སེང་རྡོར།
མུན་ཁང་ཕུ་མེད་དེ་ལ་ད་གདོད་སེར་ཁ་ཕྱེ་སོང་། །
མི་བོའི་ལྕགས་སྒྲོག་ཁོལ་མ་སྐད་ཅིག་རང་སར་ཁྲུལ་བྱུང་། །
སྣ་མགོའི་ཤེལ་མིག་འོད་ཀྱིས་ཡང་བསྐྱར་གངས་ལ་གཟིགས་སོང་། །
ཤེལ་མིག་ཆག་ཀྲུམ་མེད་པར་ཡང་བསྐྱར་བོད་ལ་གཟིགས་སོང་། །
ཤེས་པ་གསལ་ཞིང་ཨེ་དྭངས་བོད་ཀྱི་གོམ་ཞེང་ཆེན་པོ། །
ལུས་པོ་ངལ་ཞིང་ཨེ་ཆད་བོད་ཀྱི་ཕྲག་ཞེང་ཆེན་པོ། །
གནམ་སའི་མཚམས་ནས་ལོག་པའི་བོད་ཀྱི་གྲིབ་མ་རིང་པོ། །
ཁ་ཏ་ཚིག་གསུམ་གློད་དང་བོད་ཀྱི་གསེར་ལྕེ་རིང་པོ། །
ནས་ཆང་ཕོར་གང་མཆོད་ཏེ་སྙིང་གི་ཚ་བ་ཕྱུངས་དང་། །
བྱ་རྨྱང་ལན་གསུམ་གྱིས་ཏེ་རུས་པའི་སྦྲིད་བག་སེལ་དང་། །
ཁྱེད་ལ་སེམས་ཀྱི་ཁོང་ནས་དར་དཀར་ཟམ་པ་རྐྱོང་ངོ་། །
ཁྱེད་ལ་སྙིང་གི་སྦུབས་སུ་ཟ་འོག་གདན་ཁྲི་རྒྱག་གོ །
ཡབ་ཡུམ་རྒས་པའི་བཞིན་ལ་ཡང་བསྐྱར་ཉི་མ་དྲོ་བྱུང་། །
མ་སྨད་གདུང་བའི་ཁོག་ལ་ཡང་བསྐྱར་སོས་རླུང་ལྡང་སོང་། །
ཕྱོགས་ཀྱི་གྲོགས་པོ་དག་ཀྱང་ཡང་བསྐྱར་མཆི་མས་དགད་བྱུང་། །
ལས་ཀྱི་སྤུན་ཟླ་ཚོའང་ཡང་བསྐྱར་སྤྲོ་བས་བཤུམས་སོང་། །
ཉིན་གྲངས་དེ་ཚོད་ཅིག་ལ་ཁྱེད་ཀྱིས་གཟུགས་ཁྲུས་མ་བྱས། །
ཟླ་ངོ་འདི་ཙམ་ཞིག་ལ་ཁྱེད་ཀྱིས་ཐུགས་ངལ་མ་གསོས། །
ད་ནི་ཆུ་རྫིང་ཞིག་ཏུ་ངང་ཙམ་སྦང་བར་གྱིས་དང་། །
ད་ནི་འབོལ་སྟན་ཞིག་ཏུ་རན་ཙམ་གཉིད་པར་གྱིས་དང་། །
ཆར་དམར་འབྱོ་མཚམས་བཞག་ཚེ་ང་ཚོ་དལ་གྱིས་བསྡད་ཆོག །
རླུང་ནག་རྒྱུག་མཚམས་ཆད་ན་འུ་ཅག་ཡུན་གྱིས་འཕྲད་ཆོག །
རང་དབང་ཉི་འོད་སེར་པོས་ཁྱེད་ལ་རྨི་ལམ་གནང་ཤོག །
རང་དབང་ཟླ་འོད་དཀར་པོས་ཁྱེད་ལ་ཞི་འཇགས་སྩོལ་ཤོག །
2010-10-15
འདི་མཐོང་མ་ཐག་དྲ་འབུ་དག་གིས་གང་ཞིག་གོ་སོང་ཁུལ་གྱིས་སྒྲ་དོན་དམར་འཛིན་མི་བྱེད་པའི་རེ་བ་ཤིན་ཏུ་ཆེ།
སེང་རྡོར་དྲ་ཚིགས་ནས།