༈རྒྱ་བོད་ཐུན་མོང་ལ་འཕགས་ཡུལ་ཀ་སྦུག་ནས་སྩལ་བའི་རྩ་ཚིག་བཞུགས།
གས་རིའི་ལྗོངས་འདི་སྤྱན་རས་གཟིགས་ཀྱི་གདུལ་ཞིང་དང་། ངོས་རྒྱལ་དབང་གོང་མའི་ལམ་བཞིན་ཆོས་སྲིད་ཡོངས་ཀྱི་བདག་པོར་སྲིད་ཞིའི་ཆེ་རྒུ་ཀུན་གྱི་ལུང་གིས་བསྔགས་སྟབས་བསྟན་སྲིད་འཛིན་སྐྱོང་མི་དམན་པའི་ལྷག་བསམ་རྒྱ་ཆེ་བསྐྱེད་མུས་སུ་བསྟན་སྲིད་ལ་ཞེ་ནས་བརྣག་པའི་རྒྱ་དཔོན་འགའ་ཞིག་ནས་སྤར་གྱི་མཆོད་ཡོན་ཐ་ཚིག་དང་། མཚན་ལར་བོར་ཏེ་བོད་དབང་བཙན་འཕྲོག་བྱེད་རྩིས་འདི་ཐད་ལམ་དུ་བཏང་ན་མདོ་སྨད་ཁུལ་ཇི་བྱུང་བཞིན་རྒྱལ་བསྟན་རིམ་པས་བསྣུབས་རྒྱུ་དངོས་བསྟན་སྟབས་ཕྱི་དོན་ཁོ་ནར་ངལ་བ་འཛེམས་མེད་ལོ་ནས་ལོ་བཏུད་བགྱིས་གཤིས་མཆོག་གསུམ་བདེན་མཐུས་རྒྱ་ཡུལ་ཞིང་ཆེན་ཚང་མར་ངོ་ལོག་ཟིང་འཁྲུག་ཅི་ཆེས་གོང་མ་ཟུར་བཞག་གིས་ཡུས་ཤི་ཁར་རི་སྤབ་ལིའི་ཁྲི་བ་བསྐོས་འདུག་ཀྱང་ཞིང་ཆེན་ཕན་ཚུན་ཕྱོགས་ལངས་འཐབ་འཛིངས་ཀྱིས་རྒྱལ་ཕམ་རེས་མོས་ཁོ་ནས་དུས་འདའ་ཞིང་། བོད་སྡོད་རྒྱ་དཔོན་དམག་རྣམས་ཀྱི་ཕོགས་ཐོབ་རྩ་ཆད་ལ་བརྟེན་ནང་ཟིང་འཕྲོག་བཅོམ་ཅི་ཆེ་བགྱིས་མཐར་ལམ་ཆས་དངུལ་འབབ་བྱུང་ཚེ་ཕྱིར་ལོག་བསྐྱོད་རྒྱུའི་ཁ་དན་བར་མི་དང་འབྲེལ་ཏེ་ལོག་ཆས་ཁྲི་དངུལ་བཅུ་བསྐོར་སྤྲད་བླངས་རྗེས་བསམ་བཏང་དྲན་སྐྱེས་ཀྱིས་སྤོ་ཀོང་གི་རྒྱ་དམག་ཆེད་འབོད་ཀྱིས་ལམ་ཁེལ་རྫོང་གཞིས་དང་། ལྷོ་ཁུལ་སྡེ་དགོན་གྱི་རྒྱུ་དངོས་ཁྱོན་ཆེ་འཕྲོག་བཅོམ་ཚོད་མེད་བྱས་འདུག་པར་བརྟེན་རང་སྡེ་བསྲུང་ཆེད་དང་། ངོས་རྒྱལ་ཁབ་ཏུ་བསྐྱོད་རྒྱུ་བཅས་ཀྱི་སྲུང་དམག་བསྡུ་བསགས་བགྱིས་རིགས་པ་སྣམ་དུ་འབྱོར་སྐབས་གཞིས་རྒྱལ་གཉིས་ཀྱིས་ཚུར་རྒོལ་བྱེད་པར་ཆེད་བཏང་གིས་འཐབ་འཛིངས་བགྱིས་འདུག་པར་རྒྱ་ཕྱོགས་ཕམ་ཉེས་ཇི་བྱུང་ཤེས་གསལ་ད་ཆ་འཐབ་བསྐྲོད་མི་ཐུབ་པ་མེད་ཀྱང་རྒྱ་དམག་རྣམས་དབང་མེད་བོད་འབྱོར་ཙམ་ལས་སྙིང་ནས་གནོད་སེམས་མེད་པ་ནང་ཁུལ་དག་མིན་རང་ནས་རྟོགས་གསལ་སྟབས། ཨམ་བན་དང་། པི་ཅིང་གོང་མར་བོད་ལྗོངས་བསྟན་སྲིད་དང་། སྐྱེ་འགྲོའི་བདེ་སྐྱིད་བརླག་གཞིའི་རྒྱ་དམག་ཕྱིར་འཐེན་དགོས་ལུགས་རིམ་བརྗོད་བཞིན་གང་ཅིར་བསམ་ཤེས་ཀྱིས་ཚུལ་མཐུན་རྒྱ་ཡུལ་དུ་ཕྱིར་ལོག་བྱེད་མིར་རྟ་ཁལ་ལམ་ཆས་ཕན་གྲོགས་དང་བཅས་སྙད་མེད་ཤར་གཏོང་དགོས་པའི་སྔར་ལོ་སྲིད་བློན་ཐུན་མོང་ནས་དྲིལ་བསྒྲགས་བཀོད་རྒྱ་གཏོང་བཅུག་པ་མ་ཟད། ཉེ་ཆར་རྒྱལ་ཁབ་དང་། དམག་སྒར་ཁག་བཅས་ལའང་བཀོད་རྒྱ་སོང་དོན་ལྟར་དེ་རྩིས་རྒྱ་བོད་ཚང་མས་བླང་དོར་ཡིན་ལུགས་སུ་སྤྱོད་པར་གྱིས། འཕགས་ཡུལ་ཀ་སྦུག་མི་འགྱུར་མངོན་དགའི་ཕོ་བྲང་ནས་ཆུ་བྱི་ཟླ་ཚེས་བཟང་པོར་བྲིས།།
མ་དཔེ་འདི་ལྟར་སོར་བཞག་གིས་བཀོད་ཡོད་ཅིང་། ངོ་དེབ་ཅིག་ནས་འདིར་དྲངས་པ་ཡིན། དཔེ་ཆ་གང་ཞིག་ནས་ཡིན་མིན་རྩད་གཅོད་བྱེད་དུས་འདྲེན་ཁུངས་ངོ་དེབ་དེ་རྙེད་མ་སོང་།
མཆན། མཇུག་གི་ཆུ་བྱི་ཟླ་ཚེས་བཟང་པོར་ཞེས་པའི་ ཆུ་བྱི་ དེ་ནི་ཕྱི་ལོ་༡༩༡༢ ལོར་འཁེལ་འདུག