྱིན་དང་སྐད་བརྡ་ཡང་དག་གིས་གཏན་ལ་ཕབ་ཅིང་བོད་རང་གི་སྐད་གཤིས་ཀྱི་རུས་རྐང་ལ་ཟུག་པའི་མིང་ཚིག་མང་བོ་ཞིག་ལ་བསྒྱུར་བཅོས་གཏོང་འགོ་བརྩམས། ས་ཆའི་ཚོད་ཀྱི་རི་དྭགས་ཀྱི་དཔེ་ལྟར། བཙན་བྱོལ་ནང་དུ་ཁོང་གི་གསུང་ལ་ལན་སློག་ཐུབ་མཁན་ཧ་ལམ་མེད་རྐྱེན། མུ་གེའི་སྟེང་ལ་ཟླ་ལྷག་ནང་བཞིན་སྤྱིར་རང་སྐད་དག་མ་ཞིག་མི་འཁྱོངས་པའི་སྟེང་སྔར་ཡོད་ཀྱི་མིང་ཚིག་མང་བོ་ཞིག་ཧྲལ་ཧྲིལ་དུ་བཏང་སྟེ་བཙན་བྱོལ་བའི་སྤྱི་ཚོགས་འདི་སོ་སོའི་ཕ་སྐད་ལ་ཟ་རི་ཟི་རེ་ཞིག་ཏུ་བཏང་བ་རེད། དེར་བསྟུན་ནས་སྤྱི་འཐུས་དང་གཞུང་ཞབས་པ། དགེ་རྒན། རྩོམ་སྒྲིག་པ། གསར་འགོད་པ་སོགས་སྤྱི་ཚོགས་ཁྲོད་ཀྱི་གནད་ཡོད་མི་སྣ་མང་བོས་མིག་ཟུང་ལག་པས་བཀབ་ཅིང་འུར་ཆིལ་ལེར་ཁོང་གི་རྗེས་སུ་རྒྱུགས་པ་དང་། རང་གི་ཕ་མེས་ཡང་མེས་ནས་འཚོ་བ་དང་སྐད་ཀྱི་རང་གཤིས་ལ་འོ་ཆུ་ལྟར་འདྲེས་ཤིང་། ཕན་ཚུན་བརྡ་སྤྲོད་པ་ལ་ཆེས་གནད་དུ་ཁེལ་ཅིང་གོ་དོན་ཟབ་པའི་མིང་ཚིག་མང་བོ་ཞིག་ལ་ལྡབ་མ་ལྡབ་ཀྱིས་དབྱིན་ཇིའི་མིང་ཚིག་རེ་དྲངས་ཏེ་འདིའི་རྒྱུན་མཚན་གྱིས་དེ་རེད་ཟེར་བ་ལྟ་བུའི་ཅོལ་ཆུང་གི་གོམས་གཤིས་ཤིག་ཆགས་བཞིན་ཡོད། གོམས་གཤིས་ངན་པ་འདིའི་རྐྱེན་གྱིས། ད་ཆ་རང་རེས་ཚད་དུ་འཛིན་དགོས་པའི་གྲོས་ཚོགས་ར་བ་སོགས་འདི་དག་གི་སྐབས་སུ་ཡང་། བཀའ་ཁྲི་མཆོག་གཙོ་བྱས་ཏེ་སྤྱི་འཐུས་རེ་ཟུང་གིས་གནད་ཆེ་བའི་མིང་ཚིག་མང་བོ་ཞིག་དབྱིན་ཇི་ལ་ཁུངས་མ་གཏུགས་ཚེ་དོན་དག་སྟོན་མི་ཐུབ་པའི་བཟོ་ལྟ་འདོན་པ་དང་། མིང་ཚིག་གང་ཞིག་གིས་དོན་གནད་ཅི་ཞིག་སྟོན་པ་དེ་དབྱིན་ཇིའི་ནང་ཅི་ཞིག་ཡོད་པའི་རྒྱུ་མཚན་གྱིས་ཡིན་པར་སྒྲུབ་བཞིན་འདུག་པས། སྐད་ཡིག་ལ་མཚོན་ན་འདི་ལས་ལྷག་པའི་བརྙས་བཅོས་ཤིག་ག་ལ་ཡོད། ང་ཚོས་ད་བར་རྒྱ་དམར་གྱིས་ང་ཚོའི་སྐད་ཡིག་ལ་གཏོར་བཤིག་བཏང་སོང་ཞེས་སྨོད་ཀྱི་ཡོད་མོད། འོན་ཀྱང་རྒྱ་ནག་གིས་ཀྱང་བོད་ཡིག་སྟེང་འདི་འདྲའི་ཧམ་པ་ཞིག་བཤད་མེད་ཚོད་རེད། གནས་སྟངས་འདི་དག་གིས་ན། བདག་གིས་ལག་ཟུང་ཐལ་མོ་སྦྱར་ཏེ་བཀའ་ཁྲི་མཆོག་ལ། བཀའ་བློན་ཁྲི་བ་རིན་པོ་ཆེ་ལགས། བོད་ཀྱི་སྐད་ཡིག་ལ་གཏོར་བཤིག་མ་གནང་རོགས་ཞེས་ཞུ་བ་འབུལ་ལོ། །