གཡུ་དྲུག་དཀར། རྡ་ས།
དུས་རྒྱུན་ལྟར་གཉིད་ལས་སད་པ་ཡིན་མོད། གཉིད་སྐྱོ་ད་དུང་དྭངས་མི་འདུག རྨི་ལམ་ལྟ་བུའི་དྲན་པ་རབ་རིབ་དེའི་ྐློང་ན། རླུང་གཡུག་པའི་ཤུར་སྒྲ་དང་འབྲུག་གྲགས་པའི་ལྡིར་སྒྲ། ཆར་བབས་པའི་ཤག་སྒྲ་བཅས་གཟན་སྒྲ་སྣ་ཚོགས་ཤིག་གི་སུན་སྣང་ལོང་ལོང་བྱེད་པས། མདང་དགུང་ཆར་བབས་ཏེ་གཉིད་ལ་བར་ཆད་བཏང་པ་རྟོགས་ཀྱང་། ཉིན་མཚན་དབྱེར་མེད་དུ་ཞེ་ལྷོད་ནས་འདུག་ཐབས་མེད་པའི་ས་མཐའི་སྡུག་སྣང་གིས་ཡི་ག་ལོག་བཞིན། མགོ་བོ་ཡར་དགྱེས་ཤིང་གཏད་སོ་མེད་པའི་གོམ་ཁ་ཕྱི་རོལ་ལ་བསྒྱུར་དགོས་སོང་།
ཕྱི་རོལ་གྱི་འགྱུར་བག་རྒོད་པའི་ཁོར་ཡུག་ལའང་མདང་ནུབ་ཀྱི་ཆར་རླུང་གིས་ཕོག་ཐུག་བཟོས་བདོ་བ་འདྲ་ཡང་། མདང་དགུང་གི་གནམ་གཤིས་ཀྱིས་བསྐྱེད་པའི་རྫ་སྟོད་ཀྱི་ལྷུན་ཆགས་པའི་ཁ་བ་དེ་མཐོང་དུས། གློ་རྡེག་ཏུ་བདག་སེམས་སུ་བརྩེ་ཞེན་གྱི་རྦ་རླབས་དགུང་དུ་འཕྱོ་ལ། ཡིད་ཀྱི་སྣང་བ་གངས་དཀར་གྱི་གཞི་འཛིན་དུ་གྱུར་ཅིང་། གངས་དཀར་གྱི་སྣང་བ་དེ་ཡིས་མདང་དགོང་ཆགས་པའི་ཁ་བའི་དཀར་ཞིང་འཇམ་ལ། བརྗིད་ཅིང་འོད་འཚེར་བའི་ངང་གཤིས་ཡིད་དུ་འཐད་པ་དང་།
སེམས་པ་འདི་ལྟར་རང་དབང་མེད་པར་གངས་རི་ལ་ཕྱོགས་ན། རི་མཐོན་པོའི་རྩེ་ཡི་ཁ་བ་ཡིན་ཡང་། ཅི་འདྲའི་སྐྱེན་ལ་ཅི་འདྲའི་མཐོ་བའི་སྣང་བ་དེ་རང་གི་ལ་རྒྱ་ཡི་ལྡོག་གཟུགས་སུ་འཁུམས་ལ། མིག་གོང་ལ་ལྷུང་བའི་གཟི་འོད་དང་གཟི་ཉམས་དེ་རང་གི་ཚེ་སྲོག་གི་ཉམས་སྣང་ཞིག་ལྟར་འགུལ་མོད། གཡས་གཡོན་གྱི་མི་སྐོར་ཞིག་གིས་རིའི་མགོ་ལ་འཁྱག་པ་བརྒྱབས་འདུག་ཅེས་སྐད་རྒྱག་པ་དང་། ཁོང་ཚོའི་ཁ་པར་གྱི་ཁབ་མིག་ལས་དོག་པའི་འདྲ་ལེན་ཤེལ་སྒོ་ཆུང་ཆུང་དེ་ཕར་སྐོར་ཚུར་སྐོར་གྱིས་ཡ་མཚར་མདོག་དང་ཧང་སངས་མདོག་བྱེད་ཀྱིན་གདའ་བའི་རྣམ་འགྱུར་ཡ་མ་ཟུང་དེ། སྐབས་འདིར་བདག་སེམས་སུ་བརྩེ་ཞེན་གྱི་ཟེར་མ་འཇོ་བ་ལྟ་བུའི་ཉི་ཟེར་བསྒྲིབས་པའི་ཡོལ་བ་ཡིན་སོང་ཨང་།
ཁོང་ཚོའི་ཁ་ནས་ལུད་པའི་སྐད་སྒྲ་དེའང་ད་དུང་རྣ་ལམ་ན་ཡལ་མེད་པའི་མདང་དགོང་གི་གཟན་སྒྲ་དེ་དག་ཇི་བཞིན། བདག་གི་འབྱུང་ཁམས་སྦྲིད་པར་བྱས། བདག་གི་ཤག་གསེང་རུས་གསེང་ལ་འཐིམ་ཡོང་གིན་པའི་ཉི་ཟེར་གྲང་ཤུར་ཤུར། བདག་གི་མིག་གོང་གི་གངས་དཀར་པོའི་རང་མདངས་ནག་རོག་རོག
འོན་ཀྱང་། འདང་རེ་བརྒྱབས་ན། ཕྱི་ནང་གི་གཟན་སྒྲ་གང་ཡིན་ཡང་། རྒྱུ་དང་རྐྱེན་གྱིས་མ་གྲུབ་པ་ཞིག་གཏན་མེད་པས། ཁོང་ཚོའི་སྣང་བ་འདི་ལྟར་ཧྲལ་འདུག་པའང་། ཁོང་ཚོར་གངས་རི་ཟེར་བ་ཞིག་དྲན་རྒྱུ་མེད་པས་རེད་ལ། གངས་རི་དྲན་རྒྱུ་མེད་པ་དེ་ནི་ཁོང་ཚོས་གངས་རི་ཟེར་བ་ཞིག་མ་མཐོང་བས་རེད། ཁོང་ཚོས་དེ་ལྟ་བུའི་གངས་རིའི་ངོ་བསོ་མ་མཐོང་པས། ཁོང་ཚོས་གངས་རི་ནི་དག་སྣང་གི་མི་ཡི་མདུན་དུ་ལྷ་ཡི་གསོན་ཉམས་ཀྱིས་འགྱིང་བའི་སྡོང་གྲོགས་ཀྱི་མཐུ་བོ་ཆེན་པོ་ཞིག་ཡིན་པ་དང་། གངས་དཀར་ཤེལ་གྱི་མཆོད་རྟེན་ནི། བྱིན་རླབས་ཀྱི་མཚན་ཁ་འབར་བའི་དད་པའི་ཨ་ལོང་འཁོན་ས་ཡིན་པ། གངས་རི་ནི་གངས་ལྗོངས་དང་ཁ་བའི་ལྗོངས། གངས་ཅན་པ་དང་ཁ་བ་ཅན་སོགས་ཀྱི་བསྟོད་དབྱིངས་ཀྱིས་བཏེགས་པའི་བརྩེ་སེམས་ཀྱི་གཡང་ར་ཕྱུག་མོ་ཞིག་ཡིན་པ། ཐ་ན་ད་ལྟ་ས་གྲགས་གནམ་གྲགས་སུ་འགྲོ་བཞིན་པའི་འཛམ་གླིང་གི་སྣེ་མོ་གསུམ་པ་ཟེར་བ་དེའང་ཁོང་ཚོར་མཚོན་ན་གོ་ལོ་ཐོས་ལོ་ཙམ་དུ་ཟད་པ་སོགས་མང་པོ་མང་པོ་ཞིག་མ་ཤེས་པའི་སྟོང་ཆ་མང་པོ་ཞིག་ལྷག་སོང་བ་རེད།
གང་ལྟར་དེ་རིང་། ཧ་ཅང་ཐག་ཉེ་འདྲ་ལ་ཧ་ཅང་ཐག་རིང་འདྲ་བའི་ཁ་བ་དང་། ཁོང་ཚོའི་ཁ་ནས་ལུད་ཡོང་བའི་སྐད་ཆ་གསོན་པོ་དེ་དག་གིས་བདག་ལ་ལྷག་ཏུ་བདག་གི་གངས་རི་དྲན་དུ་འཇུག་་་་་་་་་་་་་་་་་་་་་་་་་་་་་་་བདག་གི་གངས་རི།