སྐྱོ་བྲག་དགའ་དབང་།
ནམ་རྒྱུན་ང་ཚོས་གོང་རིམ་གྱི་གསུང་བཀོད་འོག་མ་ལ་སྒྲོག་པའི་བཀའ་སྒྱུར་དང་། ཆོས་འཇིག་རྟེན་གྱི་ཤེས་བྱ་མང་པོ་ཞིག་དགེ་སློབ་བར་དུ་མི་གཞན་པས་སྐད་སྒྱུར་བྱ་བཞིན་ཡོད་ནའང་། དེ་དག་ཇི་མ་ཇི་བཞིན་ཡོང་བ་ནི་ཉིན་མོའི་སྐར་མ་ལྟ་བུ་ཡིན་ངེས་འདུག །འདིའི་དཔེ་མཚོན་ཡག་པོ་ཞིག་གི་གནས་ཚུལ་ད་ཐེངས་ང་ལ་བྱུང་།
ཐུན་བཞི་བླ་མའི་རྣལ་འབྱོར་གྱི་ཡེ་ཤེས་མཁའ་འགྲོ་ཁྲ་མོ་ཐང་གར་འབྲི་བ་ན། འབྲི་སྟངས་མ་འདྲ་བ་ཁ་ཤས་ཤིག་མཐོང་བྱུང། ག་རེ་བདེན་པ་ཡིན་མ་འཚལ་བས། ངས་རིན་པོ་ཆེ་ལ་བཀའ་འདྲི་ཞུས་པ་ན། རིན་པོ་ཆེས། དགྱེས་པ་རྡོ་རྗེའི་འཁོར་གྱི་མཁའ་འགྲོ་མ་ཞིག་གི་མཚན་ནས་བོས་ཏེ། དེའི་ཁ་དོག་དང་གཅིག་པ་རེད། གསུངས་པ་ཡག་པོ་ཉན་ཏེ་ཡིད་ལ་འཇོག་ཁུལ་བགྱིས་ནའང་། ཟླ་ཤས་སོང་བ་ན་ལྷ་མོའི་མཚན་དེ་བརྗེད་སོང་གདའ།
ངས་ཡང་དུ་སྐད་ཕྲན་བརྒྱུད་ནས་གྲོགས་པོ་ལ་བཀའ་འདྲི་ཞུ་རོགས་ལབ་པ་ན། ཁོང་གིས། བཀའ་འདྲི་ཞུས་ཏེ་ང་ལ་བཀའ་སྒྱུར་གནང་བ་ནི་འདི་རེད། བྷྲུམ་ལས་སྣ་ཚོགས་རྡོ་རྗེ་མ། གཟིགས་དང་དགྱེས་པ་རྡོ་རྗེའི་དཀྱིལ་འཁོར་གྱི་ནང་དུ་འདི་འདྲ་ཞིག་རྩ་བ་ནས་ཡོད་པ་མ་རེད། དོན་དངོས་ལ་རིན་པོ་ཆེས། ཌོམྦི་ནཱི་སྣ་ཚོགས་མདོག་ཅན། ཞེས་གསུང་ཡོད་ངེས་ནའང་ཁོང་གི་གོ་སྟངས་ནི་འདི་རེད།
སྤྱིར་བཏང་བྱས་ན། ཁོང་ནི་བློ་གྲོས་གསལ་པོ་དང་། མཐོང་ཐོས་རྒྱ་ཆེན་པོ་ཡིན་པ་ཙམ་དུ་མ་ཟད། རིན་པོ་ཆེ་ལ་ཧ་ཅང་གིས་འདྲིས་ཤིང་། ནམ་རྒྱུན་ཡི་གེ་པ་ཡང་གནང་གིན་ཡོད་པས། ནོར་ཡོང་བསམ་བསམ་ཞིག་ཁྱོན་ནས་མེད་ལ། ང་ལ་ཡང་བརྩི་མཐོང་ཆེན་པོ་གནང་གིན་ཡོད་པས། སྣང་མེད་བྱས་པ་ཞིག་ཀྱང་རྩ་བ་ཉིད་ནས་མ་རེད། ཡིན་ནའང་ཁོང་གི་གོ་སྟངས་ནི་དེ་རེད། འདི་ལྟར་ན་བཀའ་སྒྱུར་དང་སྐད་སྒྱུར་བྱེད་ཟེར་བ་དེ་ཚོ་ནི་དོན་དངོས་ལ་ལས་ཀྱི་ཐ་མ་ཡིན་པ་འདྲའོ། །
༧མཁན་སྐྱོ་བྲག་ཚང་གི་བཀའ་མོལ་དེ་འདྲ་རང་ད་ཨེ་ཡིན་ན། གཞན་དུ་ན། ཐུ་བྷོད་ཚང་གི་ལོ་པཎ་ཉི་ཟླའི་འོད་དང་འདྲ་བ་དེ་དག་གི་རླབས་ཆེན་གྱི་བགྱི་བར་ཡི་རངས་ཏེ། ངལ་བ་ཆེན་པོས་གསུང་རབ་ཡིག་སྒྱུར་མཛད་ཀྱིན་པའི་བོད་ཀྱི་གཞོན་རབས་པ་འདི་དག་གི་དུས་དང་དཀའ་བ་མཉམ་སྤྱད་བྱས་པའི་བགྱི་བ་དག་ཀྱང་ལས་ཀྱི་ཐ་མར་བཞེད་པ་ངོ་མཚར་ཆེའོ། །ཧ་ཅང་ཀུ་རེ་ཡིན་ལགས། ཉམས་མྱོང་ཕུན་སུམས་ཚོགས་པའི་གཏམ་ཐུན་རེ་ཚོགས་སུ་སྤེལ་བས་ཀྱང་གཞོན་རབས་པ་མང་པོར་སྨན་དུ་རེ་བ་ཅིས་མ་ལགས། སྐུ་ཚེ་བརྟན།
ལར་ནས་དགེ་ཆོས་ཀྱིས། གསེར་ཐང་དུ་ཁྱེད་ཀྱི་བླ་མས་ངེད་ལ་སེམས་གནག་བྱས་པར་འདུག་ཅེས་གསུང་ཡོད་པ་ལྟར། འགྱུར་འགའ་རེ་ནི་ཚིག་ལས་ཀྱང་དོན་གནད་དུ་ཆེ་བ་དང་། འགའ་རེ་ནི་དོན་ལས་ཀྱང་ཚིག་གནད་དུ་ཆེ་བ་སོགས་ལོ་ཙཱ་བ་དག་གིས་ཐུགས་ཉམས་འཇོག་དགོས་པའི་གནས་མང་དུ་ཡོད་པ་ཡང་ཞལ་བྱུང་དུ་ཐལ་ལོ། །