བདག་གི་བླ་སྲོག

རེབ་ཐོག་མདའ།

གནམ་གྱི་རྒྱལ་མོའི་བཀའ་ལུང་མ་ཡིན་ལ།།
ས་ཆེན་གོ་ལའི་འབྲས་སུ་མ་སྨིན་པས།།
ཀ་ཁ་སུམ་ཅུའི་དབྱངས་རྟ་སྙན་མོ་འདི།།
ང་དང་ཁ་བ་རི་བའི་བླ་སྲོག་ཡིན།།

བཙན་གྱིས་བསླབས་པའི་ཕྱི་སྐད་མ་ཡིན་ལ།།
སྒོར་གྱིས་བླུས་པའི་བྱ་དངོས་མ་ཡིན་པས།།
ལྷན་སྐྱེས་ངག་ལ་བདེ་བའི་ཕ་སྐད་འདི།།
ང་དང་ཕུ་ནུ་སྟོང་གི་སྲོག་རྩ་ཡིན།།

ནུབ་ཀྱི་གྲུ་ན་རིན་ཐང་ཆུང་ན་ཡང་།།
མཐོ་སྒང་རི་ལ་དར་བའི་སྔ་གཞུག་ནས།།
ཐུབ་པའི་བསྟན་ལ་མཇལ་བའི་སྐད་རིགས་འདི།།
ཨ་མའི་པང་ནས་རྙེད་པའི་ལེགས་སྐྱེས་ཡིན།།

ས་ཆེན་པང་ནས་གྲགས་པ་མ་འབར་ཡང་།།
གཞན་སྐད་བསྲེས་མའི་ལྷད་ཀྱིས་མ་ཞུགས་པ།།
མེས་པོའི་ངག་ནས་བསླབ་པའི་དབྱངས་གསལ་འདི།།
ང་དང་ནུ་མོ་ཟུང་གི་རྨི་ལམ་ཡིན།།

ཚན་རྩལ་རིག་པར་ཁ་ཐག་རིང་ན་ཡང་།།
དུས་རབས་རྗེས་སུ་ལན་ཅིག་ལྷག་སོང་རུང་།།
ནང་སེམས་ཞི་བདེ་བསྐྲུན་པའི་ཕ་སྐད་འདི།།
མདོ་དབུས་ཁམས་གསུམ་མྱི་ཡི་འོད་སྣང་ཡིན།།

བཙན་པོའི་ཐུགས་ལ་འཁྲུངས་པའི་སྨོན་ལམ་འདི།།
ཐོན་མིའི་བློ་ཡིས་རྙེད་པའི་སྐད་ཡིག་འདི།།
སྨག་རུམ་རྨང་ནས་བཅོམ་པའི་སྒྲོན་མེ་གཅིག །
འཚོ་བར་འོད་སྣང་སྦྱིན་པའི་ཉིང་ཁུ་ཞིག །