མིག་ཡ་གཅིག
ཁྱེད་ནི་ང་ཡི་མདུན་ལྗོངས་ན་འཛུམ་གྱིས་བཞད་པའི་ཚེམས་ཕྲེང་དཀར་པོའི་བསུ་མ་དེ་ཡིན།
ཁྱེད་ནི་ང་ཡི་རྒྱབ་ལྗོངས་ན་ཡབ་ཡབ་གཡུག་པའི་ལག་བརྡ་གཉོམ་པོའི་སྐྱེལ་མ་དེ་ཡིན།
ཁྱེད་ནི་ང་ཡི་སེམས་ཁོང་དུ་ལྷུན་གྱིས་གྲུབ་པའི་བརྩེ་འདང་ཟབ་མོའི་སྣང་བ་དེ་ཡིན།
ཁྱེད་ནི་ང་ཡི་འཚོ་བའི་ཡང་སྙིང་དུ་འཁྱིལ་བའི་སེམས་རྟེན་སྲོག་གི་ཀ་བ་དེ་ཡིན།
ཁྱེད་ནི་ང་ཡི་མི་ཚེའི་གཏམ་རྒྱུད་རིང་མོའི་བརྗོད་པ་སྟོང་གི་ཉིང་བཅུད་དེ་ཡིན།
ཁྱེད་ནི་ང་ཡི་འཇིག་རྟེན་ཟླུམ་པོར་འོད་དུ་འགྱེད་པའི་བདེ་སྐྱིད་ཉི་མའི་ཟེར་ཕྲེང་དེ་ཡིན།
ཁྱེད་ནི་ང་ཡི་ཡ་ཆུང་སེམས་སུ་རྟག་ཏུ་འགུལ་བའི་དགའ་སྐྱིད་འབུམ་གྱི་ཚོར་བ་དེ་ཡིན།
ཁྱེད་ནི་ང་ཡི་མགྲིན་གཞུང་དོག་མོར་དལ་གྱིས་རྒྱུ་བའི་སེམས་ཀྱི་གླུ་དབྱངས་སྙན་མོ་དེ་ཡིན།
ཁྱེད་ནི་ང་ཡི་མཚན་ལྗོངས་རིང་མོར་ལྷམ་མེར་འཕྲོས་པའི་དུང་ཞེན་དཀར་པོའི་ཟླ་གཞོན་དེ་ཡིན།
ཁྱེད་ནི་ང་ཡི་དཀར་ཡོལ་འབྲུག་མར་ལྟེམ་མེར་འཁྱིལ་བའི་འབྲི་མར་སེར་པོའི་འཚོ་བཅུད་དེ་ཡིན།
ཁྱེད་ནི་ང་ཡི་སྟོན་ལྗོངས་ཞིང་སར་ཁད་ཀྱིས་སྨིན་པའི་ལོ་ལེགས་སྙེ་མའི་གསེར་རླབས་དེ་ཡིན།
ཁྱེད་ནི་ང་ཡི་དགུན་གཞུང་ཁ་བར་ལམ་ལམ་འབར་བའི་མེ་དཔུང་དམར་པོའི་དྲོད་ཤ་དེ་ཡིན།
ཞིབ་ཀྱིས་བཀླགས་ཡོད། ཁྱེད་ཟེར་བ་དེ་སུ་ཞིག་ཡིན་ཡང་དངོས་ནས་བསོད་ནམས་ཆེན་པོ་རེད་འདོད། ཀུ་རེའི་ཚུལ་དུ་བཀླགས་མཆན་ཞིག་བཞག་ནས་བུད་སོང། ཚིག་སྡེབ་ཡག་གི
མྱངས་ཡོད། སྣང་ལ་སིམ་ནས་ཡོད། མུ་མཐུད་ཡོང་རོགས་ཞུ།